11/12/2025
Har du nokon gong lurt på kvar du eigentleg kjem frå?🌍
I år deltek 39 elevar frå Vg3 ved Volda vidaregåande skule i prosjektet Mitt Afrikanske DNA. Dette er eit spennande undervisningsprosjekt der vg3-elevane får utforske si eiga genetiske historie gjennom testing av Y-DNA og mitokondrie-DNA (mtDNA).
Skulen har dekka kostnadene for 10 elevar (5 gutar og 5 jenter), medan resten av deltakinga er mogleggjort gjennom støtte frå engasjerte bidragsytarar og elevar som sjølve ønskte å vere med.
Målet med prosjektet er å kartleggje dei lange fars- og morslinjene våre, og sjå korleis desse linjene har vandra gjennom historia – frå vår felles stamfar og stammor i Afrika og fram til dagens Volda. Mange av resultata kan knytast til kjende historiske hendingar og migrasjonsrørsler, men på ein personleg og konkret måte: Her får elevane sjå historia ikkje berre som teori, men som noko dei faktisk er direkte knytte til.
Prosjektet viser òg kor mykje vi menneske har til felles – ofte meir enn vi ventar, og somme tider mindre enn vi trur. Samstundes vert det tydeleg at alle slektslinjer har funne vegen til Noreg og Sunnmøre i ulike bølgjer gjennom fleire tusen år. Også dei som kjem i vår tids «bølge» er ein del av denne samanhengen, og ein viktig del av fellesskapen vår i dag.
Vi ser fram til spanande funn, gode samtalar og ny innsikt i kven vi er – og kvar vi kjem frå.
Les meir om skuleprosjektet Mitt afrikanske DNA her: https://www.fjorddna.com/kurs-og-tenester/skuleprosjektet-mitt-afrikanske-dna/
