Hystad skule

19/06/2026

Då var me komne til siste skuledag i eit innhaldsrikt, lærerikt og opplevingsrikt skuleår. Me vil takka alle foreldre og elevar for samarbeidet og alle dei gode dagane 🌼 Med ønske om ein god sommar legg me ved ei lenkje til oppfordringa frå Nasjonalt lesesenter:
Les gjennom sommaren | Universitetet i Stavanger

Bruk sommaren til å samle gode leseerfaringar – det gir motivasjon til å lese meir.

18/06/2026

I dag har 1. trinnet vore på Trottbanen saman med fadrane. 6. trinnet organiserte mange kjekke leikar, som stikkball, nappa halen, 1,2,3 raudt lys, "Bombo", stiv heks og mange andre. Dette vart ei fin avslutning på skuleåret og for samarbeidet mellom 1. trinn og fadrane.

16/06/2026

God stemning og ivrige deltakarar på aktivitetsdag i dag 🎾🏃‍➡️🎯 Etterpå var det den årlege prestisjekampen i fotball, mellom 7. trinn og dei tilsette. Kampen enda 1-0 til dei vaksne 🤩 Eit lite plaster på såret var ein heftig vasskrig på skulen for 7. trinnet. I kveld har dei hatt avslutning med foreldre og lærarar. Snart er dei klare for å sei farvel til barneskulen og me vil ønska dei lukke til vidare på Nordbygdo ungdomsskule til hausten 🌸

12/06/2026

Den andre torsdagen i juni er eit fast høgdepunkt i skuleåret. Elevane inviterer då besteforeldre, oldeforeldre og andre eldre til føremiddagkonsert. Dei har øvd i lang tid og har gledd seg til å synga for alle gjestene som kjem på besøk 🎼 Takk til alle som leverte kaker og kaffi, og takk til foreldra som hjalp til på kjøkenet. Til slutt vil me senda ein stor takk til alle som kom for å høyra på. Me håpar de vil koma tilbake på same tid til neste år 🌸

08/06/2026

Førre veke hadde 4. trinn Harry Potter-veke. Elevane fekk brev om at dei fekk vera elevar ved Galtvort i ei veke. Valhatten delte dei inn i fire hus som dei skulle samarbeida i. Dei deltok i ulike konkurransar og vart vurderte på samarbeid, orden, arbeidsinnsats og arbeidsro, og kunne til slutt vinna husdiplom for året. I løpet av veka har me hatt fag som stell av magiske vesen, eliksirer, formularer, urtologi og oldtidsruner. Dei har laga seg eigne tryllestavar, husreglar, den store monsterboka, magiske lappekaker og reklameplakatar. Veka vart avslutta med ein stor fest.

01/06/2026

I dag startar Sommarles 2026 📚

29/05/2026

Mange elevar og vaksne hadde i dag tatt på seg fotballtrøye for å markera støtte til kampen mot barnekreft. Her er ein liten gjeng me traff på i eitt av friminutta.

22/05/2026

Naturfagsveke 2026
Ei annleis skuleveke for heile skulen, med uteskule, eksperiment, utforsking og praktisk undervisning. Her er nokre glimt frå noko av det trinna har jobba med denne veka. God langhelg til alle!

13/05/2026

I dag var 6. trinnet saman med Den kulturelle skulesekken på «Eg byggjer meg ein båt» ute på Jensaneset☀️ Her spikka me nøkkelring, klinka saum og lærte om korleis dei har bygd båtar i Sagvåg i mange år🚣‍♂️Tusen takk for flott opplegg Bjørn Arve Lunde, Torill Berger Falk og Sunnhordland museum!☺️

12/05/2026

Hystad Prix 2026 🎉
For ein gjeng med modige, talentfulle og musikalske elevar me har! Sketsj, song, dans og musikk var kategoriane dei konkurrerte i og dei imponerte både store og små i salen. Takk til dei flinke programleiarane som batt det heile saman. No er det berre eitt år til neste gong og me gler oss allereie 🤩