28/05/2026
Frå Måløy til Shanghai: Andreas skal kjempe om VM-tittel i sveising
Ein tidlegare elev ved TAF/TIF-linja på Måløy vidaregåande skule er no klar for verdsmeisterskap i sveising i Kina. Andreas Ommedal Aa skal representere Noreg når verdseliten møtest i Shanghai.
Nyleg fekk TAF/TIF ved Måløy vidaregåande skule besøk av den tidlegare eleven, som delte historia om vegen frå skulebenken i Måløy til internasjonalt toppnivå i sveisefaget. Elevane fekk også sjå Andreas utføre TIG-sveising og kom med råd og vink til nysgjerrige elevar.
Andreas tok fagbrev som industrimekanikar hjå Brødrene Aa i Hyen. Gjennom praksis i bedrifta og praktiske øvingar på verkstaden ved skulen utvikla han tidleg ei særleg interesse for sveising. Det gode handverket vart raskt lagt merke til. Arbeidsgjevaren meldte han på noregsmeisterskapet i sveising, der Andreas enda på ein fjerdeplass. Resultatet vart likevel ei viktig drivkraft.
– Etter den sure fjerdeplassen bestemte eg meg for å verte best i sveising, fortel Andreas. Etter fullført fireårig TAF-utdanning og fagbrev flytta han til Stavanger for å satse vidare på faget. Der fekk han arbeid hos Stavanger Mekaniske, ei bedrift med omfattande sveiseoppdrag innan offshore-industrien og arbeid med ulike metall og metodar. Andreas stilte tidleg eit enkelt spørsmål til arbeidsformannen:
– Kva skal eg gjere for å verte ein god sveisar?
Svaret kom i form av ansvar. Han fekk som oppdrag å vere den einaste sveisaren på eit større aluminiumsoppdrag – ei krevjande oppgåve som gav både høgt arbeidspress og verdifull erfaring.
No ventar den største utfordringa så langt i karrieren. Andreas er teken ut som einaste norske deltakar i si klasse til verdsmeisterskapet i sveising, som går føre seg i Shanghai i Kina i september. Meisterskapet varer i fire dagar og deltakarane skal konkurrere i fleire disiplinar. Mellom anna skal dei sveise ein trykkboks som må tole eit trykk på heile 1000 psi.
For Andreas handlar suksess om målretta arbeid og fordjuping.
– Dersom ein skal verte god i noko, må ein fordjupe seg i det, seier han.
Frå Måløy blir det no sendt lukkeønskingar austover til Shanghai, der ein tidlegare TAF-elev skal måle kreftene mot verdas beste sveisarar.
PS: Ved sida av satsinga innan sveising arbeider Andreas òg med å utvikle ein app som skal gjere kvardagen enklare for elevar og fagfolk innan sveisefaget.
