14/11/2025
VALFAG
Fredag var ein litt spesiell dag for 1.-3. klasse, dei fekk nemleg prøve seg på valfag. På førehand var dei presenterte for dei 3 faga dei kunne velje mellom: kunst- og handverk, tur i nærområdet og programmering. Målet var å gje elevane moglegheit til å gjere sjølvstendige val, kjenne på medverknad i skulekvardagen, oppleve meistring og ha det kjekt i lag med kvarandre på tvers av klassene. Elevane skulle rangere valfaga i samarbeid med sine føresette, og så vart dei delt inn i grupper. Det var veldig kjekt at nesten alle fekk førstevalet sitt.
Turgruppa gjekk til Ugleskogen, der elevane fekk prøve seg på spikking. Dei kosa seg rundt bålet, med varm drikke og niste som kunne varmast på bålet. Kjekt å ake på rompa og rulle litt i snøen som kom i dag. Berre smil og raude kjakar å sjå då dei kom tilbake til skuleslutt.
Dei som var på kunst- og handverk fekk velje mellom ulike aktivitetar der; perling, teikning, maling, origami, klipping og liming. Mykje kreativitet og fine kunstverk å sjå der.
Programmeringsgjengen byrja med å programmere læraren til å bevege seg til riktig plass i rutenettet, så kvarandre, før dei gruppevis skulle flytte ein figur til riktig plass i rutenettet, berre ved bruk av kommandoer. Dei spelte eit dataspel som lærte dei om koding, før dei avslutta med dei kjekke "BeeBotane" våre - figurar som heilt på ekte blir koda til å gå dit elevane gjev instruksar om å gå.
Ein veldig kjekk dag, som vi gler oss til å gjenta😁
