Sheikh Dahiru Usman Bauchi Foundation

Alhamdulillah Daga Nigeria Zuwa Kasar Algeria Bayan Shafe Kwanaki Anan Gida Nigeria A Yau Litinin 07 Aug 2026 Maulana Khalifatu Lisanul Faida Sheikh Ibrahim Sheikh Dahiru Bauchi Yasamu Raka Shugaban Darikar Tijjaniyya Na Duniya Sheikh Ali Bil Arabi Filin Jirgin Sama Na Garin Abuja Ayayinda Yakama Hanya Da Tawagarsa Zuwa Kasar Algeria Alhamdulillah Alhamdulillah

SANARWA TA MUSAMMAN

Maulana Khalifa Sheikh Ibrahim Sheikh Dahiru Usman Bauchi ya sanar da ayyana ranar Litinin, 12 ga Rabi’ul-Awwal 1448H, wadda ta yi daidai da 24 ga Agusta, 2026, a matsayin ranar gudanar da Babban Maulidin Shugaban Halitta, Fiyayyen Halittu, Annabi Muhammad ﷺ, a garin Bauchi.

Wannan rana ce ta musamman wadda za a gudanar da taron tunawa da haihuwar fiyayyen halitta, Manzon Allah Muhammad ﷺ, tare da bayyana farin ciki da godiya ga Allah Maɗaukakin Sarki bisa wannan babbar ni’ima da Ya yi wa duniya.

Saboda haka, ana sanar da dukkan al’ummar Musulmi, musamman masu ƙaunar Manzon Allah ﷺ, da su tanadi wannan rana domin halartar wannan babban taro na Maulidi, tare da yawaita salati da girmama Manzon Allah ﷺ.

Muna roƙon Allah Maɗaukakin Sarki Ya sanya wannan Maulidi ya kasance mai albarka, Ya karɓi ayyukanmu, Ya ƙara mana ƙaunar Manzon Allah ﷺ, Ya haɗa kan al’ummar Musulmi, Ya kuma maimaita mana irin wannan rana cikin ƙoshin lafiya da aminci.

اللهم صل وسلم وبارك على سيدنا محمد وعلى آله وصحبه أجمعين.

SANARWA TARE DA GAYYATAR DUKKANIN AL’UMMAR MUSULMI ZUWA ZIKIRIN JUMA’A

Alhamdulillah, Alhamdulillah, Alhamdulillah!

Cikin ikon Allah, da yardarsa da kuma amincewarsa, Khalifa Sheikh Ibrahim Sheikh Dahiru Usman Bauchi R.T.A. yana sanar da daukacin al’ummar Musulmi cewa za a gudanar da gagarumin Zikirin Juma’a a Zawiyyar Maulanmu Sheikh Dahiru Usman Bauchi R.T.A.

Wannan gagarumin Zikiri zai kasance tare da Khalifa Sheikh Ali Bil-Arabi, Khalifan Tijjaniyya na Duniya, tare da Khalifa Sheikh Muhammadul Mahy Sheikh Ibrahima Niasse, Khalifan Faida na Duniya.

Za a gudanar da wannan babban taro gobe Juma’a, 1 ga watan Rabi’ul Auwal 1448H, wanda ya yi daidai da 14 ga Agusta 2026, a Babban Masallacin Juma’a na Maulanmu Sheikh Dahiru Usman Bauchi R.T.A., da misalin ƙarfe 5:30 na yamma.

Don haka, ana kira da gayyatar dukkanin zawiyoyi da almajiran Darikar Tijjaniyya, na kusa da na nesa, da su fito domin halartar wannan babban taro na ibada, tare da haɗuwa da waɗannan manyan bayin Allah, domin neman albarka da yin addu’o’i.

Muna roƙon Allah Maɗaukakin Sarki Ya karɓi ibadunmu da addu’o’inmu, Ya sanya wannan taro ya zama sanadin samun albarka, haɗin kai da zaman lafiya ga al’ummar Musulmi.

Amin Ya Allah.

Manga Alaramma Misau
Director, Khadimul Faida Media Team