Imam Yusuf Ibrahim Bauchi

Imam Ahmad bin Hanbal ya ce:

“Na bar neman yardar mutane, har na samu ikon faɗin gaskiya.”

Manzon Allah ﷺ ya ce:

"Ya ɗanɗani zaƙin imani wanda ya yarda da Allah a matsayin Ubangijinsa."

Ma'anar wannan magana ita ce:
Yarda da Allah a matsayin Ubangiji yana nufin yarda da bautarsa (Ulūhiyyarsa), wato mutum ya amince da duk abin da Allah Ya umarta, ya miƙa wuya gare Shi gaba ɗaya.

Haka kuma yarda da Ubangijintakarsa (Rubūbiyyarsa) yana nufin mutum ya yarda da dukkan yadda Allah yake tafiyar da al'amuransa da ƙaddarorinsa.

Idan Allah Ya umarce shi da wani abu, sai ya yi biyayya.

Idan Allah Ya hana shi wani abu, sai ya nisance shi.

Idan Allah Ya ba shi wani abu, sai ya karɓa da godiya.

Idan Allah Ya hana shi wani abu, sai ya yi haƙuri kuma ya yarda.

Domin ba shi da wani zaɓi da ya fi zaɓin Allah, kuma ya san cewa zaɓin Allah shi ne mafi alheri kuma mafi hikima gare shi.

Allah Ya sa mu cikin masu yarda da Shi, masu haƙuri da ƙaddararsa, kuma masu ɗanɗanar zaƙin imani. Amin.

Sufyan bn Uyaynah (Allah Ya yi masa rahama) ya ce:

Idan ka kasance a wani zamani da ake yarda da mutum saboda maganarsa kawai ba tare da aikinsa ba, ko saboda iliminsa ba tare da ya yi aiki da ilimin ba, to ka sani cewa kana cikin mafi munin zamani a tsakanin mafi munin mutane.

Ibtal al-Hiyal na Ibn Battah (1/34).