Karang Jaku Iban

Karang Jaku Iban Bekunsi Penemu Sambil Beperindang

28/04/2026

Karang Pom 3 - Unit 2 - Pengidup Berumah Panjai

Pemai ulah ti manah endang patut dikembuan tiap-tiap iku orang ke diau ba rumah panjai awakka sida ulih begulai sejalai enggau meruan.

Pejuraika sekeda pemai ulah ti manah nya.

Isi Karang:
1. Beserakup ngereja pengawa
2. Ngembuan adat basa ke manah enggau pangan diri
3. Rajin
4. Tan ninga jaku jai pangan diri

Chunto Karang:

Pengidup mensia mayuh di rumah panjai endang patut ditanggam enggau adat sereta pekat rumah panjai ti disetujuka bala mayuh. Adat enggau pekat tu endang dikena tuai ngembing sereta ngiring nembiak redak awakka numbuhka penyarut ti tau mumpung perabung dalam sebuah-sebuah rumah panjai. Berindik ari nya, mayuh bendar pemai ulah ti manah ke patut dikembuan tiap-tiap iku orang ke diau di rumah panjai awakka sida ulih begulai sejalai enggau meruan.
Siti ari pemai ulah ti patut dikembuan orang ke diau di rumah panjai iya nya beserakup ngereja pengawa. Kebuah pia, ba rumah panjai, mayuh macham pengawa ke dikereja ti begunaka saup ari pangan diri sekalika maya lantang tauka maya tusah munyi sempama baka babi agi makai sedulang. Ambika banding, baka bisi pemati, melah pinang, hari gawai, ngelaluka penatai bala menteri, meresi kandang rumah panjai enggau ti bukai. Semua pengawa ke baka nya endang begunaka penyerakup awakka pengawa jampat teputar munyi sempama berat sama ngangkat, lempung sama nanggung.
Nambahka nya, pemai ulah ke bukai ti patut dikembuan orang ke diau di rumah panjai iya nya ngembuan adat basa ke manah enggau pangan diri. Kita sama nemu, adat basa ke manah enggau pangan diri tu deka mai pengelantang pengidup enggau penyamai ati. Ambika banding sekeda basa ke patut dikembuan nya baka enda chapuh tauka inggar belabuh ari jam 10.00 malam awakka orang ulih tinduk enggau meruan, anang bejaika pangan diri, anang bejakuka orang, siru jaku enggau diri serumah enggau mayuh agi adat basa manah ti bukai. Nya alai, enti semua kitai naka ulih nguji ngembuan adat basa ke manah, nadai kebuah bala nembiak redak ba sebuah-sebuah rumah panjai nya enda ulih begulai sejalai enggau pangan diri.
Nangkanka nya, pemai ulah ti manah ke patut dikembuan kitai ke diau di rumah panjai iya nya mesti rajin ngereja pengawa. Kebuah pia, pengawa ti dikereja siku-siku kitai ke diau di rumah panjai endang mayuh lalu begunaka pengerajin awakka enda tinggal orang bukai. Ambika banding, sekeda ari pengawa nya baka bumai, ngereja kebun sawit, nangkal getah, nupi ikan, nupi babi, nupi manuk enggau ti bukai. Enti kitai bisi ubah lusu, dia orang deka ketawa ke kitai lalu kitai mega deka ngining pengidup orang bukai.
Kepenudi pemai ulah ti patut dikembuan orang ke diau di rumah panjai iya nya tan ninga jaku jai ari pangan diri. Kebuah pia, mayuh mensia ke diau di rumah panjai tu ngembuan mulut ti deka betusika berita ti enda manah enggau pangan diri munyi sempama pandak mulut engkerasak, panjai mulut kitai ti tau ngasuh pangan diri belaya enti kitai enda tan ati. Ambika banding, pengawa bejakuka orang tu nyadi bepun ari ati ti kepapas, bingking, ninding, bisi dendam lama, salah jaku enggau pangan diri enggau mayuh agi pekara bukai ti tau nyadika buah mulut. Nya alai, enti sekeda nya mipau pending, dia pekara ke baka tu tau pulai ke penyarut munyi sempama engkerasak sama engkerasak bepantuk patah patuk.
Nya mih sekeda ari pemai ulah ti manah ke patut dikembuan orang ke diau di rumah panjai awakka sida ulih segulai sejalai enggau pangan diri laban dalam sesebuah rumah panjai nya endang kaban belayan magang munyi sempama baka manuk agi sekerungan, baka babi agi sepencharan. Bepun ari nya, sama-sama mih kitai ngintu pendiau enggau adat basa diri empu lebuh ke diau ba rumah panjai awakka tau nyadika chunto ngagai nembiak rebak ke dudi. Pengidup ti lantang begulai sejalai enggau pangan diri deka mai pemujur ba pengidup.

27/04/2026

Karang Pom 3 - Unit 7 - Ngelawa Palan Bunsu Gemian

Nuan ti nyadi sekretari Kelab Rampa Menua sekula kita, udah dipinta bejaku ba rumah panjai beserimbai enggau Hari Rampa Menua senentang Guna Sungai ngagai Pengidup Kitai Mensia.

Tulis teks jaku nuan nya.

Isi karang:
1. meri sumber pemakai dalam pengidup kitai mensia
2. dikena mensia beridup besehari-sehari
3. alai orang ngelantangka ati tauka memarin

Chunto Karang:

“Terima kasih ngagai emcee ti ngangkatka aku bejaku. Keterubah aku meri tabi basa ngagai tuai rumah, mandal tuai rumah, bala pengajar, bala tuai-tuai bilik, bala indu nembiak enggau semua bala kitai ke bisi enggau begempuru ditu baka ke pagi tu. Terima kasih ketegal ulih ngelimpangka hari lalu sama ngulu pengerami ngintu Hari Rampa Menua kitai baka ke taun tu. Nyadi pagi tu aku deka ngenataika siti topik senentang Guna Sungai ngagai Pengidup Kitai Mensia.
Bala mayuh ti dipebasa,
Siti ari guna sungai nya meri sumber pemakai dalam pengidup kitai mensia. Mayuh amat bansa pemakai ke tau diempa kitai ti idup tauka diulihka ari sungai. Ambi ke banding, ikan, gerama, tekuyung, lelabi, undang enggau ti bukai nya sekeda sumber pemakai ti diambi ari sungai. Nya alai, enti nadai sungai tauka ai sungai nya kamah, dia kitai mensia deka tusah bulih pemakai ke baka nya.
Bala pangan semua,
Nangkanka nya, ai sungai tu mega dikena kitai mensia beridup besehari-sehari. Pengidup kitai enda ulih nadai ai laban ai tu mayuh bendar guna lalu enti nadai ai dia pengidup kitai berasai tusah sereta tasah. Ambika banding, ai sungai tu dikena kitai bebasu, berapi, manduk lauk, mandi, ke irup enggau mayuh agi guna ke bukai. Nya alai, enti nadai ai sungai tu, dia pengidup kitai mensia deka tejanggal laban kitai teleba bisi ai ke guna besehari-sehari.
Bala mayuh ti dipebasa,
Kepenudi guna sungai iya nya alai orang ngelantangka ati tauka memarin. Mayuh amat sungai di menua kitai tu ti tebilang ketegal pemeresi ai enggau pemanah rampa menua ngelilingi sungai nya ti narit mayuh bala temuai mandi tauka ngelantangka ati ba sungai nya. Ambika chunto, sekeda sungai ke tebilang alai ngelantangka ati baka Sungai Skrang, Sungai Katibas, Sungai Lemanak, Sungai Sarawak enggau mayuh agi sungai ti bukai di menua kitai tu. Nya alai, sungai tu tau meri penatai pemisi ngagai mensia mayuh ti bisi bejualka barang pemakai ngagai bala temuai ti bisi ngelantangka ati kia.
Bala mayuh semua,
Nya alai, enti kitai beratika penerang di atas, mayuh amat guna ai sungai tu ba pengidup kitai mensia. Beduduk ari nya, kitai patut nyaga pemeresi sungai ngambika ai sungai tu ulih dikena kitai sampai ke jemah ila. Nya alai, jaku aku naka nya. Enti nyema jaku aku bisi salah, aku minta ampun ngagai kita semua. Nya aja, terima kasih.”

21/04/2026

Karang Pom 2 - Unit 7 - Tanah Betuah Menua Belimpah

Kitai ke diau di rumah panjai tauka di sesebengkah genturung pendiau endang bisi ngeluarka sekeda komoditi ari utai tanam dikena ngidupka diri besehari-sehari.

Padahka komditi ti bisi dikeluarka kita serumah tauka genturung pendiau kita nya.

Isi Karang:
1. getah
2. lada
3. sawit

Chunto Karang:

Kami serumah ke diau di rumah panjai endang bisi ngeluarka komoditi ari utai tanam dikena ngidupka diri munyi sempama rusa begiga sepan, jani ngani engkalan. Komoditi tu endang nyadika batang pengidup dikena ngulihka belanja awakka ulih idup enggau meruan baka orang bukai ngambika enda idup merinsa mensena. Jam ke diatu mayuh komoditi utai tumbuh ti ditanam kami serumah dikena nyalir pengidup diri.
Siti ari komoditi ari utai tanam ti bisi dikeluarka kami serumah iya nya getah. Pengawa ngeluarka komoditi getah tu lama udah dikemeranka bala kami serumah. Ambika banding, lebuh hari ke manah, bala kami serumah sama bela beterebas nurun nangkal getah ngambika bisi belanja dapur, belanja anak ke sekula enggau belanja ke bukai enggau naka ulih diri empu ngelimatka belanja nya. Suah agi, pengawa tu dikereja muak ke pagi lalu muak ke lemai nya endang dikena ngereja pengawa ke bukai.
Kelimpah ari nya, sebengkah da agi komoditi utai tanam ti dikeluarka kami serumah iya nya lada. Kami serumah lama udah ngemeranka pengawa betanamka lada tu lalu salah munyi jaku nyau deka semua kami bisi nanam lada magang. Sekeda bansa lada ke ditanam nya baka lada tambak Varieti India, Varieti Kuching, Semonggok Emas, Semonggok Perak, Semonggok Aman enggau Nyerigang. Lebuh maya rega lada ke berega, bisi ga siku dua kami serumah ke bulih belanja ke jelan iya agi lalu bisi disimpan tauka dikena meli mayuh macham pengeraja ke ruang bilik.
Kepenudi, komoditi utai tanam ke bisi dikeluarka kami serumah iya nya sawit. Sida ke bisi tanah semak jalai endang dulu agi ngepunka pengawa tu lalu ditangkan bala bukai ti sama-sama betanamka sawit sepengudah bisi jalai ti disungkur lipan. Semua pengawa ke dikereja tu endang ngena chara beduruk baka nebas, ngangkut anak sawit, nanam sawit, ngerachun rumput ba dandang sawit, numbuk buah enggau beangkutka buah sawit. Mayuh sida ke udah ngereja pengawa tu berupai bendar bisi belanja lalu lantang agi pengidup ari orang bukai.
Nya alai, baka nya mih sekeda ari komoditi ari utai tanam ke bisi dikeluarka kami serumah. Taja pan chara sekeda komoditi ari utai tanam ti dikeluarka kami nya enda mayuh lalu pengidup kami serumah agi dipeda tusah baka idup manuk, kair pantuk, tang dikena nupi diri sebilik, pengawa nya mih ditapi sereta dikereja belama. Seagi-agi tulang dapat gawa, Petara tetap nyangkung pengidup kitai belama laban jereki enda tau datai ngapa enti kitai enda nurun gawa.

19/04/2026

Karang Pom 2 - Unit 8 - Siru ke Rampa Menua

Aktiviti bedunju endang manah bendar ngagai bala nembiak ke benung besekula.
Pejuraika pemanah aktiviti nya.

Isi Karang:
1. Nelebaka nembiak ngereja pengawa ngatika diri
2. Matih nembiak besaup ngereja pengawa
3. Ngelatih nembiak bedisiplin

Chunto Karang:

Aktiviti bedunju nya sebengkah aktiviti ti suah dipejalaika kelab pekayan seraris di sekula. Aktiviti tu endang narit ati bala nembiak sekula lalu sida berebut-rebut enggau ba aktiviti nya laban nemu mayuh pemanah ti deka diasaika sida sambil ti rindu beguali sejalai enggau pangan diri. Nya alai, diatu kitai deka bejuraika, nama pemanah aktiviti bedunju tu?
Siti ari pemanah aktiviti bedunju iya nya nelebaka nembiak ngereja mayuh macham pengawa ngatika diri. Kebuah pia, maya ke bedunju tu, dia nembiak deka ngereja mayuh macham pengawa ti jarang dikereja sida. Ambika chunto lebuh sida ngaga dunju tu, nembiak deka belajar milih tempat ke patut alai ngaga dunju, nirika tiang, ngatap dunju, meresi kandang dunju sereta ngaduka tempat alai sida tinduk dalam dunju nya. Semua pengawa tu endang dikereja bala nembiak bepelasarka kreativiti sida empu lalu pekara ke baka tu udah nempa sida nyadi mensia ti nemu berunding sechara kreatif enggau kritis. Nya alai, aktiviti bedunju tu endang manah bendar dikena nempa nembiak berunding ngereja pengawa ngatika diri awakka sida nyadi teleba ngereja sesebengkah pengawa nya taja pan mar munyi sempama abis miang bai tekindas.
Nangkanka nya, pemanah bukai aktiviti bedunju tu ba bala nembiak iya nya matih nembiak besaup ngereja pengawa. Kebuah pia, maya ke bedunju tu mayuh bendar pengawa tauka aktiviti ti begunaka saup ari pangan diri kelebih dalam raban ti udah ditetapka. Ambika banding baka nirika dunju, ngiga kayu dikena berapi sereta manduk lauk, bebelaka lauk, nyauk ai sereta ngaga dapur tauka tempat alai berapi enggau manduk lauk sereta mayuh agi pengawa bukai. Semua pengawa tu endang begunaka saup pangan diri awakka pengawa ke berat tau nyadi lempung munyi sempama berat sama ngangkat, lempung sama nanggung. Nya alai, maya aktiviti bedunju tu, kitai enda tau ngelakka pangan diri aja ngereja pengawa munyi sempama baka ke meda balak entua.
Kepenudi pemanah aktiviti bedunju tu iya nya ngelatih nembiak bedisiplin. Kebuah pia, maya ke bedunju tu mayuh aktiviti ti dipejalaika lalu nembiak mesti nitihka atur ti udah ditetapka enggaika sida diukum. Ambika chunto, sekeda ari atur ke patut dititihka baka nitihka taga jam ti udah ditetapka, taluk ke atur maya bedunju ti udah ditetapka, beratka pengelikun, bebasaka jaku orang ti nyadi tuai dalam raban enggau mayuh agi pekara bukai ti patut dititihka awakka siku-siku nembiak nya bedisiplin. Empas ari peneleba bala nembiak ke selalu enggau aktiviti bedunju tu deka nempa sida nyadi orang ke bedisiplin lalu tau marit bala pangan iya ke bukai mega nyadi nembiak ke ngembuan disiplin sekalika di sekula tauka di luar kandang sekula. Nya alai, aktiviti bedunju tu manah bendar ngagai nembiak lalu sida patut enda muai peluang enti dipilih enggau aktiviti ke baka tu lebuh ti diatur di sekula.
Nya mih sekeda ari pemanah aktiviti bedunju ngagai nembiak sekula lalu mayuh agi pemanah bukai ti enda diterangka ditu munyi sempama kena tinggang dilah. Bepun ari nya, bala nembiak patut enggau ba aktiviti bedunju tu awakka sida bulih peneleba ke guna diri empu dudi hari ila lebuh bisi ngaga aktiviti baka nya enggau orang bukai. Nembiak ke setimbang ukai semina lati ba aspek kurikulum enggau kokurikulum tang mega lati ba aspek emosyen enggau sosial.

13/04/2026

Karang Pom 2 - Unit 3 -Dunya Ensera

Kelab Jaku Iban sekula kita baru udah ngatur pekit nulis ensera. Nuan ti nyadi sekretari kelab dipinta nulis ripot pasal pekit nya.

Tulis ripot nya.

Isi Karang:
1. Madahka maya pekit nya diatur
2. Madahka penyampau cherita ke diterima
3. Madahka pemutus pekit nya

Chunto Karang:

Ripot Pekit Nulis Ensera Jaku Iban 2026

Ba bulan Empat taun tu tadi, dia Kelab Jaku Iban Sekula Sekondari Perintah Nanga Berasuk udah ngatur Pekit Nulis Ensera dalam Jaku Iban. Pekit tu diatur Kelab Jaku Iban. Pengelama awak ke diberi ngagai bala nembiak ke bisi ati deka enggau nulis ensera tu iya nya sebulan aja. Hari kepenudi nembiak nganjung ensera sida kena 15 haribulan Empat 2026.
Pekit tu dibuka ngagai nembiak sekula ari pom satu ngagai pom lima. Lebuh hari kepenudi maya nganjung ensera nya, dia komiti pengatur pekit tu udah nerima 20 iti ensera. Bisi tiga iku bala akim ke udah dipadu nentuka ensera ke menang. Sida tiga nya, iya nya Pengajar Jimbai, Pengajar Rana enggau Pengajar Jenifer. Lebuh ke udah diperesa sereta dibacha raban akim, dia ensera ke bulih lumur satu pulai ngagai Mengga ak Juntan. Iya nulis ensera Laya Mayau enggau Ukui. Ensera ke lumur dua pulai ngagai Claudia Mindun ak Sindai. Ensera ti ditulis iya nya dikumbai iya Ensera Keling Belelang. Ensera ke bulih lumur tiga ditulis Monica Endun ak Jatan. Iya nulis ensera senentang Jelu Nubai. Bisi tiga iku pemenang sagu ati. Sida tu iya nya Jenang ak Sani, Rudi ak Lugat enggau Anatasia ak Japar.
Sida ke menang tu kemari udah nerima perais enggau setipikit ari kepala pengajar lebuh gempuru sekula kena hari Dua 29 haribulan Empat 2026 tu tadi. Iya ke lumur satu nerima mata duit RM50.00, bup ensera enggau setipikit. Iya ke bulih lumur dua nerima RM40.00, bup ensera enggau setipikit lalu pemenang lumur tiga mega nerima mata duit RM30.00, bup ensera enggau setipikit. Sida ke nerima sagu ati nya nerima bup ensera enggau setipikit. Semua sida ke menang tu sama-sama madahka pengaga ati diri lalu nguji enggau orang agi ngeruhka ai bepekit nulis ensera dudi hari ila.
Nya alai, aku ngarika Kelab Jaku Iban, meri terima kasih ngagai bala nembiak ke enggau pekit tu. Sebarang ke enda bulih perais nya tau nguji taun ke dudi hari ila. Arapka sida enda leju lalu semampai meri sukung lebuh kelab tu ngatur pekit ke baka tu. Pia mega aku meri terima kasih ngagai sekula, kelebih agi ngagai pengajar Kelab Jaku Iban enggau bala raban kelab ke udah ngelimpangka hari diri enggau ngatur pekit tu. Enti nadai sukung enggau tulung ari semua bala nya tadi, pekit ke baka tu tentu enda mujur diatur munyi sempama puntan baka menasan jalai jelu, laban baka buah merunjau ulu. Aku mega arapka Kelab Jaku Iban sekula tu ulih ngatur pekit ke baka tu dudi hari ila laban pemayuh nembiak ke enggau nya lebih ari jangka pengatur pekit.

Nya aja, terima kasih.

Ripot tu disediaka, 03 MEI 2026
Ceceliajinanari
(CECELIA JINA AK NARI)
Sekretari Kelab Jaku Iban
Sekula Sekondari Perintah Nanga Berasuk.

10/04/2026

Pangan serambau nya mai reti seraban anak mit, nembiak, orang besai tuai tauka orang ke udah tuai lukai ke nyau deka sama penuai umur, pelajar tauka kelas sosial.
Tiap-tiap raban ke serebak umur nya tadi sama bisi pengerindu besulu enggau pangan diri. Nya alai, ba bala nembiak ke benung besekula, sida patut nemu milih pangan serambau ti tau marit sida nuju jalai pemanah enggau pemujur.
Mayuh malin ti tau dikena bala nembiak lebuh deka milih pangan serambau ti enggau sida begulai. Pangan serambau ti manah patut ngembuan penaluk ngagai Petara ti tegap sereta enda mudah begilik ngapa baka batang ti diindik. Bala nembiak deka patih nunda ulah pangan diri laban ulah ke baka nya nunjukka sida seati enggau pangan diri lalu ulih begulai sejalai tauka semake. Bepun ari nya beguna bendar tiap-tiap iku nembiak nemu milih pangan serambau ti bisi prinsip enggau penegap ulah ke menyana.
Siku-siku pangan serambau mesti bisi penteba ke selalu marit ngereja pengawa ke manah lalu mai nyeliahka ulah ti jai. Ulah pangan diri ke manah baka nya ulih marit orang bukai awakka sama-sama niti nali jalai pengidup ke meruan sereta tau dipebasaka orang mayuh. Nambahka nya, penteba bukai pangan serambau ke patut digulai iya nya ngembuan ulah ke manah. Pangan ke manah ulah ulih ngiring sereta ngembing bala pangan iya awakka sama-sama bemalinka perangai ti menuku.
Pangan serambau ke patut nyadika kaling mega patut ngembuan pengerindu enggau juluk ati ti sama. Kebuah pia, laban pangan serambau nya mih orang ke enggau kitai begulai besehari-sehari lalu bekunsika pengerindu ke sama ngagai pekara tauka pengawa ti dikereja. Nya alai, bala nembiak patut nemu begigaka pangan serambau ti bisi penteba ke manah ngambika tau digulai.
Nya alai, nyata bendar pangan serambau nya besai bendar reti ba pengidup siku-siku nembiak. Pilih mih pangan serambau ti ulih ngiring sereta ngembing ba pengidup lalu seliahka begulai enggau pangan serambau ti deka marit kitai nuju jalai pemalu enggau pemenchi.

08/04/2026

Tikas pemeresi angin di menua kitai tu majak ngirauka ati mensia mayuh kelebih agi maya musim kemarau.
Terangka kebuah pekara tu nyadi.

Isi Karang
1. Asap ari kereban pengangkut
2. Pengawa betunuka reban dandang kebun
3. Pengawa betunuka uras

Chunto Karang:

Pengamah angin ti nyadi di menua kitai tu endang suah nyadika buah mulut mensia mayuh sereta dikenang sekalika ba media massa tauka media sosial. Taja pia, penanggul tu enda kala mujur diputarka laban tiap-tiap kali musim kemarau, penusah angin kamah nyadi laban dunya nyau besebun laban repun asap. Nya alai, pekara ti deka dipejuraika ditu iya nya senentang kebuah pengamah angin tu nyadi.
Siti ari kebuah angin kamah iya nya laban asap ari kereban pengangkut ti dikena mensia besehari-sehari. Kebuah pia mensia begunaka kereban pengangkut tu nadai milih siang tauka malam laban bisi tuju ti bebatang. Ambika banding, dikena nurun gawa, ngangkut barang ke diguna mensia mayuh lalu lebuh maya bisi pengerami dia pemayuh kereban pengangkut ti dikena mensia nya jauh mayuh ari maya ke bukai. Berindik ari nya, dia angin di menua kitai tu majak kamah ketegal pemayuh asap ti dikeluarka kereban pengangkut ti majak nambah tu. Nya alai, pengamah angin ba menua kitai tu spin ulih diputarka laban pemayuh rayat menua kitai tu ti ngembuan kerita semampai nambah ninting taun.

06/04/2026

Adat mesti dikeingat, penti pemali mesti diasi.

05/04/2026

Karang Pom 3 - Waris Pesaka Bansa

Pengawa ngambuh duku patut ditampung ari rebak ke dulu ngagai rebak ke dudi.

Pejuraika pemanah nemu ngambuh duku.

Chunto Karang:

Penemu enggau pengelandik ngambuh duku patut dikemeranka sekeda nembiak rebak ke dudi. Taja pan enda semua nemu sereta landik bekambuhka duku tu tang penemu nya ulih dipelajarka sekeda nembiak ke pandai di chunggai ujung jari, lansik nyemurik mata nisi enggau rawang lempuang kadang ati. Pekara ti deka dikusai ditu iya nya nama pemanah kitai bemu ngambuh duku?
Siti ari pemanah kitai nemu ngambuh duku iya nya bisi dikena diri empu. Kebuah pia duku tu endang beguna bendar dikena kitai beridup besehari-sehari kelebih agi orang ke diau di menua pesisir. Ambika chunto, duku tu dikena bebelaka lauk, netak kayu, ngambi ruas, dibai mindah ke babas awakka nyadika kering semengat enggau mayuh agi pengawa ti bukai. Nya alai, duku tu endang enda tau nadai ba siti-siti ruang bilik laban mayuh bendar guna iya ba pengidup kitai mensia.

31/03/2026

Rajin nanya pekara ti enda ditemu ngagai pengajar nya chara ti kepenudi nembiak tau bulih pemujur ba peresa. Nembiak ke bisi penanggul senentang pekara ke dipelajar kelebih agi ba siti-siti subjek patut enda malu betanya ngagai pengajar ti ngajar sida laban sida nya baka Ingkat nemu nyapat lubang kilat tang enda nemu mampul lubang guntur, Bengkang nemu nensang lubang nyang tang enda nemu mampul lubang lambur. Ambika banding, nembiak patut rajin nanya pengajar enti sida enda nemu chara teulihka saut ti betul lebuh ngaga latih Matemarik, nyaut tanya ti begunaka pengelandik berunding tikas tinggi, chara nyebut jaku Inggeris ti engkeman, chara nukar jaku Melayu Klasik ngagai jaku Melayu Standard enggau pekara bukai ti enda ditemu. Enti nembiak enggai nanya pengajar, dia penemu sida deka tasal lalu enda ngerembai ti ngujungka sida enda mujur ba peresa. Nya alai, pengerajin betanyaka pekara ti enda ditemu ngagai orang bukai kelebih agi ngagai pengajar patut nyadika ti pemaiulah ngagai bala nembiak enti sida deka mujur ba peresa.

29/03/2026

Karang Pom 4 – Dunya Diri Empu
Disiplin ti tegap nyadika pelasar awakka nembiak mujur ba pelajar.
Pejuraika.

Isi Karang:
1. Napi peresa
2. Magi jam
3. Ulah ti manah

Chunto Karang:

Disiplin endang siti pekara ti beguna bendar ba pengidup siku-siku nembiak sekula. Taja pia, agi mayuh bala nembiak bedau beseling runding lalu nempayaka disiplin tu ba pengidup diri ti ngujungka sekeda sida teulihka pengelebu munyi sempama puntan baka menasan jalai jelu, labah baka buah merunjau ulu. Nya alai, tanya ke deka dikusaika ditu iya nya nama kebuah disiplin ti tegap nyadika pelasar awakka nembiak mujur ba pelajar?
Siti ari kebuah disiplin ti tegap nyadika pelasar awakka nembiak mujur ba pelajar iya nya dikena sida napi peresa enggau mujur. Kebuah pia, pengawa belajar tu endang begunaka disiplin dikena mentin bala nala nembiak ninggalka pelajar diri. Ambika chunto, disiplin ba pelajar tu nyengkaum nembuka kereja rumah ba maya ti patut, ninga sereta belematika pekara ti diajar pengajar dalam kelas, datai belama ke sekula enggau mayuh agi pekara ti bukai. Beduduk ari nya dia nembiak enda tinggal pelajar sereta atam ba pelajar diri. Nya alai, pemujur ba pelajar tu endang datai ari disiplin ti dikembuan diri empu lalu disempulang pengerajin ti nganchin munyi sempama genggam bara api dataika nyadi arang.

Address

Brayang Ulu
Roban
95300

Telephone

+60178083729

Website

Alerts

Be the first to know and let us send you an email when Karang Jaku Iban posts news and promotions. Your email address will not be used for any other purpose, and you can unsubscribe at any time.

Contact The School

Send a message to Karang Jaku Iban:

Shortcuts

Share