03/07/2026
Alhamdulillah! Azordi dan nou Masjid, finn ena premie Dars e Tajweed-ul-Qur'an.
Dan Dars azordi, finn koz lor linportans lir Qur'an e Kareem korek, kifer Tajweed neseser ek kifer aprann li Farz.
Finn osi explike ki Qur'an e Kareem finn desann dan lang Arab, ek dan Qur'an e Pak ena 86 Sourah Makki ek 28 Sourah Madani. Finn osi donn enn fason fasil pou rapel sa:
Pli gran Sourah dan Quran e Kareem se Sourah Al-Baqarah, ki ena 286 Aayat.
Tir 2 depi 286, res 86 = 86 Sourah Makki.
Tir 6 depi 286, res 28 = 28 Sourah Madani.
Allah Ta‘ala finn dir:
﴿إِنَّا أَنْزَلْنَاهُ قُرْآنًا عَرَبِيًّا لَعَلَّكُمْ تَعْقِلُونَ﴾
So sans: “San okenn dout, Nou finn fer sa Quran-la desann dan lang Arab, pou ki zot kapav konpran li.”
(Sourah Yusuf: 2)
Ek Allah Rabbul izzat finn dir:
﴿وَرَتَّلْنَاهُ تَرْتِيلًا﴾
So sans: “Ek Nou finn fer Quran desann avek Tartil.”
(Sourah Al-Furqan: 32)
Ek apre Li finn dir:
﴿وَرَتِّلِ الْقُرْآنَ تَرْتِيلًا﴾
So sans: “Ek lir Qur'an bien kler ek avek atansion.”
(Sourah Al-Muzzammil: 4)
Dan Dars, finn explike ki “lir bien kler” pa vedir zis lir dousman. Li vedir lir Quran e Kareem avek Makhraj korek, son korek ek dapre tou bann regleman Tajweed.
Dapre Hadith Mubarak, finn osi explike ki dimounn ki aprann lir Qur'an e Kareem korek ek lir li bien, li pou ansam avek bann anz ki bien pros ar Li ek bien onore.
Parey koumsa mem, atraver bann lexanp, finn explike ki si enn let ouswa so Harakat sanze, so sans osi sanze. Akoz sa, sak Muslim bizin aprann sa kantite Tajweed ki permet li lir Qur'an e Kareem korek.
Alafin, finn explik sink drwa Qur'an e Kareem:
Ena lafwa dan Qur'an e Kareem.
Lir Qur'an e Kareem dan enn fason korek.
Konpran Qur'an e Kareem.
Met bann lansegnman Qur'an e Kareem an pratik.
Fer mesaz Qur'an e Kareem ariv kot lezot dimounn.
In shaa Allah Ta‘ala, depi prosin Dars, leson pratik Ilm Tajweed pou koumanse bien kouma bizin. Nou pou aprann sak Qaida enn par enn dan enn fason fasil.
Ki Allah Ta‘ala donn nou kapasite pou lir Qur'an e Kareem korek, konpran li, met so bann lansegnman an pratik ek fer so mesaz ariv kot lezot dimounn. Aameen.
