St Michael School

Ilbieraħ l-istaff ipparteċipa f'attivita' tat-tmiem tas-sena skolastika. Dan in-nofstanhar sar fil-qasam tal-MUSEUM ta' Birżebbuġia. Il-ġurnata bdiet b'quddiesa ta' ringrazzjament lil Alla, u wara ħin għall-kafe', sar mument ta' riflessjoni minn Ms Amanda Smith, għalliema tal-Ingliż li qed ittemm il-ħidma tagħha fl-iskola tagħna. Din il-parti ntemmet b'messaġġ mis-surmast. Wara ġie organizzat logħob bl-ilma. Fl-aħħar l-istaff kiel xi ħaġa tajba flimkien.

Nirringrazzjaw lil kull min kien involut fl-organizzazzjoni ta' din l-attivita'. Inroddu ħajr lil Alla!

Ilbieraħ, 20 ta’ Ġunju, ġiet organizzata ġurnata Sqallija għall-istudenti tald-9 u l-10 sena li ddistingwew ruħhom fl-imġiba matul is-sena skolastika. Il-ġurnata bdiet b’titjira lejn Catania kmieni filgħodu, breakfast, żjara u mument ta’ talb fil-Katidral ta’ Sant’Agata, ħin ta’ avventura fil-Milo Parco Avventura, ikla flimkien, żjara fil-Gole dell’Alcantara u f’Acicastello. Żgir li kienet esperjenza li l-istudenti ser jibqgħu jiftakru.

Nirringrazzjaw lis-Sinjura Sharon Camilleri tal-għajnuna fl-organizzazzjoni kif ukoll lill-edukaturi li b’mid volontarju akkumpanjaw lill-istudenti tagħna.

Illum sellimna lill-istudenti kollha fi tmiem l-eżamijiet annwali. Wara l-aħħar eżami, l-istudenti nġabru fis-sala għal programm li kien jinkludi tqassim tal-premjijiet tal-isports, kant, kwiżż għall-għalliema u anke ġabra ta' aħbarijiet umorużi mill-iskola. Sellimna wkoll lis-Sur Danilo Caruana u lil Ms Amanda Smith li qed itemmu l-ħidma tagħhom fl-iskola tagħna. Fi tmiem il-programm, l-istudenti niżlu fil-bitħa fejn tqassam ġelat u kellhom iċ-ċans isellmu lil xulxin. Pero' fadlilna l-aħħar ftit...fil-ġranet li ġejjin ser isiru l-attivitajiet għall-istudenti f'kull form li kienu ta' eżempju għal sħabhom fl-imġiba. Jonqos ukoll l-aħħar laqgħa għall-istaff!

Nirringrazzjaw lill-istaff kollu għad-dedikazzjoni tagħhom matul din is-sena skolastika. Nirringrazzjaw ukoll lill-istudenti tagħna li mlew l-iskola tagħna b'ħafna ferħ matul ix-xhur li għaddew. Grazzi wkoll lill-ġenituri tas-sostenn tagħhom matul is-sena. Nawguraw sajf sabiħ u ta' mistrieħ lil kulħadd!

Inroddu ħajr lil Alla!

Situation Vacant

Full-Time Learning Support Educator on an indefinite contract basis.
Full-Time Learning Support Educator on a definite contract basis.

Applicants must meet the following minimum requirements:
- 20 week LSE course or
- Any subject at Advanced Matriculation Level (A Level)
- An Ordinary Level (O Level) pass in English language, Mathematics, and Maltese
- Additional Ordinary Level (O Level) pass in any other subject.

Applicants may send a detailed CV to the Board of Directors via email at [email protected] by not later than Friday, 26th June 2026

Apprezzament - Frank Micallef

Illum ħadna l-aħbar li s-Sur Frank Micallef, eks-għalliem tal-iskola tagħna, daħal qabilna fl-eternità. Lis-Sur Micallef niftakruh bħala għalliem ħabrieki u kollega sinċier. Ejjew nitolbu għalih u għall-għeżież tiegħu. Il-funeral ser isir nhar is-Sibt li ġej fit-8.30am fil-Bażilika tal-Mosta.

Alla Missier noffrulek il-Pjagi Divini ta’ Kristu Iben għal din ir-ruħ, sabiex idaħħlu fil-ferħ tiegħek. Ammen.

Studenti Taljani f’Esperjenza Kulturali u Edukattiva f’Malta – Mejju 2026

F’Mejju 2026, grupp ta’ 25 student u 2 għalliema mill-Istituto di Istruzione Superiore Leonardo Da Vinci ta’ Sora, Frosinone, żaru Malta bħala parti mill-proġett Etwinning “Confini da attraversare”. Il-programm ta’ ħamest ijiem kien mimli attivitajiet kulturali, edukattivi u soċjali li ppermettew lill-istudenti Taljani jiskopru l-wirt Malti u jinteraġixxu mal-komunità skolastika lokali.

It-Tnejn 11 ta’ Mejju – Merħba u mawra tal-Imdina u r-Rabat
Il-grupp wasal Malta fil-10:30 u mar direttament lejn ir-residenza Dar il-Ħanin Samaritan, fejn ġew milqugħa mid-Direttur u ngħataw il-kmamar tagħhom. Wara l-ikel ta’ nofsinhar, l-istudenti żaru l-belt l-antika tal-Imdina u r-Rabat, fejn esploraw il-Katakombi u l-ambjent storiku tal-lokalitajiet. Hawnhekk iltaqgħu wkoll ma’ studenti Maltin, li magħhom bdew jibnu l-ewwel kuntatti. Il-jum intemm b’mixja ta’ filgħaxija f’Birkirkara.

It-Tlieta 12 ta’ Mejju – L-Isla, il-Birgu u Festa mal-Maltin
Wara l-kolazzjon, l-istudenti iltaqgħu mal-kap tal-iskola. Aktar t**d żaru l-bliet fortifikati tal-Isla u l-Birgu, fejn ħadu sehem f’attività interattiva dwar l-istorja tal-Isla bl-użu tal-mowbajl.
Wara l-ikel fuq il-Waterfront tal-Isla, il-grupp għamel mixja lejn il-Birgu u żar Kastell Sant’Anġlu, magħruf ukoll bħala l-post fejn kien miżmum Caravaggio. Filgħaxija, l-istudenti rritornaw l-iskola għal festa organizzata mill-ġenituri, li fiha kellhom logħob tal-futbol u attivitajiet mal-istudenti Maltin. Il-jum intemm b’ritorn għar-residenza fid-21:30.

L-Erbgħa 13 ta’ Mejju – Jum f’Għawdex
Kmieni filgħodu, il-grupp telaq lejn il-Marfa biex jaqbad il-vapur għal Għawdex. L-ewwel waqfa kienet f’Victoria (ir-Rabat), fejn żaru ċ-Ċittadella u raw wirja multimedjali dwar l-istorja tal-gżira. Wara komplew lejn Marsalforn għall-ikel ta’ nofsinhar u mbagħd marru r-Ramla l-Ħamra għal għawma qasira.
Filgħaxija reġgħu qabdu l-vapur lura lejn Malta u, wara l-ikel fir-residenza, għamlu mixja oħra fl-Imrieħel.

Il-Ħamis 14 ta’ Mejju – Il-Furjana, il-Belt Valletta u l-Ġonna tal-Barrakka
Wara tour tal-iskola filgħodu, il-grupp telaq lejn il-Furjana u l-Belt Valletta. Huma għaddew mit-toroq storiċi tal-kapitali u żaru l-Palazz Presidenzjali. L-ikel sar f’wieħed mill-ħwienet jew take-aways tal-Belt, segwit minn ftit ħin liberu.
Waranofsinhar, żaru l-Konkatidral ta’ San Ġwann, wieħed mill-aktar monumenti importanti tal-wirt Malti. Aktar t**d iltaqgħu ma’ studenti Maltin għal mixja lejn il-Ġonna tal-Barrakka, fejn gawdew il-veduti tal-Port il-Kbir. Il-jum intemm b’ritorn għar-residenza u filgħaxija reġgħu marru sal-Belt Valletta.

Il-Ġimgħa 15 ta’ Mejju – Attività Interkulturali u Żjara f’Ta’ Qali
L-aħħar jum beda b’attività fl-iskola marbuta mal-proġett “Confini da attraversare”, li kellha l-għan li tlaqqa flimkien lill-istudenti Maltin u Taljani. Wara mixja fiċ-ċentru ta’ Santa Venera u l-ikel fir-residenza, il-grupp telaq bil-bagalji lejn Ta’ Qali, fejn żaru l-Villaġġ tal-Artiġjanat u xtraw xi tifkiriet.
Fl-aħħar nett, waslu l-ajruport fis-16:30 biex jitilgħu fuq it-titjira tagħhom lejn l-Italja fis-18:30

Gradwazzjoni 2026
Nhar il-Ġimgħa 5 ta' Ġunju, saret il-gradwazzjoni tal-istudenti tal-11 -il sena li temmew l-istudji tagħhom fl-iskola tagħna. Is-serata bdiet b'quddiesa animata mill-membri tal-istaff u l-istudenti tagħna. Wara, saret ċerimonja li nkludiet diskorsi mill-istudenti, ġenituri u membru tal-istaff. Wara sar it-tqassim taċ-ċertifikati u premjijiet marbuta ma' avvenimenti sportivi u suċċess akkademiku. Is-serata intemmet b'riċeviment li fit-tmiem tiegħu intwera feature b'ritratti tal-istudenti matul is-snin tagħhom fl-iskola.
Nawguraw minn qalbna lill-istudenti kollha u nwiegħdukom it-talb tagħna! Il-bieb tagħna dejjem miftuħ!

Din is-sena bħala skola ħadna sehem għall-ewwel darba fil-kwiżż tar-rivista Sagħtar li jixxandar fuq Sagħtar FM RTK 103. Għal dawn l-aħħar ġimgħat, tliet studenti mis-Seba' Sena, Luigi Monseigneur, Matthew Zammit McElhatton u Jake Mercieca pparteċipaw f'dan il-kwiżż b'ruħhom u b'ġisimhom, tant li darba wara oħra dejjem rebħu u nhar il-Ġimgħa 22 ta' Mejju kellhom il-finali u kklassifikaw fit-tieni post. Nifirħulhom immens għax ħadmu ħafna għalih u mhux biss kellhom iċ-ċans jaqraw iktar artikli interessanti mir-rivisti tas-Sagħtar, imma wkoll tgħallmu ħafna ħiliet oħra bħal ħidma f'tim, tisħiħ fil-kunfidenza u esperjenza li jitkellmu fuq ir-radju. Prosit tassew. Bħala rikonoxximent ingħataw ċertifikat u ktieb tal-għażla tagħhom. B'din l-opportunità nħeġġu studenti oħra mis-Seba' Sena biex jabbonaw mar-rivista Sagħtar għax fiha nsibu artikli tant interessanti u wkoll ħalli jkollhom iċ-ċans jipparteċipaw. Nirringrazzjaw lil Sa Anne Marie Camilleri ta' din l-inizjattiva u talli akkumpanjathom.

Illum l-istudenti tagħna jibdew l-eżamijiet annwali. Nawgurawlhom u nitolbu għalihom!

Illum ħadna l-aħbar li missier Daniele Cardona, student tad-9 sena, għadda għall-ħajja ta’ dejjem. Nitolbu għal ruħ missier Daniele u għall-familja tiegħu.

Alla Missier, noffrulek il-Pjagi Divini ta’ Kristu Ibnek għal din ir-ruħ sabiex iddaħħalha fil-ferħ etern tiegħek. Ammenn.