07/07/2026
БАГШ СУРАГЧДАДАА БАЯР ХҮРГЭЕ.
🏆 УВС АЙМАГ 2025–2026 ОНЫ ХИЧЭЭЛИЙН ЖИЛИЙН БОЛОВСРОЛЫН ШИЛДГҮҮДЭЭ ШАЛГАРУУЛЖ, 229.5 САЯ ТӨГРӨГИЙН УРАМШУУЛАЛ ГАРДУУЛЛАА.
👏 "Амжилт бахархал – 2026" арга хэмжээний хүрээнд олон улс, улс, бүсийн олимпиад, уралдаан тэмцээн болон элсэлтийн ерөнхий шалгалтад өндөр амжилт гаргасан сурагчид, тэднийг бэлтгэсэн багш нарыг өнөөдөр хүндэтгэн алдаршуулж, мөнгөн урамшуулал гардууллаа.
📌 Увс аймгийн Засаг даргын 2025–2028 оны "Увс хөгжил" үйл ажиллагааны хөтөлбөрийн хүрээнд хэрэгжүүлж буй "Дэлхийн иргэн" төсөл арга хэмжээний үр дүнд багш сурагчдын амжилтын түвшин ахисаар байна.
🥇 2025–2026 оны хичээлийн жилд Увс аймгийн сурагчид, багш нар улсын төрөлжсөн олимпиадаас нийт 22 медаль хүртсэн нь өмнөх оны 13 медалиас 59 хувиар өссөн үзүүлэлт болж байна. Энэхүү амжилтыг үнэлэн медальт сурагчид болон тэднийг бэлтгэсэн багш нарт 82 сая төгрөгийн мөнгөн урамшуулал олгожээ.
🌍 Олон улсын шалгалтын үзүүлэлт мөн өссөн байна. IELTS, SAT болон бусад олон улсын шалгалтад өндөр үнэлгээ авсан сурагчдын тоо өмнөх онд 25 байсан бол энэ жил 50 гаруйд хүрч, IELTS, SAT-ын оноогоо элсэлтийн ерөнхий шалгалтын 800 оноотой дүйцүүлсэн сурагчдын тоо 3-аас 8 болж нэмэгджээ. Эдгээр сурагчид болон багш нарт 45 сая төгрөгийн урамшуулал олгож, шагналыг Элсэлтийн ерөнхий шалгалтын амжилттай хамтатган гардуулсан байна.
📚 2026 оны Элсэлтийн ерөнхий шалгалтаар Увс аймгаас 800 оноо авсан 4 сурагч, 750–799 оноо авсан 21 сурагч шалгарчээ. Математик, англи хэл, биологи, монгол хэл, нийгэм судлал, физикийн хичээлээр амжилттай бэлтгэсэн багш нар болон сурагчдад нийт 102.5 сая төгрөгийн мөнгөн урамшуулал олголоо.
🇲🇳 Мөн үндэсний өв соёлыг түгээн дэлгэрүүлэх "Эх хэл – 2026" улсын анги нийтийн уралдаанд Увс аймгийн сурагчид гуравдугаар байр эзэлсэн бол аймгийн багш нар Үндэсний эрдэм шинжилгээний илтгэлийн уралдаанд сүүлийн таван жил дараалан медальт байрт шалгарсан амжилтаа үргэлжлүүлжээ.
🛠️ Мэргэжлийн болон техникийн боловсролын салбарт ч ахиц гарсан байна. "Монгол ур чадвар – 2026" улсын уралдаанд багш, суралцагчид нийт 13 медаль хүртэж, өмнөх оны амжилтаа 60 хувиар ахиулжээ.
🧠 Олон улсын болон улсын оюуны тэмцээнүүдэд ч Увс аймгийн сурагчид амжилттай оролцсон байна. Логик паззлын олон улсын уралдаанаас 1 мөнгө, 4 хүрэл медаль, цом хүртсэн бол "Оюуны наадам – 2026" улсын тэмцээнээс 6 алт, 2 мөнгө, 6 хүрэл медаль хүртэж, ТОП-10 тамирчны ес нь Увс аймгийн сурагчид болсон байна.
📝 Түүнчлэн сурагчдын мэдлэг, чадварыг олон улсын түвшинд үнэлэх зорилгоор PISA шалгалтын анги нийтийн сорилыг аймагтаа анх удаа 3–9 дүгээр ангийн сурагчдын дунд амжилттай зохион байгуулжээ.
🤝 Увс аймгийн Засаг дарга Э.Насанбат "Амжилт бахархал – 2026" арга хэмжээний үеэр сурагчдыг амжилтад хүргэсэн багш нар, хүүхдийнхээ боловсролын төлөө тууштай дэмжлэг үзүүлсэн эцэг эхчүүдэд талархал илэрхийлж, цаашид сургалтын чанарыг тасралтгүй дээшлүүлэн, мэдлэгт суурилсан хөгжлийг тууштай дэмжин ажиллахаа онцоллоо.
🎉 Энэ удаагийн арга хэмжээний хүрээнд олимпиад, олон улсын шалгалт болон Элсэлтийн ерөнхий шалгалтад өндөр амжилт гаргасан сурагчид, багш нарт нийт 229.5 сая төгрөгийн мөнгөн урамшуулал гардуулсан нь боловсролын салбарын амжилтыг бодитоор үнэлж, урамшуулж буй томоохон дэмжлэг боллоо.
