30/03/2026
ДЭЭВРИЙН ӨРӨӨН ДЭХ МИНИЙ МӨРӨӨДӨЛ БУЮУ R=VD
Солонгосын зохиолч И Жи Сонгийн “Дээврийн өрөөн дэх миний мөрөөдөл” номоор “Миний уншсан ном-Миний амьдралд-XIII” ээлжит илтгэлийн тэмцээнээ явууллаа.
Илтгэгч оюутнууд номын эхний хэсэг буюу “Амжилтыг мөрөөдөх юм бол боломж өөрөө л хүрээд ирнэ, зүгээр л нүдэндээ харагдтал төсөөлөх юм бол биелэнэ” гэсэн агуулга бүхий номын эхний хэсгүүдэд эхэндээ ерөөс итгээгүй” гэдгээ хэлж байв. Харин үргэлжлүүлэн уншиж судлахдаа өөрсдийн эзэмшиж буй сэтгэл судлалын салбарын мэдлэг, ур чадвартайгаа хослуулан өөртөө итгэл үнэмшил бий болгон, мэдээллийг задлан шинжлэх явцдаа “мөрөөдлөө хэрхэн биелүүлэх-арга зүйгээ олсон” гэдгээ илтгэгчид итгэл төгс тайлбарлаж байлаа. Тухайлбал, тэмцээний тэргүүн байрын шагналт Сэтгэл судлалын IV дамжааны оюутан Ц.Даваадорж бага байхдаа унадаг дугуй авна гээд өнгө хэлбэрийг нь чин сэтгэлээсээ төсөөлөн боддог байсан, нилээд хэд хэдэн дугуйтай болсон дурсамжаа “Үнэхээр сэтгэлийн гүнээсээ хүсэж, хичээнгүй төсөөлдөг байсан учраас миний тархи бодит хэмээн хүлээн авч гүйцэтгэсэн. Илүү нарийн тайлбарлавал төсөөлөл, бодит ертөнц хоёрыг тархи ялгаж чаддаггүй. Тиймээс тархиа бид нэг талаараа хуурч байна гэсэн үг. Нүдэндээ харагдтал төсөөлөх үед бидний тархи тэр зүйлийг бодит хэмээн хүлээн авч биелүүлэхийг зорих болно. Би бага байхдаа маш их төсөөлдөг хүүхэд байсан. Ихэнх цагтаа ямар нэгэн хүүхдийн хэрэгцээндээ таарсан зүйлийн талаар төсөөлөн, мөрөөдөн хэвтдэг байсан. Том болохын хэрээр тэр маш их төсөөлдөг байдал маань багасч байсан. Учир нь би дэмий зүйлд цаг зав их үрж байна гэж боддог байсан. Гэхдээ одоо бол эргээд урам авч эхэлсэн. Дурсамжуудаа эргээд уудлах юм бол VD хэрэгжсэн үеүүд маш их байна. Гэхдээ мэдээж би тэгэж төсөөлөн нүдэндээ харснаас бодит болсон гэдгээ одоог хүртэл энэ номыг унших хүртэл ойлгоогүй байж. Ойглож эхэлснээс өөртөө шинээр хэрэгжүүлж байгаа зүйл бол төсөөлөлдөө цаг гаргаж эхэлсэн. Энэ цаг нь унтахын өмнө бүх ажлаа амжуулаад орондоо хэвтээд унтах хүртлээ төсөөлдөг болсон. Тэгээд нэг л мэдэхэд унтсан байдаг. Өдөр болгон давтамжтай хийгээд энийгээ бүүр зуршил болгож байгаа. Бас сөрөг VD хийхээ больсон” гэж байв.
Тус тэмцээний дэд байрын шагналт Сэтгэл судлалын IV дамжааны оюутан Г.Лувсан-Очир “R=VD зарчмийг ашиглаж амжилтанд хүрэх алхмааа нэгээр ахиулах сэдэл энэ номыг уншсанаар хүчтэй төрсөн. Ингээд яагаад болохгүй гэж гэсэн бодлоор би R=VD-ыг мэргэжил, хобби хоёртойгоо хослуулан хийхээр дасгалаа хийж эхэлсэн. Хар багын л адуучид, адуу хоёртой ойр өссөн би орчноо дагаад уу генээ дагасан уу мэдэхгүй ямартай ч морь ярихад сортолзож нуруун дээр нь дарцгалсаар өдий хүрсэн хүн бөгөөд Хүй мандлын торгон дэнжид хүлэг морио түрүүлүүлж хурсан олныг баярлуулах мөрөөдөл тээдэг. Сурч буй мэргэжлээ ч ахуйтай холбон сэтгэл судлал гэх шинжлэх ухааныг хурдан хүлэгтэй холбож том нээлтийг хийж амжилтанд хүрэх мөрөөдлийг цээжэн гүндээ тээсээр анхны алхам болох дипломын ажлыг хурдан морины амжилтад уралдаанч хүүхдийн сэтгэл зүйн хувийн онцлог, темтерамент хэрхэн нөлөөлөх талаар судлахаар эхэлсэн юм. Энэ судалгааны цаашдын зорилго нь Монгол уяач мориныхоо сэтгэл зүй онцлогийг уралдаанч хүүхдийнхээ сэтгэл зүйн онцлогтой зохицуулж сурсан байхад оршино. Энэхүү мөрөөдлөө нүдэндээ төсөөлж цаасан дээр буулгаснаа энд өгүүллээ” гэв.
Мөн энэхүү уралдааны тусгай байрны шагналт Сэтгэл судлалын III дамжааны оюутан Ч.Буянбилэг “Мөрөөдлийн самбар”-аа бусаддаа танилцууллаа.
Уншсан номныхоо агуулга, бүтээлч санааг хэрхэн өөрийн амьдралд хэрэгжүүлэхээ төлөвлөж, хэрэгжүүлж эхэлснээ бусадтай хуваалцдаг уламжлалт арга хэмжээний дараагийн бүтээл хэн гэдэг зохиолчийн ямар ном байх бол?
