23/09/2026
СУИС-ийн Бүжгийн урлагийн сургууль нь олон улсын хамтын ажиллагааны хүрээнд Германы Кёльн хотын Хөгжим, бүжгийн их сургуулийн (Hochschule für Musik und Tanz Köln) Бүжгийн сургуулийн бакалаврын хөтөлбөрийн захирал, профессор Вера Сандер (Vera Sander)-ийг урьж, багш, оюутнуудтай хамтран ажиллалаа.
🎓 Оюутнуудад:
• Орчин үеийн бүжгийн техник,
• Хөдөлгөөний анализ,
• Импровизаци хийх арга зүй, бүтээлч сэтгэлгээ
• Бүжигчний өөрийн уран бүтээлийн замнал, artist biography
• Уран бүтээлээ танилцуулах, тайлбарлах, өөрийгөө эргэцүүлэн үнэлэх арга барил
• Урлагийн бүтээл хийх явцад санал, шүүмж хүлээн авах болон өгөх арга барил зэрэг чиглэлээр хичээл удирдав.
Эдгээр сургалтаар дамжуулан оюутнууд зөвхөн хөдөлгөөний ур чадвараа хөгжүүлэхээс гадна “би ямар агуулгатай бүжиг хийж байна вэ?”, “яагаад ингэж хөдөлж байна вэ?”, “уран бүтээлээ хэрхэн тайлбарлах вэ?” гэсэн асуултаар уран бүтээлчийн байр суурийг эргэцүүлэн дүгнэх арга барилд суралцав.
👩🏫 Мөн Бүжгийн урлагийн сургуулийн багш нарт их сургуулийн бүжгийн боловсролын орчин үеийн сургалтын арга зүй, хөтөлбөрийн төлөвлөлт, багшлах арга барил, оюутны хөгжлийг дэмжих арга, feedback буюу бүтээлч санал шүүмжийн соёл зэрэг асуудлаар туршлага солилцлоо.
Багш, оюутан хоёрын харилцааг зөвхөн “заах–сурах” харилцаагаар бус, хамтдаа судлах, асуулт тавих, турших, эргэцүүлэх, харилцан суралцах үйл явц болгон хөгжүүлэхэд анхаарсан юм.
💬 Сургалтын үр дүнгийн нэг нь feedback буюу бүтээлч санал шүүмжийн шинэ хандлагыг сургалтын үйл явцад нэвтрүүлэх эхлэл тавьсан явдал байлаа.
Санал шүүмжийг зөвхөн “сайн–муу”, “зөв–буруу” гэж үнэлэх бус, уран бүтээлчийг өөрийн бүтээлээ илүү гүнзгий ойлгож, хөгжүүлэхэд тогтоосон цагт сунжрахгүйгээр оносон үгээр соёлтой санал, шүүмжээ хэлж сурах арга барилуудыг туршин заав.
Хоёр долоо хоногийн сургалтын төгсгөлд оюутнууд өөрсдийн сурч мэдсэн зүйл, цаашид хөгжүүлэх шаардлагатай асуудлуудаа багш нар болон шинээр элссэн оюутнуудтай нээлттэй хуваалцсан нь сургалтын үр дүнг бодитоор харуулсан юм.
🌱 Цаашид энэхүү хамтын ажиллагааны хүрээнд:
Багш, оюутан солилцох
🔹 Бүжгийн сургалтын хөтөлбөр, агуулгыг олон улсын жишигтэй уялдуулах
🔹 Багшийн мэргэжлийн тасралтгүй хөгжлийн тогтолцоог бэхжүүлэх
🔹 Feedback, reflection, critical thinking-д суурилсан сургалтын арга зүйг хөгжүүлэх
🔹 Оюутны уран бүтээлчийн бие даасан байдлыг дэмжих
🔹 Олон улсын их, дээд сургуулиудтай академик болон уран бүтээлийн хамтын ажиллагааг өргөжүүлэх
зэрэг чиглэлээр үргэлжлүүлэн ажиллах боломж бүрдэж байна.
Бүжгийн урлагийн сургуулийн багш, оюутнуудтай хамтран ажилласан профессор Вера Сандерт чин сэтгэлээсээ талархал илэрхийлье!
