30/09/2026
🌱 ОРХОН ХАСҮ СУРГУУЛЬД “HAPPY SCHOOL” ТӨСӨЛ ХЭРЭГЖИЖ БАЙНА
Хүүхэд сургуульдаа юу сурч байгааг бид дүн, үнэлгээгээр хэмждэг. Харин сургуульдаа өөрийгөө хэрхэн мэдэрч байгааг нь хэр олон удаа асуудаг бол?
Миний үгийг сонсдог хүн энд бий юу?
Намайг байгаагаар минь үнэлдэг үү?
Би энд аюулгүй юу?
Би энэ хамт олны нэг хэсэг мөн үү?
Хамгийн гол нь — би өөрөө “Би чадна” гэж итгэдэг үү?
Өсвөр насны хүүхдийн сурч хөгжихөд мэдлэг, академик амжилт чухал хэдий ч тэдний өдөр бүр ирдэг сургууль, уулздаг хүмүүс, мэдэрдэг харилцаа, өөртөө итгэх итгэл түүнээс ч дутахгүй чухал.
Энэ хичээлийн жилд Дэйл Карнеги Трэйнинг Монголын зүгээс Орхон ХаСү сургуультай хамтран “HAPPY School” төслийг хэрэгжүүлж байна. Төслийн гол онцлог нь зөвхөн сурагчдыг оролцуулах биш тэдний өдөр тутмын амьдралд хамгийн ойр байдаг сурагч–багш–эцэг эх гэсэн гурван талыг хамтад нь оролцуулж буй явдал юм.
Төслийн HAPPY хэмээх нэр өөрөө бидний хүүхдүүддээ бүрдүүлэхийг хүсэж буй орчныг илэрхийлнэ.
H — Heard | Сонсогддог
A — Appreciated | Үнэлэгддэг
P — Protected | Хамгаалагддаг
P — Participating | Оролцдог
Y — Yes, I can | “Би чадна” гэдэгтээ итгэдэг
Манай 10–12 дугаар ангийн сурагчид Дэйл Карнегийн Generation.Next хөтөлбөрийн 24 цагийн сургалтад гурван өдрийн турш хамрагдаж дууслаа. Өөртөө итгэх итгэлээ хөгжүүлэхээс эхлээд бусдыг сонсож ойлгох, санаа бодлоо зөв илэрхийлэх, сэтгэл хөдлөлөө удирдах, зөрчлийг зөв зохистой шийдвэрлэх хүртэл өсвөр насанд төдийгүй цаашдын амьдралд нь хэрэг болох олон ур чадвар дээр тэд хамтдаа ажиллалаа.
Сургалтын дараах сурагчдын сэтгэгдэл ч биднийг баярлууллаа. Хүүхдүүд сургалтыг маш өндөр үнэлж, сонирхолтой, өгөөжтэй, өөрсдөд нь үнэхээр хэрэгтэй сургалт болсныг онцолж байв. Харин Дэйл Карнеги Трэйнинг Монголын сургагч багш нар манай сурагчдын идэвх оролцоо, хичээл зүтгэл, харилцаа хандлага, хүмүүжил төлөвшлийг өндрөөр үнэлж, тэдэнтэй ажиллахад таатай байснаа илэрхийлсэн нь бидний хувьд бас нэгэн сайхан үнэлгээ байлаа.
Ийнхүү гурван өдрийн сургалт зөвхөн шинэ зүйл сурсан өдрүүд байгаад зогсохгүй, сурагчид маань өөрсдийгөө нээж, харин бид хүүхдүүдээ өөр өнцгөөс харах боломж болсон нь энэ удаагийн сургалтын хамгийн сайхан үр дүнгийн нэг байв.
Сурагчид өөрийгөө зөв илэрхийлж, бусдыг сонсож ойлгох чадварт суралцахын зэрэгцээ тэдний эргэн тойронд байгаа насанд хүрэгчид ч мөн хүүхдийг сонсож, ойлгож, дэмжих арга барилд суралцах нь чухал. Тиймээс төслийн дараагийн шатанд сурагчдын өдөр тутмын амьдралд хамгийн ойр байдаг багш, эцэг эхчүүдийг хамруулж, хүүхдэд сургалтаар олгосон мэдлэг, ур чадварыг сургууль болон гэр бүлийн орчинд дэмжин бэхжүүлэхэд чиглэж байна.
10 дугаар сарын 21-нд багш нар, 10 дугаар сарын 22-нд 10–12 дугаар ангийн сурагчдын эцэг эхчүүд тус бүр дөрвөн цагийн сургалтад хамрагдана. Багш нар сурагчдаа илүү сайн сонсож, дэмжих, эерэг харилцааг бэхжүүлэх талаар, эцэг эхчүүд өсвөр насны хүүхдээ анзаарч, сонсож ойлгох, шүүмжлэлгүй ярилцах арга барилын талаар хамтдаа суралцана.
Учир нь хүүхдийн эргэн тойрон дахь хүмүүсийн харилцаа өөрчлөгдөж байж хүүхдэд өгсөн сургалтын үр нөлөө бодит амьдралд үргэлжилнэ. Сургуульд нь сонсдог багш, гэрт нь ойлгож ярилцдаг эцэг эх, харин өөрт нь санаа бодлоо илэрхийлэх итгэл, бусдыг ойлгох чадвар — энэ бүхэн нэг нэгнээсээ салангид зүйл биш юм.
Хүүхэд, өсвөр үеийнхнийхээ төлөө ийм үнэ цэнтэй ажлыг санаачлан, манай сургуулийг хамтран ажиллах түншээр сонгон, мэдлэг туршлагаа харамгүй хуваалцаж буй Дэйл Карнеги Трэйнинг Монголын хамт олонд чин сэтгэлийн талархал илэрхийлье. 💚
Бидний хүсэж буй зүйл энгийн атлаа хамгийн чухал:
Хүүхэд сургуульдаа ирэхдээ
“Намайг сонсдог.
Намайг үнэлдэг.
Би энд аюулгүй.
Би энэ хамт олны нэг хэсэг.
Би чадна.”
гэж мэдэрдэг байх.
🌱 HAPPY School — сурагч, багш, эцэг эхийн хамтдаа бүтээх эерэг орчин.
