Эгшиглэн төгөлдөр хуурын сургууль

нийтийн боловсролын салбарыг хөгжүүлэх зорилгоор хүүхэд залуучууддаа зориулан төгөлдөр хуур хөгжмийн анхны цуврал сурах бичиг болох “PIANO” номыг боловсруулан гаргасан ба 2014 онд тус сурах бичгийн дараагийн цуврал болох “PIANO II” ном бүхий сургалтын хөтөлбөрийг эрхлэн гаргасан. Энэхүү сурах бичиг, сургалтын хөтөлбөрийг гаргаснаар Монгол орон даяар хүүхэд залуучуудад хөгжмийн боловсрол олоход илүү хүртээмжтэй болж хөгжмийн онолын мэдлэг, урлагийн түүхийн ойлголтыг өөрөө бие даан суралцаж танин мэдэх боломжтой болсон төдийгүй дэлхийн сонгодог болон орчин үеийн бүтээлүүдийг системчилсан сургалтын хөтөлбөрөөр тоглож суралцах нөхцөл боломж нь бүрдсэн билээ. Түүнчлэн уг сургалтын хөтөлбөр, ном нь мэргэжлийн багш нарт заах арга зүй, сургалтын гарын авлага болж өгсөнөөрөө хамгийн том ач холбогдолтой юм.
2014 онд дэлхийн хөгжмийн салбарын томоохон төлөөлөгч болох KAWAI хөгжмийн сургуулийн албан ёсны төлөөлөгч болж Япон улсын урлагийн боловсролын системийг өөрийн орондоо нэвтрүүлэн ажиллаж, Япон улсын хөгжмийн багш нарыг урин ажиллуулж туршлага мэдлэгээс нь хуваалцах, суралцах эхлэлийг тавиад байна. Энэ нь олон улсын сургалтын стандартыг өөрийн орондоо нэвтрүүлэхэд томоохон үүрэг гүйцэтгэх чухал эхлэл болсон.
2018 онд “Авьяаслаг Дарханчууд” хөтөлбөртэй хамтран ажиллаж Дархан-Уул аймгийн нийт ЕБС-ийн сургуулиудын дуу хөгжмийн багш нарыг олон улсын заах арга зүйн сургалтанд хамруулж нэгдсэн сургалтыг зохион байгуулсан ба улмаар Пиани Хармоник хөгжмөөр дамжуулан сурагчдыг урлагийн мэдлэг боловсролтой, хөгжимдөх чадвартай болгох хөтөлбөрийг хэрэгжүүлж, “Авьяаслаг Дарханчууд” урлагийн наадмыг хамтран зохион байгуулсан.
Манай сургууль өнгөрсөн хугацааны хуримтлуулсан туршлага, мэдлэг, баг, боловсон хүчний нөөц боломжоо ашиглан Монгол улсынхаа Ерөнхий боловсролын сургуулиудын дуу хөгжмийн багш нарыг чадваржуулах, заах арга зүйн олон улсын сургалтанд хамруулах хөтөлбөрийг сүүлийн хоёр жилийн хугацаанд амжилттай хэрэгжүүлэн ажиллаж байна.
Бид хөгжмийн урлагийн боловсролоор дамжуулан хүүхэд залуучуудыг ирээдүйн соёлт иргэн болгон төлөвшүүлэх зорилго дэвшүүлэн өнөөдрийн хүртэл ажилласаар ирсэн ба цаашид Монгол авъяасыг дэлхийд таниулах зорилгыг дэвшүүлэн өөрийн орны чадварлаг, авъяаслаг хүүхэд залуучуудыг дэмжин ажиллах зорилгоор 2021 оноос эхлэн үйл ажиллагаагаа өргөжүүлэн “Art of Ulaanbaatar” төвийг байгуулан үйл ажиллагаагаа өргөжүүллээ. “Art of Ulaanbaatar” төгөлдөр хуур, сонгодог урлаг, үндэсний урлаг, дүрслэх урлагийн сургалт, концертын танхим, шилдэг бүтээлийн үзэсгэлэн, урлагийн номын кофе, KAWAI төгөлдөр хуурын үзэсгэлэн худалдаа, соёл урлагийн менежментийн үйлчилгээ явагдана.