I see Enso

Морин толгойт зэн дугуй💪 Энсо
Гал морин жилд бүр цааш, цаашаа яв, хязгааргүйд чү чү

Энэ бэхэн зураг нь морьдын дүрээр дамжуулан хүч чадал, хамгаалалт, удам залгамжийн утгыг илэрхийлсэн бэлгэдэлт бүтээл юм. Хар ба цагаан өнгөний эсрэгцэл, дугуй зохиомж нь эв нэгдэл, мөнхийн холбоог мэдрүүлж байна.

Гал Морин жилдээ
Гал шиг бадарч,
Морь шиг хурдалж,
Аз хийморь дүүрэн байх болтугай!

Зургаа дахь машин ба Зэний дугуй

Нэгэн урт зам дээр арван машин цуваа үүсгэнэ.
Би зургаа дахь нь.

Би урдаа тавыг харна.
Тэд удаан явбал би удаан явна.
Тэд зогсвол би зогсоно.

Миний ард дөрөв бий.
Тэд намайг л харна.
Тэдний нүдэнд би саад.

Арын машин уурлана.
“Чи зам хаалаа!” гэж хараана.

Гэвч тэр миний урд буй тавыг үл харна.
Хамгийн урд яваа ганц машиныг бүр ч мэдэхгүй.

Ингээд уур, буруутгал, үл ойлголцол
цуваа шиг үргэлжилнэ.
………..

Үүнийг Зэн дугуй тойрогтой холбоё
(Нэг амьсгаагаар татсан дугуй.
Эхлэл ба төгсгөл нь нэг.
Төгс бус мөр нь төгс чанарыг илтгэнэ.)

⸻

🪷 Машины цуваа бол Энсо

Зам дээрх арван машин шулуун мэт.
Гэвч ухамсрын дээрээс харвал
энэ бол шулуун биш дугуй.

Урд яваа нь ардынхаа шалтгаан.
Арын уур нь урдынхаа үр.
Буруутгал нь үл ойлголцлын хэлбэр.

Энэ бүх хэлхээ
Энсогийн тойрог шиг тасралтгүй.

Хэн нэгнийг буруутгах мөчид
чи дугуйн дотор байна.

Харин бүхэлд нь харсан мөчид
чи дугуйг гаднаас нь харна.

⸻

Зэн ухаанд “асуулт”-аас илүү “шууд харах” чухал.

Арын машин бодож байна:
“Яагаад тэр удаан явна вэ?”

Зэн асууна:
“Чи бүх замыг харж байна уу?”

Хэрэв чи зургаа дахь машин гэдгээ ухаарвал
чи уурлахгүй.
Хэрэв чи арын машин гэдгээ танивал
чи буруутгахгүй.

Учир нь дугуйн аль ч цэг төвөөс хол биш.

⸻

Амьдрал шулуун зам биш.
Энэ бол Энсо
Нэг амьсгаагаар зурсан
шалтгаан ба үрийн дугуй.

Чи хаана явна вэ гэдэг чухал биш.
Чи дугуйг харж чадаж байна уу гэдэг л чухал.

Хадны зургаас сэдэвлэж Морин толгойт зэн дугуй бэхээр зурлаа. 🙏
Эртний дүрслэл, дотоод төвлөрөл, монгол ахуй гурвын уулзвар.