27/04/2026
🙏🏼🙏🏼Эрхэм багш минь
ЭМГЭНЭЛ
САМБУУГИЙН ТҮНДЭВРЭНЦЭН
АУ-НЫ ДОКТОР, ПРОФЕССОР
(1960-2026)
АШУҮИС-ийн Био-Анагаахын сургуулийн Анатомийн тэнхимийн ахмад багш анагаах ухааны доктор, профессор Самбуугийн Түндэврэнцэн 2026 оны 4 дүгээр сарын 23-ны өдөр хүнд өвчний улмаас таалал төгсөж Монголын анагаах ухаан, эрүүл мэнд, хүний биеийн бүтэц судлалын салбарт нэгэн том орон зайг орхин одлоо.
Профессор С.Түндэврэнцэн нь 1960 онд Архангай аймгийн Цэнхэр сумын “Цагаан сүм” гэдэг газар айлын ууган хүү болон төрж 1979 онд Архангай аймгийн төвийн нэгдүгээр арван жилийн сургуулийг төгсөөд АУДС-д элсэн ороход нь зүрхний нэрт мэс засалч, Академич АШУ-ы доктор, профессор Т.Шагдарсүрэн багш Эрдмийн алтан түлхүүрийг гардуулан өгч, хичээлийн жилийн анхны хонхыг цохиж, 1985 онд АУИС-ийг хүний их эмч мэргэжлээр онцгойлох “Улаан диплом”-той төгссөн шилдэг оюутан байлаа. 1995 онд “Монгол хүний зүрхний эрүүл, эмгэг үеийн хэмжээг харьцуулан судалсан нь” сэдвээр АУ-ны магистр, 2000 онд “Монгол хүний эрүүл болон зарим эмгэгтэй зүрхний хэмжил зүйг судасжилтын хэлбэртэй харьцуулан судалсан нь” сэдвээр анагаах ухааны докторын зэрэг хамгаалж, 2007 онд дэд профессор цол, 2012 онд профессор цол хүртэж 25 ном, сурах бичгийн зохиогч, 4 номын редактор, 2 номын орчуулгад хамтран оролцож, 1 доктор, 9 магистр, 5 бакалаврын ажлыг удирдаж хамгаалуулсан, хэвлэн нийтлүүлсэн материал-20, эрдэм шинжилгээ, судалгааны ажлаас эшлэл 30, эрдэм шинжилгээний илтгэл, өгүүлэл 120 гаруй, олон улсын болон хоёр улсын их дээд сургуулийн хоорондын эрдэм шинжилгээний хурлын илтгэл 10, Дэлхийн эрүүл мэндийн байгууллагын төсөлт ажил 1, дотоодын төсөлт ажил 1, эрдэм шинжилгээний төсөлт ажилд өгөх санал 4, эрдэм шинжилгээний ажилд албан ёсны шүүмж 10, эрдэм шинжилгээний ажилд эксперт 3, боловсруулсан стандарт болон хөтөлбөрүүд 6, Монгол улсын шинэ бүтээлийн патент 3, ШБОС, тэргүүн туршлага 12-ыг нэвтрүүлж ажилласан эрдэмтэн, судлаач байлаа. 2002-2006 онд ЭМЯ-ны Эмгэг судлал-Шүүх эмнэлгийн мэргэжлийн зөвлөлийн нарийн бичгийн дарга, ЭМЯ-ны Шүүх эмнэлгийн ерөнхий мэргэжилтэн, 2017 оноос ЭМЯ-ны Эмгэг судлал-Шүүх эмнэлгийн мэргэжлийн зөвлөлийн гишүүн, 2003-2008 оны хооронд ЭМШУИС-ийн Био-анагаахын ёс зүйн зөвлөлийн гишүүн, 2004-2006 оны хооронд ЭМШУИС-ийн Био-Анагаахын магистрын жинхэнэ хамгаалах зөвлөлийн гишүүнээр тус тус ажиллаж байлаа.
Багшийн маань нөр их хөдөлмөр, оюуны хөрөнгө оруулалтыг салбар яамдууд болон төр засаг нь үнэлж 2008 онд Биеийн тамир спортын тэргүүний ажилтан, 2010 онд Эрүүлийг хамгаалахын тэргүүний ажилтан, 2014 онд Боловсролын тэргүүний ажилтан, 2018 онд Шинжлэх ухааны тэргүүний ажилтан, 2016 онд “Алтан гадас” одон, 2022 онд “Хөдөлмөрийн гавьяаны улаан тугийн одон”-гоор тус тус шагнагдаж байлаа.
Эрхэм багшийн маань эрдэм оюунаар хийж бүтээгдсэн бүхэн мөнхийн бүтээл болж, Хүнлэг энэрэнгүй, хөдөлмөрч хичээнгүй зангаар сургаж заасан бүхэн олон мянган шавь нарынх нь сэтгэл зүрхэнд мөнхөд орших болно.
Багшийнхаа гэр бүл, үр хүүхэд, ач зээ, ачит багш нар, анд нөхөд, мянга мянган шавь нарт нь гүн эмгэнэл илэрхийлье.
Анагаахын шинжлэх ухааны үндэсний их сургууль
Био-Анагаахын сургууль
АШУҮИС, Био-Анагаахын сургууль, Анатомийн тэнхимийн хамт олон
2026 оны 4 дүгээр сарын 24.
Гал морин жилийн хаврын адаг сарын шинийн 8.
