Ухаарлын 7 хоног

23/07/2024

Камала Харрис АНУ-ын ерөнхийлөгчөөр сонгогдох нь уур амьсгалын өөрчлөлтийн хувьд юу гэсэн үг вэ?

Ерөнхийлөгч Жо Байден өчигдөр сонгуулиас нэрээ татсанаар түүний Дэд Ерөнхийлөгч Камала Харрис Америкийн хамгийн анхны эмэгтэй Ерөнхийлөгч болоход тун ойртоод байна. Гэхдээ болоогүй ээ, 4 долоо хоногийн дараа Ардчилсан Нам санал хурааж, намынхаа нэр дэвшигчийг албан ёсоор зарлана. Харрисын хувьд Байдены бүрэн дэмжлэг байгаа учраас Ардчилсан Намаас нэр дэвших магадлал маш өндөр. Намаасаа сонгогдсон тохиолдолд Камала Харрис Америкийн түүхэн дэх хамгийн хөгшин нэр дэвшигч болсон Трампын эсрэг хүчтэй өрсөлдөгч байж чадна.

Харрис Ерөнхийлөгч болбол юу хийх вэ?
Үндсэндээ Ардчилсан Нам өөрийн нэр дэвшигчээ зарлахад ийм богино хугацаа (8 сарын 19 хүртэл) үлдсэн байхад Харрис Байдены барьж байсан уур амьсгалын мөрийн хөтөлбөрт гэнэтийн том өөрчлөлт оруулахгүй. Ард түмэн түүнийг Байдены бодлогыг үргэлжлүүлнэ гэж хүлээж байгаа. Нам нь ч хүлээж байгаа.

Байден бол Ерөнхийлөгч байх хугацаандаа алдаа оноотой бодлогууд их явуулсан ч уур амьсгалын өөрчлөлттэй тэмцэх чухал бодлогуудыг мөн явуулж чадсан ерөнхийлөгч. Хоёр жилийн өмнө IRA- “Инфляцыг Бууруулах Хууль” гэдэг нэрийн дор Америкийн түүхэн дэх уур амьсгалын хамгийн том хуулийн төсвийг баталсан. Инфляц энэ тэр гэсэн нэртэй боловч цаад санаа нь 10 жилийн хугацаанд 370 тэрбум ам.долларыг сэргээгдэх эрчим хүч рүү шилжихэд зарцуулахаар төсөвлөсөн байгаа юм. Үүнийг Харрис дэмжиж батлуулсны дээр Ерөнхийлөгчөөр сонгогдвол үргэлжлүүлэх нь зайлшгүй юм аа. IRA батлагдахаас өмнө Америкийн хүлэмжийн хий жилд 2%-аар л буурч байсан. IRA батлагдсанаас хойш 4%-аар буурч эхэлсэн, цаашдаа ч тэгэх төлөвтэй байгаа юм. Харин Трамп энэ хуулийг эдийн засгийн үр ашиггүй гэж үзэж, Ерөнхийлөгч болмогцоо хүчингүй болгоно гэсэн байр суурьтай яваа.

Хоёрдугаарт, Харрис сонгогдвол Парисын хэлэлцээрт Америк өндөр байр суурьтай хэвээр байна. Өнгөрсөн оны НҮБ-ын уур амьсгалын хуралд Харрис өөрийн биеэр очиж, Америкийн байр суурийг илэрхийлсэн байдаг. Ингэхдээ “Манай дэлхий даяар ард иргэд ган гачигт нэрвэгдэж, үерт угаагдаж, хар шуурганд сүйрч байна. Ойн түймрийн утаанд тэнгэр харанхуйлж, далайн түвшний өсөлт сая сая хүний амь нас, амьжиргааг заналхийлж байна. Энэ мөчид бид яарах ёстой нь тодорхой. Цаг зүгээр ч нэг чаг чаг гэхээ больж, тасхийтэл цохилж байна шүү дээ! Бид алдсан цаг хугацаагаа нөхөж ажиллах ёстой" гэсэн байдаг. Түүний дурдаж буй “алдсан цаг хугацаа” гэдэг нь Трампын засаглалын дор Америк 2020 онд Парисын хэлэлцээрээс гарсны дараа алдагдсан нэг жилийг хэлж буй юм.

Гуравдугаарт, Харрис бол прокурор хүн. Дэлхийн том, том газрын тосны, хууль зөрчсөн компаниудыг шүүхэд өгч хэдэн сая ам.долларыг төлүүлж байсан түүхтэй. Ийм учраас ExxonMobil, BP, Chevron зэрэг компаниудтай хариуцлага тооцсон хэвээр байх болов уу. Ер нь Америкийн улс төрд хүлэмжийн хийн ялгарлыг, далайд санамсаргүй гоожуулсан нефтийг “гэмт хэрэг” гэж нэрлэдэг түүн шиг улс төрч олон байдаггүй ээ.

Харин Трамп Ерөнхийлөгч болбол Америк гэдэг орон Парисын хэлэлцээрээс хоёр дахь удаагаа гарсан цор ганц орон болох нь гарцаагүй болно. Одоо ч гэсэн Америк Парисын хэлэлцээрээс гарсан цор ганц орон шүү дээ.

Мөн Трамп Америкийн засгийн газрын далай, атмосфер судлалын агент (NOAA гээд уур амьсгалын өөрчлөлтийн маш чухал судалгааны агент--агаар мандал, далайд болож буй бүх процессыг судалж, олон нийтэд цаг агаар, хар салхи, далайн шуургыг цаг тухайд нь мэдээлж, далайн амьтан, ус болон агаарын температурын дата өгөгдлөөр судлаачдыг хангаж байдаг шинжлэх ухааны байгууллага)-ын төсвийг үгүй хийж, хувьчлах бодлого явуулахаа зарлачихсан.

Уур амьсгалын бүх өгөгдлийг NOAA гэгч энэ байгууллагаас авахаа болиод үүнийг хувьчилчихвал далай, агаарын температурын өгөгдөл өмнөх шигээ нягт няхуур байхаа болино. Цаашлаад хувьчлал нь өмнө нь олон нийтэд нээлттэй байдаг байсан өгөгдлийг худалдаж авахад хүргэхээс гадна улсын санхүүжилттэй уур амьсгалын өөрчлөлтийн судалгааг алга болгох аюултай байна. Трамп мөн Америкийн Байгаль Орчныг Хамгаалах Агенглагийн төсвийг эрс бууруулж, уур амьсгалын өөрчлөлттэй тэмцэх зорилгоор баталсан хуулиудыг хүчингүй болгох тухай 1000 гаруй хуудас "мөрийн хөтөлбөр"-төө тусгажээ.

Дэлхийн түүхэн дэх хамгийн их хүлэмжийн хий ялгаруулсан орон (үндсэндээ түүхэн дэх нийт хүлэмжийн хийн дөрөвний нэгийг дангаараа ялгаруулчихсан) Харрисыг сонгохгүй бол уур амьсгалын өөрчлөлтийн дэлхийн бодлого сүйрэх шат руугаа орохоор байна. Хоёр дахь удаагаа шүү бүр.

17/06/2024

🎉Энэ зун АНУ-ын Pulitzer Center-т уур амьсгалын сэтгүүлчээр ажиллахаар шалгарлаа. Энэ нь Монголоос энэхүү тэтгэлгийг авсан анхны тохиолдол болж байгаа бөгөөд уур амьсгалын өөрчлөлтийн чиглэлээр тус байгууллагаас шалгаруулж авсан 12 сэтгүүлчийн нэг болсондоо туйлын их баяртай байна! Дэлхийн сэтгүүл зүйн салбарт Пулитцерийн шагналыг андахгүй сэтгүүлч гэж байхгүй биз ээ.

Би Йелийн их сургуульд өнгөрсөн намар байгаль орчны менежментийн магистрт сургуулиасаа 100%-ийн тэтгэлэгтэйгээр суралцаж эхэлсэн. Энд суралцах хугацаандаа уур амьсгалын өөрчлөлтийг өөрийн үндсэн мэргэшил болгон эхний жилээ суралцаж дуусгалаа. Ийнхүү Йелийн их сургуулиас энэхүү хөтөлбөрт шалгарсан цор ганц оюутан болсондоо ч их баяртай байна.

🤔Тэгэхээр энэ хөтөлбөрт шалгараад юу хийх вэ гэж үү?

Монгол Улсад малчдад уур амьсгалын өөрчлөлт хэрхэн нөлөөлж буйг харуулсан богино хэмжээний баримтат кино хийнэ ээ. Үүнийг хийхдээ Монголоос өөрийн кино багаа бүрдүүлсэн бөгөөд дараагийн гурван сарын хугацаанд нэг малчин айлын амьдралын өдөр тутмын амьдралыг харуулах юм. Монголд болоод байгаа энэ зудыг, энэ их цөлжилтийг, 20 жилийн өмнө намайг бага байхад үнээгээ өдөрт хоёр удаа саадаг байж байгаад одоо нэг удаа л саадаг айлууд Хангайн нутгаар яагаад ихсэнийг, наадмаар үерлээд гаргадаггүй байсан гол нь одоо яагаад юу ч үгүй болтлоо ширгэснийг дэлхийн хэмжээнд ярихгүй байгаа учраас үүнийг зориглоод хийгээд үзье гэж шийдсэн юм. Киноны гол дүрд тохирох 9-12 насны хурдан морь унадаг, малчин айлын хүүхдийг одоо болтол хайсаар байгаа учраас та бүхэн камерын өмнө нээлттэй ярьж чадах таньж мэддэг гэр бүлүүдийг санал болгоорой 🙏 Кинонд дүр нь мөнхлөгдөх юм шүү.

Хийсэн кино маань Пулитцерийн Төвийн вэбсайт дээр англи хэлээр байршиж, олон улсын сэтгүүлч, судлаач, уур амьсгалын өөрчлөлтийг сонирхогчдод хүрэх юм.

Гурван сарын өмнө Монголын зудын талаар, зуд энэ зууны төгсгөл гэхэд 20%-аар нэмэгдэх тухай уур амьсгалын сэтгүүл зүйн нийтлэлийг мөн Yale Environment 360 сэтгүүлд хэвлүүлэхэд үүний талаар мэддэг нэг ч гадаад хүнтэй би таараагүй юм. Гэвч мэдсэн хүн бүр мал сая саяараа хөлдөж үхсэнийг гайхаж, яаж туслах вэ гэж байсан. Мэдээлэл олон улсад хүрч байж, тусламж, арга хэмжээнүүд авагдана. Тиймээс та бүхэн энэхүү төслийг маань дэмжиж ажиллаач ээ хэмээн уриалж байна. Гол дүрд тавигдах шаардлага болон төслийн хугацааны талаар тодруулж асуух зүйлс байвал мессенжерээр чөлөөтэй холбогдоорой, баярлалаа.

Хөтөлбөрийн талаар дэлгэрэнгүй мэдээллийг эндээс 👇
https://pulitzercenter.org/blog/announcing-2024-pulitzer-center-reporting-fellows

23/01/2024

Өөр улсад амьдарна гэдэг өөрийнхөө дассан, дасан дурласандаа өгөгдмөл ч гэж санагдах болсон бодлынхоо чөлөөт урсгалаа цаг тутам хязгаарлан гадаад орчноос тулгагдсан сэтгэлгээгээр бодож, сэтгэхийг хэлдэг. Харийн сэтгэлгээгээр бодож сэтгэсээр аяндаа тэр хэлээр амьдралынхаа зарчим, үнэт зүйлсээ хүртэл тодорхойлж эхэлнэ. Гэвч энэ бүхэн өөрт нэг л тухгүй санагдах бөгөөд сэтгэлгээнийхээ зарим хэсгийг боож, үгүйсгэж байгаа мэт мэдрэмжийг мөн төрүүлнэ. Учир нь өөр хэлээр хэзээ ч бодохгүй мэдэгдэхүүн, ойлголт, мэдрэмж, төсөөлөл эх хэлд минь байдаг. Түүнийг зөвхөн эх хэлээрээ ярьсан, бодсон, сэтгэсэн цагт л ойлгож, мэдрэх боломжтой аж. Зүрхнийхээ угт тэр мэдэгдэхүүнээрээ цангаж, хэн нэгэн боогдсон мэдрэмжийг нь олж хараад тайлбарлаад өгөөсэй гэж хүсдэг юм байна. Эх хэл гэдэг зүгээр ч нэг харилцааны хэрэгсэл биш. Энэ бол соёл, сэтгэлгээний эрх чөлөө, бодлын чөлөөт урсгал. Тийм учраас гадаад үг бүрт монгол хэл рүү хөрвүүлсэн үг нь байгаасай, сайн ном их хэвлэгдээсэй, бичээчид болон уншигчид тогтсон жишиг, үнэлэмжтэй байгаасай гэж их хүсэх юм.

31/07/2023

Хамтарч ажилласан Сараагийн Урлан-д маш их баярлалаа 😊😘🥰

13/07/2023

Баяртай 👋😭🙂
Өнгөрсөн 6 жилийн турш хамт байсан та бүхэндээ баярлалаа 🙏🙏🙏

Нэр нь хүртэл маркетингийн ямар ч потенциалгүй энэ бүтээлдээ би өөрт байсан бүх л хайр, итгэл, зүрх сэтгэлээ зориулжээ. Зарим үед доторх сэтгэл минь хоосроод, өгье гээд ч өгөх зүйлгүй өдрүүдэд Ухаарлын 7 хоногийг өмнөөс минь хайрлан, урмын үгээр таслаагүй сонсогчдодоо чин сэтгэлээсээ талархъя.

Мод цэцэглэх, бороотой үед цонхоор ширтэн суух, наран ургах, дэвхрэг үсрэхийг ажиглах—эдгээрийг бодоод л дотор уужирч байгаа биз? Байгаль гэдэг ийм л уужуу. Ойрхон байх тусам биднийг чимээгүйхэн ямар их хайрладгийг ойлгож, өөрийн эрхгүй сүрдэж, хүндэлмээр санагддаг агуу эх. Тарьсан тасалгааны ургамлуудаа ургахыг нь хүлээж тэсэхгүй өөрөөсөө би өөрийгөө ямар тавьтаргүй бөгөөд хүлээцгүй гэдгээ олж харж билээ. Байгаль бол аажим бөгөөд зогсолтгүй хүч.

Би ердөө байгалиас олж харсан бүхнээ хэчнээн гайхалтайг сануулж, бусадтай хуваалцах гэсээр өдийг хүрчээ. Байгаль орчны асуудал бүр хүндхэн байдаг ч түүх нь аймшигтай, уйтгартай байх албагүй юм. Иймд эсээ бичих бүртээ бага ч гэсэн итгэлийн орон зайг үлдээхийг хичээсээр ирсэн юм.

Энэ хугацаандаа мэргэжилдээ ч дурлаж. Үзэл санаа тэлэхийн хэрээр хоорондоо зөрчилдөөнтэй олон ч эсээ бичлээ. Тухайн үед зөв л санагдаж байсан юм даа. Одоо харахад инээдтэй юм. Хэдэн жилийн дараа энэ жилийн эсээнүүд тэгэж санагддаг болсон байх болтугай хэмээн залбирч сууна.

Би 20-хон настай хүүхдийн үгийг сонссон тэр үеийн өсвөр насныханд талархаж байна. Их сургуулийн оюутан байсан надад байгаль орчны төлөө хогоо ангилахаас өөр хийж чадах зүйл даанч байгаагүй тул ядаж л бичье гэж бодсон юм. Мэдээж хичээлдээ шамдан суралцаж байсан нь сайн хэрэг. Гэвч энэ нь хэзээд хангалтгүй байв. Ийнхүү аажмаар хийж байсан зүйл маань “Ухаарлын 7 хоног” блог, удалгүй “Ухаарлын 7 хоног” аудио эсээ, мөн сүүлд “Ухаарлын 7 хоног” видео эсээ болж хувирав. Энэ хувьслын хамт миний сэтгэлгээ ч хувиран өөрчлөгдөж, уур амьсгал, байгаль орчин гэдэг нарийн, нандин сэдэв тул зарим үед хэт хурдан дүгнэлт хийж байснаа ч олж хардаг боллоо.

Үнэнийг хэлэхэд Ухаарлын 7 хоногтоо дахин эсээ бичихгүй гэхээр өөрийнхөө нэг хэсгийг алдчхаж байгаа мэт санагдаж байна. Гэхдээ өөр нэгэн үнэн гэвэл би одоо ч мэргэжлийнхээ хувьд хангалттай өсөөгүй байна. Сурсан бүхнээ гарган ирж хуваалцахыг урьтал болголгүйгээр би дотроо хэсэг хав дараад гүйцэт боловсорсон цагт нь гарган ирж ярихыг хүснэ. Мөн одоо нэгэнт мэргэжилтэн болсон учраас өөрийгөө илүү хурцалж, салбартаа бүрэн анхаарлаа төвлөрүүлэхийг хүсэж байна.

Сүүлийн 6 жилийн хугацаанд Та бүгдийн болоод Ухаарлын 7 хоногийн ачаар би өөрийн дуу хоолойг олж авсан. Энэ их хөдөлмөрийн үрээр олж авсан учраас үүнийгээ би хэзээ ч гээхгүй.

Мөн намайг хаана ч явсан дэмжих сонсогчид шиг минь хүмүүс байдаг гэдгийг мэдсэн учраас би сэтгэл дотроо дахиж хэзээ ч ганцаардахгүй.

27/05/2023

Судалгаа хийхдээ олж авсан амьдралын нэгэн сургамж:

Дүгнэлт хийх гэж яарч хэрэггүй. Уур амьсгалын өөрчлөлт байдаг гэдгийг нотлохын тулд 30 жилийн өдөр тутмын цаг агаарын өгөгдөл хэрэгтэй болдог. 30 жил хэмжсэний эцэст сая нэг юм дундаж хэм үнэхээр урт хугацаанд өссөнийг харах боломжтой. Гэсэн хэдий ч энэ хугацаанд агаарын хэм дээш, доош маш олон удаа хэлбэлзсэн байж таардаг. Тухайн жил тэр аяар хүйтэн байх нь дэлхийн дулаарал байдаггүй гэдгийн хангалттай нотолгоо болдоггүй. Тэр жил хүйтэн байжээ гэдэг ганцхан дүгнэлтийг л үүнээс хийх боломжтой юм.

Түүнтэй адил хүнтэй анх уулзахад тухайн хүн өөрийгөө дээд эсвэл доод хэлбэлзэл дээрээ тавьчихсан явж байж болдог юм билээ. Тэр агшны мэдээллээр тухайн хүний өнгөрсөн, одоо, ирээдүйгийн алийг ч оновчтой хэлэх боломжгүй юм.

Үүнийг мэдлээ гээд яах билээ гэж үү? Сэтгэл тань амарна. Хэн нэгэн тантай нэг удаа уулзаад мундаг гэж магтаж байна уу? Эсвэл их зантай гэж араар тань муулж байсан уу? Энэ бүхэн эцсийн эцэст хэнд ч хамааралгүй, хоосон мэдээлэл. Учир нь нэг уулзалтын өгөгдөлд хийсэн дүгнэлт үнэн бодит байдлыг илтгэх чадваргүйг, ийм дүгнэлттэй судалгаа ирвэл сэтгүүлийн хаалгыг давахгүй хол шидэгдэхийг ямар ч судлаач мэднэ. Дүгнэлт нь үнэнд хамгийн ойр байдаг учраас бид шинжлэх ухаанд суурилсан бодлого улс оронд минь хэрэгтэй гэдгийг хүлээн зөвшөөрдөг. Тийм байтал судалгааны хамгийн суурь зарчим болох хангалттай өгөгдлийг цуглуулаагүй гаргасан хүмүүсийн өдөр тутмын "дүгнэлт" бол амьдралын зүгээр л хэнд ч хэрэгцээгүй чимээ юм.

19/05/2023

🍎 “Агуу юм бүхэн их энгийн байдаг” гэж аав хэлж байв. Тухайн үед би ойролцоогоор 13 настай байлаа. Утгыг нь ойлгох гэж хичээсэн би толгойдоо сандал төсөөлөн бодлоо. Надад энгийн санагддаг өдөр тутмын зүйл сандал л байсан юм. Дөрвөн хөлтэй, дээрээ нэг тавцантай зүгээр л нэг сандал.

Тэгээд “Сандал их агуу. За байз, яагаад агуу билээ? Яагаад гэвэл сандал байхгүй бол газар сууна шүү дээ. Хөдөө үнээ саахдаа хүмүүс юун дээр суух болж байна? Тэр агуу болохоор л өдөр болгон хаа сайгүй хүн бүр хэрэглэж байгаа юм.

"Хүүхдийн гэнэн бодлууд" аудио эсээний цоо шинэ дугаарыг энэ бүтэнсайн буюу 05 /21 өдөр хүлээн аваарай! 😇

Анзааралгүй үлдээсэн чимгүүдээ саная
🎨 Зургийг зурсан: @Сараагийн Урлан 💛
Ухаарлын 7 хоног подкастын бусад дугаарыг
сонсохыг хүсвэл 👇
◽ Youtube: (https://www.youtube.com/channel/UC71
SG_RTOWM3A18rZVZZX3Q)
◽ SoundCloud:
(https://soundcloud.com/search?q=Uhaarliin%207%20
honog)
◽ Facebook: (https://www.facebook.com/uhaarliin7
honog)
#Ухаарлын7хоног

12/05/2023

🍎 Энэ нийгэм намайг хүүхэд байхаас хийхийг хүсдэг зүйлсээс минь сарниулсаар л байна. Төрөхөд л олгогдсон амьдрах болон амьсгалах хүний наад захын эрхийнхээ төлөө бид өдөр бүр тэмцэлдэж байна. Цэвэр агаарын төлөө тэмцэлдэнэ. Хм, хачин байгаа биз? Төрөхдөө ямар ч хүн том болоод цэвэр агаарын төлөө тэмцдэг хүн болно гэж хэзээ ч боддогүй байх. Би ч байгаль хамгаалдаг хүн болъё гэж хүсэж өссөнгүй. Гэвч амьдралын минь ихэнх цаг одоо үүнд зориулагдаж байна.

"Алдагдсан боломж" аудио эсээний цоо шинэ дугаарыг энэ бүтэнсайн буюу 05 /14 өдөр хүлээн аваарай! 😇

Анзааралгүй үлдээсэн чимгүүдээ саная
🎨 Зургийг зурсан: Сараагийн Урлан 💛
Ухаарлын 7 хоног подкастын бусад дугаарыг
сонсохыг хүсвэл 👇
◽ Youtube: (https://www.youtube.com/channel/UC71
SG_RTOWM3A18rZVZZX3Q)
◽ SoundCloud:
(https://soundcloud.com/search?q=Uhaarliin%207%20
honog)
◽ Facebook: (https://www.facebook.com/uhaarliin7
honog)
#Ухаарлын7хоног

10/05/2023

“Жаргалтай үйл явдал тохиолдвол мод тарь. Гунигтай үйл явдал тохиолдвол бас л мод тарь. Төрсөн өдрөөрөө мод тарь. Учир нь та бидний хэн нь ч үлдэхгүй. Тарьсан хэдэн мод маань л үлдэнэ. “ -Ухаарлын 7 хоногийн эсээнээс

Өнөөдөр гэртээ мод тарьж байна. Хэд хоногийн өмнө Америкийн байгаль орчны сэтгүүлчдийн нийгэмлэгийн 32-р хуралд урилгаар оролцоод эргэж ирэхдээ Америкийн баруун хойд бүсэд ургадаг нарс модны үр авч ирсэн. Өнөөдөр түүнийгээ тарьж байна 🙃

4 долоо хоногийн дараа гэхэд соёолчихсон байх ёстой. Тэр үед дахиад бичнэ ээ 😝 9 сард тарьсан мод маань ургасаар байгаа тул энэ модоо ч бас ургана гэж найдаж байнаааа 😛

08/05/2023

🍎 “Цаг уурын өөрчлөлт” биш, “уур амьсгалын өөрчлөлт” 🌏

Дэлхийн Цаг Уурын Байгууллага уур амьсгалын өөрчлөлттэй холбоотой судалгаа хийдэг боловч цаг уурын өөрчлөлтийн судалгааг хийдэггүй.
Зөв нэр томъёог ашиглая 😉😉

07/05/2023

Төрсөн цагаасаа эхлээд байгалиас авсан зүйлс надад дэндүү их. Уншсан бүх номыг минь хүртэл тэр бэлдэн өгч байв. Харин хариуд нь талархал болгон өгсөн зүйл надад бараг үгүй. Тарьсан хэдхэн мод минь л байна. Анхныхаа тарьсан модыг хайлаас байсныг мэддэг шиг сүүлийнхээ тарих модоо ч юу байхыг бас би мэдэж байна.

Хүн төрөлхтнийг дэлхий дээр үүссэн хорт хавдар гэж хаа нэгтээ сонсож байлаа. Хорт хавдар харин үүссэн газраа тэтгэж, тэндээ харъяалагддаг эд биш. Ямар ч эрүүл харилцаа өгөө, аваатай байдаг... Ухаарлын 7 хоногийн цоо шинэ дугаар орсон шүү 🥳👇

Энэ бол Ухаарлын 7 хоногийн 4-р улирлын дор нийтлэх 8 дугаарын 4 дэх нь юм.Ухаарлын 7 хоног бол мартагдсан сэдвүүдийг хөндөж, бид бүхний сэтгэл дотор байдаг ...

05/05/2023

🍎 Төрсөн цагаасаа эхлээд байгалиас авсан зүйлс надад дэндүү их. Уншсан бүх номыг минь хүртэл тэр бэлдэн өгч байв. Харин хариуд нь талархал болгон өгсөн зүйл надад бараг үгүй. Тарьсан хэдхэн мод минь л байна. Анхныхаа тарьсан модыг хайлаас байсныг мэддэг шиг сүүлийнхээ тарих модоо ч юу байхыг бас би мэдэж байна.

Анзааралгүй үлдээсэн чимгүүдээ саная

🎨 Зургийг зурсан: @Сараагийн Урлан .amber 💛

Ухаарлын 7 хоног подкастын бусад дугаарыг
сонсохыг хүсвэл 👇

◽ Youtube: (https://www.youtube.com/channel/UC71
SG_RTOWM3A18rZVZZX3Q)

◽ SoundCloud:
(https://soundcloud.com/search?q=Uhaarliin%207%20
honog)

◽ Facebook: (https://www.facebook.com/uhaarliin7
honog)

#Ухаарлын7хоног