19/12/2025
Бага насанд хүүхдүүд өөртөө чухам юу хэрэгтэй байгаагаа илэрхийлж мэдэхгүй болохоор сэтгэл зүйн, бие махбодийн хэрэгцээгээ үргэлж үйлдлээр илэрхийлэн бусадруу чиглэн хайж уйлж, сахилгагүйтэж илэрхийлдэг.
Харин өсвөр насанд ирэхээр хүүхдүүд энэ хэрэгцээгээ тодорхойлж эхлэн би ер нь хэн бэ? би хэнд хэрэгтэй юм бол? гэж өөрлүүгээ чиглэж, өөрийнхөө үнэ цэнийг олж мэдэхийг хичээж эхлэдэг. Ингэхийн тулд өөрийгөө бусадтай харьцуулна, өөрийг нь ойлгож хүлээн зөвшөөрөх хүнийг хайна, түүндээ хайрлагдсан хэвээр байхын тулд хүссэнээр нь хувирч өөрчлөгдөнө. Ингэж хайрлаж хүлээн зөвшөөрдөг гэдгийг нь гэр бүл нь мэдрүүлэхгүй бол тэгээд мэдрүүлдэг хүмүүсрүү л тэмүүлнэ. Энэ бол хүний л угийн төрөлх зан шүү дээ.
Энэ үеийн үйл явцад л муу муухай санаатай хүмүүс үүн дээр нь дөрөөлөн ашиглана. Ихэвчлэн жаахан охидыг эрчүүд, хөвгүүдийг ч ялгаагүй бас эрчүүд ашиглана.
Эго өндөр, харизмтай, буруу сэргэлэн эрчүүдэд жаахан охид өөрийг нь хамгаалж энэрэх баатар гэж итгэн татагдах нь амьдралд маш олон тохиолдолд харагддаг.
Тиймээс миний ойлгосон зүйл нь эмэгтэй хүнийг эр хүний хүч чадал, эд хөрөнгө биш, өөрийн эрдэм мэдлэг хамгаална.
Мэдлэгийг өөрийн нэг хэсэг болгож эзэмших тусмаа хүн өөрийгөө хамгийн гол нь хүндэлдэг болно. Өөрийнхөө үнэ цэнийг мэднэ. Өөрийгөө хүндэлж байгаа үед бусадтай хэм хэмжээтэй, хүндлэлтэй хил хязгаар тогтоож чадна.
Бусадтай өөрийн царай зүс, бие хаа, өмссөн зүүснээ харьцуулж биш, бусдын мэдлэг туршлагыг эрж хайж, тэднээс суралцах хүсэлтэй болно. Тэр цагт үзэмж бол үнэ цэн биш гэдгийг аль хэдийнээ чимээгүйхэн өөртөө суулгачихдаг. Тэгээд ургахдаа өөрийгөө үзэсгэлэнтэй гэдгээ харж эхлэнэ.
Мэдлэг бол мөнгө биш. Мөнгө үрэгдээд дуусна.
Эрчүүд ирнэ бас явна. Энэ хорвоог туулах тэр хүн нь өөрөө үлдэхийг хүснэ.
Эмэгтэйчүүдийн эрх энэ дэлхийд үнэхээр олон талаар зөрчигддөг. Харамсалтай нь хаана ч байсан, хэн ч байсан ямар нэгэн байдлаар үргэлж энэ байсаар байдаг.
Тэгэхээр өөрийгөө хамгаалж, үнэ цэнээ хадгалж үлдэхийн тулд өөрийгөө мэдлэгээр дүүргэхээс өөр замгүй.
