01/09/2026
СЭЛБЭ СУРГУУЛЬ, ЦЭЦЭРЛЭГ ЦОГЦОЛБОРЫН
ГҮЙЦЭТГЭХ ЗАХИРЛЫН МЭНДЧИЛГЭЭ !
🎯НЭГЭН ШИНЭ ИРЭЭДҮЙГ ХАМТДАА БҮТЭЭХ АЯН
Эрхэм хүндэт эрдэмтэн багш нараа,
Эрдмийн их өргөөний босгыг анхлан алхаж буй нэгдүгээр ангийн алдрай бяцхан шавь нараа
Анги дэвшин суралцах хоёроос арван нэгдүгээр ангийн суралцагчид аа,
Сургуулийн амьдралынхаа хамгийн хариуцлагатай, хамгийн дурсамжтай сүүлийн жилийг эхлүүлж буй арван хоёрдугаар ангийн эрхэм төгсөгчид өө,
Эрхэм хүндэт эцэг эх, асран хамгаалагчид аа,
Хүндэт зочид, боловсролын салбарын эрхэм нөхөд өө!
Та бүхэндээ 2026–2027 оны хичээлийн шинэ жилийн баярын мэндийг өргөн дэвшүүлье! 🎉
Хүүхдийн дуу цангинаж, инээд хөөр бялхсан Сэлбэ сургуулийн эрдмийн өргөөнд бидний нэгэн шинэ түүх эхэлж байна.
Хичээлийн шинэ жил гэдэг хуанлийн нэгэн шинэ хуудас төдий зүйл биш. Энэ бол өнгөрснөөсөө суралцаж, өнөөдрөө бүтээж, ирээдүйгээ хамтдаа тодорхойлох шинэ боломж. Тиймээс суралцагч бүр өөрөөсөө:
“Би энэ жил юуг шинээр мэдэх вэ?
Би юуг илүү сайн хийж сурах вэ?
Би хэн болж төлөвших вэ?
Би бусдын сайн сайхны төлөө юу бүтээх вэ?” хэмээн асуух шинэ эхлэл юм.
Өнгөрсөн хичээлийн жил бидэнд бахархалт амжилт, үнэ цэнтэй туршлага, сургамжтай алдааг аль алийг нь үлдээсэн. Амжилт бидэнд урам өгдөг бол алдаа биднийг илүү ухаан суулгадаг. Харин алдаа, амжилт хоёроосоо суралцаж чадсан хүн л дараагийн түвшинд дэвшдэг.
Тиймээс бид өнгөрснөө үгүйсгэхгүй, бас түүндээ хэт баригдахгүй. Харин ололтоо бататгаж, алдаагаа сургамж болгон, илүү тодорхой зорилго, илүү нэгдмэл сэтгэл, илүү хариуцлагатай хамтын бүтээлч үйлээр урагшлах болно.
Өнөөдөр Монголын боловсролын салбар өөрчлөлт шинэчлэлтийн чухал цаг үед ирээд байна.
Бид зөвхөн хичээлийн агуулга эзэмшүүлдэг бус, хүнээ хөгжүүлдэг боловсролын систем хэрэгтэйг улам тодорхой ойлгож, хэрэгжүүлэх болж байна.
Суралцагч бүрийн ялгаатай хэрэгцээг хүндэтгэдэг, сурлагын амжилтаас гадна хөгжил, төлөвшил, сэтгэл зүйн сайн сайхан байдлыг дэмждэг, багшийн хөгжлийг байгууллагын хөгжлийн үндэс гэж үздэг тогтолцоог бүтээхээр ажилласаар байна.
Мөн Монгол 🇲🇳 хүүхэд эх орныхоо түүх, хэл, соёл, үнэт зүйлээр бахархдаг байхын зэрэгцээ дэлхийтэй өрсөлдөх мэдлэг, чадвартай байх учиртай.
Өөрөөр хэлбэл, бидэнд үндэсний дархлаатай атлаа дэлхийн сэтгэлгээтэй, хүнлэг атлаа зоримог, уламжлалаа хүндэтгэдэг атлаа шинийг бүтээдэг шинэ үе хэрэгтэй байна. Энэ бол шинийг бүтээгчдийн Сэлбэчүүд бидний үндсэн философи юм.
Дэлхий дахинд ч боловсролын мөн чанарын тухай асуултыг дахин шинээр тавьж байна.
Хиймэл оюун хэдхэн хормын дотор мэдээлэл боловсруулж, эх бичиж, зураг бүтээж, тооцоо хийж чаддаг боллоо. Гэвч технологи хэчнээн ухаалаг болсон ч хүний өмнөөс мөрөөдөж, хүний өмнөөс үнэт зүйл сонгож, хүний өмнөөс хариуцлага хүлээж чадахгүй.
Хиймэл оюун хариулт өгч чадна.
Харин зөв асуулт тавихыг хүн өөрөө сурна.
Хиймэл оюун мэдээлэл нэгтгэж чадна.
Харин үнэн, худлыг ялгаж, нотолгоонд тулгуурлан дүгнэхийг хүн өөрөө эзэмшинэ.
Хиймэл оюун бүтээл хийхэд тусалж чадна.
Харин юуг, яагаад, хэний сайн сайхны төлөө бүтээхийг хүний ухамсар шийднэ.
Тиймээс 2026–2027 оны хичээлийн жилд Сэлбэ сургууль хиймэл оюуныг хориглох бус, ухаалгаар, ёс зүйтэй, хариуцлагатай ашиглах соёл төлөвшүүлэхийг эрхэмлэнэ.
Бид технологийг хүний оюун ухааныг орлох хэрэгсэл бус, харин оюун ухаанаа дасгалжуулах, бүтээх боломжоо тэлэх, багшийн арга зүйг дэмжин туслагч болгон ашиглана.
Учир нь боловсролын ирээдүй зөвхөн хиймэл оюунд биш, хиймэл оюуныг зөв зорилгоор ашиглаж чаддаг боловсорсон хүний оюун санаанд оршино.
Сэлбэ сургууль үүсгэн байгуулагдсан цагаасаа боловсролын үйлчилгээний цогц тогтолцоог шинжлэх ухааны үндэстэйгээр хөгжүүлж, бүтээлч оршихуй, шинэ санаа, инновац, өөрчлөлт шинэчлэлийг байгууллагынхаа соёлын үнэт зүйл болгон ирсэн.
Энэ хичээлийн жилд бид Кэмбрижийн цэцэрлэгийн Early Years хөтөлбөрийг хэрэгжүүлж эхэлснээр Кэмбрижийн олон улсын хөтөлбөр, Үндэсний цөм хөтөлбөрийг босоо тогтолцоондоо бүрэн нэвтрүүлж дууслаа. Хүмүүншиж, төлөвших “Хүсэл эрмэлзэл, Итгэл үнэмшил, Үнэ цэн” хөтөлбөр, нийгмийн харилцаа, сэтгэл хөдлөл, ёс зүйн боловсролыг дэмжих хөтөлбөрүүдийнхээ уялдаа холбоо, чанар, үр нөлөөг дараагийн түвшинд гаргана.
Мөн ББЗ технологийн Танин мэдэхүйн, Бүтээхүйн, Нийгэмшин, Оршихуйн цогц чадамж, оюун санааны хөгжлийг суралцахуйн үйл ажиллагаатай бодитоор холбож, суралцагч бүрийн хөгжлийг зөвхөн дүнгээр бус, хийж чаддаг үйл, бүтээсэн зүйл, гаргасан ахиц, төлөвшсөн хандлага, бусдад үзүүлсэн эерэг нөлөөгөөр нь үнэлэхийг зорьж байна.
Бидний зорилго зөвхөн их мэдээлэл цээжилсэн суралцагч бэлтгэхэд оршихгүй.
Харин мэдлэгээ хэрэглэж чаддаг, асуудлыг олон талаас нь шинжилдэг, нотолгоонд тулгуурлан шийдвэр гаргадаг, шинэ санааг бодит бүтээл болгодог, сэтгэлээ жолоодож, үйл хөдлөлөө хариуцдаг Шинийг бүтээгч — КВАНТ бүтээгч иргэн төлөвшүүлэхэд оршино.
Хайрт суралцагчид аа,
Алдахаас бүү айгаарай.
Асуухаас бүү санаа зовоорой.
Бусадтай өөрийгөө бүү харьцуулаарай.
Өдөр бүр асуулттай ирж, ахицтай хариарай.
Алдаа бүрээсээ суралцаж, амжилт бүртээ даруу байгаарай.
Өөрийн мөрөөдлийн төлөө тууштай хөдөлмөрлөж, бусдын мөрөөдлийг ч хүндэтгэж яваарай. Эрхэм эцэг эхчүүд та бүхэн маань Хүүхдийнхээ аяллын хамгийн үнэнч дэмжигч, багшийн хамгийн итгэлтэй хамтрагч байгаарай.
Та бүхэндээ 2026–2027 оны хичээлийн шинэ жилийн баярын мэндийг дахин өргөн дэвшүүлье!
Хүндэтгэсэн,
Э.Золбоо
