11/08/2026
2026 оны 8 дугаар сарын 10-ны өдөр зохион байгуулагдсан “Хөгжлийн бэрхшээлтэй хүний эрхийн хэрэгжилт ба улсын төсөв: Санхүүгийн бодлогыг хүний эрхэд нийцүүлэх нь” хэлэлцүүлэгт оролцож, хөгжлийн бэрхшээлтэй хүүхдийн эрт илрүүлэлт, оношилгоо, эрт үеийн оролцоог тогтвортой санхүүжүүлэх асуудлаар санал, байр сууриа илэрхийллээ.
Хөгжлийн бэрхшээлтэй болон хөгжлийн эрсдэлтэй хүүхдэд үзүүлэх дэмжлэгийг зөвхөн оношилгоогоор хязгаарлахгүй, 0–3 насанд гэр бүлд түшиглэсэн эрт үеийн оролцоо, эцэг эх, асран хамгаалагчдын сургалт, зөвлөгөө, шаардлагатай дэмжих үйлчилгээг тодорхой төсөвтэйгээр тогтолцоонд тусгах шаардлагатайг онцоллоо.
Мөн хүүхэд, гэр бүлтэй ажиллах эмч, багш болон бусад мэргэжилтнүүдийг хангалттай тоогоор бэлтгэж, тогтвортой ажиллуулах, хүүхдийг гэр бүлийн орчноос цэцэрлэгт, цэцэрлэгээс сургуульд шилжих үе шат бүрд “шилжилтийн хөтөлбөр”-тэй болгох нь чухал гэж үзэж байна.
Эрт илрүүлэлт бодит үр дүнд хүрэхийн тулд илрүүлсний дараах үйлчилгээ, мэргэжлийн дэмжлэг, салбар хоорондын уялдаа, тогтвортой санхүүжилт хамтдаа бүрдэх шаардлагатай.
📌 Өнөөдрийн хэлэлцүүлгийн тухай
“Хөгжлийн бэрхшээлтэй хүний эрхийн хэрэгжилт ба улсын төсөв: Санхүүгийн бодлогыг хүний эрхэд нийцүүлэх нь” хэлэлцүүлгийг Хөгжлийн бэрхшээлтэй хүний хөгжлийн ерөнхий газар-тай хамтран зохион байгуулж үйлчилгээ, санхүүжилтийн асуудлыг салбар бүрээр нь хэлэлцлээ.
Хэлэлцүүлгээс дараах асуудлуудыг 2027 оны улсын төсөвт бодитоор тусгах шаардлагатай гэж үзэв. Үүнд:
🔹 Хөгжлийн бэрхшээлтэй хүүхдийн эрт илрүүлэлт, оношилгоо, эрт үеийн оролцоог тогтвортой санхүүжүүлэх
🔹 0–2, 3–5, 6–18 насны хүүхдийн хөгжлийн үе шат бүрд шаардлагатай дэмжих үйлчилгээг төсөвтэй уялдуулах
🔹 Сэргээн засах болон дэмжих үйлчилгээг орон нутагт хүртээмжтэй болгох
🔹 Тэгш хамруулах боловсролын санхүүжилтийг боловсронгуй болгож, туслах багш, туслах технологи, хүртээмжтэй сургалтын хэрэглэгдэхүүнд шаардлагатай төсөв бүрдүүлэх
🔹 Эрүүл мэнд, сэргээн засах үйлчилгээний тасралтгүй тогтолцоог санхүүжилтээр дэмжих
🔹 Хөгжлийн бэрхшээлтэй холбоотой зардлыг улсын төсөвт тодорхой харагддаг, ялган тайлагнадаг болгох
🔹 Шинээр барих болон засварлах төрийн барилга, нийтийн тээвэр, цахим үйлчилгээний төсөвт хүртээмжийн зардлыг анхнаас нь тусгах
🔹 Мөнгөн тэтгэмжээс гадна бие даан амьдрах, нийгэмд оролцох, хөдөлмөр эрхлэхийг дэмжсэн үйлчилгээнд хөрөнгө оруулалтыг нэмэгдүүлэх
🔹 Төсөв боловсруулах, хэрэгжүүлэх, хянах бүх үе шатанд хөгжлийн бэрхшээлтэй хүмүүсийн оролцоог хангах
Өнөөдөр Гэр бүл, Хөдөлмөр, Нийгмийн хамгааллын яам, Хот байгуулалт, барилга, орон сууцжуулалтын яам, Цахим хөгжил, инновац, харилцаа холбооны яам, Боловсролын яам,
Эрүүл мэндийн яамнаас мэдээлэл танилцуулж, түүнчлэн Сангийн яам, Нийслэлийн нийтийн тээврийн газраас оролцогчдын асуултад хариулт өглөө.
Хэлэлцүүлгээс гарсан санал, зөвлөмжийг нэгтгэн 2027 оны улсын төсвийн төлөвлөлтөд хүргүүлнэ.
Цаг заваа гарган хэлэлцүүлэгт оролцсон оролцогчид, мэдээллээ бэлтгэн ирж нээлттэй мэдээлэл хүргэсэн дээрх яам, харьяа агентлаг газрууддаа маш их баярлалаа.
