Ирээдүй Академи

Гайхалтай дадлууд
1. Эхэлсэн бол дуусга: Тууштай байдлыг суулгана.
2. Буруугаа хүлээж сур: Хариуцлагатай занг өгнө.
3. Одоо хийж чадах зүйлээ бүү хойшлуул: Бүтээмжтэй занг өгнө.
4. Хэлэхээсээ өмнө бод: Хэрсүү, хянуур занг өгнө.
5. Алдсан бол дахиад оролд: Дайчин, сэтгэлийн тэнхээг өгнө.
6. Бусдын амжилтанд алга таш: Атаархлаас ангид, аз жаргалтай байж сурна.
7. Хүнд туслах боломж гарвал заавал тусал: Энэрэнгүй, дулаан сэтгэлийг өгнө.
8. Хүний ардуур бүү муул: Найдвартай түшигтэй зан чанарыг өгнө.
9. Ном унш: Ухаантай, олон талаас боддог болгоно.
10. Зорилготой бай: Энэ нь амьдралыг урсгалаараа биш, утга учиртай, тэмүүлэлтэй амьдрахад тусална.

🌱 Яавал хүүхэд өөртөө итгэлтэй болох вэ?

Хүүхдийн өөртөө итгэх итгэл нь магтаалаар биш, харин өөрийгөө чадна гэж мэдэрсэн туршлагаар бий болдог.

✅ 1. Хичээл зүтгэлийг нь магт
“Чи мундаг юм аа” гэхээс илүү
👉 “Чи үнэхээр их хичээлээ.”
👉 “Чи бууж өгөлгүй оролдлоо.”
гэж хэлээрэй.

✅ 2. Алдаа гаргах эрхийг нь өг
Алдаа бол бүтэлгүйтэл биш, суралцах үйл явц гэдгийг ойлгуул.

✅ 3. Өөрөөр нь шийдвэр гаргуул
Өдөр тутмын жижиг сонголтуудыг өөрөөр нь хийлгэснээр хариуцлага, итгэл нэмэгддэг.

✅ 4. Бусадтай биш, өөртэй нь харьцуул
“Нөгөө хүүхэд шиг бай” гэж хэлэхийн оронд
👉 “Өнгөрсөн сараас илүү ахиц гаргажээ” гэж урамшуул.

✅ 5. Сонсож сур
Хүүхдийн бодол, мэдрэмжийг үнэлж сонсох нь “Миний үг үнэ цэнтэй” гэсэн мэдрэмж төрүүлдэг.

✅ 6. Жижиг амжилтыг нь тэмдэглэ
Өдөр бүрийн өчүүхэн ахиц хүртэл өөртөө итгэх итгэлийг нь аажмаар бүтээдэг.

💡 Өөртөө итгэлтэй хүүхэд гэдэг айдаггүй хүүхэд биш. Айж байсан ч гэсэн оролдож чаддаг хүүхэд юм. ❤️

🌱 Урсгалаараа ангиллын хүүхдүүд

Ийм хүүхдүүдийн дотор ихэвчлэн ирээдүйн том зорилгоос айх айдас, мөн “Би чадахгүй байх” гэсэн өөртөө итгэлгүй мэдрэмж нуугдаж байдаг. Тиймээс тэд идэвхгүй, зорилгогүй мэт харагдах нь бий.

🔑 Хэрхэн харилцах вэ?

❌ “Чи том болоод юу болох гэж байна?”, “Яагаад илүү хичээхгүй байгаа юм?” гэх мэт том зорилгоор бүү шахаж дарамтлаарай. Ийм асуулт хүүхдийг улам бүр айлгаж, өөртөө хаалт хийхэд хүргэдэг.

✅ Харин маш жижиг амжилтуудыг бий болгож өгөөрэй. Гэрт нь насанд нь тохирсон энгийн хариуцлага өгч, хийж чадсан үед нь чин сэтгэлээсээ магтаж урамшуул.

Жижиг ялалтууд өөртөө итгэх итгэлийг аажмаар бий болгож, айдас болон гацалтыг нь багасгана. Ингэснээр хүүхдийн амьдралын идэвх сэргэж, өөрийн боломжоо олж харах эхлэл тавигддаг.

#Бодол
Миний ухаантай хүүхдийг багш нар яагаад сургаад, хөгжүүлчихэж чаддаггүй юм бэ?

Хүнийг өөрчлөх, хөгжүүлэх амархан уу? Маш хэцүү.

Яагаад?

Таны ухаантай хүүхэд маш зөрүүд. Зөвхөн таны хүүхэд ч биш, ер нь хүн бүр зөрүүд.

Тэгэхээр зөрүүд хүнтэй ойлголцоод, түүнийг өөрийн талдаа оруулаад, түүнтэй нэг баг болоод, хүсэхгүй байгаа, сонирхол муутай зүйлсийг хийлгэнэ гэдэг бол амар зүйл биш!

Дурын хүн багш болчихдоггүй. Үүний учрыг олсон хүн л "Багш" болдог.

Хэн ч эхнээсээ сайн багш болж төрөхгүй. Сайн багш болно гэдэг бол урт хугацааны, уйгагүй хөдөлмөрийн үр дүн.