02/08/2026
О.Цогтгэрэл: Огцом турснаас болоод арьс болон зовхи суларч, хараа муудаад байсан учраас эрүүл мэндийн шалтгаанаар хагалгаанд орсон
АН-ын дарга О.Цогтгэрэл эрүүл мэндийн шалтгаанаар зовхио татуулах хагалгаанд орсон талаараа тайлбар хийлээ.
Тэрбээр “С.Зориг агсны хөшөөг нүүлгэсэнд бухимдаж, буцааж байрлуулах асуудалд анхаарал хандуулах гээд өчигдөр лайв хийсний араас миний эрүүл мэндийн асуудлыг олон хүн анхаарсан бололтой
Тулсан асуудлаас бултаж, зугтаж яваагүй болохоор хүмүүс юу гэж ярихыг үл тоон ажлаа л хийж байна гэж бодсон. Цаашдаа ч хийнэ.
Энэ бүгдийг дахин үл нуршаад ер нь тайлбар хийчих нь зүйтэй юм байна гэж бодлоо. (Зөвлөхүүдээс хүлцэл өчье хувийн асуудлаа дур мэдэн нийтэлж байгаа даа)
Би сүүлийн 2 жилийн хугацаанд 20 орчим кг жингээ хаясан. Анхны шалтгаан нь илүүдэл жингээс болсон гэсэн оношоор ойрын хүнээ алдчихаад турья гэж хатуу шийдсэн юм. Турж байгаа хүмүүс мэднэ дээ хасахаасаа барих нь хэцүү гэдгийг, ажлын ачаалал их үед үнэхээр тамиргүйдэж няцмаар санагддагийг, архи, тамхитай найз нөхдийн орчин зөндөө үүсдэг зэрэг олон л юм болдог.
Дахиад ч нэмж тур гэж эмч шаардсан хэвээр. Мөн архи тамхи хориотой. Ажлын шаардлагаар архи хэрэглэх хэрэгцээ зөндөө гардаг. Сүүлийн 2 жилд архийг нэг удаа л хэрэглэсэн байдаг. Пиво ч амсахгүй яваа. Хааяа найз нөхдөөрөө суух үе гардагч эмчийн зөвлөгөөг хатуу дагаж явна.
Турахаар бие хөнгөрөөд урам аваад эрүүлжээд сайхан байдаг. Бас сайны хажуугаар саар гэж нүдний хараа минь харин огцом муудчихлаа. Шил тааруулж байна. Эмч хэлэхдээ огцом турснаас болоод арьс болон зовхи чинь суларчихсан. Дээд доод зовхиноос авахуулахгүй бол хараа чинь нэмж муудна гэж анхааруулж, цаашид хасах жин сулрах хэсгийг тооцож хагалгаанд орохыг зөвлөсөн юм.
Би харин дээд зовхинд нь хэдэн жилээс үнэхээр шалтгаантай бол хийлгэе гэж бодоод одоо арай амрыг нь сонгосон ухаантай.
Иймэрхүү өөртөө хүндэтгэх шалтгаан байгаа гэж бодсон учраас зайлшгүй гэсэн эмчийн заалттай нүдний асуудалдаа анхаарал хандуулсан юм.
Ээждээ харин энэ талаар нэг л санаа зовоод эхнэр бид 2 хэлээгүй байсан юм, одоо сошиалаас үзчихсэн байх, уучлаарай ээжээ
Харин төгсгөлд нь та бүхэнд нэг нууцаа хэлэхэд ирэх хавар УБ-марофоны 20 км-т гүйх мөрөөдөлтэй байгаагаа хэлье. Нас жиндээ тааруулж бэлдэнэ дээ. Тэр өдрийг өөрийгөө ялсан, урамшсан өдөр байлгахын төлөө хичээнээ, хэддүгээр байранд ирэх нь бол хамаагүй.
Та бүгддээ эрүүлийг, амжилтыг хүсье" хэмээн өөрийн цахим хуудаснаа нийтэлжээ
