04/12/2025
📗Өнөөдөр би Ивата Мацуогийн “Амжилтад хүрдэг, хүрдэггүй хүмүүсийн өчүүхэн ялгаа” номыг уншиж байна. Өнөөдөр уншсан зүйлсээс надад хамгийн их таалагдсан хэдэн мөрийг хуваалцъя.
📌"Амьдралаа утга учиртай өнгөрөөе гэвэл хэрхэн хөдөлмөрлөх вэ?
Ажлыг илэрхийлдэг япон үгийг Шигуту гэдэг ба үүний ханзны утгыг задлан авч үзвэл ямар нэгэн үйл хэрэгт үйлчлэх гэсэн утгатай. Аливаа хөдөлмөрийг өөрийнхөө хүсэл мөрөөдлийг биелүүлэх арга хэрэгсэл гэж бодох нь чухал. Ажлын цаг бидний амьдралын ихэнх хэсгийг эзэлдэг. Магадгүй энэ цаг хугацаа зовлон бэрхшээлтэй юм уу, утга учиргүй өнгөрдөг бол өдөр бүрийн амьдрал маань ямар хэцүү болох бол. Харин эсрэгээрээ хөөр баяр, урам зоригийг мэдэрч, тухайн ажлаар дамжуулан хүсэл мөрөөдлөө биелүүлж чадвал бид амьдралаа утга учиртай өнгөрөөж чадна."
📌"Амжилтад хүрье гэвэл хийж буй ажилдаа дуртай байх хэрэгтэй. Дуртай ажлаа олоогүй бол үргэлжлүүлэн хайгаарай. Үүнд тайвширч огт болохгүй. Сэтгэлд тань хуримтлагдсан бүх асуудал таныг дуртай ажлаа олсон аяндаа ойлгогдох болно."
💭Миний бодлоор, уншсан зүйл маань бидний амьдралд зөвхөн хийж буй ажилтай холбоотой бус, шинэ зүйл сурахад ч чухал нөлөөтэй. “Дургүйд хүчгүй” гэдэг үг байдаг шүү дээ. Хийж буй зүйлдээ дуртай байх, тэр зорилгодоо тууштай байх нь үнэхээр чухал юм.
Тухайн зүйлийг эхлүүлсэн үедээ сайн хийж чадахгүй байж болно, гэхдээ тууштай хөдөлмөрлөж, эцсийг нь үзвэл үр дүн нь сэтгэлд хүрдэг. Мэдээж хүнд хэцүү өдрүүд бас гарна. Хийж буй зүйл утга учиргүй санагдах, эцэс төгсгөл нь мэдэгдэхгүй, “Яагаад би үүнийг хийж байна вэ?” гэдэг асуулт олон дахин төрөх үе байдаг. Гэсэн хэдий ч хамгийн гол нь тууштай байж, хийж буй зүйлдээ дуртай байх нь амжилттай үргэлжлэх түлхүүр бололтой.
Та бүгд маань уншиж байгаа,эсвэл уншсан номноосоо дуртай ишлэлээ хуваалцаарай. 🙂
Photo by Leah Newhouse: https://www.pexels.com/photo/selective-focus-photography-of-woman-holding-book-373465/
