Мөнххайрхан сумын сургууль нь 1948 онд 1 анги, 2 бүлэг, 63 сурагч, 2 багш, 4 ажилчинтайгаар анх байгуулагдан 5 эсгий гэрт үйл ажиллагаагаа явуулж эхэлснээс хойш Ховд аймгийн төдийгүй Монгол улсын боловсролыг хөгжүүлэх үйл хэрэгт шийдвэрлэх үүрэг гүйцэтгэсээр ирсэн бөгөөд 60 гаруй жилийн урт түүхэн замналыг туулахдаа бага 4, 8,10,11,12 жилийн сургууль болон өргөжсөн.
Одоо тус сумын 12 жилийн сургууль нь хичээлийн 2 байр, спортын заал, 80 хүүхдийн дотуур байр, компьютерийн иж бүрэн кабинет, 10000 номын фонд бүхий номын сантай, 18 бүлэгт 500 хүүхэд суралцаж, нийт 50 багш ажилчин ажиллаж “Тохилог орчин - чанартай үйлчилгээ, “Зөв сэтгэл– гэрэлт ирээдүй” уриа дэвшүүлэн “Чадвартай багш- чанартай сургалт
Чармайлттай суралцагч- чансаатай боловсрол” зарчмыг эрхэмлэн сургалт хүмүүжлийн үйл ажиллагаагаа явуулж байна.
Мэргэжлийн багшийн хүрэлцээ хангамж 100 хувь, багш нарын 36 хувь нь магистрийн, 60 хувь нь бакалаврын, 4 хувь нь тусгай дунд боловсролтой, 60% нь мэргэжлийн зэрэгтэй, 2009, 2010, 2011, 2012 онд аймгийн шилдэг үнэлгээтэй сургуулиар шалгарч ажлын үзүүлэлтээрээ “Аймгийн тэргүүний сургууль” үнэлгээ авсан.
