Blaze Academy Mongolia

380 хүүхэд Хиймэл оюуны сургалтад суулаа
Даланзадгадын ЕБ-ын сургуулиудын 9-11 дүгээр ангийн сурагчид Н.Энхсайхан Enkhsaikhan Nyamsuren багшийн маань "Хиймэл оюуныг мэргэжил сонголтод оновчтой ашиглах нь" сургалтад хамрагдлаа.

Багшийн сургалтын онцлог нь зөвхөн онол ярьдаггүй, харин хүүхдүүдтэй хамтдаа цахим орчинд хайлт хийж, практик дадлага хийдэг. Их сургуулийн багш нараа сонгохдоо ямар эрдэм шинжилгээний бүтээлүүд хийж, тэр нь дэлхий даяар хэдэн удаа эшлэгдсэнийг ямар аргаар яаж мэдэх вэ гэх зэрэг бодитой судалгааг хийж үзүүлж байлаа. Хөөх гэж гайхах дуу үе үе танхимд гарч байсан шүү. Сургалтын дараа ч хүүхдүүд сонирхсон сэдвээрээ асууж, удтал ярилцсан. Бүгдэд баярлалаа.

Н.Энхсайхан багш Empasoft Institute of Technology- мэдээлэл технологийн дээд сургуулийг хамтран үүсгэн байгуулагч, Олон улсын бизнесийн көүч (ACC), НҮБ-ын зөвлөх, Women in Tech дэлхийн хөдөлгөөний Монгол дахь салбарын захирлаар ажилладаг. Охид эмэгтэйчүүдийг STEM болон технологийн салбарт хөтлөн чиглүүлэх хөтөлбөр тогтмол зохион байгуулж, олон улс оронд уригдаж лекц сургалт хийдэг дэлхийд танигдсан ментор багш юм.

Дунд, ахлах ангийнхан ирээрэй
Гэрийн даалгавар, дуу шүлэг, зураг видео хийхдээ хиймэл оюуныг туслагчаа болгодог уу? Тийм гэдэгт итгэлтэй байна. Тэгвэл түүнийг ирээдүйн мэргэжлээ сонгохдоо хэрхэн ухаалаг ашиглаж, жинхэнэ "ТУСЛАГЧИЙН ҮҮРЭГ"-ийг нь гаргах вэ?

Сургалтыг Улаанбаатараас олон улсын көүч Н.Энхсайхан Enkhsaikhan Nyamsuren багш өөрийн биеэр ирж заана.

Сургалт, уулзалт
Хэзээ: Маргааш, 26-ны 14 цагт
Хаана: ШУТИС-ийн байр (Багшийн Хөгжлийн Ордон) хурлын танхимд болно.
Зөвхөн Даланзадгадын сурагчдад ҮНЭ ТӨЛБӨРГҮЙ.

Хүн төрөлхтнийг "хиймэл оюун хэрэглэдэг хүн & хиймэл оюун хэрэглэдэггүй хүн" гэж хоёр л ангилдаг болсон өнөө үед мэдээлэл технологийн мэдлэг боловсрол, шийдвэр гаргах ур чадвар өндрөөр үнэлэгдэж байна.

https://forms.gle/FRuyDjuPrAgR6mbt8 Бүртгэлээ урьдчилан дараах линкээр баталгаажуулбал сайн. Учир нь бид дараагийн сонин сайхан сургалт зарлахдаа тан руу хамгийн түрүүнд хандах болно.

Н.Энхсайхан багш Мэдээлэл технологийн Empasoft Institute of Technology дээд сургуулийг хамтран үүсгэн байгуулагч, Women in Tech дэлхийн хөдөлгөөний Монгол дахь салбарын захирлаар ажилладаг юм. Мөн охид эмэгтэйчүүдийг STEM болон технологийн салбарт хөтлөн чиглүүлэх хөтөлбөр тогтмол зохион байгуулж, олон улс оронд уригдаж лекц сургалт хийдэг дэлхийд танигдсан ментор багш юм.

Ахлах ангийн сурагчид маань батламжаа гардан авлаа
Энэ жилийн SAT + TOEFL математик, англи хэл хосолсон ангид 30 гаруй сурагч хамрагдасан. Тэд маань хоёр долоо хоногийн өмнө Улаанбаатар хотод очиж Дижитал SAT (АНУ-ын Элсэлтийн шалгалт гэж ойлгож болно) тестээ өгсөн бөгөөд өнөөдөр дүн нь гарлаа. Мөн академи дээрээ TOEFL ITP тест өгсөн сурагчид батламжаа гардан авсан юм.

Энэ хичээлийн жилд Bataa Uranchimeg Б.Уранчимэг багш маань сурагчдыг англи хэл дээр математикийн тестэд бэлтгэж ажилласан. SAT математикийн тестийн дээд хэмжээст оноо нь 800 байдаг. Манай сурагчид 480-780 хүртэлх оноог авсан амжилт гаргасан. 12-р ангийн сурагч А.Алтанзул 780 оноо авч, Монгол улсын Элсэлтийн Шалгалтын 800 оноонд дүйцүүлж чадсан нь орон нутгийн хүүхдүүдэд боломж маш их байгааг харуулсан үйл явдал болсон юм.

Англи хэлний олон улсын тестэд бэлтгэж виртуалаар ажилласан Shur-Erdene Gombodorj болон танхимын сургалтын хариуцан ажилласан Edu Khulan багш нартаа мөн баярлалаа. Сурагчид маань TOEFL ITP эхний тестээ амжилттай өгч, 443-577 оноо авсан үр дүнг үзүүллээ. Анхны оролдлогоор В1/B2 түвшинд үнэлэгдсэн нь чамлахааргүй том амжилт юм. Одоо хүүхдүүдийг маань TOEFL iBT болон IELTS тестийн бэлтгэл хийх, мөн SAT тестээ дахин өгөх том сорилт хүлээж байна.

Өнгөрсөн хичээлийн жилд өдөр бүр хичээл зүтгэл гаргаж байсан бүх сурагчдаа баярлалаа. Бас халуун баяр хүргэе. Хүсэж мөрөөдөж байгаа оргилдоо заавал хүрээрэй. Багш нар нь туслахад хэзээд бэлэн шүү.

"Дэлхийн түвшний сурагч" хөтөлбөрийнхөн төгсөлтөө хийлээ
Дунд ангийн сурагчид маань өнөөдөр TOEFL Junior шалгалтын сертификат, онооны батламжаа гардаж авлаа.

Сурагчдын маань хичээл зүтгэл, эцэг эхчүүдийн дэмжлэг, хамгийн гол нь Ёндонгийн Оюун-Эрдэнэ багшийн сонсгол-ярианы тусгай аргачлал, Ярианы клуб хариуцсан гадаад багш Лавиниагийн маань тоглоомын арга дээр суурилсан интерактив сургалтуудын ачаар хүүхдүүд маань энэ жил мөн л өндөр ахиц гаргаж чадлаа. Манай сургалтын онцлогоос шалтгаалан ихэнх хүүхдүүд маань сонсголын тестээ өндөр оноотой өгдөг. Энэ жил ч мөн адил байв.

TOEFL Junior тестийн хэмжээст оноо нь 600-900 байдаг. Хүүхдүүд маань 625-860 оноо авч үнэлэгджээ. Тодруулбал, 15 сурагч 2-р түвшинд, 6 сурагч 3-р түвшинд, 8 сурагч 4-р түвшинд үнэлэгдсэн. 15 сурагч амжилтын батламж буюу Алт, Мөнгө, Хүрэл сертификатууд авлаа. Энэ жилийн дунд ангийн сурагчдаас хоёр сурагч TOEFL ITP тестийг ахлах ангийн сурагчидтай хамт өгч 513 В1 түвшин, 557 В2 түвшинд тус тус үнэлэгдэн Мөнгө, Хүрэл батламж авсан нь онцлох үйл явдал байлаа.

Хоёрдугаар жилийн сурагчдын маань 98% нь хувийн амжилтаа ахиулж чадсан нь энэ хичээлийн жилийн онцгой амжилт байв. Хүүхдүүд маань өмнө жилийн шалгалтын дүнгээ 25-95 оноогоор ахиулж чадсан юм. Энэ удаагийн тестэд манай сурагчдын авсан хамгийн өндөр оноо 860/900 юм. Ингэснээр дунд ангийн сурагчид маань ирэх жил TOEFL -ийн дараагийн шатны тестийг өгөх боломжтой болж байна.

Гадаадын сургуулийн бэлтгэлийг манай академи 6-р ангиас эхлэн хийж эхэлдэг. Англи хэл бол олон шалгуур үзүүлэлтийн зөвхөн нэг хэсэг нь юм. Дунд ангидаа англи хэлний тодорхой түвшинд хүрчихсэн байхад хүүхдүүд маань цаашид англи хэл дээр шинжлэх ухааны мэдлэгт суралцах өргөн боломжийг эдэлж чадна. Манай сурагчдаас монгол сургуулийнхаа хажуугаар Америкийн ахлах сургуульд сурч байгаа хүүхдүүд ч бий. Системтэй бэлтгэл, тууштай хандлага, эцэг эхийн дэмжлэг оролцоо маш чухал байдаг юм.

Хүүхдүүд ээ, ирэх намар баяртай уулзацгаая. Хайртай шүү.

Зочин илтгэгч О.Эрдэнэ-Өрнөх: Унших чадвар сайн бол сэтгэх чадвар сайн байна гэсэн үг. Уншдаг иргэн байгаарай, хүүхдүүд ээ!
Манай академи 2025-2026 оны хичээлийн жилийн хаалтаа өнөөдөр хийлээ. Төгсөлтийн баяр дээр маань ирж "Дэлхийн иргэн байх нь" сэдвээр зочин илтгэгч Оюуны Эрдэнэ-Өрнөх сурагчдад маань сонирхолтой яриа тавилаа.

О.Эрдэнэ-Өрнөх Английн Засгийн тэтгэлгээр Йоркийн Их Сургуулийг онолын эдийн засгийн мэргэжлээр магистр зэрэгтэй төгссөн юм. Тэрээр Англи улсыг сонгож зорьсон шалтгаанаа тайлбарлахдаа "Монгол, Англи хоёр улс дэлхийн түүхэнд хүчирхэг гүрэн байгуулж, олон арван улс үндэстэн, ард түмнийг өөртөө нэгтгэж явсан агуу их үүх түүхтэй. Тиймээс их гүрний сэтгэлгээ талаасаа төсөөтэй зүйлс хоёр оронд нэлээд бий" гэж яриагаа эхлүүлсэн юм.

Евразийн өндөрлөгт монгол хэлээр нэрлэгдсэн газар орон хэдэн арав, хэдэн зуугаар тоологддог. Тиймээс дэлхийн энтэй агуу түүх, агуу соёлтой Монгол эх орноо хайрлан хүндэтгэх, эх орондоо хэрэгтэй хүн байх, түүний төлөө хичээн шамдан суралцахын ач холбогдлыг тэрээр онцолж ярилаа. Өнөөгийн хүчирхэг гүрнүүд бүгд "уншигч" гүрнүүд. Орчин цагийн боловсролтой иргэн байх нь тогтмол унших дадалтай шууд холбоотой. Унших чадвараа алдвал сэтгэх чадвараа алдана гэсэн үг. Тиймээс уншдаг иргэн байхыг эцэст нь дахин сануулж хэллээ.

Амралтын өдрөө хугаслан бидний төгсөлтийн үйл ажиллагаанд ирж, хүүхдүүдэд маань Монголчуудын их түүхийн талаар, мөн өнөөгийн хиймэл оюун дээр суурилсан технологийн эрин үеийн бодитой сорилт боломжийн тухай, хүн төрөлхтний цаашдын хөгжлийн чиг хандлага, төлөв байдлын тухай гээд өргөн сэдвээр өнгөрсөн одоо ба ирээдүй гурвын цагийн хэлхээс дунд тайлбарлаж, сонирхолтой яриа хийсэн нь нийт багш сурагчдад маань "мэдлэгт нь мэдлэг нэмсэн" үйл явдал болов. Өмнөговь Аймгийн ИТХ-ын дарга О.Эрдэнэ-Өрнөх танд ажлын амжилт хүсье!