Twin Stars Education Center - Language School

𝐏𝐚𝐫𝐭 𝟑: 𝐏𝐞𝐫𝐜𝐞𝐧𝐭𝐚𝐠𝐞 ရဲ့ ဒုတိယ အမြွာ 𝐚𝐤𝐚 𝐃𝐞𝐜𝐢𝐦𝐚𝐥𝐬 (ဒဿမ)

ပြီးခဲ့တဲ့ 𝐏𝐨𝐬𝐭 မှာ 𝐏𝐞𝐫𝐜𝐞𝐧𝐭𝐚𝐠𝐞 နဲ့ 𝐅𝐫𝐚𝐜𝐭𝐢𝐨𝐧 တို့ရဲ့ ပတ်သက်မှုကို ပြောပြခဲ့ပြီးပြီဆိုတော့ ဒီနေ့မှာတော့ 𝐅𝐨𝐫𝐦𝐮𝐥𝐚 တွေထဲမှာ အသုံးအများဆုံးဖြစ်တဲ့ 𝐃𝐞𝐜𝐢𝐦𝐚𝐥𝐬 (ဒဿမ) အကြောင်းနဲ့ 𝐂𝐚𝐥𝐜𝐮𝐥𝐚𝐭𝐨𝐫 မလိုတဲ့ 𝐦𝐞𝐧𝐭𝐚𝐥 𝐦𝐚𝐭𝐡 𝐬𝐡𝐨𝐫𝐭𝐜𝐮𝐭𝐬 တွေကို ဆက်ပြီးပြောပြပေးသွားပါမယ်။

🔢 𝐃𝐞𝐜𝐢𝐦𝐚𝐥𝐬 (ဒဿမ) ဆိုတာ ဘာလဲ?
ဒဿမဆိုတာ တကယ်တော့ အပိုင်းကိန်း (𝐅𝐫𝐚𝐜𝐭𝐢𝐨𝐧) တွေကို တိုက်ရိုက် ချစားလိုက်လို့ ထွက်လာတဲ့ အဖြေ သို့မဟုတ် ရာခိုင်နှုန်းကို ၁၀၀ နဲ့ စားထားတဲ့ကောင် လို့ မှတ်လို့ရပါတယ်။ ဥပမာ 𝟓𝟎% ဆိုတာ 𝟓𝟎/𝟏𝟎𝟎 ဖြစ်ပြီး၊ ချစားလိုက်ရင် 𝟎.𝟓 ဆိုတဲ့ ဒဿမကိန်း ထွက်လာတာပါ။ သူက ဂဏန်းတွေကြားထဲမှာ အစက်လေး (𝐃𝐞𝐜𝐢𝐦𝐚𝐥 𝐏𝐨𝐢𝐧𝐭) နဲ့ နေရာယူထားတတ်တဲ့ကောင်ပေါ့။

❓ 𝐖𝐡𝐲 𝐢𝐭 𝐦𝐚𝐭𝐭𝐞𝐫𝐬 𝐟𝐨𝐫 𝐆𝐄𝐃 (ဘာလို့ သိထားဖို့ အရေးကြီးတာလဲ)
𝐆𝐄𝐃 𝐌𝐚𝐭𝐡 မှာ 𝐏𝐞𝐫𝐜𝐞𝐧𝐭𝐚𝐠𝐞 ကို ပေးထားပြီး 𝐅𝐨𝐫𝐦𝐮𝐥𝐚 ထဲထည့်တွက်ခိုင်းတဲ့ ပုစ္ဆာတွေ အများကြီးပါပါတယ်။ အဲ့လိုနေရာမျိုးမှာ ရာခိုင်နှုန်းကို ဒီတိုင်းထည့်တွက်လို့မရဘဲ 𝐃𝐞𝐜𝐢𝐦𝐚𝐥 (ဒဿမ) ပြောင်းပြီးမှ တွက်ရတာမလို့ ဒီကောင့်အကြောင်းကို သေချာနှံ့စပ်နေဖို့ လိုပါတယ်။

🧮 𝐂𝐚𝐥𝐜𝐮𝐥𝐚𝐭𝐨𝐫 မသုံးဘဲ တွက်လို့ရတဲ့ နည်းလမ်းတွေ (𝐌𝐞𝐧𝐭𝐚𝐥 𝐌𝐚𝐭𝐡 𝐒𝐡𝐨𝐫𝐭𝐜𝐮𝐭𝐬)
ချတွက်ဖို့မလိုဘဲ စိတ်ထဲတင် ဝှီးဝှီးနဲ့ ချက်ချင်းတွက်လို့ရတဲ့ 𝐬𝐡𝐨𝐫𝐭𝐜𝐮𝐭𝐬 လေးတွေလည်း ပြောပြပေးပါမယ်။

𝟏𝟎% ရှာချင်ရင် 𝐃𝐞𝐜𝐢𝐦𝐚𝐥 𝐩𝐨𝐢𝐧𝐭 ကို ဘယ်ဘက် တစ်နေရာ ရွှေ့လိုက်ပါ။
ဥပမာ 𝟏𝟎% 𝐨𝐟 𝟑𝟒𝟎 ကို လိုချင်တယ်ထားပါတော့။ 𝟑𝟒𝟎 ဆိုတာ တကယ်တော့ 𝟑𝟒𝟎.𝟎 ပါပဲ။ 𝐝𝐞𝐜𝐢𝐦𝐚𝐥 က 𝟑𝟒𝟎 အနောက်မှာ​ရှိနေတာပါ​။ အဲ့တော့ 𝐩𝐨𝐢𝐧𝐭 ကို ဘယ်ဘက်ကို တစ်နေရာရွှေ့ပေးလိုက်ရင် 𝟑𝟒𝟎.𝟎 ကနေ 𝟑𝟒.𝟎 ဖြစ်သွားပါတယ်။

𝟓𝟎% ရှာချင်ရင် 𝟐 နဲ့ စားလိုက်ပါ။ (𝟓𝟎% 𝐨𝐟 𝟏𝟐𝟔 = 𝟔𝟑 လိုမျိုး)
𝟏𝟓% 𝐓𝐢𝐩 ပေးချင်ရင် 𝟏𝟎% ကို အရင်ရှာလိုက်ပါ။ ပြီးရင် အဲ့ဒါရဲ့ တစ်ဝက် (၅%) နဲ့ ပေါင်းလိုက်ပါ။

ဥပမာပေးရရင် မုန့် 𝟐𝟎𝟎𝟎𝟎 ဖိုး စားထားလို့ 𝟏𝟓% 𝐓𝐢𝐩 ပေးမယ်ဆိုရင် အရင်ဆုံး 𝟏𝟎% ဖြစ်တဲ့ 𝟐𝟎𝟎𝟎 ကိုအရင်ရှာ။ ပြီးရင် 𝟐𝟎𝟎𝟎 ရဲ့ တစ်ဝက် 𝟏𝟎𝟎𝟎 နဲ့ ပေါင်းလိုက်။ အဲ့တာဆိုရင် စုစုပေါင်း 𝟑𝟎𝟎𝟎 ဆိုပြီး ရသွားပါလိမ့်မယ်။
အဲ့လိုမျိုးပါ။ တွက်ပါများလာရင် ဝှီး ဝှီး နဲ့ တွက်တတ်သွားမှာပါ။ အဲ့ကြောင့် များများလေ့ကျင့်ပါ။

⚠️ ကျောင်းသားတွေ အမှတ်လျော့ဆုံး 𝐝𝐞𝐜𝐢𝐦𝐚𝐥𝐬 𝐭𝐫𝐚𝐩 𝟑 ခု
❌ 𝐃𝐞𝐜𝐢𝐦𝐚𝐥 𝐄𝐫𝐫𝐨𝐫 (ဒဿမပြောင်းဖို့ မေ့တာ): 𝟐𝟎% လျှော့မယ်ဆိုပြီး 𝐅𝐨𝐫𝐦𝐮𝐥𝐚 ထဲ 𝟐𝟎 အတိုင်း ထည့်မမြှောက်ပါနဲ့ (အဖြေ မိုးပေါ်ပျံတက်သွားလိမ့်မယ်)။ အမြဲတမ်း 𝐃𝐞𝐜𝐢𝐦𝐚𝐥 အရင်ပြောင်းပြီး 𝟎.𝟐𝟎 နဲ့ မြှောက်ပါ။

❌ 𝐅𝐨𝐫𝐠𝐞𝐭𝐭𝐢𝐧𝐠 𝐭𝐡𝐞 "𝟏" 𝐢𝐧 𝐆𝐫𝐨𝐰𝐭𝐡: ပစ္စည်းစျေး 𝟐𝟎% တိုးလို့ နောက်ဆုံးကျသင့်မယ့် "စုစုပေါင်းစျေး" ကို တစ်ခါတည်း လိုချင်ရင် 𝟎.𝟐𝟎 နဲ့ မမြှောက်ပါနဲ့။ မူလပမာဏ ပါဝင်တဲ့ 𝟏.𝟐𝟎 နဲ့ တိုက်ရိုက်မြှောက်ချလိုက်ပါ။

❌ 𝐒𝐦𝐚𝐥𝐥 𝐏𝐞𝐫𝐜𝐞𝐧𝐭𝐚𝐠𝐞𝐬 𝐓𝐫𝐚𝐩 (ရာခိုင်နှုန်းအသေးလေးတွေ): 𝟓% ကို 𝟎.𝟓 လို့ သွားမရေးပါနဲ့ (𝟎.𝟓 က 𝟓𝟎% ကြီးတောင် ဖြစ်သွားမှာပါ)။ ဂဏန်းတစ်လုံးတည်းဆို ဒသမနှစ်နေရာရွှေ့ပြီး 𝟎.𝟎𝟓 လို့ ရေးရမှာပါ။

📝 𝐒𝐮𝐦𝐦𝐚𝐫𝐢𝐳𝐞 ပြန်လုပ်ရမယ်ဆိုရင်
𝐏𝐞𝐫𝐜𝐞𝐧𝐭𝐚𝐠𝐞 ကို 𝐅𝐨𝐫𝐦𝐮𝐥𝐚 ထဲထည့်တွက်တော့မယ်ဆိုရင် 𝐃𝐞𝐜𝐢𝐦𝐚𝐥 (ဒဿမ) အရင်ပြောင်းဖို့ လုံးဝမမေ့ပါနဲ့။

ရာခိုင်နှုန်းငယ်လေးတွေ (𝟓%, 𝟐%) ဆိုရင် 𝟎.𝟎𝟓, 𝟎.𝟎𝟐 လို့ ရေးဖို့ သတိထားပါ။
ကဲ အဲ့တာဆိုရင် 𝐏𝐞𝐫𝐜𝐞𝐧𝐭𝐚𝐠𝐞 ရဲ့ အမြွှာတွေဖြစ်တဲ့ 𝐅𝐫𝐚𝐜𝐭𝐢𝐨𝐧𝐬 နဲ့ 𝐃𝐞𝐜𝐢𝐦𝐚𝐥𝐬 အကြောင်း စုံသွားပြီဆိုတော့ နောက် 𝐏𝐨𝐬𝐭 ကျရင်တော့ ကျောင်းသားတွေ အမှားအများဆုံးဖြစ်တဲ့ 𝐑𝐚𝐭𝐢𝐨 (အချိုး) နဲ့ 𝐏𝐫𝐨𝐩𝐨𝐫𝐭𝐢𝐨𝐧 (အချိုးတူ) အကြောင်းကို ဆက်သွားကြတာပေါ့။

ကျွန်တော်ကတော့ 𝐍𝐓 ပါ။ နောက်တစ်ခေါက်မှ တွေ့ကြတာပေါ့။

Post ကို လွတ်လပ်စွာ ရှယ်နိုင်ပါသည်။ ❌ ကူးယူဖော်ပြခွင့်မပြုပါ။ ❌

PreGED, GED Preparation & GED Intensive အတန်းများအတွက် page messenger http://m.me/384050591451495 𝐨𝐫 𝐓𝐞𝐥𝐞𝐠𝐫𝐚𝐦 𝐮𝐬𝐞𝐫𝐧𝐚𝐦𝐞 @𝐭𝐰𝐢𝐧𝐬𝐭𝐚𝐫𝟕𝟖𝟐𝟎𝟐𝟎 မှာ အသေးစိတ်စုံစမ်းမေးမြန်းနိုင်ပါတယ်။

လူ့ခန္ဓာကိုယ် အရိုးစုစနစ် (𝐇𝐮𝐦𝐚𝐧 𝐒𝐤𝐞𝐥𝐞𝐭𝐚𝐥 𝐒𝐲𝐬𝐭𝐞𝐦)

လူအများစုက လူ့အရိုးစုစနစ်ဆိုတာနဲ့ သိပ္ပံအတန်းတွေမှာ ပြထားတဲ့ အရိုးခြောက်ကြီးတွေကိုသာ ပြေးမြင်တတ်ကြပါတယ်။ ဒါပေမဲ့ လူ့အရိုးစုစနစ်ဆိုတာ အဲတာလေးတင်မကပါဘူး။ ခန္ဓာကိုယ်ကိုရဲ့ ပုံသဏ္ဌာန်ကို ထောက်ပံ့ပေးတာ၊ ထိခိုက်လွယ်တဲ့ ကိုယ်တွင်းအင်္ဂါတွေကို ကာကွယ်ပေးတာ၊ လှုပ်ရှားသွားလာစေတာ၊ သွေးဆဲလ်တွေကို ထုတ်လုပ်တာတွေအပြင် ခန္ဓာကိုယ်အတွက် မရှိမဖြစ်လိုအပ်တဲ့ သတ္တုဓာတ်တွေကို သိုလှောင်တာတွေကို လုပ်ဆောင်ပေးနေပြီး အမြဲ သက်ဝင်လှုပ်ရှားနေတဲ့ စနစ်ကြီးတစ်ခုပါ။ တကယ်လို့ အရိုးစုစနစ်ကြီးသာမရှိရင် လူ့ခန္ဓာကိုယ်ကြီးက ပုံသဏ္ဌာန်မရှိတဲ့ အသားစတွေ၊ ကိုယ်တွင်းအင်္ဂါစုတွေအနေနဲ့ ပြိုကျနေမှာပါ။ တွေးကြည့်တာနဲ့တင် လန့်စရာပဲ။ အဲတာဆို လူသားတွေကို လန့်စရာ ခန္ဓာကိုယ်ကြီးမဖြစ်အောင် ထောက်ပံ့ပေးထားတဲ့ အရိုးစုစနစ်ကြီးဆိုတာ ဘာတွေနဲ့ ဖွဲ့စည်းထားပြီး ဘယ်လိုတွေ အလုပ်လုပ်နေလဲဆိုတာ သိထားသင့်တယ် မဟုတ်ပါလားဗျာ . . . ။

လူ့အရိုးစုစနစ် (𝐒𝐤𝐞𝐥𝐞𝐭𝐚𝐥 𝐒𝐲𝐬𝐭𝐞𝐦) ကို တစ်နည်း ‘ကြွက်သားနဲ့ အရိုးစုစနစ်’ (𝐌𝐮𝐬𝐜𝐮𝐥𝐨𝐬𝐤𝐞𝐥𝐞𝐭𝐚𝐥 𝐒𝐲𝐬𝐭𝐞𝐦) လို့လဲ ခေါ်ပါသေးတယ်။ ဒီစနစ်က ရှေ့မှာပြောခဲ့သလိုပဲ လူ့ခန္ဓာကိုယ်ကို အဓိက ထောက်ပံ့ပေးထားတဲ့ ငြမ်းစင်ကြီး (𝐅𝐫𝐚𝐦𝐞𝐰𝐨𝐫𝐤) တစ်ခုပါ။ လူကြီးတစ်ယောက်မှာဆိုရင် ပုံမှန်အားဖြင့် အရိုးပေါင်း ၂၀၆ ချောင်း ရှိပြီး၊ ဖွဲ့စည်းပုံတစ်ခုလုံးကို ချိတ်ဆက် တည်ငြိမ်စေဖို့အတွက် အဆစ် (𝐉𝐨𝐢𝐧𝐭) တွေ၊ အရိုးနု (𝐂𝐚𝐫𝐭𝐢𝐥𝐚𝐠𝐞) တွေ၊ အရိုးတွဲအရွတ် (𝐋𝐢𝐠𝐚𝐦𝐞𝐧𝐭) တွေနဲ့ ကြွက်သားတွဲအရွတ် (𝐓𝐞𝐧𝐝𝐨𝐧) တွေနဲ့ တွဲဆက်ထားပါတယ်။ ဒီအစိတ်အပိုင်းတွေအကုန်ပေါင်းပြီး လူတွေရဲ့ နေ့စဉ်ဘဝ လှုပ်ရှားမှုတွေနဲ့ လုပ်ငန်းဆောင်တာတိုင်းနီးပါးကို ထောက်ပံ့ပေးနိုင်တဲ့ အံ့ဩလောက်စရာ စနစ်တစ်ခုကို ဖန်တီးထားတာပါပဲ။

အရိုးဆိုတာထက်ပိုတဲ့ အရိုးစုစနစ်
အရိုးစုက ခန္ဓာကိုယ်အတွင်းပိုင်းမှာ ငြမ်းစင်ကြီးတစ်ခုအနေနဲ့ ဆောင်ရွက်ပေးတာ သိလောက်ပါပြီ။ ခန္ဓာကိုယ်ရဲ့ အလေးချိန်ကို ထိန်းထားပေးတာတွေ၊ ပုံသဏ္ဌာန်နှင့် တည်ငြိမ်မှုကို ထောက်ပံ့ပေးထားတာတွေသာမက ခန္ဓာကိုယ်တွင်းရှိ အင်္ဂါတွေ၊ ကြွက်သားတွေနဲ့ အသားစတွေ သူ့နေရာနဲ့သူရှိနေဖို့အတွက် အရိုးစုစနစ်အပေါ်မှာပဲ မှီခိုနေရတာပါပဲ။

တစ်ချိန်တည်းမှာပဲ အရိုးစုက ခန္ဓာကိုယ်ရဲ့ အရေးကြီးတဲ့ ကိုယ်တွင်းအင်္ဂါတွေကို ကာကွယ်ပေးပါတယ်။ ဥဒါဟရုံပြရရင် ဦးခေါင်းခွံ (𝐒𝐤𝐮𝐥𝐥) က ဦးနှောက်ကို ထိခိုက်ဒဏ်ရာမရအောင် ကာကွယ်ပေးထားတာ၊ ရင်အုံရိုး/ နံရိုးအိမ် (𝐑𝐢𝐛 𝐂𝐚𝐠𝐞) ကလဲ နှလုံး၊ အဆုတ်တို့ကို သံချပ်ကာအင်္ကျီတစ်ထည်လို ဝန်းရံစောင့်ရှောက်ပေးထားတာအပြင် ကျောရိုးမကြီး (𝐕𝐞𝐫𝐭𝐞𝐛𝐫𝐚𝐥 𝐂𝐨𝐥𝐮𝐦𝐧) ကလဲ ဦးနှောက်နှင့် ခန္ဓာကိုယ်အနှံ့အပြားအကြား အချက်ပြချက်တွေကို သယ်ဆောင်ပေးတဲ့ အာရုံကြောမကြီး (𝐒𝐩𝐢𝐧𝐚𝐥 𝐂𝐨𝐫𝐝) ကို လုံခြုံစေတာကို ကြည့်ပါ။

ထောက်ပံ့ခြင်းနဲ့ ကာကွယ်ပေးခြင်းတို့အပြင် အရိုးစုစနစ်က လှုပ်ရှားသွားလာမှုဆိုတဲ့ အရာမှာလဲ အရေးပါတဲ့ အခန်းကဏ္ဍက ပါဝင်နေပါတယ်။ အရိုးတွေက သူ့အလိုအလျောက် မလှုပ်ရှားနိုင်ပေမဲ့ ကြွက်သားတွေနဲ့ အနီးကပ် တွဲဖက်လုပ်ဆောင်ကြပါတယ်။ ကြွက်သားတွေ ကျုံ့ခြင်း၊ ဆန့်ခြင်း ဖြစ်ပေါ်တဲ့အခါ အကြောတွေကတစ်ဆင့် အရိုးတွေကို ဆွဲငင်ပြီး လှုပ်ရှားမှုကို ဖန်တီးပေးလိုက်တာပါပဲ။ ပန်းပဲခူးခူး၊ လမ်းပဲကူးကူး လှုပ်ရှားမှုတိုင်းမှာ ဒီကြွက်သားနဲ့ အရိုး​တွေကြားက တွဲဖက်ညီမှုအပေါ်မှာ မူတည်နေတာပါ။

အရိုးတွေထဲက လျှို့ဝှက်စက်ရုံ
အရိုးဆိုတာက တကယ်တော့ သက်မဲ့အရာဝတ္ထုမဟုတ်ဘဲ သက်ရှိတစ်ရှုး (𝐋𝐢𝐯𝐢𝐧𝐠 𝐓𝐢𝐬𝐬𝐮𝐞) တွေပါ။ အရိုးတော်တော်များများရဲ့ အတွင်းအနက်ပိုင်းမှာ ‘ရိုးတွင်းခြင်ဆီ’ (𝐁𝐨𝐧𝐞 𝐌𝐚𝐫𝐫𝐨𝐰) လို့ခေါ်တဲ့ သွေးဆဲလ်အသစ်တွေ ထုတ်လုပ်ပေးကာ နူးညံ့ပြီး အပေါက်ငယ်လေးတွေပါတဲ့ တစ်ရှူး (𝐒𝐨𝐟𝐭 𝐒𝐩𝐨𝐧𝐠𝐲 𝐓𝐢𝐬𝐬𝐮𝐞) တွေရှိပါတယ်။ အားလုံးသိကြတဲ့အတိုင်း သွေးနီဥတွေက ခန္ဓာကိုယ်အနှံ့ အောက်ဆီဂျင်တွေ သယ်ပေးပြီး သွေးဖြူဥတွေက ရောဂါပိုးမွှားတွေကို ကူညီတိုက်ဖျက်ပေးတာဆိုတော့ အဲဒီသွေးဆဲလ်တွေကို ထုတ်ပေးနေတဲ့ အရိုးစုစနစ်က ဆဲလ်အဆင့်အထိပါ လူသားတွေ ရှင်သန်ရေးအတွက် အထောက်အကူပြုနေတာပါပဲ။

ဒါ့အပြင် အရိုးတွေက သတ္တုဓာတ်တွေ (အထူးသဖြင့် ကယ်လ်စီယမ် (𝐂𝐚𝐥𝐜𝐢𝐮𝐦) နှင့် ဖော့စဖရပ် (𝐏𝐡𝐨𝐬𝐩𝐡𝐨𝐫𝐮𝐬)) ကို သိုလှောင်ရာဌာနတွေလဲ ဖြစ်ပါတယ်။ အဲဒီသတ္တုဓာတ်တွေက အရိုးတွေကို သန်မာစေရုံသာမက ကြွက်သားကျုံ့ဆန့်ခြင်းနဲ့ အာရုံကြောအချက်ပြမှုတွေအပါအဝင် ခန္ဓာကိုယ်ရဲ့ လုပ်ငန်းဆောင်တာ တော်တော်များများကို ထောက်ပံ့ပေးနေတာပါ။ အရိုးစုက သတ္တုဘဏ်တိုက်ကြီးတစ်ခုလို လုပ်ဆောင်ပေးပြီး လိုအပ်တဲ့အခါတိုင်း သတ္တုဓာတ်တွေကို သွေးကြောထဲ ထုတ်လွှတ်ပေးလိုက်တာပါပဲ။

အရိုးစုစနစ်ရဲ့ အဓိက အစိတ်အပိုင်းကြီးနှစ်ခု
ဆက်ပြီးတော့ လူ့အရိုးစုစနစ်ကို ခွဲထားတဲ့ အဓိက အစိတ်အပိုင်းကြီးနှစ်ခုကို ကြည့်လိုက်ရအောင် . . . ။ လူ့အရိုးစုစနစ်ကို ဗဟိုရိုးခွင် (𝐀𝐱𝐢𝐚𝐥 𝐒𝐤𝐞𝐥𝐞𝐭𝐨𝐧)၊ နဲ့ အတက်အလက်အရိုးငြမ်း/ ခြေလက်အရိုးစု (𝐀𝐩𝐩𝐞𝐧𝐝𝐢𝐜𝐮𝐥𝐚𝐫 𝐒𝐤𝐞𝐥𝐞𝐭𝐨𝐧) ဆိုပြီး နှစ်မျိုးခွဲထားပါတယ်။

ဗဟိုရိုးခွင်ကတော့ နာမည်အတိုင်းပဲ လူ့ခန္ဓာကိုယ်ရဲ့ ဗဟိုဝင်ရိုးကြီးကို ဖြစ်ပေါ်စေပြီး အရိုးပေါင်း ၈၀ နဲ့ဖွဲ့စည်းထားပါတယ်။ အဲဒီထဲမှာ ဦးခေါင်းခွံ (𝐒𝐤𝐮𝐥𝐥)၊ ကျောရိုးမကြီး (𝐕𝐞𝐫𝐭𝐞𝐛𝐫𝐚𝐥 𝐂𝐨𝐥𝐮𝐦𝐧/ 𝐒𝐩𝐢𝐧𝐞)၊ နံရိုးအိမ် (𝐑𝐢𝐛 𝐂𝐚𝐠𝐞) နဲ့ နားတွင်းရှိ သေးငယ်တဲ့ အရိုး (𝐎𝐬𝐬𝐢𝐜𝐥𝐞) လေးတွေ ပါဝင်ပါတယ်။ သူ့ရဲ့ အဓိကလုပ်ဆောင်ချက်ကတော့ ကာကွယ်ပေးဖို့နဲ့ ထောက်ပံ့ပေးဖို့ပါ။ ဗဟိုရိုးခွင်က ဦးနှောက်၊ အာရုံကြောမကြီးနဲ့ ရင်ဘတ်မှာရှိတဲ့ အရေးကြီးတဲ့ အင်္ဂါတွေကို မထိခိုက်အောင် ကာကွယ်ပေးထားပါတယ်။

ခြေလက်အရိုးစုဆိုတာကလဲ သူ့နာမည်အတိုင်းပဲ ခြေတွေ၊ လက်တွေက အရိုးတွေနဲ့ ဖွဲ့စည်းထားတာပါပဲ။ သူ့မှာဆိုရင် အရိုးပေါင်း ၁၂၆ ခုပါပြီး လက်မောင်းနဲ့ လက်ဖဝါး (𝐀𝐫𝐦 & 𝐇𝐚𝐧𝐝) တွေ၊ ခြေ​ထောက်နဲ့ ခြေဖဝါး (𝐋𝐞𝐠 & 𝐅𝐨𝐨𝐭) တွေ၊ ပုခုံးရိုးခွေ (𝐒𝐡𝐨𝐮𝐥𝐝𝐞𝐫/ 𝐏𝐞𝐜𝐭𝐨𝐫𝐚𝐥 𝐆𝐢𝐫𝐝𝐥𝐞) နဲ့ တင်ပဆုံရိုး (𝐏𝐞𝐥𝐯𝐢𝐬) တို့ပါဝင်ပါတယ်။ ခြေလက်အရိုးစုတွေကတော့ လှုပ်ရှားမှုတွေအတွက် အဓိကတာဝန်ယူရပါတယ်။ လူသားတွေကို လမ်းလျှောက်တာ၊ ပြေးတာ၊ ပစ္စည်းတွေ မ,တာစတဲ့ ကိုယ်လက်လှုပ်ရှားမှုတွေ ပြုလုပ်နိုင်အောင် ကူညီပေးပါတယ်။

အရိုးအမျိုးအစားများ
အရိုးဆိုတိုင်း အကုန်အတူတူပဲတော့ မဟုတ်ကြပါဘူး။ သိပ္ပံပညာရှင်တွေက အရိုးတွေကို သူတို့ရဲ့ ပုံသဏ္ဌာန်နဲ့ လုပ်ဆောင်ချက်အပေါ် မူတည်ပြီး အဓိကအမျိုအစားကြီး ငါးမျိုး ခွဲခြားထားပါတယ်။ အဲတာတွေကတော့ -

၁။ အရိုးရှည် (𝐋𝐨𝐧𝐠 𝐁𝐨𝐧𝐞)
အရိုးရှည်တွေဆိုတာက အနံထက် အလျားကပိုရှည်တဲ့ အရိုးတွေကို ပြောတာပါ။ သူတို့က ခန္ဓာကိုယ်ရဲ့ အလေးချိန်နဲ့ လှုပ်ရှားသွားလာမှုတွေကို အဓိက ထောက်ပံ့ပေးတာပါ။ ဥပမာ ပေါင်ရိုး (𝐅𝐞𝐦𝐮𝐫) နှင့် လက်မောင်းရိုး (𝐇𝐮𝐦𝐞𝐫𝐮𝐬) တို့ပါ။ ပေါင်ရိုးကတော့ လူ့ခန္ဓာကိုယ်မှာ အရှည်ဆုံးနဲ့ အသန်မာဆုံး အရိုးဖြစ်ပါတယ်။

၂။ အရိုးတို (𝐒𝐡𝐨𝐫𝐭 𝐁𝐨𝐧𝐞)
အရိုးတိုတွေက အကြမ်းဖျင်းအားဖြင့် ကုဗတုံးပုံသဏ္ဌာန်ရှိကြပါတယ်။ သူတို့ကတော့ အကန့်အသတ်ရှိတဲ့ လှုပ်ရှားမှုတွေကိုပဲ ပြုလုပ်နိုင်ကြပြီး တည်တည်ငြိမ်ငြိမ်ဖြစ်အောင် ထောက်ပံ့ပေးထားကြတာပါ။ အရိုးတိုတွေကို လက်ကောက်ဝတ်နှင့် ခြေကျင်းဝတ်တွေမှာ အများဆုံး တွေ့ရတတ်ပါတယ်။

၃။ အရိုးပြား (𝐅𝐥𝐚𝐭 𝐁𝐨𝐧𝐞)
အရိုးပြားတွေကတော့ ခန္ဓာကိုယ်အတွင်းရှိ အင်္ဂါတွေ ကာကွယ်ပေးပြီး ကြွက်သားတွေ တွယ်ကပ်ဖို့အတွက် မျက်နှာပြင်ကျယ်ကြီးတွေကို ထောက်ပံ့ပေးပါတယ်။ ဥပမာ ဦးခေါင်းခွံ၊ ရင်ညွန့်ရိုး၊ နံရိုးနှင့် တင်ပဆုံရိုးတို့တွေပါ။

၄။ ပုံသဏ္ဌာန်မမှန်တဲ့ အရိုး (𝐈𝐫𝐫𝐞𝐠𝐮𝐥𝐚𝐫 𝐁𝐨𝐧𝐞)
ဒီအရိုးတွေက သီးခြားလုပ်ငန်းဆောင်တာတွေကို ဆောင်ရွက်ဖို့ ပုံစံထုတ်ထားပြီး ရှုပ်ထွေးတဲ့ ပုံသဏ္ဌာန်တွေရှိကြပါတယ်။ ကျောရိုးဆစ် (𝐕𝐞𝐫𝐭𝐞𝐛𝐫𝐚𝐞) တွေက ပုံသဏ္ဌာန်မမှန်တဲ့ အရိုးတွေရဲ့ ဥပမာကောင်းတစ်ခုပါ။ သူတို့ရဲ့ ထူးခြားတဲ့ တည်ဆောက်ပုံက ခန္ဓာကိုယ် လှုပ်ရှားမှုတွေကို ထောက်ပံ့ပေးနေရင်းနဲ့ အာရုံကြောမကြီးကိုလဲ ကာကွယ်ပေးနေတာပါ။

၅။ နှမ်းစေ့ပုံအရိုး (𝐒𝐞𝐬𝐚𝐦𝐨𝐢𝐝 𝐁𝐨𝐧𝐞)
နှမ်းစေ့နဲ့ ပုံသဏ္ဍာန်၊ အရွယ်အစား ဆင်တူလို့ ဂရိဘာသာစကား '𝐒𝐞𝐬𝐚𝐦𝐨𝐧' (နှမ်း) ကနေ ဆင်းသက်လာတာပါ။ ဒီအရိုးတွေက အရွတ်တွေအတွင်းမှာ မြှုပ်နှံ တည်ရှိနေတဲ့ အဝိုင်းပုံ အရိုးအသေးစားလေးတွေပါပဲ။ ဒီအရိုးတွေက ပွတ်တိုက်မှုကို လျှော့ချပေးပြီး အရွတ်တွေ ပွန်းပဲ့ပျက်စီးခြင်းကနေ ကာကွယ်ပေးပါတယ်။ ဒူးဖုံးရိုး (𝐏𝐚𝐭𝐞𝐥𝐥𝐚) က အကြီးဆုံး နှမ်းစေ့ပုံအရိုးဖြစ်ပါတယ်။

အရာအားလုံးကို တွဲဆက်ပေးထားတဲ့ တစ်ရှူးများ
အရိုးစုစနစ်ကြီးတစ်ခုလုံး ကောင်းကောင်း အလုပ်လုပ်နိုင်ဖို့ အရိုးတွေတင်မကဘဲ ချိတ်ဆက်တစ်ရှုူး (𝐂𝐨𝐧𝐧𝐞𝐜𝐭𝐢𝐯𝐞 𝐓𝐢𝐬𝐬𝐮𝐞) တွေပေါ်မှာလဲ မှီခိုနေရပါတယ်။

၁။ အရိုးတွဲအရွတ် (𝐋𝐢𝐠𝐚𝐦𝐞𝐧𝐭)
အရိုးတွဲအရွတ်တွေဆိုတာက အရိုးတစ်ခုနဲ့ တစ်ခုကို အဆစ် (𝐉𝐨𝐢𝐧𝐭) မှာ ချိတ်ဆက်ပေးထားတဲ့ အားကောင်းတဲ့ ဖိုင်ဘာမျှင်တန်းကြီးတွေပါ။ သူတို့တွေက အဆစ်တွေကို တည်ငြိမ်စေပြီး အလွန်အကျွံ မလှုပ်ရှားနိုင်အောင် တားဆီးပေးပါတယ်။ ဘာလို့လဲဆိုတော့ လက်ကျိုး၊ ခြေကျိုးတွေ ဖြစ်ကုန်မှာစိုးတဲ့ အရိုးတွဲအရွတ်တွေရဲ့ စေတနာပါ။

၂။ ကြွက်သားတွဲအရွတ် (𝐓𝐞𝐧𝐝𝐨𝐧)
ကြွက်သားတွဲအရွတ်တွေကတော့ ကြွက်သားတွေကို အရိုးတွေနှင့် ချိတ်ဆက်ပေးပါတယ်။ ကြွက်သားတွေ ကျုံ့ဆန့်သွားတဲ့အခါ အဲဒီအရွတ်တွေက ဆွဲအားကို အရိုးများဆီကို လွှဲပြောင်းပေးပြီး လှုပ်ရှားမှုတွေကို ဖြစ်ပေါ်စေတာပါ။ ကျွန်တော်အခုလို စာရေးနေနိုင်တာလဲ ကြွက်သားတွဲအရွတ်တွေရဲ့ ကျေးဇူးမကင်းဘူးလို့ ပြောရမှာပါပဲ။

၃။ အရိုးနု (𝐂𝐚𝐫𝐭𝐢𝐥𝐚𝐠𝐞)
ကျွန်တော်တို့တစ်တွေ ဝက်သားဒုတ်ထိုးတို့ဘာတို့ စားတဲ့အခါ အသည်းစွဲဖြစ်ကြတဲ့ အရိုးနုဆိုတာကတော့ အဆစ်တွေနဲ့ ခန္ဓာကိုယ်အနှံ့အပြားမှာ တွေ့ရတတ်တဲ့ ချောမွေ့ပျော့ပျောင်းတဲ့ တစ်ရှုူးတစ်ခုပါ။ အရိုးနုတွေက တုန်ခါမှုဒဏ်တွေကို စုပ်ယူပေးတဲ့အပြင် (𝐒𝐡𝐨𝐜𝐤 𝐀𝐛𝐬𝐨𝐫𝐛𝐞𝐫) လှုပ်ရှားနေစဉ်အတွင်းမှာ အရိုးအချင်းချင်း ပွတ်တိုက်မှုကို လျှော့ချပေးပါတယ်။

အဆစ် (𝐉𝐨𝐢𝐧𝐭) တွေကို နားလည်ခြင်း
အဆစ်တွေဆိုတာက အရိုးနှစ်ခု ဆုံတဲ့နေရာတွေပါ။ အဆစ်တွေက သူတို့ရဲ့ အမျိုးအစားအပေါ် မူတည်ပြီး မတူညီတဲ့ လှုပ်ရှားမှုအဆင့်တွေကို လုပ်ဆောင်ခွင့်ပေးပါတယ်။
၁။ လှုပ်ရှားလို့မရတဲ့ အဆစ် (𝐒𝐲𝐧𝐚𝐫𝐭𝐡𝐫𝐨𝐬𝐢𝐬 𝐣𝐨𝐢𝐧𝐭) တွေက ဦးခေါင်းခွံရိုးဆက်ကြောင်း (𝐒𝐤𝐮𝐥𝐥 𝐒𝐮𝐭𝐮𝐫𝐞) တွေလိုမျိုး လုံးဝလှုပ်ရှားလို့မရတဲ့ အဆစ်တွေပါ။

၂။ အနည်းငယ် လှုပ်ရှားနိုင်တဲ့ အဆစ် (𝐀𝐦𝐩𝐡𝐢𝐚𝐫𝐭𝐡𝐫𝐨𝐬𝐢𝐬 𝐣𝐨𝐢𝐧𝐭) တွေကတော့ တင်ပဆုံရိုးမှာရှိတဲ့ အဆစ်တွေလိုမျိုး အနည်းငယ်ပဲ လှုပ်ရှားမှုကို ခွင့်ပြုပါတယ်။ မယုံရင်လိုက်လှုပ်ကြည့်ပါ။

၃။ လွတ်လပ်စွာ လှုပ်ရှားနိုင်တဲ့ အဆစ် (𝐃𝐢𝐚𝐫𝐭𝐡𝐫𝐨𝐬𝐢𝐬 𝐉𝐨𝐢𝐧𝐭𝐬) တွေကတော့ ပခုံး၊ တံတောင်ဆစ်နှင့် ဒူးဆစ်များကဲ့သို့ စိတ်ကြိုက် လွတ်လပ်စွာ လှုပ်ရှားနိုင်သည်။ လွတ်လပ်စွာ လှုပ်ရှားနိုင်တဲ့ အဆစ်တွေက လူတွေကို ကျယ်ကျယ်ပြန့်ပြန့် လှုပ်ရှားနိုင်စေပြီး စာရေးတာကနေ အားကစားလုပ်တာအထိ ရှုပ်ထွေးတဲ့ လုပ်ဆောင်ချက်တွေကို လုပ်ဆောင်နိုင်စေပါတယ်။

အမြဲတမ်း ပြောင်းလဲနေတဲ့ သက်ရှိစနစ်တစ်ခု
လူအများစုက ကိုယ့်အရိုးကိုယ်ကိုယ် တစ်သက်လုံး မပြောင်းလဲဘဲ တည်ရှိနေတယ်လို့ ထင်တတ်ကြပါတယ်။ မိတ်ဆွေ လောကကြီးမှာ ဘယ်အရာမှ မတည်မြဲပါဘူး။ အဲဒီလိုပဲ လူတွေရဲ့ အရိုးတွေကလဲ အမြဲပျက်စီးလိုက်၊ ပြန်တည်ဆောက်လိုက်နဲ့ သံသရာလည်နေတာပါ။ အရိုးတစ်ရှူးဟောင်းတွေ အရည်ပျော်သားတဲ့အခါ အဲဒီနေရာမှာ တစ်ရှူးအသစ်တွေ ပြန်ဖြစ်ပေါ်လာပါတယ်။ ဒီဖြစ်စဉ်က အရိုးတွေ သန်မှာမှုကို ထိန်းသိမ်းပေးပြီး၊ တကယ်လို့ မိတ်ဆွေက အိမ်သာထဲမှာ ချော်လဲလို့ ထိခိုက်ဒဏ်ရာတွေရတဲ့အခါ အရိုးတွေကို သူ့ဘာသူ ပြန်ပြုပြင်သွားစေပါတယ်။

ဒါပေမဲ့ အရာအားလုံးက ကောင်းကျိုး၊ ဆိုးကျိုး ဒွန်တွဲနေတတ်တဲ့ သဘောအရ အရိုးစုစနစ်မှာလဲ ကျန်းမာရေး ပြဿနာလေးတွေ ဖြစ်နိုင်ပါသေးတယ်။ အရိုးပွရောဂါ (𝐎𝐬𝐭𝐞𝐨𝐩𝐨𝐫𝐨𝐬𝐢𝐬) လိုမျိုး အခြေအနေတွေမှာဆိုရင် အရိုးတွေကို အားနည်းစေပြီး အထူးသဖြင့် သက်ကြီးရွယ်အိုတွေမှာ အရိုးကျိုးနိုင်ခြေကို ပိုမိုမြင့်မားစေပါတယ်။ ဒါ့အပြင် အဆစ်အမြစ်ရောင်ရမ်းခြင်း (𝐀𝐫𝐭𝐡𝐫𝐢𝐭𝐢𝐬) ကြောင့်လဲ အဆစ်တွေ ရောင်ရမ်းနာကျင်ရတာတွေလဲရှိပါတယ်။ ကိုယ့်မှာ အဲဒီလိုရောဂါတွေ မျိုးရိုးလိုက်တာမရှိရင်တောင် အသက်ကြီးလာတာနဲ့အမျှ တဖြည်းဖြည်းနဲ့ အရိုးတွေ၊ အဆစ်တွေ ယိုယွင်းပျက်စီးလာတတ်ကြပါတယ်။ ရောဂါတွေကြောင့် မဟုတ်ရင်တောင် အရိုးကျိုးတာ၊ အဆစ်လွဲတာ၊ အရွတ်ပြဲတာလိုမျိုး ထိခိုက်ဒဏ်ရာတွေကလဲ အရိုးတွေနှင့် ချိတ်ဆက်တစ်ရှူးတွေကို ပျက်စီးစေနိုင်ပါသေးတယ်။

အရိုးစုစနစ်ကို ဘယ်လို ကျန်းမာအောင် လုပ်ကြမလဲ . . . ?
သန်မာတဲ့ အရိုးအဆစ်တွေကို ပိုင်ဆိုင်ချင်တယ်ဆိုရင် တစ်သက်တာလုံး ကျန်းမာရေးနဲ့ညီညွတ်တဲ့ အလေ့အထတွေကို မွေးမြူထားဖို့ လိုပါတယ်။ ကယ်လ်စီယမ် (𝐂𝐚𝐥𝐜𝐢𝐮𝐦) နှင့် ဗီတာမင် ဒီ (𝐕𝐢𝐭𝐚𝐦𝐢𝐧 𝐃) ကြွယ်ဝပြီး သင့်တင့်မျှတတဲ့ အစားအစာတွေကို စားသုံးတာက အရိုးတွေကို သန်မာလာစေမှာပါ။ ပုံမှန်လေ့ကျင့်ခန်းလုပ်ခြင်း၊ အထူးသဖြင့် လမ်းလျှောက်တာ၊ ပြေးတာလိုမျိုး ခန္ဓာကိုယ်အလေးချိန်ကို ထိန်းထားရတဲ့ လှုပ်ရှားမှုတွေက အရိုးကြီးထွားမှုကို လှုံ့ဆော်ပေးပြီး အဆစ်တွေ တည်ငြိမ်မှုကို တိုးတက်စေပါတယ်။
ဒါ့အပြင် ဘေးကင်းလုံခြုံမှုဆိုတာကလဲ အရေးကြီးပါတယ်။ ထိုင်ခုံခါးပတ်ပတ်တာ၊ ဆိုင်ကယ် ဦးထုပ်ဆောင်းတာကစလို့ သင့်တော်တဲ့ အားကစားအကာအကွယ်ပစ္စည်းတွေကို ဝတ်ဆင်တာတွေကလဲ အရိုးစုစနစ်ကို ပြင်းထန်တဲ့ ထိခိုက်ဒဏ်ရာတွေကနေ ကာကွယ်ပေးတာပါပဲ။

အရိုးစုစနစ် နိဂုံးချုပ်
အဆုံးသတ်အနေနဲ့ အရိုးစုစနစ်ဆိုတာ အ​ရေပြားအောက်မှာ ဝှက်ကွယ်နေတဲ့ အရိုးအစုအဝေးကြီးတစ်ခုဆိုတာထက် ပိုပါတယ်။ ဒီစနစ်ကြီးက ခန္ဓာကိုယ်ကို ထောက်ပံ့ပေးတာ၊ ကိုယ်တွင်းအင်္ဂါတွေကို ကာကွယ်ပေးတာ၊ လှုပ်ရှားသွားလာနိုင်စေတာ၊ သွေးဆဲလ်တွေကို ထုတ်လုပ်ပေးတာအပြင် မရှိမဖြစ်လိုအပ်သော သတ္တုဓာတ်တွေကို သိုလှောင်ပေးတာတို့ကို လုပ်ဆောင်ပေးတဲ့ သက်ရှိ ငြမ်းစင်ကြီးတစ်ခုပါ။ လူတွေပြုလုပ်လိုက်တဲ့ လှုပ်ရှားမှုတိုင်းနဲ့ ရှူရှိုက်လိုက်သမျှ အသက်တိုင်းရဲ့ နောက်ကွယ်မှာ တိတ်တဆိတ် လည်ပတ်နေတဲ့ ထူးခြားပြောင်မြောင်လှတဲ့ စနစ်တစ်ခုပါပဲ။ အရိုးစုစနစ်သာမရှိရင် လက်ရှိ ကျွန်တော်တို့သိထားတဲ့ လူ့ဘဝပုံစံဆိုတာလဲ ရှိလာမှာမဟုတ်ပါဘူး။ နောက်တစ်ခါ စာသင်ခန်းတွေထဲက အရိုးစုကြီးတွေကို မြင်ရင် ပြေးဖက်ချင်လောက်အောင် ချစ်ခင်စိတ်ပေါက်သွားမယ်လို့ မျှော်လင့်ပါတယ်။

နောက်ထပ်ပို့စ်တွေမှာလဲ လူ့ခန္ဓာကိုယ်စနစ်တွေအကြောင်း ထပ်တင်ပေးအုံးမှာဖြစ်လို့ ဆက်လက်စောင့်မျှော်ဖတ်ရှုပေးကြပါအုံး . . . ။

References:
GetBodySmart. (n.d.). Skeletal System • Anatomy & Function. https://www.getbodysmart.com/skeletal-system/
Professional, C. C. M. (2026, January 8). Skeletal system (Musculoskeletal system). Cleveland Clinic. https://my.clevelandclinic.org/health/body/21048-skeletal-system
The skeletal system - Skeleton - Living organisms - KS3 Biology - BBC Bitesize. (2023, October 23). BBC Bitesize. https://www.bbc.co.uk/bitesize/articles/zgbddp3
Human skeletal system: structure and functions. (n.d.). Pacific Medical Training. https://pacificmedicaltraining.com/human-skeletal-system
Image Credit: Pixabay

ချစ်ခင်စွာဖြင့်
PPK

Post ကို လွတ်လပ်စွာ ရှယ်နိုင်ပါသည်။ ❌ ကူးယူဖော်ပြခွင့်မပြုပါ။ ❌

PreGED, GED Preparation & GED Intensive အတန်းများအတွက် page messenger http://m.me/384050591451495 𝐨𝐫 𝐓𝐞𝐥𝐞𝐠𝐫𝐚𝐦 𝐮𝐬𝐞𝐫𝐧𝐚𝐦𝐞 @𝐭𝐰𝐢𝐧𝐬𝐭𝐚𝐫𝟕𝟖𝟐𝟎𝟐𝟎 မှာ အသေးစိတ်စုံစမ်းမေးမြန်းနိုင်ပါတယ်။

𝐏𝐚𝐫𝐭 𝟐: 𝐏𝐞𝐫𝐜𝐞𝐧𝐭𝐚𝐠𝐞 ရဲ့ ပထမ အမြွာ 𝐚𝐤𝐚 𝐅𝐫𝐚𝐜𝐭𝐢𝐨𝐧𝐬 (အပိုင်းကိန်း)

သင်္ချာမှာ 𝐏𝐞𝐫𝐜𝐞𝐧𝐭𝐚𝐠𝐞 ဆိုတာက တစ်ယောက်တည်း အထီးကျန်နေတာ မဟုတ်ပါဘူး။ သူ့မှာ အမြွှာနှစ်ယောက်ရှိပါသေးတယ်။ ဘယ်သူတွေလဲဆိုတော့ 𝐅𝐫𝐚𝐜𝐭𝐢𝐨𝐧𝐬 (အပိုင်းကိန်း) နဲ့ 𝐃𝐞𝐜𝐢𝐦𝐚𝐥𝐬 (ဒဿမ) တွေပါ။

ဒီနေ့ 𝐏𝐨𝐬𝐭 မှာတော့ ပထမဆုံးအမြွှာဖြစ်တဲ့ 𝐅𝐫𝐚𝐜𝐭𝐢𝐨𝐧𝐬 (အပိုင်းကိန်း) အကြောင်းကိုပဲ အသေးစိတ် အရင်ပြောပြသွားပါမယ်။

🍕 𝐅𝐫𝐚𝐜𝐭𝐢𝐨𝐧𝐬 (အပိုင်းကိန်း) ဆိုတာ ဘာလဲ?
အလွယ်ဆုံးမှတ်ရရင်တော့ 𝐅𝐫𝐚𝐜𝐭𝐢𝐨𝐧 ဆိုတာ "တစ်ခုလုံးထဲကမှ အစိတ်အပိုင်းတစ်ခု" ကို ပြောတာပါ။ ဥပမာ ပီဇာတစ်ချပ်လုံးကို ၄ ပိုင်းပိုင်းပြီး ၁ ပိုင်းစားလိုက်ရင် 𝟏/𝟒 (၄ ပိုင်းထဲက ၁ ပိုင်း) စားလိုက်တယ်လို့ ပြောတာမျိုးပေါ့။ အပေါ်ကကောင်က ကိုယ်ယူလိုက်တဲ့ "အစိတ်အပိုင်း (𝐏𝐚𝐫𝐭)" ဖြစ်ပြီး၊ အောက်ကကောင်က "စုစုပေါင်း (𝐖𝐡𝐨𝐥𝐞)" ကို ပြောတာပါ။

❓ 𝐖𝐡𝐲 𝐢𝐭 𝐦𝐚𝐭𝐭𝐞𝐫𝐬 𝐟𝐨𝐫 𝐆𝐄𝐃 (ဘာလို့ သိထားဖို့ အရေးကြီးတာလဲ)
𝐆𝐄𝐃 𝐌𝐚𝐭𝐡 မေးခွန်းတွေက ကျောင်းသားတွေကို လှည့်စားရတာ သဘောကျကြတယ်။ (ပြောရရင် ပလေးရတာ ကြိုက်ကြတယ်ပေါ့ 🥹) ပုစ္ဆာထဲမှာ 𝐅𝐫𝐚𝐜𝐭𝐢𝐨𝐧 (ဥပမာ 𝟏/𝟒) လို့ ပေးထားပြီး အဖြေကို 𝐏𝐞𝐫𝐜𝐞𝐧𝐭𝐚𝐠𝐞 နဲ့ ရွေးခိုင်းတာမျိုး ခဏခဏလာတတ်လို့ သူတို့ကြား ဘယ်လိုကူးပြောင်းလဲဆိုတာကို မျက်မှန်တန်းမိနေဖို့ လိုပါတယ်။

𝐏𝐞𝐫𝐜𝐞𝐧𝐭𝐚𝐠𝐞 𝐅𝐫𝐚𝐜𝐭𝐢𝐨𝐧
𝟏𝟎𝟎% 𝟏/𝟏
𝟕𝟓% 𝟑/𝟒
𝟓𝟎% 𝟏/𝟐
𝟐𝟓% 𝟏/𝟒
𝟏𝟎% 𝟏/𝟏𝟎
အစရှိသဖြင့်ပေါ့။
(𝐏𝐫𝐚𝐜𝐭𝐢𝐜𝐞 များများလုပ်တဲ့အခါမှာ ဘယ်ဟာက ဘယ်လောက်ဆိုတာကို စိတ်ထဲမှာတင် ချက်ချင်းတွက်တတ်လာမှာပါ။ အဓိကက များများတွက်ဖို့ပါ။)

⚠️ အပိုင်းကိန်း ထောင်ချောက် (𝐓𝐡𝐞 𝐖𝐫𝐨𝐧𝐠 𝐖𝐡𝐨𝐥𝐞 𝐓𝐫𝐚𝐩)
ကျောင်းသားတွေ 𝐅𝐫𝐚𝐜𝐭𝐢𝐨𝐧 နဲ့ တွက်ရင် အမှားဆုံးအကွက်က ကိန်းဂဏန်းတွေကို ဘယ်ကောင်နဲ့ ချစားရမလဲဆိုတာပါပဲ။

𝐃𝐢𝐬𝐜𝐨𝐮𝐧𝐭 (လျှော့စျေး) တွက်တဲ့အခါမျိုးမှာ လျှော့ပြီးသားစျေး (𝐒𝐚𝐥𝐞 𝐏𝐫𝐢𝐜𝐞) ကို ပိုင်းခြေ (အောက်ကောင်) မှာ သွားထားပြီး စားမိတတ်ကြပါတယ်။

𝐏𝐞𝐫𝐜𝐞𝐧𝐭𝐚𝐠𝐞 ဆိုတာ အမြဲတမ်း 𝐎𝐫𝐢𝐠𝐢𝐧𝐚𝐥 𝐏𝐫𝐢𝐜𝐞 (မူလစျေး) ပေါ်မှာပဲ အခြေခံတာ ဖြစ်လို့ မူလစျေးနဲ့ပဲ စားပေးရပါမယ်။

မှတ်ထားရမှာတစ်ခုက 𝐏𝐚𝐫𝐭/𝐖𝐡𝐨𝐥𝐞 တွက်တဲ့အခါ အောက်က 𝐖𝐡𝐨𝐥𝐞 နေရာမှာ အမြဲတမ်း "မူလတန်ဖိုး" ပဲ ဖြစ်ရပါမယ်။ အဲ့ဒါမှ "မူလတန်ဖိုးရဲ့ ဘယ်နှပုံက လျှော့ပေးလိုက်တာလဲ" ဆိုတဲ့ အဖြေမှန် ထွက်လာမှာပါ။

📝 𝐒𝐮𝐦𝐦𝐚𝐫𝐢𝐳𝐞 ပြန်လုပ်ရမယ်ဆိုရင်
𝐏𝐞𝐫𝐜𝐞𝐧𝐭𝐚𝐠𝐞, 𝐅𝐫𝐚𝐜𝐭𝐢𝐨𝐧 ဆိုတာ ပုံစံသာကွဲတာ၊ တန်ဖိုးက အတူတူပါပဲ။
𝐃𝐢𝐬𝐜𝐨𝐮𝐧𝐭 တွက်ရင် အမြဲတမ်း 𝐎𝐫𝐢𝐠𝐢𝐧𝐚𝐥 𝐏𝐫𝐢𝐜𝐞 (မူလစျေး) ကို ပိုင်းခြေမှာထားပြီး စားပါ။

ကဲ ဒီလောက်ဆိုရင်တော့ ရာခိုင်နှုန်းရဲ့ ပထမအမြွာဖြစ်တဲ့ 𝐅𝐫𝐚𝐜𝐭𝐢𝐨𝐧 အကြောင်း မြင်သာသွားပြီလို့ ထင်ပါတယ်။

နောက် 𝐏𝐨𝐬𝐭 မှာတော့ ဒုတိယအမြွာဖြစ်တဲ့ 𝐃𝐞𝐜𝐢𝐦𝐚𝐥𝐬 (ဒဿမ) ရဲ့ အကြောင်းတွေနဲ့ 𝐂𝐚𝐥𝐜𝐮𝐥𝐚𝐭𝐨𝐫 မလိုတဲ့ စိတ်တွက်တွက်နည်းတွေ အကြောင်းကို ဆက်ပြီး ပြောပြပေးသွားပါမယ်။

ကျွန်တော်ကတော့ 𝐍𝐓 ပါ။ နောက်တစ်ခေါက်မှ တွေ့ကြတာပေါ့။

Post ကို လွတ်လပ်စွာ ရှယ်နိုင်ပါသည်။ ကူးယူဖော်ပြခွင့်မပြုပါ။
PreGED, GED Preparation & GED Intensive အတန်းများအတွက် page messenger http://m.me/384050591451495 𝐨𝐫 𝐓𝐞𝐥𝐞𝐠𝐫𝐚𝐦 𝐮𝐬𝐞𝐫𝐧𝐚𝐦𝐞 @𝐭𝐰𝐢𝐧𝐬𝐭𝐚𝐫𝟕𝟖𝟐𝟎𝟐𝟎 မှာ အသေးစိတ်စုံစမ်းမေးမြန်းနိုင်ပါတယ်။