24/01/2024
ဒီသတင်းစာ ဖြတ်ပိုင်းလေးတွေ့မိတော့
ဘိက္ခုနီသံဃာဒိသေသ် ပဌမဆုံး(ဥဿယဝါဒိကာ သိက္ခာပုဒ်)သိက္ခာပုဒ်ကို ပြေးပြီး
အမှတ်ရမိတယ်....
ဇာတ်လမ်းအကျဉ်းက....မြတ်ဗုဒ္ဓ သာဝတ္ထိပြည်မွန် ဇေတဝန်ကျောင်းမှာ သီတင်းသုံးနေထိုင်စဉ်အခါက ဥပါသကာတစ်ယောက်ဟာ ဘိက္ခုနီသံဃာအား ဘဏ္ဍာတိုက်(ဘဏ္ဍာထားရာ အဆောက်အဦး)ကို ပေးလှူပြီး ကွယ်လွန်သွားတယ်....
သူ့မှာ သားနှစ်ယောက်ကျန်ခဲ့တယ်....
တစ်ယောက်က သဒ်ဓါတရားရှိ,သာသနာကိုကြည်ညိုတဲ့သူ....
တစ်ယောက်က သဒ်ဓါတရားမရှိ,သာသနာကို မကြည်ညိုတဲ့သူ....
အမွေခွဲကြတဲ့အခါ သဒ်ဓါတရားမရှိ,သာသနာကို မကြည်ညိုတဲ့သားက ငါတို့ရဲ့ ဘဏ္ဍာတိုက်ကို
အမွေခွဲကြစို့"လို့ ပြောပါတယ်.....
သဒ်ဓါတရားရှိ,သာသနာကိုကြည်ညိုတဲ့သားက မင်း ဒီလိုမပြောနဲ့ ငါတို့အဖေက ဘိက္ခုနီသံဃာအား ပေးလှူထားပြီးသား"လို့ ပြောပါတယ်.....
သုံးကြိမ် သုံးခါ သဒ်ဓါတရားမရှိ,သာသနာကို မကြည်ညိုတဲ့သားက ငါတို့ရဲ့ ဘဏ္ဍာတိုက်ကို
အမွေခွဲကြစို့"လို့ ထပ်ပြောလာတဲ့အခါ သဒ်ဓါတရားရှိ,သာသနာကိုကြည်ညိုတဲ့သားက
တကယ်လို့ ငါရခဲ့လျှင် ငါလည်း ဘိက္ခုနီသံဃာအား ပေးလှူမယ်"လို့ ကြံစည်ပြီး
အေး ခွဲကြတာပေါ့"လို့ ပြန်ပြောပါတယ်....
အမွေခွဲတဲ့အခါ သဒ်ဓါတရားမရှိ,သာသနာကို မကြည်ညိုတဲ့သားက ထိုဘဏ္ဍာတိုက်ရသွားပါတယ်.....
သဒ်ဓါတရားမရှိ,သာသနာကို မကြည်ညိုတဲ့သားက ဘိက္ခုနီတွေအထံသွားပြီး အရှင်မတို့ ထွက်သွားကြပါ ဒီဘဏ္ဍာတိုက်ဟာ ကျွန်တော့်ရဲ့ ဘဏ္ဍာတိုက်ဖြစ်ပါတယ်"လို့ ပြောပါတယ်....
ထုလ္လနန္ဒာအမည်ရှိတဲ့ ဘိက္ခုနီမက ထိုသဒ်ဓါတရားမရှိ,သာသနာကို မကြည်ညိုတဲ့သားဖြစ်သူကို
အမောင် ဒီလိုမပြောပါနဲ့၊သင်တို့ရဲ့ အဖေဟာ ဘိက္ခုနီသံဃာအား ပေးလှူထားပြီးသား"လို့
ပြန်ပြောပါတယ်......
လှူပြီး/မလှူရသေးဘူး" ငြင်းကြခုံကြရင်း တရားရုံးရောက်သွားပါတယ်...
တရားသူကြီးတွေက အရှင်မ ဘိက္ခုနီသံဃာအား ပေးလှူထားတယ်လို့ ဘယ်သူ သိပါသလဲ"လို့
အသိသက်သေကို မေးပါတယ်.....
ထုလ္လနန္ဒာဘိက္ခုနီက ထိုတရားသူကြီးတွေကို အမောင်တို့ အသိသက်သေထားပြီး လှူသည်ကို
သင်တရားသူကြီးတို့သည် မြင်ရော မြင်ဖူးပါသလား?ကြားရော ကြားဖူးပါသလား?"လို့ ပြန်မေးပါတယ်...
တရားသူကြီးတွေက အရှင်မသည် အမှန်ကိုသာ ပြောပြီ"ဆိုပြီး ဘိက္ခုနီမတွေကို အနိုင်ပေးလိုက်ပါတယ်....
သဒ်ဓါတရားမရှိ,သာသနာကို မကြည်ညိုတဲ့သားက အမှုရှုံးတော့ ဘိက္ခုနီမတွေကို နင်ပဲငါဆဆဲရေးပါတယ်...
ထုလ္လနန္ဒာဘိက္ခုနီက အမတ်တွေကို တိုင်,အမတ်တွေက ထိုသဒ်ဓါတရားမရှိ,သာသနာကို မကြည်ညိုတဲ့သားကို ဒဏ်ရိုက်,ဒဏ်ရိုက်ခံရတာကို မကျေနပ်လို့ ဘိက္ခုနီကျောင်းအနီးမှာ
အာဇီဝကတွေအတွက် ကျောင်းဆောက်ပေးပြီး အာဇီဝကတွေကို ဘိက္ခုနီမတွေကို ထပ်ဆဲခိုင်း
ပါတယ်.....
ထုလ္လနန္ဒာဘိက္ခုနီက အမတ်တွေကို ထပ်ပြီးတိုင် အမတ်တွေက ထိုသဒ်ဓါတရားမရှိ,သာသနာကို မကြည်ညိုတဲ့သားကို ဖမ်းဆီးထောင်ချကြပါတယ်....
ဒီလိုဖြစ်တာကို လူတွေက ကဲ့ရဲ့,လူတွေကဲ့ရဲ့သံကို ဘိက္ခုနီမတွေကကြားပြီး ကဲ့ရဲ့ကြ...
မြတ်ဘုရားထံမှောက် ထိုအကြောင်းအရာရောက်ရှိတဲ့အခါ မြတ်ဗုဒ္ဓက
ယာ ပန ဘိက္ခုနီ ဥဿယဝါဒိကာ ဝိဟရေယျ ဂဟပတိနာ ဝါ ဂဟပတိပုတ္တေန ဝါ ဒါသေန ဝါ ကမ္မကာရေန ဝါ အန္တမသော သမဏပရိဗ္ဗာဇကေနာပိ၊အယံ ဘိက္ခုနီ ပဌမာပတ္တိကံ ဓမ္မံ အာပန္နာ နိဿာရဏီယံ သံဃာဒိသေသံ"ဆိုပြီး သိက္ခာပုဒ်ပညတ်တော်မူပါတယ်.....
ဆိုလိုတာက....တရားစွဲဆိုမှု မလုပ်နဲ့....လုပ်လျှင် အာပတ်သင့်စေ"လို့ ပညတ်တော်မူပါတယ်...
မြတ်ဘုရားခေတ်ကလည်း ဒီလို ပြဿနာဖြစ်ဖူးသည်ဟု ဗဟုသုတအနေနဲ့ မှတ်သားကြပါ....
မေတ္တာဖြင့် အရှင်နရိန္ဒ(မင်းကွန်း)
ပါစိတ်ပါဠိတော် ၂၈၈/၂၈၉။
24/07/2017
08/10/2016
07/02/2016