24/08/2026
ရန်ကုန်ဗုဒ္ဓတက္ကသိုလ် (ရွှေပြည်သာ)
M.A. နှင့် B.A. တန်း ကျမ်းခေါင်းစဉ် ရွေးချယ်အတည်ပြုခြင်း လုပ်ငန်းဆောင်ရွက်မှု
ရန်ကုန်ဗုဒ္ဓတက္ကသိုလ် (ရွှေပြည်သာ) ၏ M.A. နှင့် B.A. တန်း ကျောင်းသူ၊ ကျောင်းသားများ၏ သုတေသနကျမ်းခေါင်းစဉ်များ ရွေးချယ်အတည်ပြုနိုင်ရေးအတွက် တက္ကသိုလ်ပညာရေးအဖွဲ့မှ လိုအပ်သော စိစစ်ရွေးချယ်မှုနှင့် အတည်ပြုရေးလုပ်ငန်းများကို ကျောင်းပိတ်ရက်ဖြစ်သည့် စနေ၊ တနင်္ဂနွေ နှစ်ရက်တာကာလအတွင်း စနစ်တကျ ဆောင်ရွက်ခဲ့ပါသည်။
အဆိုပါလုပ်ငန်းစဉ်တွင်—
တင်ပြလာသော M.A. နှင့် B.A. တန်း ကျမ်းခေါင်းစဉ်များကို သုတေသနပြုလုပ်ရန် သင့်လျော်မှု၊ အကြောင်းအရာဆီလျော်မှုနှင့် ပညာရပ်ဆိုင်ရာ အကျိုးရှိမှုတို့အပေါ် အခြေခံ၍ စိစစ်သုံးသပ်ခြင်း၊
ကျောင်းသူ၊ ကျောင်းသားများအား ၎င်းတို့ရွေးချယ်ထားသည့် ကျမ်းခေါင်းစဉ်နှင့် သုတေသနရည်ရွယ်ချက်များအပေါ် မေးမြန်းဆွေးနွေး၍ သုတေသနဆောင်ရွက်နိုင်မှုကို စိစစ်ခြင်း၊
စိစစ်မှုအရ သုတေသနပြုရန် သင့်လျော်သည့် ကျမ်းခေါင်းစဉ်များအား အတည်ပြုပေးခြင်း၊
လိုအပ်ချက်များရှိနေသေးသည့် ကျမ်းခေါင်းစဉ်များအတွက် ပြင်ဆင်ဖြည့်စွက်ရန် လမ်းညွှန်ပေးခြင်း၊
အတည်ပြုခြင်း မရရှိသေးသော ကျောင်းသူ၊ ကျောင်းသားများအား လိုအပ်သည့် ပြင်ဆင်မှုများ ပြုလုပ်ပြီး ပြန်လည်တင်ပြနိုင်ရန် သတ်မှတ်ရက် ပြန်လည်ပေးအပ်ခြင်း
စသည့် လုပ်ငန်းစဉ်များကို အဆင့်ဆင့် ဆောင်ရွက်ခဲ့ပါသည်။
ဤသို့ ဆောင်ရွက်ခြင်းအားဖြင့် ကျောင်းသူ၊ ကျောင်းသားများ၏ သုတေသနလုပ်ငန်းများသည် ပညာရပ်ဆိုင်ရာ စံနှုန်းများနှင့် ကိုက်ညီမှုရှိစေရန်၊ သုတေသနပြုလုပ်ရန် သင့်လျော်သည့် ခေါင်းစဉ်များကို စနစ်တကျ ရွေးချယ်နိုင်စေရန်နှင့် ကျမ်းရေးသားမှုလုပ်ငန်းစဉ်များကို အရည်အသွေးပြည့်မီစွာ ဆက်လက်ဆောင်ရွက်နိုင်စေရန် ရည်ရွယ်၍ တက္ကသိုလ်ပညာရေးအဖွဲ့မှ တာဝန်ယူ ဆောင်ရွက်ပေးခဲ့ခြင်း ဖြစ်ပါသည်။
သတင်းနှင့်ပြန်ကြားရေး
ရန်ကုန်ဗုဒ္ဓတက္ကသိုလ်
ရွှေပြည်သာ
