Sun Moon Stars "Holistic Development Education Centre"

11/05/2025

Happy Mother's Day ❤

ဘာဆိုဘာမှ အဆက်သွယ်မရတာ (၂) နှစ်ပြည့်တော့မယ် အမေ။ မိခင်တာဝန်နဲ့ ဝတ္တရားတွေ
ကျေလွန်းတဲ့အမေ့ကို ဘုရားသခင်စောင့်ရှောက်ပေးပါစေလို့ပဲ နှစ်နှစ်ကာကာ ဆုတောင်းပါတယ်။

မောင်သာကျော် (ဖြစ်ရပ်မှန်)
11 May 2025 - Sunday

29/04/2025

* ဒဏ်ရာများနဲ့ လူ *

မယူပြန်တော့လည်း စေတနာကို
စော်ကားရာ ကျဦးမယ်
ယူပြန်တော့လည်း လောဘကြီးရာ ဖြစ်ဦးမယ်
ဘယ်တစ်ခုမှ အပြစ်နဲ့ မလွတ်
ငါနေချင်သလို
ငါရှင်လျင်သလို
ငါပျော်သလို
နေလိုက်တော့မယ်လို့ တွေးပြန်တော့လည်း
ကိုယ့်နောက်မှာ ငိုသံတွေက တစ်ပုံကြီး

တစ်ခါပဲ မွေးခဲ့တော့
တစ်ကြိမ်ပဲ သေရမယ်လို့ ထင်ခဲ့တာ
ဘယ်ဟုတ်မလဲ

ထမင်းမဝတိုင်း သေခဲ့ရ
ငေးကြည့်ရတိုင်း သေခဲ့ရ
ချစ်မိတိုင်း သေခဲ့ရ
လွမ်းမိတိုင်း သေခဲ့ရ
အနာဖြစ်တိုင်း သေခဲ့ရ
ဒဏ်ရာပြန်ပေါ်တိုင်း သေခဲ့ရ
မီးမလာ ရေမလာတိုင်း သေခဲ့ရ
အိမ်ပြင်ထွက်တိုင်း သေခဲ့ရ
ညရောက်တိုင်း သေခဲ့ရ
နေ့ရောက်တိုင်း သေခဲ့ရ
အကြိမ်ကြိမ် သေခဲ့ရ

သ၊တ်လို့ သေတယ်
ကြောက်လို့ သေတယ်
ငတ်လို့ သေတယ်

လူသားတွေ အချင်းချင်းမေတ္တာရှိပုံများ
ခွေးတွေ ကြောင်တွေကိုတော့
သားရယ် သမီးရယ်လို့ ခေါ်ပြီး
ကိုယ့်ဝမ်းနဲ့ လွယ်ပြီး
ကိုယ်မွေးထားတဲ့ကိုယ့်သားသမီးတွေကိုကျ
ခွေး၊ နွားလို့ ခေါ်တဲ့ခေတ်
တိရစ္ဆာန်က လူလာဖြစ်ပြီး
လူက တိရစ္ဆာန်ဖြစ်သွားတဲ့ခေတ်

အတုနဲ့ အစစ်မှားတာ
နေ့နဲ့ည မှားတာ
အဓိကနဲ့ သာမညမှားတာ
ဓမ္မနဲ့ အဓမ္မမှားတာ
လူနဲ့ တိရစ္ဆာန်မှားတာ

ကမ္ဘာမှာ ပန်းတွေ မဝေတော့ဘူး
ဒီမြေမှာ ပန်းတွေ မပွင့်တော့ဘူး
ငါ့ရင်မှာ ပန်းရနံ့တွေ မရတော့ဘူး
စစ်ဖြစ်တိုင်း ခံနေရတာက ပြည်သူတွေ
ချစ်မိတိုင်း ကြေကွဲရတာက နှလုံးသား

ကိုယ့်အသက်ထက်
ချစ်ရတာ တန်ဖိုးထားရတာ
ဘာမှ မရှိတော့ဘူးလေ
လူတိုင်းက တစ်နေ့သေရမယ်လို့
ငါတို့အားလုံး သိထားကြပေမယ့်
သေရမှာကိုတော့ ကြောက်ကြတယ်

"အကြောက်တရားတွေ အားလုံးထဲမှာ
သေခြင်းတရားဟာ အကြောက်ရဆုံးပဲ"

နာလို့ အော်တဲ့အသံ
ငတ်လို့ အော်တဲ့အသံ
ကြောက်လို့ အော်တဲ့အသံ
လွမ်းလို့ အော်တဲ့အသံ

ကိုယ့်အော်သံ ကိုယ်ကလွဲရင်
ဘယ်သူ့မှ မကြားရ
ကြားလည်း မကြားချင်ကြ
ကိုယ်ပဲ ထပ်ခါထပ်ခါ ကြားနေရ

အော်လို့လည်း မထူးတဲ့ဘဝမှာ
ဆက်အော်နေလည်း အာခြောက်ရုံသာမို့
မအော်ချင်တော့ပါဘူး ။

မောင်သာကျော် (ဖြစ်ရပ်မှန်)
29 April 2025 - Tuesday

06/04/2025

03/03/2025

အခုတလော ကိုယ့်နားထဲမှာ ကိုယ့်နာမည်ကို အဖေနဲ့အမေခေါ်သံချည်းပဲ ကြားကြားနေရတယ်။ အဲ့ဒီလိုဖြစ်တာ တစ်ပတ်လောက်ရှိပြီ။ အဆက်သွယ်မရတာလည်း တစ်နှစ်ကျော်ပြီ။ အဖေနဲ့အမေ နေကောင်းရဲ့လား။ နေကောင်းပါစေ အဖေနဲ့အမေ။ ဘုရားသခင် အစဥ်အမြဲစောင့်ရှောက်ပေးပါစေ။

မောင်သာကျော် (ဖြစ်ရပ်မှန်)
3 March 2025 - Monday

17/02/2025

* ငါတို့နိုင်ငံ ငါတို့ဘဝ

လူက လူလို မကျင့်
လူကို လူလို့ မမြင်
လူမဆန်တဲ့ကမ္ဘာမှာ
ကျွန်တော်တို့တွေ
လူလာဖြစ်ခဲ့ကြတယ်

တစ်နေ့တစ်နေ့
ငါတို့အလုပ်တွေများ
အစာငတ်ခံ
ပြေးမယ် ပုန်းမယ်
အော်မယ် ငိုမယ်

မိမဲ့ဘမဲ့ဖြစ်မယ်
အိုးမဲ့အိမ်မဲ့ဖြစ်မယ်
အသက်မဲ့ဘဝမဲ့
အနာဂတ်မဲ့မယ်

သေတဲ့လူတွေက
အသက်ပျောက်တယ်
ရှင်တဲ့လူတွေက
အနာဂတ်ပျောက်တယ်

အသက်မရှိတော့ရင်
သေတယ်လို့ ခေါ်တယ်
အနာဂတ်မရှိတော့ရင်
ကြေတယ်လို့ ခေါ်ပါတယ်
ငါတို့နိုင်ငံ ငါတို့ဘဝ

မောင်သာကျော် (ဖြစ်ရပ်မှန်)
18 February 2025 - Tuesday

12/02/2025

ငယ်ငယ်ကတည်းကနေ စာရေးဆရာတွေဆို သိပ်ပြီး အထင်ကြီးလေးစားခဲ့ရတဲ့ကျွန်တော်။ ကိုယ်တိုင်စာရေးသူဖြစ်လာတော့ လူတွေ ကိုယ့်ကို စာရေးဆရာလို့ ခေါ်ရင်၊ စာရေးဆရာလို့ မိတ်ဆက်ပေးရင် ကိုယ်နှစ်ခြိုက် မြတ်နိုးတန်ဖိုးထားရတဲ့နာမည်ဖြစ်လို့ စိတ်ထဲမှာ ပီတိတွေ အရမ်းဖြစ်တယ်။

စာရေးသူဖြစ်လို့လား မသိဘူး။ စင်ပေါ်တက်ရရင် အရမ်းလည်း ပျော်တယ်။ အချို့လူတွေ ကိုယ့်ကိုပညာဗဟုသုတနဲ့ ဘဝထဲက အတွေ့အကြုံတွေ မျှဝေဟောပြောပေးဖို့ လေးလေးစားစား ဖိတ်ခံရရင် စားမဝင်အိပ်မပျော်တဲ့အထိ ပျော်လို့မဆုံးဘူး။

တန်းဖိုးရှိ အကျိုးရှိသောစာရေးသူဖြစ်လာဖို့ စာတွေလည်း အများကြီးဖတ်ရပါဦးမယ်။ အများကြီးလည်း သင်ယူရပါဦးမယ်။ အများကြီးလည်း ကြိုးစားရပါဦးမယ်။ ပထမဆုံးစာအုပ်မှာ ဘုရားချီးမြှောက်ပေးလို့ လူတွေ အတိုင်းတာတစ်ခုထိ သိပေးကြတဲ့အတွက်လည်း ထွက်သမျှစာအုပ်တွေ အတိုင်းတာတစ်ခုထိ ရောင်းခဲ့ရတာ ဝမ်းသာရပါတယ်။

(ခုနှစ်အုပ်မြောက် စာအုပ်ကို မကြာခင်မှာ ထွက်နိုင်ဖို့ ကြိုးစားနေပါတယ်။ ထွက်လာရင် အားပေးကြပါဦး)

မောင်သာကျော် (ဖြစ်ရပ်မှန်)
12 February 2025 - Wednesday