03/06/2020
"ခေတ်သစ်မြန်မာစာ ငါတို့မြန်မာစာ"
စာရေးသူဟာ ဂျပန် - မြန်မာပြန် ဘာသာပြန်တစ်ဦးပါ။ နည်းပညာဆိုင်ရာ စာအုပ်အတော်များများကို အချိန်ယူပြန်ဆိုခဲ့ဖူးပါတယ်။ ဂျပန်နိုင်ငံရဲ့ ဘာသာပြန်ဟာ ကမ္ဘာမှာ ထိပ်ဆုံးကရှိနေပါတယ်။ ဂျပန်ရဲ့ ဘာသာပြန်လောကဟာ အစဥ်သဖြင့် သက်ဝင်လှုပ်ရှားမှု တီထွင်ဆန်းသစ်မှုတွေနဲ့ ပြည့်နှက်နေပါတယ်။ ဂျပန်ဘာသာပြန်တွေဟာ တီထွင်မှုနဲ့ အသစ်ဆိုတာတွေကို ရင်ဆိုင်ရဲကြပါတယ်။ စိန်ခေါ်ရဲကြပါတယ်။ ဒါကြောင့်လည်း ၄င်းတို့ရဲ့နည်းပညာဟာ ကမ္ဘာမှထိပ်ဆုံးကရှိနေခြင်းဖြစ်ပါတယ်။
ဘာသာပြန်အဖွဲ့တွေထဲမှာ အပတ်စဥ် ခေတ်သစ်မြန်မာစာ စာပို့ချမယ်လုပ်တော့ ခင်မင်ရသူ မိတ်ဆွေဘာသာပြန်ကျွမ်းကျင်သူတစ်ဦးမှ ဆက်သွယ်လာပါတယ်။ သူကတော့ ကျွမ်းကျင်ဘာသာပြန်တစ်ဦးပါ။ သူက ကိုယ့်ကိုဒီခေတ်သစ်မြန်မာစာကို မပို့ချဖို့ နားချပါတယ်။ သူပြောတာကတော့
"အမရယ် ... ဘာသာပြန်တွေ လမ်းလွဲရောက်ကုန်ပါ့မယ်"
"ဘာသာပြန်နည်းလမ်းကောင်းတွေရေးသားထားတဲ့ စာအုပ်တစ်အုပ်ကို ပြန်ဆိုကြည့်ကြရင် မကောင်းဘူးလားအမ။
ကိုယ်က ပြန်ပြောပါတယ်။
"ဘာသာပြန်နည်းစာအုပ်ကောင်းတွေ ပေါမှပေါ။ ဒို့နည်းပညာဘယ်မှ ရှေ့ရောက်လို့တုန်း တီထွင်ဆန်းသစ်ဖို့လိုနေတာ"
"အမ အဲဒီစာအုပ်ကို အချိန်ယူပြန်ဆိုပြီးရင် သတင်းနှင့် ပြန်ကြားရေးကို လှူကြမယ်လေ။"
"မောင်လေး နင်ပြောချင်တာ ငါ့ကို ခေတ်သစ်မြန်မာစာ မသင်ပါနဲ့ဦး လို့လား။
ဒို့မြန်မာစာမှာ နည်းပညာမရှိတော့ အတောင်အလက်တွေ မဲ့နေပြီ။ နှစ်လည်းကြာလှပြီ။ အသစ်တီထွင်ဖို့လိုနေတယ်။ အသစ်တီထွင်ပြီး အထပ်ထပ်သုတေသနပြုရမယ်။"
သူလက်မခံပါဘူး။ ဆက်ပြောပြန်တယ်။
"ဘေးလူတွေက ပြောလိမ့်မယ်အမ။ ကျွန်တော် သတိမပေးဘူးလားလို့။"
"ဒီလိုလုပ်ပါလား.. အမကို (၃) လလောက်အချိန်ပေးပြီး စာပို့ချမှုကိုလေ့လာကြည့်ပါလား။ ရေးထားတဲ့စာတွေကို ဖတ်ရုံတင်မဟုတ်ဘဲ လေ့ကျင့်ခန်းတွေပါ လိုက်လုပ်ကြည့်ပေးဖို့ပါ။"
သူစဥ်းစားပါတယ်။ ဆက်ပြောတယ်။
"အမ စာတွေ ကျွန်တော်ဖတ်ကြည့်ပါတယ်။ ကျွန်တော် လက်မခံဘူးအမ။"
"အမ လည်း လက်ခံပါလို့မပြောပါဘူး။ ပြစ်တင်ရမယ်။ ဝေဖန်ရမယ်။ ပြီးရင် ပိုကောင်းအောင် ပြုပြင်ရမယ်။ ဒါမှ ခေတ်မီလာမှာပေါ့။ ဘယ်နေရာကိုတော့ ဘာကြောင့်မကြိုက်ဘူးလို့ ပြတ်ပြတ်သားသား ဝေဖန်ပါ။ လက်ခံပါတယ်။ ဝေဖန်စရာမရှိရင် လက်တွေ့ကျင့်သုံးရမယ်ပေါ့။"
"အချိန်အနည်းငယ်သူစဥ်းစားကာ ကျွန်တော် အပြုသဘောဆောင်တဲ့ ဝေဖန်မှုတော့ လုပ်ပါမယ်"
ဒီလိုနဲ့သဘောတူညီချက်ရသွားပါတယ်။
ခေတ်သစ်မြန်မာစာဟာ သုတေသနပြုဆဲဖြစ်ပါတယ်။ ဒါကြောင့် ဘာသာပြန်များအနေဖြင့် သုတေသနပြုနိုင်လေ အနာဂတ်မှာ အကျိုးကျေးဇူးများစေမည်ဖြစ်ကြောင်း အခိုင်အမာပြောလိုပါတယ်။ အပတ်စဥ်ပို့ချမှုများမှာ ဘာသာစကားသုတေသန ပြုနည်းကို အဓိကပို့ချပေးသွားမှာပဲဖြစ်ပါတယ်။
ခေတ်သစ်မြန်မာစာဟာ အနာဂတ်မှာ ဘာသာပြန်တို့ရဲ့စာ၊ နည်းပညာရှင်၊ အတတ်ပညာရှင်တို့ရဲ့စာ၊ သာမာန်လုပ်သားပြည်သူတိုင်းရဲ့ စာဖြစ်လာမှာ မလွဲဧကန်ဖြစ်ပါတယ်။
နည်းပညာမဲ့သည့် ခေတ်မှ နည်းပညာများဖြင့်ပြည့်စုံသောခေတ်၊ အမှောင်ခေတ်မှ အလင်းခေတ်သို့ ခေတ်သစ်မြန်မာစာ သုတေသနပြုမှုကနေ ပို့ဆောင်ပေးမှာဖြစ်ပါတယ်။ နေ့စဥ်ဘဝ အခြေခံလုပ်သားပြည်သူများကို နိမ့်ပါးသောဘဝမှ ဗဟုသုတ စာပေအဆင့်အတန်းမြင့်မားသော အသိပညာ ဥာဏ်ပညာမြင့်မားသော ခေတ်သို့ ရောက်လာမှာပဲဖြစ်ပါတယ်။ ဒါကြောင့် ခေတ်သစ်မြန်မာစာ သုတေသနပြုရေးမှာ ဝိုင်းဝန်းပါဝင်ဆွေးနွေးကြဖို့ စာပေလေ့လာသူများ၊ ဘာသာစကားလေ့လာသူများ၊ ဘာသာပြန်ကျွမ်းကျင်သူများကို လေးစားစွာဖိတ်ခေါ်အပ်ပါတယ်။
ဥက္ကဌ
ဒေါ်အေးကေခိုင်
ဘာသာပြန်နှင့် မြန်မာစာပေတိုးတက်ရေး သုတေသန
(၃ရက်၊ ၆လ၊ ၂၀၂၀ခု)
