PMS Pre-School

ဖတ်ရှုလေ့လာပြီးမှ KG ကို အပ်သင့်ပါတယ်...
မိဘရဲ့အတ္တတွေ လောဘတွေကြားထဲမှာ ကလေးမနိုင်ဝန်ထမ်းရင်း ကျောင်းထားပြီး စာမတတ်ဘူး/စာလဲမသင်ဘူးဖြစ်မှာစိုးလို့ပါ..ဘာမှရမလာဘူးက ပါသေး😬(သင်ကြားရေးစနစ်ကို အရင်နားလည်ကြပါစေ)
(KG အတန်းတွင် အမြဲကြုံတွေ့ရလေ့ရှိသည့်ပြသနာ)
🎓🎓🎓🎓🎓🎓🎓🎓🎓🎓
ယခုနှစ်တွင် KGတက်ရောက်ရမည့် သားသားမီးမီးရှိသော မိဘများသိရှိစေရန်.....
မကြာခင် ကျောင်းတွေပြန်ဖွင့်တော့မယ်ဆိုတော့ ယခုနှစ်မှ ၅ နှစ်ပြည့်ပြီး KG တန်းကို တက်ရောက်ကြရမယ့် ကလေးငယ်များရဲ့ မိဘတွေက ပူပန်နေကြတာ မြင်ရကြားရပါတယ် ။
KG တန်းကို မတက်ရောက်ပေမယ့် ၆နှစ်ပြည့်ပြီးသူတိုင်း ပထမတန်း( G1 ) ကို တိုက်ရိုက်တက်ရောက်ခွင့်ရှိတာ သိကြပြီးသားကိုလည်း နားလည်ပါတယ် ။
KG မတက်ခဲ့ဘဲ G1ရောက်လာတဲ့ကလေးဟာ KG တက်ပြီးသား ကလေးနဲ့တော့ ဖွံ့ဖြိုးမှုချင်း မတူနိုင်တာ အမှန်ပါပဲ ။
ကျောင်းကို မလွှတ်ဘဲ အိမ်မှာနေရင်းနဲ့ မိမိရင်သွေးကို သင်ကြားကြမယ့် မိဘအများစုဟာ လမ်းဟောင်းကြီးအတိုင်း မိမိလောဘကြောင့် ကလေးတွေကို ဇွတ်တွေစာတွေရေးခိုင်း ၊ဖတ်ခိုင်းတော့မှာ စိုးတာမို့ KG တန်းကို လေးနှစ်ဆက်တိုက် သင်ကြားလာတဲ့ နုနယ်သေးတဲ့ အတွေ့အကြုံလေးနဲ့ပဲ ဖြစ်ဖြစ် မိဘတွေကို ရှင်းပြချင်ခဲ့မိတာပါ။ ဒါကြောင့်မို့ စာကို ပြီးအောင်ဖတ်ကြလိမ့်မယ်လို့ ယုံကြည်မိပါတယ် ။
ကျွန်တော်ရေးမယ့် အကြောင်းအရာတွေက
KG သင်ရိုးညွှန်းတမ်းရဲ့ ရည်မှန်းချက်
သင်ယူမှုနယ်ပယ်များ
သင်ယူမှုနယ်ပယ်တစ်ခုချင်းစီအတွက် မိဘများမှ
ပံ့ပိုးပေးနိုင်သည့် လုပ်ငန်းများ
ကစားခြင်းဖြင့် သင်ယူခြင်း လုပ်ငန်းများ
KG သင်ရိုးညွှန်းတမ်းရဲ့ ရည်မှန်းချက်
အသက် ၅ - နှစ်ပြည့်ပြီးလို့ KG တန်းကို တက်ရောက်ခဲ့ကြတဲ့ ကလေးတွေဟာ ပညာသင်ကာလ ပြီးဆုံးတဲ့အခါမှာတော့
၁. မိမိကိုယ်ကို မိမိ ယုံကြည်အားကိုးတတ်သူများ
၂. အာဟာရပြည့်ဝ၍ ကျန်းမာပျော်ရွှင်သူများ
၃. စာရေးစာဖတ်ခြင်းနှင့် သင်္ချာအပါအဝင် အသိပညာ
များကို စိတ်အားထက်သန်စွာ လေ့လာသင်ယူများ
၄. မိမိပတ်ဝန်းကျင်အကျိုးကို ဆောင်ရွက်တတ်သူများ
ဖြစ်လာကြမှာ အမှန်ပါ ။
အမျိုးသားပညာရေးဥပဒေမှာ KG ပညာရေးကို
အဓိပ္ပာယ်ဖွင့်ဆိုရာမှာတော့ `` ပထမတန်းသို့ ကူးပြောင်းမှု လွယ်ကူစေရန် အသက် ၅ .နှစ်ပြည့်ပြီး ကလေးများအတွက် ဘက်စုံဖွံ့ဖြိုးမှုနှင့်သင့်လျော်သော နည်းလမ်းများကို အသုံးပြုပြီး ပြုစုပျိုးထောင်ပေးသည့် ပညာရေး " လို့ ဖွင့်ဆိုထားတာကို တွေ့ရမှာဖြစ်ပါတယ် ။
ဒါ့ကြောင့် ကျွန်တော်တို့ရဲ့ ရင်သွေးရတနာများကို အိမ်မှာသင်ပေးကြမယ့် မိဘတွေအနေနဲ့ ကလေးများကို စာရေးစာဖတ်ခြင်းတွေဆီ စောလျင်စွာမသွားမိစေဖို့ တိုက်တွန်းအပ်ပါတယ်ဗျာ ။
ငါတို့တုန်းက သူငယ်တန်းဆိုရင် ညအခါ လသာသာ ၊ကစားမလား နားမလား တွေ ရနေပြီ။ ခုကျ သူငယ်တန်းသာဆိုတယ် ဘာမှလည်းမရပါလားဆိုပြီး ဖြစ်တတ်ကြတဲ့ ဖေဖေမေမေတို့ရေ သူငယ်တန်းရဲ့ အဓိပ်ပါယျကို သိကြပြီးပြီဆိုတော့ စိတ်မပူပါကြပါနဲ့နော် ။
ကဲ ဒါဆိုရင် နောက်ထပ်အနေနဲ့ မိမိတို့ရင်သွေးရတနာများဆီကို ချဉ်းကပ်ကြရမယ့် နယ်ပယ်တွေ လေ့လာကြပါဦးစို့ခင်မျာ...
သင်ယူမှုနယ်ပယ်များ
KG တန်းဆိုတာဟာ မူလတန်းပညာရေးရဲ့ အခြေခံအကျဆုံးအတန်းလေးပါ ဖေဖေမေမေတို့ရေ ။ အရေးကြီးတဲ့ အတန်းတစ်ခုဖြစ်တာကြောင့် အစစအရာရာ အဆင်ပြေကြစေဖို့ ရေးသားပြုစုထားတဲ့ KG သင်ရိုးမှာတော့ တစ်ခြားအတန်းများလို့ ဘာသာရပ်နယ်ပယ်တွေ ခွဲခြားထားခြင်းမျိုး မရှိဘဲ အဆိုပါ ဘာသာရပ်ကြီးတွေဆီ တဖြည်းဖြည်း ချဉ်းကပ်နိုင်ဖို့ သင်ခန်းခေါင်းစဉ် ( ၁၅ ) ခုကို သင်ယူဖွံ့ဖြိုးမှုနယ်ပယ်ကြီး ( ၆ ) ခု နဲ့ ချိတ်ဆက် ရေးဆွဲထားပါတယ်။
KG သင်ရိုးရဲ့ သင်ခန်းစာခေါင်းစဉ် ( ၁၅ ) ခု
မိမိအကြောင်း
တို့မိသားစု
တို့ကျောင်း
တို့ရပ်ရွာ
အပင်များ
ရာသီဥတု
သယ်ယူပို့ဆောင်ရေး
စျေးများ
ပွဲတော်များ
ငါး
ရေ
ပိုးကောင်လေးများ
အိမ်များ
ငှက်များ
နို့တိုက်သတ္တဝါများ တို့ ဖြစ်ကြပါတယ်။
သင်ယူဖွံ့ဖြိုးမှုနယ်ပယ်တွေကတော့
၁ . ကိုယ်စိတ်နှစ်ဖြာကျန်းမာချမ်းသာခြင်း
၂ . စာရိတ္တ၊ မိတ္တနှင့် စိတ်လှုပ်ရှားမှုဆိုင်ရာ
ဖွံ့ဖြိုးတိုးတက်ခြင်း
၃ . အပြန်အလှန်ပြောဆိုဆက်သွယ်ခြင်း
၄ . သင်္ချာအခြေခံများကို စူးစမ်းလေ့လာခြင်း
၅ . အနုပညာရသခံစားခြင်းနှင့် ဖန်တီးခြင်း
၆ . ပတ်ဝန်းကျင်လောကကို သိရှိနားလည်ခြင်း....တို့ပဲဖြစ်ပါတယ်ခင်မျာ။
ကဲ... အခုဆိုရင် စိတ်ဝင်စားဖို့ အတော်ကောင်းနေပြီမဟုတ်ပါလား။
ဒါဆိုရင် နောက်ထပ်တစ်ဆင့် တက်ကြပါဦးစို့ဗျာ
သင်ယူမှုနယ်ပယ်တစ်ခုချင်းစီအတွက် မိဘများမှ
ပံ့ပိုးပေးနိုင်သည့် လုပ်ငန်းများ
အထက်မှာ ဖော်ပြခဲ့တဲ့ သင်ယူမှုနယ်ပယ် ( ၆ ) ခုအတွက် နယ်ပယ် တစ်ခုချင်းစီအလိုက် ဖေဖေမေမေတို့က ကောင်းမွန်စွာ အတူတူ သင်ယူလေ့ကျင့်ပေးလိုက်မယ်ဆိုရင်တော့ မိမိတို့ရဲ့ ရင်သွေးရတနာများ ပထမတန်းကို ကူးပြောင်းရာမှာ အခြားကလေးများနည်းတူ လိုက်ပါပြောင်းလဲနိုင်မယ်ဆိုတာ အသေချာပါပဲဗျာ ။
ဒါဆိုရင် သင်ယူနယ်ပယ် ( ၆ )ခု ရဲ့ ပထမဦးဆုံး နယ်ပယ်ဖြစ်တဲ့
၁ . ကိုယ်စိတ်နှစ်ဖြာကျန်းမာချမ်းသာခြင်း နယ်ပယ်
ဒီနယ်ပယ်ရဲ့ ရလဒ်တွေ အောင်မြင်ဖို့ဆိုရင်တော့ ဖေဖေမေမေတို့က ရင်သွေးတို့နဲ့အတူ လုပ်ပေးရမယ့်လုပ်ငန်းလေးတွေ ရှိနေပါတယ်နော် ။
ကျန်းမာသန့်ရှင်းခြင်းနှင့်ဆိုင်သော လုပ်ငန်းများ
လုံခြုံစိတ်ချရမှု ၊ စိတ်ဓါတ်ကြံ့ခိုင်မှုတို့နှင့်ဆိုင်သော
လုပ်ငန်းများ
ခန္ဓာကိုယ်ဖွံ့ဖြိုးမှုဆိုင်ရာ လုပ်ငန်းများ
ဒီသုံးချက်ဆိုတာက တကယ်တော့ ကြီးကြီးကျယ်ကျယ်ကြီးတွေ လျှောက်လုပ်နေရမှာ မဟုတ်ပါဘူးနော်။ အိမ်မှာ နေ့စဉ်မိဘတွေက ပြုလုပ်ပေးနေတာတွေကို ကလေးတွေကိုယ်တိုင် ပြုလုပ်နိုင်ရင်ပဲ ရပါပြီနော် ။
ကျန်းမာသန့်ရှင်းခြင်းနှင့်ဆိုင်သော လုပ်ငန်းများ
ကျန်းမာသန့်ရှင်းခြင်းနဲ့ဆိုင်တဲ့ ကလေးတွေ သင်ယူရမယ့်အချက်တွေကတော့ အာဟာရပြည့်ဝစွာ စားသုံးခြင်း၊ သန့်ရှင်းစွာစားသောက်ခြင်း ၊ ကိုယ်ခန္ဓာသန့်ရှင်းရေး ၊ လက်ဆေးခြင်း ၊ အိမ်သာစနစ်တကျ အသုံးပြုခြင်း၊ မိမိနေထိုင်ရာ ပတ်ဝန်းကျင် သန့်ရှင်းရေးပြုလုပ်ခြင်း စတာတွေ ပါဝင်ပါတယ်။ ဒီအချက်တွေဟာ သီးသီးသန့်သန့်ကြီး သင်ကြားပေးဖို့ မလိုအပ်ပါဘူးနော်။ ကလေးတွေ နေ့စဉ်လုပ်ဆောင်ရတဲ့ ထမင်းစားချိန် ၊နားချိန် စတာတွေမှာ လက်တွေ့လုပ်ကိုင်ရင်းနဲ့ သင်ယူရင်း ကောင်းမွန်တဲ့အလေ့အကျင့်လေးတွေမို့ စွဲနေအောင် လေ့ကျင့်သင်ကြားပေးရမှာ ဖြစ်ပါတယ်ဗျာ။
အဟာရပြည့်ဝစွာ စားသောက်နိုင်ရေးအတွက်ကတော့ မိဘတွေအနေနဲ့ အလုပ်အကြောင်းပြပြီး ဖြစ်သလို စားသောက်တာမျိုးထက် အစာအုပ်စုစုံလင်အောင် စီမံပေးကြဖို့ တိုက်တွန်းပါရစေနော်။ ကျောင်းမှာထားမယ်ဆိုရင်လည်း ဆရာနဲ့မိဘပူးပေါင်းပြီး ကျောင်းတွင်းအဟာရကျွေးမွေးရေး လုပ်ငန်းတွေမှာလည်း ပါဝင်လှူဒါန်းပေးတော့ မိမိရင်သွေးအပါအဝင် အခြားကလေးငယ်များကိုပါ အကျိုးဖြစ်ထွန်း
စေမှာပါ။
ကျန်းမာရေးအလေ့အကျင့်ကောင်းဆိုတာက တစ်မိသားစုလုံးနဲ့ဆိုင်တဲ့ ကိစ္စလို့ သတ်မှတ်သင့်ပါတယ်။ တစ်ကြိမ်တစ်ခါတည်း လေ့ကျင့်ပေးရမှာမျိုး မဟုတ်ဘဲ
အမြဲစွဲမြဲသွားရမယ့် အလေ့အကျင့်ဖြစ်သွားအောင် မိသားစုဝင်များ၊ ဆရာဆရာမများနဲ့တိုင်ပင်ပြီး စဉ်ဆက်မပြတ် ပြုလုပ်သွားကြရမှာ ဖြစ်ပါတယ်။
လုံခြုံစိတ်ချရမှု ၊ စိတ်ဓါတ်ကြံ့ခိုင်မှုတို့နှင့်ဆိုင်သော
လုပ်ငန်းများ
ဒီအပိုင်းမှာတော့ ကလေးတွေဟာ မိမိအိမ်၊ကျောင်းနဲ့ ပတ်ဝန်းကျင်တို့မှာ အန္တရာယ်မဖြစ်အောင် ဘယ်လိုနေထိုင်ရမယ်ဆိုတာတွေကို လေ့ကျင့်ပေးကြရမှာပါ။ နေ့စဉ်လုပ်ငန်းတွေထဲမှာ လက်တွေ့လိုက်နာကျင့်သုံးရမယ့် အဓိကကျတဲ့အချက်တွေ ထည့်သွင်းလေ့ကျင့်ပေးသင့်ပါတယ်။ မိမိနှင့်အတူ အခြားသူများ မထိခိုက်အောင် လုပ်ကိုင်ရမယ့် ကျွမ်းကျင်မှုတွေကတော့
ချွန်ထက်သောအရာများကို အသုံးပြုနည်း ၊ တုတ်ချောင်းများ ၊ သစ်သားတုံးများ စတာတွေကို ဘယ်လို ကိုင်တွယ်သင့်တယ်ဆိုတာ လေ့ကျင့်သင်ကြားပေးရမှာပါ။
ဒါ့အပြင် ကစားတဲ့နေရာမှာပဲဖြစ်ဖြစ် ၊ အများနဲ့စုပေါင်းလုက်ကိုင်ရတဲ့ အခါတွေမှာပဲဖြစ်ဖြစ် လိုက်နာရမယ့် စည်းကမ်းလေးတွေကိုလည်း လေ့ကျင့်ပေးလိုက်ပါနော်။
ဥပမာ အတူတူကစားကြတဲ့အခါမှာတော့
တစ်ယောက်နဲ့တစ်ယောက် မတွန်းရ
ကစားသည့်အခါ အလှည့်စောင့်ရမည်
တစ်ခြားလူများကစားနေတဲ့ ဒန်း ၊ စီးဆော၊ လျှော စတာတွေနဲ့ လွတ်တဲ့နေရာတွေမှာ နေရမယ်
ဆိုတာတွေ လေ့ကျင့်ပေးရမှာ ဖြစ်ပါတယ်။
ကျောင်းမှာဖြစ်ဖြစ် ၊ အိမ်မှာဖြစ်ဖြစ် လုံခြုံစိတ်ချမှုနဲ့ စပ်လျဉ်းတဲ့ အသိသညာတွေဖြစ်တဲ့ မီး၊ လျှပ်စစ်မီးခလုတ်၊ ချွန်ထက်သောအရာများနဲ့ ဆော့ကစားခြင်းမပြုမိစေဖို့ လေ့ကျင့်ပေးကြရမှာဖြစ်ပါတယ် ။
ဒါတွေအပြင်
အန္တရာယ်ကင်းစွာ လမ်းကူးပုံ
ရပ်ရွာအတွင်းတွေ့ရသည့် အန္တရာယ်ရှိကြောင်းပြ
သင်္ကေတများ
အန္တရယ်ဖြစ်နိုင်ချေရှိတဲ့ အခြေအနေများကို
သတိပြုမိပြီး အန္တရာယ်ကင်းစွာ တုံ့ပြန်လုပ်ဆောင်နိုင်ရန်
အချက်များ
စတာတွေကို အကြောင်းအရာတစ်ခုအပေါ် ချဉ်းကပ်ပြီး စနစ်တကျ စီစဉ်သင်ကြားပေးရမှာ ဖြစ်ပါတယ် ။
ဖေဖေမေမေတို့က ဒီလိုလေးတွေသာ လေ့ကျင့်ပေးလိုက်မယ်ဆိုရင်တော့ ကလေးတွေဟာ မိမိကိုယ်ကို ဘေးကင်းအောင်နေထိုင်တတ်ပြီး အခက်အခဲတွေ ကြုံလာတဲ့အခါ သပ်သပ်ရပ်ရပ် ကျော်ဖြတ်သွားနိုင်တဲ့ စိတ်ဓါတ်ကြံ့ခိုင်တဲ့ ကလေးတွေဖြစ်လာမှာ အသေချာပါပဲ။
ခန္ဓာကိုယ်ဖွံ့ဖြိုးမှုဆိုင်ရာ လုပ်ငန်းများ
ဒီနယ်ပယ်မှာတော့ ကာယလှုပ်ရှားမှုဆိုင်ရာ ကျွမ်းကျင်မှုများ ဖွံ့ဖြိုးလာအောင် ဆောင်ရွက်ရတဲ့ လုပ်ငန်းတွေ ပါဝင်တာပါ။ ကျွမ်းကျင်မှုဆိုတဲ့ အထဲမှာတော့ ကြွက်သားငယ်များကို အသုံးပြုလုပ်ဆောင်ရသည့် အနုစိတ်ကာယလှုပ်ရှားမှုများ ၊ ကြွက်သားကြီးများကို အသုံးပြုရသည့်ကာယလှုပ်ရှားမှုများ ပါဝင်ပါတယ်။
ကြွက်သားငယ်များကိုအသုံးပြုရသည့်
အနုစိတ်ကာယလှုပ်ရှားမှုများ
ဒီလှုပ်ရှားမှုတွေကတော့ လက်မောင်း၊လက်ကောက်ဝတ်၊လက်ချောင်း စတဲ့ ကြွက်သားငယ်များကို အသုံးပြုလုပ်ဆောင်ရတာ ဖြစ်ပါတယ်။ ကြွက်သားငယ်များကို ကျွမ်းကျင်စွာလှုပ်ရှားအသုံးပြုနိုင်တဲ့ကလေးတွေဟာ ပုံဆွဲခြင်း၊စာရေးခြင်း၊တီထွင်ဖန်တီးခြင်း စတဲ့လုပ်ငန်းတွေမှာ ကောင်းမွန်စွာလုပ်ဆောင်နိုင်တာ တွေ့ရမှာပါ။ ခဲတံ၊မြေဖြူ၊စုတ်တံ စတာတွေကို ကျွမ်းကျင်စွာ ကိုင်တွယ်နိုင်လာခြင်းရဲ့ အကျိုးကျေးဇူးတွေပါ။ ဒီလိုမျိုး အနုစိတ်ကာယလှုပ်ရှားမှုတွေကိုတော့ အခြားသော သင်ယူမှုလုပ်ငန်းတွေဖြစ်တဲ့
ရေးခြစ်ခြင်း
ပုံဆွဲခြင်း
ဆေးရောခြယ်ခြင်း
ဖြတ် ၊ ညှပ်၊ ကပ် ခြင်း
ရက်လုပ်ခြင်း စတဲ့လုပ်ငန်းတွေကနေ
လေ့ကျင့်ပေးနိုင်ပါတယ်
ထို့အပြင် လွတ်လပ်စွာ ကစားချိန်တွေမှာ သစ်သားဘလောက်တုံးများဖြင့် တည်ဆောက်ကစားခြင်း ၊ ကြိုးသီကစားခြင်း ၊ စက္ကူရုပ်ခေါက်ခြင်း စတဲ့ လုပ်ငန်းတွေကနေတစ်ဆင့်လည်း ကြွက်သားငယ်များ သန်မာလာအောင် လေ့ကျင့်ပျိုးထောင်ပေးနိုင်ပါတယ်ခင်မျာ။
ကြွက်သားကြီးများကိုအသုံးပြုရသည့်
ကာယလှုပ်ရှားမှုများ
တကယ်တော့ စာတွေးတွေးနေလို့သာ ကာယတွေ ကြွက်သားတွေ ဖြစ်နေတာ။ ရိုးရိုးလေး စဉ်းစားရရင် ခေါင်း ၊ ခါး ၊ ခြေ ၊လက် ဆိုတဲ့ ခန္ဓာကိုယ်အစိတ်အပိုင်းတွေ လှုပ်ရှားမှုဟာ ကြွက်သားကြီးတွေပါတဲ့ ကာယလှုပ်ရှားမှုပါပဲ ။
၄င်းလှုပ်ရှားမှုထဲမှာ ရွေ့လျားခြင်းနှင့်ဆိုင်သော ကျွမ်းကျင်မှုများ ၊ မရွေ့လျားဘဲလှုပ်ရှားရသည့် ကျွမ်းကျင်မှုများ ၊ ကျင်လည်စွာ ကိုင်တွယ်ခြင်းဆိုင်ရာ လှုပ်ရှားမှုများ ပါဝင်ပါတယ်။ အဆိုပါ လှုပ်ရှားဆောင်ရွက်ခြင်းကနေတစ်ဆင့် ကလေးငယ်များဟာ မိမိခန္ဓာကိုယ်အကြောင်းကို မိမိကိုင်တိုင် သိရှိလာနိုင်မှာ ဖြစ်ပါတယ် ။
ကြွက်သားကြီးတွေကို အသုံးပြုလုပ်ဆောင်ရသည့် အခြေခံကာယလှုပ်ရှားမှုဆိုင်ရာ ကျွမ်းကျင်မှုတွေကို လေ့လာ
ကြည့်ကြပါစို့ ...
ရွေ့လျားခြင်း
တွားသွားခြင်း
လမ်းလျှောက်ခြင်း
ပြေးခြင်း
လျှောတိုက်ခြင်း
ခုန်ခြင်း
ကဆုန်ပေါက်ခြင်း
ကြိုးခုန်ခြင်း
မရွေ့မလျားလုပ်ဆောင်ခြင်း
ကွေးခြင်း
ဆန့်ခြင်း
လှည့်ခြင်း
လိမ်ခြင်း
လှုပ်ရမ်းခြင်း
ဆွဲခြင်း
တွန်းခြင်း
ကျင်လည်စွာကိုင်တွယ်လုပ်ဆောင်ခြင်း
ဖမ်းခြင်း
ပစ်ခြင်း
လှိမ့်ခြင်း
ပုတ်ခြင်း
ကန်ခြင်း
ရိုက်ခြင်း
တော့ခြင်း တို့ ပါဝင်ပါတယ်။
မိဘများ၊ဆရာများရဲ့ အခန်းကဏ္ဍ
ဖေဖေမေမေတို့က သရုပ်ပြသပါ ။ အချို့လုပ်ငန်းတွေမှာ ရှင်းလင်းတဲ့ ညွှန်ကြားချက်တွေပေးပြီး ထင်သာမြင်သာအောင် သရုပ်ပြသဖို့လိုပါတယ်။ ဥပမာ - လျှောက်လမ်းပေါ်မှာ ဟန်ချက်ထိန်းခြင်း
ကလေးများကိုယ်တိုင် လေ့ကျင့်နိုင်ရန် အခွင့်အရေးများပေးပါ ။ ကလေးရဲ့ လုပ်ဆောင်မှုအပေါ်မှာလည်း အပြုသဘောဆောင်တဲ့ တုံ့ပြန်မှုတွေကိုပေးပါ ။ ဥပမာ သမီးက ကောင်းကောင်းလုပ်နိုင်တယ် ဒါပေမယ့် ဆင်းတဲ့အခါကျရင် ဖြည်းဖြည်းဆင်းရမယ် ခုန်မချရဘူးနော် စသည်ဖြင့်
ပြောပေးပါ ။
ကလေးတွေရထားတဲ့ ကျွမ်းကျင်မှုကို အသုံးချဖို့ အခွင့်အလမ်းတွေလည်း ဖန်တီးပေးရပါမယ် ။ ကလေးရဲ့
လုပ်ဆောင်မှုအပေါ် စိတ်ဝင်စားမှု စိတ်အားထက်သန်မှု နှင့် ဂရုစိုက်မှုတို့ကို ပြသပါ ။ ချီးကျူးအားပေးခြင်းတို့ကို ပြုလုပ်ပေးပါ။ ဂရုစိုက်မှုဆိုတဲ့နေရာမှာ ကလေးဘာလုပ်လုပ် တဟဲ့ဟဲ့ လိုက်ကန့်ကွက်နေဖို့မဟုတ်ဘူးနော် ။
ကလေးတွေရဲ့ ကိုယ်ကာယဖွံ့ဖြိုးဖို့အတွက် ခြံထဲက အရိပ်ရတဲ့နေရာတွေမှာ ဖြစ်နိုင်ရင် အောက်ပါကစားစရာပစ္စည်းများနဲ့ ကစားရန်နေရာများကို ထားရှိပေးသင့်ပါတယ် ။
ဒန်း
စီးဆော
လျှော
တာယာအဟောင်းတွေနဲ့ပြုလုပ်ထားတဲ့ အနိမ့်အမြင့်လျှောက်လှမ်း
တွယ်တက်ရန် ပိုက်နဲ့ဆင်ထားတဲ့ အရာ
ဘောလုံး
ခုန်ကြိုး
ဘက်တံ စတာတွေကို စီစဉ်ပေးထားသင့်ပါတယ် ။
သူငယ်တန်းကလေးဟာ ထိုင်နေရတဲ့အချိန်ထက် လှုပ်ရှားသွားလာနေရတဲ့အချိန်က ပိုများရမယ်ဆိုတာတော့ သတိချပ်စေချင်ပါတယ် ။ဒါမှသာ ကြွက်သားကြီးများကို အသုံးပြုခွင့်ရပြီး သန်မာလာမှာမို့ပါ။ ဝလုံး တစ်မျက်နှာပြီးမှ ဆော့ရမယ်တို့ ကကြီးရေးပြီးမှ မုန့်စားရမယ်တို့
မလုပ်မိပါစေနဲ့နော် ။
ကလေးတွေကိုယ်တိုင် အင်္ကျီဝတ်တတ်အောင် ၊ လက်ဆေးတတ်အောင် ၊ မုန့်စားတတ်အောင် လေ့ကျင့်ပေးသင့်တဲ့အပြင် ပစ္စည်းများ သိမ်းတတ်ကောက်တတ်ဖို့လည်း အရေးကြီးပါတယ် ။ မတော်တဆဖြစ်မှုများ ၊ ဖိတ်စဉ်မှုများ ၊ လုပ်ငန်းအပြီးမသတ်နိုင်တာတွေလည်း ရှိတတ်တာမို့ ဖေဖေမေမေတို့က စိတ်မဆိုးရဘူးနော် ။
KG အရွယ်ဆိုတာ မူကြိုအရွယ် ကျောင်းသားတွေထက် အာရုံစိုက်နိုင်ချိန် ပိုများတယ်ဆိုပေမယ့် အလုပ်တစ်ခုတည်းအပေါ် အချိန်အကြာကြီး အာရုံစိုက်နေရအောင် ပစ်မထားရဘူးနော် ။
ကစားစရာ ရွေးချယ်ဝယ်ယူတဲ့အခါ ကျား၊မ ကွဲပြားမှုသဘောကိုပါ ထည့်သွင်းစဉ်းစားသင့်ပါတယ်။ ဥပမာအားဖြင့် ကလေးများလုပ်ကိုင်နိုင်ရန် ကြိုးသီးပုတီးစေ့များ ထားရှိပေးသင့်သလို သစ်သားဘလောက်တုံးများလည်း ထားသင့်ပါတယ် ။
ကိုယ်စိတ်နှစ်ဖြာကျန်းမာချမ်းသာခြင်းနယ်ပယ်အတွက်ကတော့ ကျွန်တော်အကြံပေးချင်တာ ဒီလောက်ပါပဲခင်မျာ ။
၂ . စာရိတ္တ၊ မိတ္တနှင့် စိတ်လှုပ်ရှားမှုဆိုင်ရာ
ဖွံ့ဖြိုးတိုးတက်ခြင်း
စာရိတ္တ ၊ မိတ္တနှင့် စိတ်လှုပ်ရှားမှုဆိုင်ရာ ကျွမ်းကျင်မှုတွေဟာ ကျောင်းနေစဉ်အတွက်သာမကဘဲ ဘဝတစ်လျှောက်လုံးအတွက် အရေးပါပါတယ် ။ အဆိုပါကျွမ်းကျင်မှုတွေဟာ ကလေးတွေရဲ့ အနာဂတ်အောင်မြင်မှုအတွက် ခိုင်မြဲတဲ့ အကျိုးဆက်တွေပါ။
သူငယ်တန်းအရွယ် ကလေးငယ်များ မိမိကိုယ်ကို နားလည်မှု ထိန်းချုပ်မှု ၊ အများနှင့်ဆက်ဆံတတ်မှု ၊ ကိုယ်ချင်းစာစိတ် အစရှိတဲ့ လူမှုဆက်ဆံရေးဆိုင်ရာ အခြေခံကျွမ်းကျင်မှုတွေ ရရှိသင့်ပါတယ် ။ မတူကွဲပြားမှုများကို လေးစားတန်ဖိုးထားခြင်း ၊ မိမိလုပ်ဆောင်ချက်အပေါ် မိမိကိုယ်တိုင် တာဝန်ယူ တာဝန်ခံမှုတို့ကိုလည်း လေ့ကျင့်ပေးရမှာဖြစ်ပါတယ် ။
ဒီနယ်ပယ် ကျွမ်းကျင်ဖို့အတွက်ကတော့
မိမိကိုယ်ကို သိခြင်းနှင့်ထိန်းသိမ်းခြင်း
မိမိ၏ လူမှုအသိုင်းအဝိုင်းကိုသိခြင်း
အများနှင့်ပေါင်းသင်းဆက်ဆံခြင်း
တာဝန်ယူဆုံးဖြတ်လုပ်ဆောင်နိုင်ခြင်း
စသည်တို့နဲ့ သက်ဆိုင်တဲ့ လုပ်ငန်းလေးတွေနဲ့ လေ့ကျင့်ပေးကြရမှာပါဗျ ။
မိမိကိုယ်ကို သိခြင်းနှင့်ထိန်းသိမ်းခြင်း
မိမိအားသာချက်များကို မိမိကိုယ်တိုင်သိရှိတဲ့ကလေးတွေဟာ မိမိကိုယ်ကို တန်ဖိုးထားတတ်လာပါတယ် ။ ဘာတွေကိုနှစ်သက်တယ် ၊ ဘာကို မနှစ်သက်ဘူး ၊ဘာတွေကိုလုပ်နိုင်တယ် ၊ ဘာတွေကိုတော့မလုပ်နိုင်ဘူး လို့လည်း ခွဲခြားနိုင်ကြပါတယ်။ အဆိုပါကလေးတွေက သူတို့ဘာခံစားနေရတယ်
ဆိုတာ သိသလို သူတို့သိတာတွေကိုလည်း ပြန်ပြော
နိုင်ကြပါတယ် ။
တစ်ချိန်တည်းမှာပဲ အရာရာကို မိမိအမြင်နဲ့သာကြည့်ပြီး အခြားသူများရဲ့ အမြင်တွေ ၊ ခံစားချက်တွေကို ထည့်မတွက်တော့ဘဲ ပြောဆိုလုပ်ကိုင်လာတတ်ကြပါတယ် ။ ဒါကြောင့် မိမိနဲ့ သူများရဲ့ မတူကွဲပြားမှု ၊ စိတ်ခံစားချက်တွေနဲ့ တစ်ဖက်လူရဲ့ သဘောထားတွေကို သတိပြုမိလာစေဖို့ ကူညီပေးရမှာပါနော် ။
မိမိ၏ လူမှုအသိုင်းအဝိုင်းကိုသိခြင်း
ရင်သွေးငယ်များကို မိမိနေထိုင်ကြီးပြင်ရာ လူမှုအသိုင်းအဝိုင်းကို သိအောင်ပြုလုပ်ပေးရပါမယ်။ အသိုင်းဝိုင်းဆိုတဲ့နေရာမှာ မိသားစု ၊ ရပ်ရွာအပြင် နိုင်ငံအထိ အကျုံးဝင်ပါတယ် ။ ထိုအသိုင်းအဝိုင်းရှိ လူများ၏ တူညီမှု မတူညီမှုများကို ခွဲခြားသိမြင်နိုင်အောင် ဆောင်ရွက်ပေးရမှာပါနော် ။ မိမိအသိုင်းအဝိုင်းကို သိတဲ့ကလေးတွေဟာ အခြားသူတွေရဲ့ ခံစားချက် ၊ ထင်မြင်ချက်တွေကို သတိထားမိပြီး မတူကွဲပြားခြင်းများကို လက်ခံကာ တန်ဖိုးထားလေးစားလာမှာပါ ဖြစ်ပါတယ်။
အများနှင့်ပေါင်းသင်းဆက်ဆံခြင်း
အိမ်မှာပဲ သင်ကြမယ့်ကလေးတွေအတွက် အပေါင်းအသင်းမများနိုင်ဘူးဆိုပေမယ့် အထက်၊အောက် မောင်နှမတွေနဲ့ လေ့ကျင့်ပေးလို့နိုင်ပါတယ် ။ စုပေါင်းလုပ်ငန်းတွေလုပ်ကြတဲ့အခါ မိမိကလည်း တစ်ထောင့်တစ်နေရာကနေ ပါဝင်လုပ်ဆောင်ရန် လိုအပ်တယ်ဆိုတာ သိရှိလာမှာပါ။အခြားသူတွေနဲ့ အတူတကွလုပ်ဆောင်ရတဲ့ လုပ်ငန်းတွေကနေတစ်ဆင့် လူမှုဆက်ဆံရေးအလေ့အထတွေဖြစ်တဲ့ အလှည့်စောင့်ရခြင်း ၊ အခြားသူများပြောသည်ကို နားထောင်ပေးရခြင်း စတဲ့ကောင်းမွန်တဲ့ လူမှုဆက်ဆံရေး အလေ့အကျင့်လေးတွေ ရရှိနိုင်ပါတယ် ။
တာဝန်ယူဆုံးဖြတ်လုပ်ဆောင်နိုင်ခြင်း
မိမိကိုယ်ကို တာဝန်ယူမှုနဲ့ မိမိလုပ်ဆောင်ချက်များ
အပေါ် တာဝန်ယူမှုများကို ရရှိလာအောင် ကလေးတွေကို တဖြည်းဖြည်းချင်း သင်ယူပေးကြရမှာပါ။ ကလေးကိုယ်တိုင် အမှီအခိုကင်းစွာ လုပ်တတ်လာနဲ့အမျှ ဆုံးဖြတ်ချက်ချခြင်းနှင့် ပတ်သက်တဲ့ ကျွမ်းကျင်မှုတွေလည်း တိုးတက်လာမှာပါ ။ ကလေးအရွယ်နဲ့ သင့်လျော်တဲ့ ပြဿနာများကို ဖြေရှင်းနိုင်ဖို့ နည်းလမ်းအမျိုးမျိုးရှာဖွေရန် အခွင့်အလမ်းများ ဖန်တီးပေးသင့်ပါတယ် ။ ဒါမှသာ ဆုံးဖြတ်ချက်ချနိုင်စွမ်း ၊ တာဝန်ယူနိုင်စွမ်းတွေ တိုးတက်လာမှာပါ ။
နယ်ပယ် ( ၆ ) ခုမှာ ၂ ခုတည်းအတွက် ပြီးသေးတာပါ
ခင်မျာ။
စာတွေရှည်နေရင် မဖတ်မှာစိုးလို့ ခုတော့ ဒီလောက်ပါပဲဗျာ။
နောက်ထပ်အခွင့်သင့်ရင် ကျန်တဲ့နယ်ပယ်တွေအတွက် ကျွန်တော့်အတွေ့အကြုံလေးတွေနဲ့အတူ ကလေးများ ကစားရင်း သင်ယူနိုင်မယ့် နည်းလမ်းများ ပုံပြင်ပြောနည်းများကို မျှဝေပေးချင်ပါသေးတယ်ခင်မျာ ။
KG တန်းတက်ရောက်ကြမယ့် သားသားမီးမီးတို့ရဲ့ မိဘများ ၊ ဘဝတူ ဆရာ၊ဆရာမများတို့အတွက် မုံညှင်းစေ့လောက်လေးဖြစ်ဖြစ် အသိတစ်ခုတိုးတယ်ဆိုရင်ပဲ ကျေနပ်ပါပြီဗျာ ။
Crd ဦးအောင်ရန်ဟိန်း
မူလတန်းပြ မြိုင်
ကိုးကား .. KG ဆရာလမ်းညွှန်