15/04/2020
အသိရယ်၊ အမြင်ရယ်၊ အလုပ်ရယ်
ကျွန်တော်တို့ ဆေးပညာမှာတော့ KAP လို့ အတိုကောက် ခေါ်ပါတယ်။ Knowledge, Attitude, Practice ပေါ့။ သိတာရယ်၊ ခံယူချက်ရယ်၊ လက်တွေ့လုပ်ဆောင်တာရယ် ဆိုပြီး ၃ ပိုင်း ရှိပါတယ်။ ဒီ Covid 19 နဲ့ ပတ်သက်လို့ အဲ့လိုလေး စဉ်းစားကြည့်ရအောင်။
၁။ အသိပညာ (Knowledge)
ဒီဗိုင်းရပ်စ်က ဘယ်လိုဆိုရင် ကူးတယ်၊ ဘယ်လိုကာကွယ်ရတယ်၊ ပိုးကူးစက်ခံထားရပေမဲ့လည်း ချက်ချင်း လက္ခဏာ မပြသေးတာမို့ မဖျားဘူးဆိုတိုင်း ပိုးမရှိဘူး ပြောလို့ မရဘူး၊ စသဖြင့် သိထားဖို့ လိုတယ်။
အဲ့လိုတွေ မသိတဲ့အခါ Quarantine ယူဖို့ ပျက်ကွက်တယ်။ မရည်ရွယ်ပေမဲ့ ဗိုင်းရပ်စ်ကို ဖြန့်လိုက်သလို ဖြစ်သွားတယ်။ (တချို့ နိုင်ငံခြားပြန်တွေဆို Quarantine ဝင်ရမယ်ဆိုပြီး စည်းကမ်း မထုတ်ခင်ကတည်းက ပြန်ရောက်နေတာ ဆိုပေမဲ့ ဒီအသိမျိုး ရှိထားတဲ့အခါကျတော့ သူ့ဟာသူ အိမ်ထဲမှာ Self-quarantine လုပ်နေခဲ့တယ်။ အသိပညာရဲ့ အကျိုးကျေးဇူးပေါ့)
ဒီအတွက် ဒီဗိုင်းရပ်စ်နဲ့ ပတ်သက်လို့ မှန်ကန်တဲ့ အသိပညာတွေ ပေးရတယ်။ လက်ဘယ်လိုဆေးရတယ်၊ Mask ကို ဘယ်လိုသုံးရတယ်၊ အိမ်ထဲမှာနေဖို့က ဘယ်လောက်အရေးကြီးတယ်၊ ဘယ်လိုလက္ခဏာတွေ ပြတတ်တယ်၊ ဖြစ်ခဲ့ရင် ဆေးရုံ ဆေးခန်းပြဖို့ လိုပါတယ် စသဖြင့်ပေါ့။ နောက်ပြီး သတင်းမှားတွေကိုလည်း ရှင်းပေးရမယ်။
အသိပညာပေးတဲ့အခါမှာလည်း နည်းလမ်းပေါင်းစုံ သုံးရမယ်။ ဆိုရှယ်မီဒီယာ၊ ရေဒီယို၊ TV ၊ လက်ကမ်းစာစောင်၊ သတင်းစာ စသဖြင့်။ လူအများပေါ် လွှမ်းမိုးမှုရှိတဲ့သူတွေရဲ့ အားကိုလည်း ယူရမယ်။ သူတို့တွေကလည်း ကိုယ် သတင်းတစ်ခုကို မပေးခင် သေချာစနစ်တကျ လေ့လာဖို့ လိုမယ်။ မသေချာရင် ကျွမ်းကျင်သူနဲ့ မေးမြန်းပြီးမှ တင်စေချင်တယ်။ လွှမ်းမိုးမှု ကြီးတဲ့သူတွေမို့လို့ပါ။
၂။ ခံယူချက် (Attitude)
သိတာက သိတာတစ်ပိုင်းပဲ။ ခံယူချက်က သက်သက်ဖြစ်တယ်။
တချို့ကျ ခပ်ပေါ့ပေါ့ တွေးတယ်။ မဖြစ်နိုင်ပါဘူး၊ ငါတို့နဲ့ အဝေးကြီးပါပေ့ါ။ ဘယ်သူ ဘယ်လောက်ပြောပြော၊ အပြင်တွေ ထွက်မြဲ၊ လူစုလူဝေးတွေ လုပ်မြဲ။ လက်လည်း သေချာမဆေး၊ Mask လည်း မတပ်ဘူး။ ဒီနေရာမှာ ဘာသာရေးယုံကြည်ချက်အရလည်း ပေါ့ဆသွားတာလည်း ပါမယ်။
သူတို့ကိုတော့ မပေါ့ဆဖို့၊ ကမ္ဘာ့နိုင်ငံကြီးတွေတောင် အလူးအလဲ ခံနေရတယ်ဆိုတာကို သိအောင် ပြောရမယ်။
တချို့ကျ အကြောက်လွန်တယ်၊ သေကုန်တော့မှာပဲ။ ကမ္ဘာကြီး ပျက်တော့မှာပဲ။ ငတ်ကုန်ကြတော့မှာပဲ စသဖြင့်ပေါ့။ ဒါမျိုးကျ ဗိုင်းရပ်စ်နဲ့ ပတ်သက်တဲ့ သတင်းကောင်းတွေကို ဝေမျှပေးရမယ်။ အီကွေဒေါက ဘယ်လိုဖြစ်သွားပြီ ဆိုတဲ့ ဂျင်းသတင်းတွေကိုလည်း ရှင်းပြပေးရမယ်။ ဒီလိုတွေ ကာကွယ်ဖို့ကသာ အဓိကကျတယ်၊ ကိုယ့်တာသာ ကိုယ်လုံအောင် လုပ်ပါ ဆိုတာမျိုး ပြောပြရတယ်။ မဟုတ်ရင် ဗိုင်းရပ်စ်က မကူးဘူး။ စိတ်နဲ့တင် ပြဿနာဖြစ်ကုန်မှ ခက်မယ်။
အဲ့လို အကြောက်လွန်ရာကနေတစ်ဆင့် ခွဲခြားဆက်ဆံတာ၊ အပြစ်တင်တာတွေ ဖြစ်လာတယ်။ မြို့ထဲ အဝင်မခံတာ ကန့်ကွက်တာတွေ ဖြစ်လာတယ်။ ထုတ်ဖော်ပြောဆိုဖို့ကို တွန့်ဆုတ်လာကြမယ်။ အိမ်မှာ ကြိတ်ကုမယ်။
ဒီအတွက် ခွဲခြားမဆက်ဆံကြဖို့ လိုတယ်။ ပေ့ါဆမှု၊ အဆင်အခြင်မဲ့မှုကြောင့် ဖြစ်ခဲ့ရတာဆို သက်ဆိုင်ရာက တရားစွဲ၊ အရေးယူလိမ့်မယ်။ မရည်ရွယ်ပါဘဲနဲ့ ဖြစ်ခဲ့ရတာမျိုးတွေအတွက် ဖေးဖေးမမနဲ့ ဆက်ဆံပေးဖို့ လိုမယ်။ ဒီဗိုင်းရပ်စ် ကူးတိုင်း သေမှာမဟုတ်ကြောင်းကိုလည်း ပြောပြပေးရမယ်။ HIV လိုပါပဲ။ ဒီပိုးက မကောင်းတဲ့သူတွေမှ ကူးတာ၊ ကုရာနတ္တိ ဆေးမရှိ ပဲ ဆိုတာမျိုးတွေနဲ့ ကြောက်အောင်လို့ အသိပညာ ပေးကြတော့ ပိုးကူးခံရသူတွေခမျာ ထုတ်မပြောရဲကြတော့ဘူး၊ ကူးပြီဆိုတာနဲ့ အသေပဲ ဆိုပြီး စိတ်လျှော့လိုက်တော့ ကုသမှု မခံယူကြတော့ဘူး။
နောက် ခံယူချက်တစ်မျိုးကတော့ ဘာလာလာ ယုံတဲ့အုပ်စု။ တကယ်တော့ ဒီပြဿနာမှ မဟုတ်ပါဘူး။ ကျွန်တော်တို့ မြန်မာတွေက စူပါမန်းကို မျှော်ကိုးတတ်တဲ့ ခံယူချက်မျိုး ရှိကိုရှိတယ်။ ဥပမာ သွေးတိုး၊ ဆီးချို ဆိုပါတော့၊ အစားအသောက် ရှောင်နော်ဆို ဘယ်လိုပြောပြော မလုပ်ဘူး။ သူတို့ လိုချင်တာ ဘာလဲ။ အမြစ်ပြတ်ပျောက်မယ် ဆိုတဲ့ ဆေး။ ဝိတ်ချမယ်ဆိုလည်း ပိန်ဆေးပဲ သောက်ချင်ကြတာ။ အစားအသောက် ထိန်းဖို့၊ လေ့ကျင့်ခန်း လုပ်ဖို့ကျ စိတ်မဝင်စားဘူး။ ဆိုတော့ ဒီ Covid 19 မှာလည်း လက်ဆေးနော်၊ လူစုလူဝေး ရှောင်နော် ဆိုတာတွေထက် တမာရွက်ကိုပဲ ပိုပြုတ်သောက်ချင်တာ။ သူတို့ကိုတော့ ဂျင်းကြိုက်တဲ့ အုပ်စုလို့ နာမည်ပေးချင်တယ်။
နောက်တစ်ခုကတော့ ဘဝကြီးက သေမထူး နေမထူး ဖြစ်နေတာ။ လှည့်ကြည့်စရာလည်း မိသားစု မရှိ။ ဘဝကလည်း နေမပျော်။ ကူးသွားဖို့လည်း ထူးခြားမသွားဘူးဆိုတဲ့ လူတွေကလည်း ခပ်ပေါ့ပေါ့ နေလိမ့်မယ်။
ဒါက ကျွန်တော် စဉ်းစားမိသလောက် ထွက်လာတဲ့ ခံယူချက်တွေပဲ။ ဆိုလိုတာက အသိပညာ ပေးထားတာချင်း တူတူတောင် လူတွေရဲ့ ခံယူချက်ပေါ် မူတည်ပြီး လုပ်ဆောင်ချက်တွေက အမျိုးမျိုး ကွဲသွားတယ် ဆိုတာပဲ။
အဲ့လိုပဲ အသိပညာ ပေးတဲ့အခါမှာလည်း စိုးရိမ်စရာ အချက်တွေကိုပဲ ထိုင်ပြောနေလို့ မရဘူး။ ထောင့်ပေါင်းစုံကနေ ပြောပြပေးဖို့ လိုတယ်။ ပေါ်လာသမျှ ကောလဟာလတွေ၊ ဂျင်းတွေကိုလည်း ရှင်းပြပေးဖို့ လိုပါတယ်။
၃။ လက်တွေ့ လုပ်ဆောင်ဖို့ (Practice)
ဒါကတော့ အရေးကြီးဆုံးပဲ။ ဘယ်လောက်ပဲ သိသိ၊ လက်တွေ့ မလုပ်နိုင်ရင်တော့ အလကားပဲ။
ဒီနေရာမှာ ဘယ်လိုပဲ သိသိ၊ ဘယ်လိုပဲ လိုက်နာချင် လိုက်နာချင်၊ လိုက်နာလို့ မရတဲ့ လူတန်းစားတွေတော့ ရှိတာပေါ့။ Hand gel မဝယ်နိုင်၊ Mask မဝယ်နိုင်တဲ့သူတွေ၊ တစ်နေ့လုပ်မှ တစ်နေ့စားရသူတွေ စသဖြင့် ရှိပါတယ်။ သူတို့ကို ခဏချန်ထားလိုက်ရင် ကျန်တဲ့သူတွေကတော့ သူတို့ဟာသူတို့ သိသည်ဖြစ်စေ၊ မသိသည်ဖြစ်စေ၊ ဘယ်လိုခံယူချက်ထားသည်ဖြစ်စေ စည်းကမ်းတွေကို တိတိကျကျ လိုက်နာစေဖို့ လိုပါလိမ့်မယ်။
အဲဒီနေရာမှာ လိုအပ်လာတာကတော့ ပြတ်သားတဲ့ ခေါင်းဆောင်မှုပါပဲ။ အိမ်ပြင်မထွက်ဖို့၊ လူစုလူဝေး မလုပ်ဖို့ မေတ္တာရပ်ခံနေရုံနဲ့တော့ မရဘူး။ စည်းကမ်းထုတ်မှ၊ လိုအပ်တဲ့ အရေးယူမှုတွေ လုပ်မှ ရမယ်။
ရွာတွေမှာ ရွာအဝင်ပိတ်တာတွေ၊ မြို့တစ်မြို့မှာ ဈေးသည်တွေ တစ်ဆိုင်နဲ့တစ်ဆိုင် ၆ ပေခွာပြီးမှ ရောင်းနေတာတွေ တွေ့ရတယ်။ သိပ်ဝမ်းသာစရာ ကောင်းတယ်။ စဉ်းစားကြည့်၊ အဲဒါ ဘာကြောင့်လဲ။ ခေါင်းဆောင်မှုကြောင့်ပါ။
ရန်ကုန်က ဈေးသည်တစ်ယောက် အဲ့လိုတွေ ၆ ပေခွာ ရောင်းချင်တယ်၊ ရမလားဆို မရပါဘူး။ တစ်ဈေးလုံးကမှ မပူးပေါင်းဘဲနဲ့ ဘယ်လိုသွားလုပ်မလဲ။ တစ်ဈေးလုံး ပူးပေါင်းဖို့ကတော့ ခေါင်းဆောင်က တိတိကျကျ ပြတ်ပြတ်သားသား စည်းကမ်းချပေးမှ ရပါမယ်။ ဆန်တွေ၊ ဆီတွေ ဝေတယ်။ ဒီအတိုင်း ဝေကြည့်။ ကြိတ်ကြိတ်တိုး စီရမှာပဲ။ Covid အရေးထက် ဝမ်းရေးခက်နေတာကိုး။ ကျွန်တော်ကိုယ်တိုင်ဆိုလည်း အဲ့လိုပဲ ဝင်စီရမှာပဲ။ အဲ့လိုလူစုလူဝေး မဖြစ်ချင်ဘူးဆိုရင်တော့ စပြီး ဝေမယ်ဆိုကတည်းက စနစ်တကျ စီစဉ်ဖို့ လိုမယ်။
ခုဆို အရင်ကထက် စစ်ဆေးမှုတွေ ပိုလုပ်လာပြီ။ ပိုပိုပြီးလည်း တွေ့လာရလိမ့်မယ်။ ဒါ မျှော်လင့်ထားရမဲ့ ကိစ္စပဲ။ ကျွန်တော်တို့ လုပ်နိုင်တာကတော့ ပျံ့နှံ့မှုကို လျှော့ချဖို့။ ဒါမှ ကျန်းမာရေးဝန်ထမ်းတွေအပေါ်မှာ ဝန်ထုပ်ဝန်ပိုး မဖြစ်မှာ။ ဒီပြဿနာကြီးကို မြန်မြန်ဆန်ဆန် အဆုံးသတ်နိုင်မှာ။
ဒီအတွက် အသိပညာ ရှိဖို့၊ ခံယူချက်တွေ မှန်ဖို့နဲ့ လက်တွေ့ လုပ်ဆောင်ဖို့ဆိုတဲ့ ၃ ဆင့် လိုအပ်ပါလိမ့်မယ်။ တစ်ဦးချင်းစီကလည်း လိုက်နာဖို့၊ တာဝန်သိဖို့ လိုသလို၊ လက်တွေ့လိုက်နာမှုတွေ ပိုအားကောင်းလာစေချင်တယ် ဆိုရင်တော့ ခေါင်းဆောင်မှုကောင်းကောင်းလည်း လိုအပ်ပါလိမ့်မယ်။
ဒေါက်တာ ဖြိုးသီဟ
၁၅.၄.၂၀၂၀
