31/10/2021
နှစ်စဉ် အောက်တိုဘာလ ၃၁ ရက်နေ့မှာ ကမ္ဘာတစ်ဝှမ်းမှာ ဟောလိုဝင်းပွဲတော်ကို ကျင်းပကြပါတယ်။
ကလေးတွေ costume ဝတ်စုံမျိုးစုံ ဝတ်ဆင်ပြီး တစ်အိမ်ဝင် တစ်အိမ်ထွက် ချောကလက်တွေ မုန့်တွေ တောင်းစားကြတဲ့ အရမ်းပျော်စရာကောင်းတဲ့ ဒီ Trick or Treat ယဉ်ကျေးမှုလေးက မြန်မာနိုင်ငံမှာတော့ မတွင်ကျယ်သေးပါဘူး။
ဒါပေမဲ့ ဟောလိုဝင်းလို့ ပြောလိုက်တာနဲ့ ပြုံးဖြဲဖြဲ မျက်နှာ ထွင်းထားတဲ့ ရွှေဖရုံသီးပုံကို အားလုံးပြေးမြင်မိကြမှာပါ။
ဒီ ရွှေဖရုံသီးသရဲ ကို Jack-o'-lantern လို့ ခေါ်ပြီးတော့ သူ့ဇာတ်လမ်းလေးက အိုင်ယာလန်နိုင်ငံကနေ အစပြုပါတယ်။
တစ်ခါတုန်းက အိုင်ယာလန်နိုင်ငံမှာ Jack လို့ခေါ်တဲ့ အရမ်းကပ်စီးနည်းတဲ့ လူလည်တစ်ယောက် ရှိပါတယ်။
တစ်ရက်မှာ သူက မကောင်းဆိုးဝါး devil ကြီးကို ဖိတ်ခေါ်ပြီး အရက်အတူတူသွားသောက်ကြတယ်တဲ့။ သောက်ပြီးသွားတော့ ပိုက်ဆံမရှင်းချင်လို့ဆိုပြီး devil ကို ပိုက်ဆံအကြွေပြား ပုံစံ ဟန်ဆောင်ခိုင်းလိုက်ပါတယ်။
အညာမိသွားတဲ့ devil တစ်ယောက် အကြွေစေ့ဖြစ်သွားတာနဲ့ Jack က သူ့ပိုက်ဆံအိပ်ထဲကို လက်ဝါးကပ်တိုင် cross လေးနဲ့အတူတူ ကောက်သိမ်းထားလိုက်ပြီး ဖမ်းထားလိုက်ပါလေရော။
ပြီးတော့ သူ့ကို တစ်နှစ်တိတိ မနှောက်ယှက်ပါဘူးဆိုတဲ့ ကတိကို ရမှ ပြန်လွှတ်ပေးလိုက်တယ်တဲ့။
တစ်နှစ်ပြည့်သွားတော့ အမှတ်မရှိတဲ့ devil ကို သူက နောက်တစ်ခေါက် ပန်းသီးပင် တက်မယ်ဆိုပြီး ခေါ်လိုက်ပြီး အပင်မှာ လက်ဝါးကပ်တိုင်ပုံစံထွင်းပြီး ပြန်ဆင်းလို့မရအောင် ဖမ်းထားလိုက်ပြန်ပါတယ်။
ဒီတစ်ခါတော့ နောက်ဆယ်နှစ်တိတိ သူ့ကို မနှောက်ယှက်ပါဘူး၊ ဒါ့အပြင် သူသေရင်လည်း သူ့ဝိညာဉ်ကို မယူပါဘူးဆိုတဲ့ ကတိကိုရမှ ပြန်လွှတ်ပေးလိုက်တယ်တဲ့။
နောက်ဆုံး Jack သေသွားတဲ့အခါမှာ ဒီကတိကြောင့် သူ ငရဲပြည်လည်းမသွားရ၊ ကောင်းကင်ဘုံကလည်း လက်မခံနဲ့ ဟိုမရောက် ဒီမရောက် မကျွတ်မလွတ် ဘဝမှာ လူ့ပြည်ကို လျှောက်သွားနေရတဲ့ ကျိန်စာသင့်သွားပါတယ်တဲ့။
ညဘက် မှောင်ပြီဆိုရင် မုန်လာဥကြီးကို ထွင်းထားပြီး ဖယောင်းတိုင် ထည့်ထွန်းထားတဲ့ မီးအိမ်လေးကို ကိုင်ပြီး လျှောက်သွားနေတဲ့ မီးအိမ်ကိုင် ဂျက် (Jack of the lantern) ကို ရံဖန်ရံခါ တွေ့နိုင်ပါတယ်ဆိုတဲ့ ပုံပြင်လေးပေါ်ပေါက်လာပါတော့တယ်။ အိုင်ယာလန်လူမျိုးတွေရဲ့ ထုံးစံအတိုင်း of ကို ပီပီသသ မထွက်တော့ သူ့နာမည်ကလည်း Jack-o'-lantern လို့ လူသိလာကြပါတယ်။
Jack ရဲ့ ဒီ ရိုးရာပုံပြင်လေးက အိုင်ယာလန်လူမျိုးတွေနဲ့အတူ အမေရိကန်ကို ပါလာတဲ့အခါ မုန်လာဥ အစား ဒေသထွက် ပိုပေါ ပိုလှတဲ့ ရွှေဖရုံသီးတွေ အစားထိုးလာပြီး အားလုံး သိကြတဲ့ ဟောလိုဝင်းရဲ့ မရှိမဖြစ် ရွှေဖရုံသီးသရဲ Jack-o'-lantern ရယ်လို့ ဖြစ်လာပါတော့တယ်။
အားလုံးပဲ အပူအပင်ကင်း၍ ငြိမ်းချမ်းသော ပျော်ရွှင်ဖွယ်ရာ ဟောလိုဝင်းပွဲတော် ဖြစ်ပါစေလို့ ဆုတောင်းပေးလိုက်ပါတယ်။
Areindama Education
