Scholarship Insider

Scholarship Insider Sharing experience and advice on study abroad, STEM research subjects, career advancement, and scholarship opportunities

စင်ကာပူမှာ NUS အပါအဝင် အခြား စင်ကာပူတက္ကသိုလ်တွေက မြန်မာကျောင်းသားတွေဦးဆောင်ပြီး အလှူခံတာ ၃ ပတ်အတွင်း စင်ကာပူဒေါ်လာ SGD$...
19/04/2025

စင်ကာပူမှာ NUS အပါအဝင် အခြား စင်ကာပူတက္ကသိုလ်တွေက မြန်မာကျောင်းသားတွေဦးဆောင်ပြီး အလှူခံတာ ၃ ပတ်အတွင်း စင်ကာပူဒေါ်လာ SGD$11,057 မန္တလေးပြည်သူ့ဆေးရုံကြီးမှတဆင့် ငလျင်ဒဏ်သင့် ပြည်သူတွေကို ထောက်ပံ့ပေးနိုင်ခဲ့ပါပြီ။
NUS ကလုပ်နေတဲ့ Fundraiser က လက်စသတ်လိုက်ပြီဖြစ်သော်လည်း လက်ရှိအချိန်မှာ SIM က မြန်မာကျောင်းသားတွေလုပ်နေတဲ့ Fundraiser ရှိပါသေးတယ်။ ဒီ page က follower တွေထဲက စင်ကာပူနိုင်ငံက မိတ်ဆွေများအနေနဲ့လည်း စေတနာရှိပါက ‌အောက်ပုံကနေ လှူဒါန်းနိုင်ကြောင်း သတင်းပေးလိုပါတယ်။
စင်ကာပူက မြန်မာကျောင်းသားတွေအနေနဲ့ ကျောင်းတဖက်၊ အချိန်ပိုင်းအလုပ်တဖက်နဲ့ အခက်အခဲကြားကနေ ငလျှင်ဒဏ်သင့်ပြည်သူတွေအတွက် တတ်နိုင်သလောက် ကြိုးစားကူညီနေကြတာကို မြင်ရတာ အထူးဝမ်းသာမိပါတယ်။ နောက်ပြီး ကျောင်းသားတွေရဲ့ စွမ်းဆောင်ရည်ကို ကျွန်တော်ကိုယ်တိုင် မျက်မြင်ကိုယ်တွေ့ဖြစ်တဲ့အတွက် ဦးဆောင်လှုပ်ရှားခဲ့တဲ့ စင်ကာပူက ကျောင်းသူကျောင်းသားများ နောက်နှစ် Graduate school လျှောက်တဲ့အခါမှာ extracurricular profile အတွက် သက်သေအထောက်အထားပြဖို့ (သို့) အချို့ scholarship များလျှောက်တဲ့အခါ 1) academic 2) Professional အပြင် တတိယမြောက် reference အဖြစ် extracurricular leadership အတွက် recommendation လိုအပ်လာပါက ကျွန်တော်က NUS staff တစ်ဦးအနေနဲ့ ကိုယ်တိုင်ရေးပေးနိုင်ကြောင်း ကျောင်းသား chat group ထဲသတင်းပေးခဲ့ပါတယ်။ ဒီ page ကနေလည်း အချိန်မရွေးဆက်သွယ်လို့ရပါတယ်။ ဒီလို NUS profile ကို သုံးပြီး ထောက်ခံပေးခြင်းအားဖြင့် အခုအချိန်မှာ ပြည်တွင်းက တကယ် ဘာမှ ထိထိရောက်ရောက်မလုပ်ဘဲ recommendation letter ကိုယ်တိုင်ရေး သူများလက်မှတ်ထိုးခိုင်းပြီး အတုလုပ်နေတဲ့ကျောင်းသားများနှင့် ယှဉ်ပြိုင်လျှောက်ရတဲ့အခါမျိုးမှာ အကဲဖြတ်သူ ကျောင်းတာဝန်ရှိသူများအနေနဲ့ တကယ်လုပ်တဲ့ ကျောင်းသားတွေအပေါ် သံသယတစ်စုံတစ်ရာမဖြစ်အောင်လို့ ရည်ရွယ်ချက်နဲ့ဖြစ်ပါတယ်..

Cambridge မှာ ဆုယူရင်း ငလျှင်ဒဏ်သင့် ဧရာဝတီလင်းပိုင်နှင့် အကျိုးတူပူးပေါင်းငါးဖမ်းသူရေလုပ်သားများနှင့် မန္ဒလေး၊ စစ်ကိုင်...
10/04/2025

Cambridge မှာ ဆုယူရင်း ငလျှင်ဒဏ်သင့် ဧရာဝတီလင်းပိုင်နှင့် အကျိုးတူပူးပေါင်းငါးဖမ်းသူရေလုပ်သားများနှင့် မန္ဒလေး၊ စစ်ကိုင်းတိုင်းရှိ ကျေးရွာများအတွက် အကူအညီတောင်းခံခဲ့ပါသည်.....
မြန်မာပြည်မှာ ငလျှင်ဒဏ်သင့်နေချိန်တွင် ကျွန်တော်သည် Research Conference တစ်ခုတွင် Presentation လုပ်ရန် UK သွားသည့် လေယာဉ်ပေါ်ရောက်နေပါသည်။ UK ရောက်တော့ weekend ဖြစ်ပြီး နောက်အပတ်ထဲမှာတော့ Conference တက်နေရတဲ့အတွက် ဘာမှထိထိရောက်ရောက်မလုပ်နိုင်ဘဲ ခြေချုပ်မိသလိုဖြစ်နေပါတယ်။
ကံကောင်းချင်တော့ ကျွန်တော့် research က Conference မှာ ဆုတခုရသွားပါတယ်။ Award winner အနေနဲ့ အခြား ပွဲတက်သူတွေနဲ့ Cambridge Conservation Initiative (CCI) က ခေါင်းဆောင်ပိုင်း လူကြီးတွေနဲ့ စကားအနည်းငယ်ပြောခွင့်ရတဲ့အတွက် စစ်ကိုင်းဘက်က လင်းပိုင်နဲ့ငါးဖမ်းတဲ့ ကျေးရွာဘက်က ငလျှင်ဒဏ်သင့်သူတွေကို အကူအညီပေးဖို့ တိုက်ရိုက်အကူအညီတောင်းခံခဲ့ပါတယ်။ Cambridge Conservation Initiative ဆိုသည်မှာ Cambridge တက္ကသိုလ်နှင့် ကမ္ဘာ့အကြီးဆုံး သဘာဝပတ်ဝန်းကျင် ထိန်းသိမ်းရေး INGO ၁၀ ခု - 1) United Nations Environment Programme – World Conservation Monitoring Centre, 2) BirdLife International, 3) British Trust for Ornithology 4) Cambridge Conservation Forum 5) Fauna and Flora 6) International Union for Conservation of Nature (IUCN) 7) Royal Society for the Protection of Birds (RSBP), 8. TRAFFIC, 9) Tropical Biology Association, 10) Wildlife Conservation Society - ပူးပေါင်းဖွဲ့စည်းထားသော မဟာမိတ်အဖွဲ့ဖြစ်ပါတယ်။ သဘာဝ ပတ်ဝန်းကျင် ထိန်းသိမ်းရေးအဖွဲ့များတွင် သဘာဝဘေးအန္တရာယ်တွင် emergency response အတွက် စီစဉ်ထားတာမျိုးရှိတတ်ပြီး Professional fundraising unit များလည်းရှိပါတယ်။ အထူးသဖြင့် ဒီအဖွဲ့တွေရဲ့ ခေါင်းဆောင်ပိုင်းဟာ ဘုရင်ချီးမြှင့်ထားတဲ့ ဆာဘွဲ့ရတဲ့သူတွေ၊ ကမ္ဘာကျော်ပုဂ္ဂိုလ်တွေ၊ အရှိန်အဝါရှိတဲ့သူတွေဖြစ်တာကြောင့် သေရေးရှင်ရေးအချိန်တွင် ၎င်းတို့၏ အကူအညီရလျှင် အချိန်တိုအတွင်း ခရီးများများတွင်နိုင်သည်။ ၎င်းတို့ထဲမှ အချို့ အဖွဲ့အစည်းများတွင် မြန်မာနိုင်ငံတွင်း မြေပြင်ပေါ်လုပ်ငန်းဆောင်ရွက်နေသည့် ဝန်ထမ်းများရှိပြီး UK အစိုးရမှလည်း မြန်မာနိုင်ငံကို ကနဦး ပေါင် ၁၀ သန်း ထောက်ပံ့ဖို့ ကြေငြာထားပါတယ်။
လူကယ်ဖို့ထက် လင်းပိုင်ကယ်ဖို့ တမင်ထည့်ပြောရသည့် အကြောင်းအရင်းမှာ_
၁။ CCI အဖွဲ့အစည်းများသည် သဘာဝပတ်ဝန်းကျင် ထိန်းသိမ်းရေးအတွက် ဖြစ်ပြီး ကြက်ခြေနီ အသင်းကဲ့သို့ ဒုက္ခသည်ကယ်ဆယ်ရေး အဖွဲ့အစည်းများမဟုတ်ပါ။ NGO လောကတွင်လည်း အချင်းချင်း ထိန်းကွပ်ထားသည့် စည်းမျဉ်းများရှိပြီး ကိုယ်နဲ့ တိုက်ရိုက်မဆိုင်သည့် ကဏ္ဏတွင် ဘောင်ကျော်ဆောင်ရွက်ခွင့်မရှိသောကြောင့် သဘာဝပတ်ဝန်းကျင်ထိန်းသိမ်းရေးနှင့် တိုက်ရိုက်သက်ဆိုင်သည့် လင်းပိုင်ကယ်ဆယ်ရေးနှင့် ချိတ်ဆက်ပေးမှသာလျှင် လမ်းစ အကြောင်းပြချက်ရသွားမှာ ဖြစ်ပါတယ်။
၂။ နောက်တခုရှိတာကလည်း အနောက်တိုင်းသား အများစုသည် ကမ္ဘာမှာ မြန်မာ ဆိုသည့်နိုင်ငံ ရှိမှန်းတောင်မသိကြပါ။ ကြားဖူးပါကလည်း မြန်မာနိုင်ငံသည် နိုင်ငံတကာ အသိုင်းအဝိုင်းတွင် ရိုဟစ်ဂျာအရေး၊ မူးယစ်ဆေးဝါး၊ scam center ၊ cyberbullying၊ ပြည်တွင်းစစ်ဖြစ်၊ တရားမဝင် ခိုးဝင်နေထိုင် စသည်ဖြင့် နာမည်ပျက်နေသော တိုင်းပြည်ဖြစ်သဖြင့် သဘာဝပတ်ဝန်းကျင်ထိန်းသိမ်းရေးတွင် INGO တွေနဲ့ လက်တွဲ အလုပ်လုပ်ခဲ့၊ fundraising လုပ်ခဲ့တဲ့ ကျွန်တော့်အတွေ့အကြုံအရ နိုင်ငံတကာ အသိုင်းအဝိုင်းမှာ မြန်မာလို့ပြောလိုက်ရင် နိုင်ငံခြားသားတချို့လူများ ကူဖို့ လက်တွန့်သွားလေ့ရှိကြတယ်။ လင်းပိုင်ကျတော့ လူအများစု ချစ်မြတ်နိုးသည့် သတ္တဝါဖြစ်သဖြင့် ခေါင်းစဉ်တပ်လိုက်ပါက အကူအညီရနိုင်ချေရှိပါတယ်။ လိုရင်းကတော့ အခုအချိန်မှာ တော၊ မြို့၊ လူ၊ သတ္တဝါ မခွဲခြားဘဲ အကူအညီရဖို့က အဓိကပါ။
မည်သို့ပင်ဖြစ်စေ၊ ကူခြင်းမကူခြင်းက ၎င်းတို့၏ အဆုံးအဖြတ်ဖြစ်ပြီး သေရေးရှင်ရေးမှာ ရနိုင်တဲ့ နေရာမှန်သမျှမှာ အကူအညီတောင်းရမှာက ကိုယ့်တာဝန်ဖြစ်သည်။ ကံကောင်းထောက်မစွာဖြင့် အချိန်ကိုက် နိုင်ငံတကာ အသိုင်းအဝိုင်းမှာ လူရှေ့ထွက်စကားပြောခွင့် ကြုံလာတာကြောင့် ကိုယ့်နည်းကိုယ့်ဟန် ကိုယ်ပိုင်အဆက်အသွယ်ဖြင့် ကိုယ်ကျင်လည်ရာ နယ်ပယ်ကနေ လမ်းကြောင်းသစ်ရှာ ကျရာနေရာမှ အုတ်တစ်ချပ်၊ သဲတစ်ပွင့် ပါဝင်ကူညီခွင့်ရသည်ကိုဘဲ ကျေနပ်မိပါသည်။
Cambridge တက္ကသိုလ်ကနေ Fundraising လုပ်နေတဲ့ တခြား initiative တခုလည်းရှိပါတယ်။ Judge Business School မှာ ASEAN student society တွေနဲ့ ပေါင်းပြီး Cambridge community ကနေ အလှူခံ၊ World Food Programme နဲ့ ချိတ်ပြီး လှူနေတာ ၂ ပတ်အတွင်း ပေါင် ၄၀၀၀ ကျော် အလှူငွေရသွားပါပြီ။ UK က မိတ်ဆွေများ လှူဒါန်းလိုပါက အောက်က link ကနေ သွားလှူနိုင်ပါတယ်။
https://cambridge-asean-myanmar-thailand-earthquake-relief-fund.raiselysite.com/?fbclid=IwY2xjawJkxvdleHRuA2FlbQIxMAABHhBpTUV8R-byhlq8TqsOsLz_XiF7fpO37relfWf2eqdZjHxkkh9aM4UfoPjk_aem___jAB987AGwMSbzskr_TPg
ပြည်တွင်းမှာတော့ မိသားစု၊ ဆွေမျိုး၊ အသိုင်းအဝိုင်းနဲ့ ရပ်နီးရပ်ဝေးကမိတ်ဆွေတွေ ကိုယ်ထူကိုယ်ထ လှူကြတာ ၂ ပတ်အတွင်း သိန်း ၁၀၀၀ ကျော်ရသွားပါပြီ။
စာဖတ်သူအားလုံးလည်း နည်းများမဟူ၊ နီးစပ်ရာကနေ လှူဒါန်းနိုင်ကြပါစေ။ ဒုက္ခရောက်နေသူအပေါင်းလည်း အမြန်ဆုံး အကူအညီရဖို့ ဆုတောင်းပေးပါတယ်။ အခုရက်ပိုင်းအတွင်း ကျွန်တော်ပြု ခဲ့သမျှကုသိုလ်အားလုံးကို ငလျှင်ဒဏ်သင့် ဆုံးပါးသွားသူအပေါင်းကို အမျှဝေပါတယ်။ အားလုံးဘဲ ရောက်ရာဘုံဘဝမှ အမျှရ၍ ကောင်းရာသုဂတိလားကြပါစေ။

ကနဦး အလှူအဖြစ်အရင်အပတ် NUS မှ M.Sc. ကျောင်းသားများကို ၁ နာရီ lecture စာသင်ရာမှ ဉာဏ်ပူဇော်ခ ရရှိပါသော SGD $250 - မြန်မာငွ...
31/03/2025

ကနဦး အလှူအဖြစ်အရင်အပတ် NUS မှ M.Sc. ကျောင်းသားများကို ၁ နာရီ lecture စာသင်ရာမှ ဉာဏ်ပူဇော်ခ ရရှိပါသော SGD $250 - မြန်မာငွေကျပ် ၁၀ သိန်းကို ငလျှင်ဒဏ်သင့် ပြည်သူများအတွက် ကယ်ဆယ်ရေး ကိရိယာပစ္စည်းများ လှူဒါန်းလိုက်ပါသည်။

အခြား စဉ်းစားထားသည့် initiative များ၊ အစီအစဉ်များလည်း ရှိနေပြီး ယနေ့ တနင်္လာနေ့ ရုံးပြည်ဖွင့်ပြီမို့ fundraising လုပ်ရန် နိုင်ငံခြားသား အဆက်အသွယ်များအနက်မှ တွေ့သင့်သူနှင့်တွေ့ ၊ ဆွေးနွေးသင့်သူနှင့် ဆွေးနွေးနေပါသည်။ ယခု အချိန်သည် ရွှေထက်တန်ဖိုးရှိသည့်အတွက် မြန်မြန်ဆန်ဆန်နှင့် ထိထိရောက်ရောက်ဆောင်ရွက်နိုင်ရန် ကြိုးစားသွားပါဦးမည်...

We stand with earthquake victims from Myanmar.အခုလို သဘာဝဘေးဆိုး ကျရောက်ချိန်တွင် ကျွန်တော်လည်းဘဲ ငလျင်ဒဏ်သင့် ပြည်သူမျာ...
31/03/2025

We stand with earthquake victims from Myanmar.
အခုလို သဘာဝဘေးဆိုး ကျရောက်ချိန်တွင် ကျွန်တော်လည်းဘဲ ငလျင်ဒဏ်သင့် ပြည်သူများနှင့် အတူရှိနေမည်ဖြစ်ကြောင်း အသိပေးအပ်ပါသည်။ ကျွန်တော်ဘဝတွင် သဘာဝဘေးအန္တရာယ်ဆို၍ ဆယ်ကျော်သက်အရွယ်တွင် နာဂစ်မုန်တိုင်းကို နဖူးတွေ့ ဒူးတွေ့ကြုံခဲ့ရသည်။ ဖခင်ဖြစ်သူကိုယ်တိုင်က အရေးပေါ် ဘေးအန္တရာယ် စီမံခန့်ခွဲမှု ကျွမ်းကျင်သူဖြစ်သောကြောင့် ကျွန်တော်ကိုယ်တိုင်လည်း ဆယ်ကျော်သက်အရွယ်ထဲကပင် သဘာဝဘေးအန္တရာယ်ကယ်ဆယ်ရေး လုပ်ငန်းများနှင့် အကျွမ်းဝင်ခဲ့သည်။ ၂၀၁၇-၁၈ ခုနှစ်က မြန်မာနိုင်ငံအလယ်ပိုင်းရေဘေး အန္တရာယ်သင့်ချိန်တွင်လည်းကောင်း၊ ၂၀၂၀ ကိုဗစ်ကာလအတွင်း ဧရာဝတီလင်းပိုင်များ အသတ်ခံနေရချိန်တွင်လည်းကောင်း၊ ကိုယ်ပိုင်ငွေကြေး သိန်းပေါင်းများစွာ အိတ်စိုက်ထုတ်၍ ပရဟိတလုပ်ငန်းများတွင် လူကိုယ်တိုင် ပါဝင်ခဲ့သည်။ ကျွန်တော်သည် ယနေ့အချိန်တွင် မြန်မာနိုင်ငံကို စွန့်ခွာခဲ့ပြီ ဖြစ်သော်ငြား ယခုလိုသေရေးရှင်ရေး အချိန်တွင် လွန်ခဲ့သော ၃-၄ နှစ်အတွင်း ကျွန်တော်မနေမနား တည်ဆောက်ခဲ့သော သဘာဝပတ်ဝန်းကျင်ထိန်းသိမ်းရေးနယ်ပယ်နှင့် ပညာရေးနယ်ပယ်များမှ နိုင်ငံခြားမိတ်ဆွေများနှင့် အဆက်အသွယ်များကို သုံး၍ ငလျင်ဘေးသင့် ပြည်သူများ ကယ်ဆယ်ရေးကို တတ်နိုင်သမျှ ဆောင်ရွက်သွားမည်။
ဤ page ကို နိုင်ငံခြားပညာရေး အတွက် ရည်ရွယ်၍ တည်ထောင်ထားသော်လည်း လက်ရှိအရေးပေါ်အခြေအနေအရ ပညာရေးလုပ်ငန်းများကို ဧပြီလကုန်အထိ တစ်လတိတိ ခေတ္တရပ်နား၍ ကယ်ဆယ်ရေး လုပ်ငန်းများအတွက်သာ အဓိကအသုံးပြုသွားမည်ဖြစ်ကြောင်း အကြောင်းကြားအပ်ပါသည်။ တလက်စထဲ ကျောင်းသားမိဘများနှင့် လူငယ်များ extracurricular profile တခုတည်ဆောက်နိုင်စေရန် ပရဟိတလုပ်ဆောင်နည်းများကို တတ်နိုင်သလောက် လမ်းပြသွားပါမည်။

📢Lecture alert! Inviting NUS Myanmar students and alumniနောက်အပတ်မှာ ကျောင်းက Master ကျောင်းသားတွေကို lecture လေးတခု ဟော...
20/03/2025

📢Lecture alert! Inviting NUS Myanmar students and alumni
နောက်အပတ်မှာ ကျောင်းက Master ကျောင်းသားတွေကို lecture လေးတခု ဟောပြောပေးဖို့ ရှိပါတယ်။ ဟောပြောမယ့်အကြောင်းအရာကတော့ UN Convention for Biological Diversity အကြောင်းနဲ့ အလားတူ ကုလသမ္မဂမှာ သဘာဝပတ်ဝန်းကျင်ဆိုင်ရာ နိုင်ငံတကာ အစည်းအဝေးပွဲတွေမှာ နိုင်ငံပေါင်းစုံက နည်းဗျူဟာ ပေါင်းစုံနဲ့ ဘယ်လိုဆွေးနွေးပြီး သဘောတူညီမှုယူကြတယ်၊ ဒီလိုသဘောတူညီမှုအရ စင်ကာပူနိုင်ငံက သူ့ရဲ့ National Biodiversity Strategy and Action Plan (NBSAP) ကို ဘယ်လိုချမှတ်ထားတယ်၊ လက်တွေ့ထိရောက်မှုရှိအောင် Master ကျောင်းသားတွေကိုယ်တိုင် မြေပြင်ပေါ်မှာ ဘာတွေလုပ်နိုင်တယ်ဆိုတာ ကျွန်တော် အရင်လုပ်ဖူးတဲ့ သုသေသနတခုနဲ့ ဆက်စပ်ပြီး ပြောပြသွားမှာဖြစ်ပါတယ်။ Closed-door event ဆိုပေမယ့် Master program director က ကျွန်တော့် အသိကျောင်းသားတွေနဲ့ alumni တွေ စိတ်ဝင်စားရင်လာတက်ခွင့်ပေးပါတယ်။ ဒါကြောင့် NUS ကမြန်မာကျောင်းသားများနဲ့ ကျောင်းသားဟောင်းများ ဒီဘာသာရပ်အကြောင်းကို စိတ်ဝင်စားရင် လူကိုယ်တိုင် in-person လာတက်လို့ရပါတယ်။ အပြင်လူဆိုရင်လည်း နေရာလွတ်ကျန်သေးရင် လာတက်လို့ရပါတယ်။
Professor တွေလည်း လာမှာမို့ Master, PhD program တွေနဲ့ research တွေ အကြောင်းလည်း သိချင်တာ လူကိုယ်တိုင်လာပြီး မျက်နှာချင်းဆိုင်မေးလို့ရပါတယ်။ လာတက်ချင်သူများ ကျွန်တော့်ကို ကျောင်း directory မှာ ရှာပြီး စာရေးဆက်သွယ်လိုက်ပါ....

အားလုံးဘဲ မင်္ဂလာပါ…အလုပ်ကိစ္စတွေကြောင့် ဒီ page မှာ ပို့စ်မတင်တာ ၁ နှစ်ကျော်ကြာသွားပါပြီ။ ကျွန်တော်ကတော့ Cambridge ကနေ ...
19/03/2025

အားလုံးဘဲ မင်္ဂလာပါ…
အလုပ်ကိစ္စတွေကြောင့် ဒီ page မှာ ပို့စ်မတင်တာ ၁ နှစ်ကျော်ကြာသွားပါပြီ။ ကျွန်တော်ကတော့ Cambridge ကနေ ဘွဲ့ရပြီးနောက် Cambridge Conservation Leadership Alumni Network မှာ Council Representative တစ်ဦးအနေနဲ့ တာဝန်ယူထားပါတယ်။ အခုဆိုရင်တော့ မြန်မာနိုင်ငံကို အပြီးစွန့်ခွာပြီး အရင်နေထိုင်ခဲ့တဲ့ စင်ကာပူမှာဘဲ အပြီးအခြေချလိုက်ပါပြီ။
လက်ရှိမှာတော့ ကျွန်တော့်ရဲ့ First Master Degree ကို ယူခဲ့တဲ့ National University of Singapore (QS World Ranking - #8; THE World Ranking - #17) မှာဘဲ researcher/lecturer အဖြစ် သုသေသနလုပ်ရင်း စာပြန်သင်နေပါပြီ။ ကျောင်းမှာ academic staff တစ်ဦးအဖြစ် admission/scholarship တွေကို decision ချတဲ့ professor တွေ fellow တွေနဲ့ တစ်ရုံးထဲထိုင် တာဝန်ထမ်းဆောင်ရင်းနားလည်လာတာက … အရင်က ကျောင်းသားအနေနဲ့ ကျွန်တော်သိထားခဲ့တာတွေက တော်တော်များများက တကယ် အမှန်မဟုတ်ပါဘူး။ သာမန်ကျောင်းသားတစ်ယောက်သိတယ်ဆိုတာ တစ်ကြိမ်တစ်ခါကျောင်းတက်ဖူး၊ ပညာသင်ဆုတစ်ကြိမ်ရဖူးတဲ့ ကိုယ်ပိုင်အမြင်၊ experience လောက်သာဖြစ်ပြီး ကျောင်းသားတစ်ယောက်အနေနဲ့ သိခွင့်မရှိလို့ ပေးမသိတာတွေ အများကြီးရှိပါသေးတယ်။
ဥပမာပေးရရင် အခု NUS မှာ Scholarship ရပြီး ကျောင်းတက်နေတဲ့ မြန်မာကျောင်းသား တော်တော်များများရှိပါတယ်။ NUS မှာ တစ်နှစ်ကို သိန်း ၂ ထောင်ကျော်တဲ့ merit-based scholarship တစ်ခုအတွက် interview ဆန်ခါတင်အရွေးခံရဖို့ undergraduate ဆိုရင် SAT၊ post-graduate ဆိုရင် GRE/GMAT အနိမ့်ဆုံး cut-off အမှတ်ဘယ်လောက်ရဖို့လိုလဲ သူတို့သိခွင့်မရှိလို့ လုံးဝမသိပါဘူး။ ရဖူးတဲ့သူကတော့ သူတစ်ယောက်ထဲ အမှတ်ဘယ်လောက်ရခဲ့တယ်ဆိုတာဘဲ ကိုယ်ပိုင်အတွေ့အကြုံပြောလို့ရချင်ရမယ်၊ အသိအတန်းဖော် ၃-၄ ယောက်ရဲ့အမှတ်သိချင်သိမယ်။ ဒီအမှတ်ရရင် ဒီကျောင်းကျိန်းသေပေါက်ရမယ် ဆိုတာမျိုးက ခန့်မှန်းပြောနေတာချည်းပါဘဲ။ ကျောင်းဘက်ကတော့ စာမေးပွဲရမှတ်အပြင် Extracurricular profile, personal statement အရေးအသားတွေ လာလျှောက်တဲ့ applicant တွေ အားလုံးကို ခြုံငုံအကဲဖြတ်တဲ့ စည်းမျဉ်းတွေ၊ ရှုထောင့်စုံက 360 degree ခြုံငုံစဉ်းစားပုံတွေ၊ အလှူရှင်/အဖွဲ့အစည်းနဲ့ ကျောင်းသားအကြား ကိုက်ညီမှုရှိမရှိ၊ အခြားနောက်ကွယ်က politics တွေဖြစ်တဲ့ diversity, equity, inclusion quota တွေ စသဖြင့် အဘက်ဘက်က ထည့်သွင်းစဉ်းစားရတာတွေ အများကြီးရှိပါသေးတယ်။
နိုင်ငံခြားပညာရေးနဲ့ ပတ်သက်လို့ information တွေသာများပြီး သတင်းမှန်ရှားပါးနေတဲ့ ခေတ်မှာ ဒီ page ကို စထောင်စဉ်က ၂၀၂၂ ခုနှစ်က ကျွန်တော့်အနေနဲ့ နိုင်ငံ ၃ နိုင်ငံမှာ ဘွဲ့ ၄ ခု Scholarship ၅ ခုအထိ ယှဉ်ပြိုင်ရယူခဲ့တဲ့ ကျွန်တော့်ရဲ့ ပြိုင်ပွဲဝင်အတွေ့အကြုံတွေက အဲဒီခေတ်၊ အဲဒီအချိန်က မရဖူး၊ မတက်ဖူးဘဲ internet ကနေစာဖတ်ပြီး ပြောနေတဲ့သူတွေထက် ပိုအတွင်းကျကျသိထားတာမို့ ဒီ page ကို Scholarship Insider လို့ နာမည်ပေးခဲ့တယ်။ အခု ၂၀၂၅ ခုနှစ်မှာတော့ Scholarship ရသူတွေအများကြီး ကိုယ်စီ blog ထောင်ပြီး ပို့စ်တင်နေလို့ နိုင်ငံခြားမှာ ကျောင်းတက်တဲ့အတွေ့အကြုံ scholarship လျှောက်နည်းဆိုတာ ပရဆေးအညွန်းလို တစ်ယောက်တစ်မျိုး share နေလို့ information မရှားတော့ပါဘူး။ ကျောင်းသားတွေရဲ့ ကိုယ်ပိုင်အထင်အမြင်တွေသာများနေသလောက် ကမ္ဘာ့ အဆင့် top 10 ဝင်တဲ့ တက္ကသိုလ်တွေမှာ academic staff အဖြစ် ပြန်ခန့်ခံရသူ ရှားနေတာကြောင့် ပညာသင်ဆုလာပြိုင်လျှောက်သူတွေကို တက္ကသိုလ်ကျောင်းတွေဘက်က ဘယ်လိုအကဲဖြတ်သလဲ ဆိုတာ တိတိကျကျရှင်းပြနိုင်သူ မရှိသေးပါ။
ဒါကြောင့်မို့ ဒီ page ကို ယနေ့ကစပြီး Scholarship Insider 2.0 အဖြစ် upgrade မြှင့်လိုက်ပါပြီ။ Scholarship Insider 1.0 မှာ share ခဲ့တာတွေက ကျွန်တော့်ရဲ့ ကျောင်းသားအဆင့် ကြားဖူးနားဝ အတွေ့အကြုံသက်သက်သာဖြစ်ပြီး Scholarship Insider 2.0 ကတော့ ကျောင်းသားတွေ မသိတဲ့ ဆရာအတွေ့အကြုံ တွေဖြစ်ပါတယ်။ ရည်ရွယ်ချက်ကတော့ တတ်ယောင်ကားလျှောက်ပြောနေသူတွေ page တွေလိုက်ဖတ်ပြီး အချိန်ကုန်၊ ငွေကုန် ဘယ်မှခရီးမရောက်နိုင်ဖြစ်နေသူတွေ၊ ကျောင်းသားမိဘတွေကို တတ်နိုင်သလောက် ကူညီကယ်တင်ဖို့ပါ။ ဒါကြောင့် နောက်ပိုင်းအားလပ်ချိန်တွေမှာ ကျောင်းသားတွေ သိသင့်သိထိုက်တာတွေ ကောင်းနိုးရာရာစုပြီး တင်ဆက်ပေးသွားပါမယ်။

edit: မြန်မာနိုင်ငံမှာ ငလျှင်ဘေးသင့်ချိန် အရေးပေါ် အကူအညီလိုနေလို့ ပညာရေးလုပ်ငန်းတွေ ခဏရပ်နားပြီး ကိုယ်တည်ဆောက်ထားတဲ့ အဆက်အသွယ်တွေသုံးပြီး ပရဟိတ ၁ လ ကြာ ဝင်လုပ်ပါဦးမယ်။

👏 🎊 Congratulations!!🎓ကျွန်ုပ်တို့၏ Founder ဖြစ်သူ ဦးငြိမ်းဇော်ကိုသည် UK နိုင်ငံ University of Cambridge တွင် Selwyn Co...
24/10/2023

👏 🎊 Congratulations!!
🎓ကျွန်ုပ်တို့၏ Founder ဖြစ်သူ ဦးငြိမ်းဇော်ကိုသည် UK နိုင်ငံ University of Cambridge တွင် Selwyn College မှ ချီးမြှင့်သော Silverstrand Scholarship (Full Scholarship) ဖြင့် တက်ရောက်ပြီး Master of Philosophy ဘွဲ့ကို October 20, 2023 နေ့တွင် ရယူပြီးဖြစ်ပါကြောင်း ...

Chevening Tip 5️⃣: School Selection Matters!Chevening, Fulbright, Australian Award တို့ရဲ့ အားနည်းချက်တခုက လျှောက်လို့ရတ...
24/10/2023

Chevening Tip 5️⃣: School Selection Matters!
Chevening, Fulbright, Australian Award တို့ရဲ့ အားနည်းချက်တခုက လျှောက်လို့ရတဲ့ ကျောင်းအရေအတွက်ကို သတ်မှတ်ထားပါတယ်။ Chevening ဆိုရင် တက္ကသိုလ် ၃ ကျောင်းကိုသာ ရွေးခွင့်ရှိပြီး အဲဒီ ၃ ကျောင်းထဲက တစ်ကျောင်းကျောင်းက ဝင်ခွင့်မရရင် essay, interview တွေမှာ performance ဘယ်လောက်ကောင်းကောင်း တန်းပယ်ခံရပါတယ်။ အဲဒီအချက်ကို လျှောက်သူအများစုကနားမလည်တဲ့အတွက် essay ရေးဖို့လောက်သာ အာရုံစိုက်နေပြီး ကျောင်းရွေးတဲ့ နည်းဗျူဟာကိုတော့ လေ့လာမထားကြဘူး။ ဒီနေရာမှာ ကျောင်းသားအများစု တော်တော်လေးအားနည်းကြတာကို သတိထားမိတယ်။

❓ဘာကြောင့်ကျောင်းရွေးချယ်တဲ့ strategy က အရေးကြီးသလဲ?
Scholarship ဆိုတာ တက်စရာကျောင်းမရှိဘဲ ရရိုးထုံးစံမရှိဘူး။ အထက်ကဆိုခဲ့သလို essay, interview တွေမှာ performance ဘယ်လောက်ကောင်းကောင်း ရွေးထားတဲ့ကျောင်းကနေ ဝင်ခွင့်မရရင် တန်းပယ်ခံရတာဖြစ်လို့ ကျောင်းရွေးတတ်ဖို့ဆိုတာက essay, interview တွေက အခြေခံပိုကျပြီး အရေးအကြီးဆုံး skill ဖြစ်တယ်။

❓ဒါဆို ကျောင်းလျှောက်တဲ့အကြောင်း ဘာလို့ အကျယ်တဝင့်ပြောတဲ့သူမရှိတာလဲ?
Scholarship လျှောက်တဲ့အတွေ့အကြုံမရှိတဲ့ beginner တွေနဲ့၊ တစ်ကြိမ် တစ်ခါလောက်သာရဖူးတဲ့ alumni တွေအနေနဲ့ ကျောင်းအရင်ရပြီးမှ ပညာသင်ဆုရမှာဆိုတာကို သတိမထားမိကြတဲ့အတွက် နွားရှေ့ထွန်ကျူးပြီး essay ရေးနည်းတွေ၊ recommendation ဘယ်လိုတောင်း၊ application form ဘယ်လိုဖြည့်ရမလဲဆိုတာကိုသာ ပြောနေကြတယ်။ ဘယ်လောက်တောင်မေ့နေကြသလဲဆိုရင် လျှောက်မယ့်ကျောင်းသားမဆိုထားနဲ့၊ အခြား Chevening အကြောင်း‌ နာမည်ကြီးဆရာတွေ၊ အရင်နှစ်က alumni တွေက အခမဲ့ပေးနေတဲ့ webinar တွေမှာ (British Council ကလုပ်တဲ့ဟာ အပါအဝင်) ကျောင်းရွေးတဲ့ strategy အကြောင်းကို အသားပေးဆွေးနွေးထားတာမျိုးမရှိဘူး။ ကြိုက်တဲ့ကျောင်းလျှောက်လို့ ပြောတဲ့သူကပြော၊ ရနိုင်တာရွေးလျှောက်လို့ ပြောသူကပြော အပေါ်ယံလောက်ဘဲ ရှပ်ပြောသွားတာ သတိထားမိတယ်။

❓အဲဒီ အခြေခံအကျဆုံး School Selection Strategy ဆိုတာဘာလဲ?
ကြိုက်တဲ့ထဲက အကောင်းဆုံးတွေ ရွေးလျှောက်ရမှာလား၊ ကျိန်းသေပေါက်ရနိုင်မယ့် Russell group ထဲက ဘိတ်ချီးကျောင်းတွေရွေးလျှောက်ရမှာလား၊ ကြိုက်တဲ့ကျောင်းအများကြီးထဲကရနိုင်တာ ၃ ခုကိုလျှောက်ရမှာလား၊ ရနိုင်တဲ့ကျောင်းအများကြီးထဲက ကြိုက်တာ ၃ ခုရွေးလျှောက်ရမှာလား?
ဒီနေရာမှာ “ကြိုက်တာ” နဲ့ “ရနိုင်တာ” ဆိုတဲ့ အရေးကြီးတဲ့ ဝေါဟာရ ၂ ခုထွက်လာတယ်။ ကျောင်းတခုကို ကြိုက်တယ်ဆိုရင် ဘာလို့ကြိုက်နေတာလဲ ---- သွားလည်ဖူးလို့လား၊ အသိရှိလား၊ ဆရာတွေနဲ့ ဆက်ဆံဖူးလား၊ ကျောင်း website က ကြော်ငြာကြည့်ကြိုက်နေပြီး အပြင်မှာကျတော့ ထင်ထားတာနဲ့ တလွဲဖြစ်နေတာတွေအများကြီးနော် (ထိုင်းမှာ သွားတက်တဲ့သူတွေကို မေးကြည့်လိုက်)။ ကြိုက်တဲ့အကြောင်းအရင်းခိုင်ခိုင်လုံလုံမရှိဘဲ ကြော်ငြာထားတာကြိုက်လို့ လာလျှောက်တဲ့သူကို ဘယ်ကျောင်းကမှ ဝင်ခွင့်မပေးပါ (ကိုယ်ပိုင်ငွေ နဲ့ ကျောင်းလခ အကုန်စိုက်ပေးပြီးတက်မယ်ဆိုရင်တော့ တစ်မျိုးပေါ့၊ Chevening လျှောက်သူအကုန်လုံးကတော့ ကိုယ်ပိုင်ငွေနဲ့ ပေးတက်နိုင်သူမဟုတ်မှန်း ကျောင်းဘက်က သိပြီးသားမို့ အလွယ်တကူ ဝင်ခွင့်မပေးပါ)
ရနိုင်တာဆိုတာနဲ့ ပတ်သတ်ပြီး ပြောရမယ်ဆိုရင် ရနိုင်မရနိုင် ကိုယ့်ဟာကိုယ်ဘယ်လိုသိလဲ? နိုင်ငံခြား တက္ကသိုလ်ဆိုတာ မြန်မာအစိုးရတက္ကသိုလ်တွေလို စာမေးပွဲ အမှတ်တခုထဲကြည့်ပြီး ကျောင်းဝင်ခွင့်ပေးတာမျိုးမှမဟုတ်တာ၊ ဒီတော့ရနိုင်မရနိုင် ဘယ်လိုကြိုသိနိုင်မလဲ၊ သူများရတိုင်း ကိုယ်လျှောက်တဲ့အခါ ရပါ့မလား… အဖြေကတော့ သင်သည်မည်သူဖြစ်ပါစေ၊ မည်သည့်ကျောင်းကိုလျှောက်သည်ဖြစ်ပါစေ၊ ဝင်ခွင့်ရမရ တရားဝင် result စာမရောက်ခင် ဘယ်လိုမှ 100% ကျိန်းသေမသိနိုင်ဘူး။ ဒီတော့ Chevening interview အမေးခံရတဲ့ အချိန်မှာ ဒီလျှောက်ထားတဲ့ ၃ ကျောင်းထဲမှာ ၁ ကျောင်းတော့ ကျိန်းသေပေါက်ရနိုင်ကြောင်း ယုံလောက်အောင် ဘယ်လိုဖြေမလဲ? ကျိန်းသေပေါက် ရမှာဖြစ်ကြောင်း ယုံလောက်တဲ့ သက်သေအထောက်အထားမပြနိုင်ဘဲ အထင်တလုံးနဲ့ ရမယ်ထင်လို့လျှောက်ကြည့်တာပါ၊ Chevening Scholarship ကိုသာ ကျောင်းမရခင်ထဲက အရင်ကြိုပေးထားလိုက်ပါ အချိန်တန်ရင် နွားပိန်ကန်လို့ admission offer လာပါလိမ့်မယ် ဆိုတာမျိုး သွားပြောရင်တော့ ရလာဒ်ဘယ်လိုထွက်မလဲ သိတယ်မဟုတ်လား။ (အဲဒီအတိုင်း အပြင်မှာ တကယ်သွားဖြေတဲ့သူတွေ အများကြီးရှိခဲ့ဖူးတယ်နော်…)

❓School Selection Strategy က Chevening Scholarship ရဖို့ ဘယ်လိုအထောက်အကူပြုသလဲ?
ဒီတော့ ကြိုက်တာရော၊ ရနိုင်တာရောသည် မသေချာမရေရာတဲ့ ဖြစ်နိုင်ချေ probability တွေပေါ်မှာ မူတည်ပြီး ဆုံးဖြတ်ချက်ချရတာမျိုးဖြစ်တဲ့အတွက် အဲဒီ probability game တစ်ခုကို ကစားနိုင်ဖို့ဆိုရင် winning strategy တခုကို သေချာချထားဖို့လိုပါတယ်။ အဲဒီ strategy ကို သံရုံးက Chevening interview panel ကို ချပြပြီး စနစ်တကျ နည်းဗျူဟာချထားပြီး အပိုင်လျှောက်တာကြောင့် အချိန်တန်ရင် ၃ ခုလုံးဖြစ်စေ၊ ၃ ခုထဲက အနည်းဆုံးတခုခုဖြစ်စေ ကျိန်းသေပေါက်ရမှာဖြစ်ကြောင်း ပြောရတယ်။ ‘မပိုင်ရင် ခြင်တောင်မရိုက်ဖူး” ဆိုတဲ့ confidence မျိုးနဲ့ မပြောနိုင်ရင် ဘယ် interviewer ကမှ သင့်ကိုမယုံပါ။

❓ဒါဆို School Selection Strategy ဘယ်နှမျိုးရှိသလဲ?
ထောင်နဲ့သောင်းနဲ့ချီပြီးရှိတယ်။ Winner တစ်ယောက် သူဘယ်လိုလုပ်ခဲ့လဲ မေးကြည့်ရင် တစ်ယောက်တစ်မျိုးဖြေလိမ့်မယ်။ ဒါပေမယ့် အခြေခံ နည်းဗျူဟာကတော့ ၄ မျိုးဘဲရှိတယ်။
1️⃣ Top-middle-last: ကံကောင်းရင် အကောင်းဆုံး Oxbridge နှစ်ခုထဲက တခုရပြီး၊ ကံဆိုးရင် Sheffield Hallam လောက်တော့ရနိုင်လိမ့်မယ်ဆိုတဲ့ နည်းဗျူဟာက တမျိုး -
(Oxbridge မှန်းပြီး ကြိုးစားသူက Sheffield Hallam လောက်တော့ရနိုင်ပါတယ်။ အားနည်းချက်က ကိုယ့်အဆင့်ဘယ်လောက်ရှိလဲ ကိုယ့်ဟာကိုယ်မသိဘဲ ရမ်းလျှောက်နေတာရုပ်ပေါက်လွန်းတယ်)
2️⃣ Insurance policy: Russell group ထဲက ranking အနိမ့်ဆုံး ၃ ကျောင်းရွေးလျှောက်တဲ့ နည်းဗျူဟာကနောက်တမျိုး - (အားသာချက်က ကျိန်းသေပေါက်ရလိမ့်မယ်။ အားနည်းချက်က ရည်မှန်းချက်နိမ့်လွန်းပြီး ကျောင်းတက်ရပြီးရော သွားချင်တာသိသာလွန်းတာကြောင့် Scholarship မရနိုင်)
3️⃣ Aim for the Moon: Oxford, Cambridge, Imperial College/UCL ကိုဘဲ ရွေးလျှောက်တာက တစ်မျိုး - (အားသာချက်က ရည်မှန်းချက်ကြီး ကြိုးစားချင်စိတ်ရှိကြောင်းသိသာတယ်။ အားနည်းချက်က ဘယ်ကျောင်းတခုမှမရဘဲ မြန်မာပြည်မှာဘဲ သောင်တင်သွားဖို့ ဖြစ်နိုင်ချေပိုများတယ်)
4️⃣ Middle of the Road: အလယ်အလတ်စား ranking မတိမ်းမယိမ်း ကျောင်း ၃ ကျောင်း ရွေးလျှောက်တာက တစ်မျိုး - (အားသာချက်/အားနည်းချက် - ရရင် ၃ ကျောင်းလုံးရပြီး မရရင်လည်း ၃ ကျောင်းလုံးမရဘူး)
အဲဒီ နည်းဗျူဟာ ၄ ကို ရောစပ်ပြီး သုံးရင် အပွားပေါင်း ထောင်သောင်းချီထွက်လာတယ်။ အဲဒါကြောင့်လဲ alumni တွေကို သွားမေးရင် တစ်ယောက်တစ်ပေါက်ပြောနေကြတာဖြစ်ပါတယ်။

❓ကိုယ်နဲ့ အကိုက်ဆုံး နည်းဗျူဟာကို ဘယ်လိုထုတ်မလဲ?
ဘယ်သူဘာပြောပြော အထိရောက်ဆုံးနဲ့ လက်တွေ့အကျဆုံး နည်းလမ်းပြောပြပါမယ်။ အဲဒါကတော့ တကယ်နားလည်တတ်ကျွမ်းတဲ့ နည်းပြ (mentor) ငှား၊ သေချာဆွေးနွေးပြီး ကိုယ်နဲ့ကိုက်တဲ့ နည်းဗျူဟာချပါ။ ကမ္ဘာ့ဖလား အဆင့်မှာ နည်းပြမပါဘဲ ဝင်ကန်လို့မရသလို၊ နည်းဗျူဟာကောင်းကောင်းတခုကို နည်းပြအနည်းဆုံး တယောက်မရှိဘဲ နိုင်ငံခြားမှာ ပညာသင်တဲ့ အတွေ့အကြုံမရှိဖူးတဲ့ မြန်မာကျောင်းသားတစ်ယောက်သည် ကိုယ့်ဟာကိုယ်မထုတ်နိုင်ဘူး။ (US, Australia, Hong Kong, Canada တို့မှာ Scholarship နဲ့ undergraduate တက်ဖူးတဲ့သူ ဆိုရင်တော့ ကိုယ့်ဟာကိုယ်စဉ်းစားလို့ရကောင်းရနိုင်လိမ့်မယ်။ ဒါပေမယ့် အဲဒီလိုလူမျိုးကလည်း ဒီအဆင့်မှာ ဝင်ပြိုင်တဲ့အခါ အနည်းဆုံးတော့ mentor သို့မဟုတ် consultant အကြံပေး တစ်ဦးလောက်တော့ မငှား/မသုံးဘဲ ပြိုင်တာမျိုး သိပ်မရှိဘူး)
ကျွန်တော်ကိုယ်တိုင်လဲ နည်းပြငှားပြီး သေချာပြင်ဆင်မှရတယ်။ ကျွန်တော့် Cambridge အသိုင်းအဝိုင်းထဲက မြန်မာမဟုတ်တဲ့ အခြားနိုင်ငံတွေက ‌Chevening Scholar တွေလဲ သူ့နည်းသူဟန်နဲ့ နည်းပြငှားပြီး ပြင်ဆင်ကြတာဘဲ။ မြန်မာပြည်မှာတော့ နည်းပြသုံးရကောင်းမှန်းမသိဘူး။ ပိုဆိုးတာက ဆရာမကူ၊ ကိုယ်ပိုင်အရည်အချင်းနဲ့ ရအောင်လျှောက်နိုင်သူက Hero၊ ငွေကုန်ကြေးကျခံပြီး နည်းပြငှားတဲ့သူဆိုရင် အာဝါဒါးဆိုပြီး လှောင်ချင်ကြတယ်။ ပိုက်ဆံအကုန်မခံဘဲ ကိုယ်ပိုင်အရည်အချင်းနဲ့ လေ့လာနိုင်မှ Scholarship winner ဖြစ်နိုင်သယောင်ယောင် လျှောက်ပြောနေကြတယ်။ အမှန်တော့ အဲဒီပြောနေတဲ့သူတွေ အများစုကိုယ်တိုင်က Chevening Scholarship လို သိန်း ၂ ထောင်တန် ပညာသင်ဆုမျိုးကိုထားဘိ၊ ငွေ ၆ သိန်းတန် TOEFL/IELTS လို English skill test လေးတွေ ဖြေဖို့တောင် ကိုယ်ပိုင်အရည်အချင်းနဲ့ မလေ့လာနိုင်လို့ English 4 skill၊ Intensive Master Class ဆိုတာမျိုးတွေကို ၄-၅ သိန်းပေး သင်တန်းတက်ဖြေမှ ကျောင်းပြိုင်လျှောက်နိုင်မယ့် အမှတ်ရတဲ့သူတွေဆိုတာ သူတို့ရဲ့ account တွေမှာ လိုက်လေ့လာကြည့်ရင် တွေ့နိုင်လိမ့်မယ်။
လက်တွေ့မှာတော့ Cambridge မှာတက်နေတဲ့ ကမ္ဘာ့အတော်ဆုံးဆိုတဲ့ ကျောင်းသားတွေကိုတောင် Career Center ကနေ Postgraduate ကျောင်းလျှောက်နည်း သင်တန်းတွေပေးတယ်။ Consultant/mentor နဲ့ appointment ယူပြီး တိုင်ပင်ရတယ်။ အခြား တက္ကသိုလ်တွေမှာလည်း ဒီအတိုင်းဘဲ၊ Harvard ကကျောင်းပြီးတဲ့ Undergraduate ကျောင်းသားတစ်ယောက် Chevening လျှောက်ချင်တယ်ဆိုပါစို့၊ Harvard ရဲ့ career centre မှာ consultant နဲ့ တွေ့လို့ရတယ်၊ webinar တက်လို့ရတယ်။ အဲဒီလို level မှာ နည်းပြမရှိဘဲ ကိုယ့်ဉာဏ်လေးတစ်ခုထဲနဲ့ ဝင်ပြိုင်လို့ကတော့ 2 vs 1 ပြိုင်သလိုဖြစ်နေမှာပေါ့။ နည်းပြမပါဘဲ ကျောင်းလျှောက်ရင် အလယ်အလတ်စား Exeter, Bristol, Newcastle တို့မှာ ကျောင်းဝင်ခွင့်ရကောင်းရနိုင်ပါလိမ့်မယ်။ Scholarship တော့ပြိုင်လျှောက်နိုင်မည်မထင်။ Mentor မပါဘဲ Scholarship ရခဲ့တယ်ဆိုရင်လည်း ပေါင်သုံးလေးထောင်ဖိုးလောက်ဘဲရနိုင်ပါလိမ့်မယ်။ Mentor သုံးလိုက်ရင် ပိုကောင်းတဲ့ကျောင်းမှာ ပိုများတဲ့ ဆုကို ကျိန်သေပေါက်ကိုရလိမ့်မယ်။
ဒီတော့ နိဂုံးချုပ်ရမယ်ဆိုရင်တော့ Chevening Scholarship မှာ essay ကောင်းဖို့ထက် ကျောင်းဝင်ခွင့်အရယူဖို့က ပိုအရေးကြီးတယ်။ School Selection Strategy တွေက အခြေခံ ၄ မျိုးကနေပွားလိုက်တာ သုံးလို့ရတဲ့နည်း ထောင်သောင်းမကရှိတယ်။ နိုင်ငံခြားမှာ Scholarship ရဖူးတဲ့ အတွေ့အကြုံရှိ နားလည်တတ်ကျွမ်းသူဆိုရင်တော့ ကိုယ်တိုင်စဉ်းစားရွေးချယ်နိုင်တယ်။ အတွေ့အကြုံလုံးဝမရှိတဲ့ beginner ဆိုရင်တော့ နည်းပြမပါဘဲ ကိုယ့်ဟာကိုယ်မလုပ်နိုင်ဘူး။ လုပ်ရင် ပြိုင်ဘက် နည်းပြ-ကျောင်းသား အတွဲနဲ့ 2vs1 ပြိုင်ရသလို နောက်ကောက်ကျ ကျန်ခဲ့လိမ့်မယ်။ ငွေမရှိလို့ ပညာသင်ဆုလျှောက်ပါတယ် ဆိုနေမှ နည်းပြငှားဖို့၊ Scholarship လျှောက်နည်းသင်တန်းလိုက်တက်ဖို့ ငွေဘယ်လိုရနိုင်မလဲလို့ မေးကောင်းမေးလိမ့်မယ်။ ဒါပေမယ့် Chevening ဆိုတာ အရည်အချင်းကိုမကြည့်ဘဲ လိုအပ်ချက်ကိုသာ အသားပေးကြည့်တဲ့ ဆင်းရဲသားဒုက္ခသည်ကိုပေးတဲ့ humanitarian Scholarship မျိုးမဟုတ်ဘူးဆိုတာ သတိရလိုက်ပါ။ Public မှာ webinar ပေးနေတဲ့ Chevening alumni တွေရဲ့ Biography ကို သွားလေ့လာကြည့်ရင် ငွေကြေးအတန်အသင့် ချမ်းသာပြီး နိုင်ငံခြားဘွဲ့ယူထားတဲ့သူတွေ အများကြီးရှိကြောင်း သင်တွေ့ပါလိမ့်မယ်။ ဒါကြောင့် သင့်ရည်ရွယ်ချက်သည် ငွေတခုထဲကြောင့် ပညာသင်ဆုလျှောက်ချင်တာဆိုရင်တော့ merit-based ဖြစ်တဲ့ Chevening ကို အစထဲကမရွေးဘဲ Humanitarian Scholarship မျိုးကိုသာ ရွေးလျှောက်ဖို့ အကြံပေးချင်ပါတယ်။

စေတနာဖြင့်
ငြိမ်းဇော်ကို
၂၃-၁၀-၂၀၂၃




အခြား tip များကို ဖတ်ချင်ပါက အောက်ပါ group ကို လာ join နိုင်ပါတယ်..
https://www.facebook.com/groups/mmchevening/
----------------------------------------------
A Glance at Scholarship Insider
Scholarship Insider သည် နိုင်ငံခြား ပညာသင်ဆုလျှောက်ထားခြင်းနှင့် ပတ်သက်၍ အခြေခံမှစ၍ စနစ်တကျ သင်တန်းပေးသည့် ပညာရေးအကြံပေးလုပ်ငန်းဖြစ်သည်။ US, UK, Singapore နိုင်ငံများတွင် ဘွဲ့ ၄ ခု၊ Scholarship ၅ ခု အထိရယူဖူးသည့် အတွေ့အကြုံရှိသူ ဦးငြိမ်းဇော်ကို မှ ၂၀၂၂ ခုနှစ်တွင် စတင်တည်ထောင်ခဲ့ပြီး ၆ လအတွင်း ပညာသင်ဆုလျှောက်ထားသူများကို ကမ္ဘာ့အဆင့် Top 10 ဝင် တက္ကသိုလ်များတွင် ပညာသင်ဆုများရအောင် ကူညီပံ့ပိုးပေးနိုင်ခဲ့သည်။ မြန်မာနိုင်ငံမှ အခြားအလားတူ ပညာရေး အကြံပေးလုပ်ငန်းများထက် အဓိကအားသာချက်မှာ Scholarship Insider ဆိုသော အမည်အတိုင်း နိုင်ငံခြားတက္ကသိုလ်များမှ ပါမောက္ခများ၊ ကမ္ဘာ့အဆင့် ၁-၃၀ ဆင့်ဝင် တက္ကသိုလ်ကျောင်းများတွင် တန်ဖိုးကြီး ပညာသင်ဆုများ တစ်ခုထက်ပို၍ ရရှိထားသော ကျောင်းသားများ၊ ထိုကျောင်းများမှ ပညာသင်ဆုပေးရန် ရွေးချယ်ရာတွင် အကဲဖြတ်သည့် တာဝန်ခံများနှင့် ဆက်သွယ်ထားသဖြင့် သာမန်လူများ လက်လှမ်းမမှီသော အတွင်းသတင်းများ၊ အခွင့်အလမ်းကောင်းများ၊ ပညာသင်ဆုလျှောက်သည့် နည်းဗျူဟာများကို စုံစမ်းထောက်လှမ်းနိုင်စွမ်းရှိကြောင်း ဒီ page က ပို့စ်များကို ကြည့်လိုက်ရင် အလွယ်တကူ သတိထားမိမှာဖြစ်ပါတယ်။

ဒါကတော့ UK က OXFORD နဲ့ CAMBRIDGE ဝင်ခွင့်လျှောက်နည်းကို The Telegraph သတင်းစာက Oxbridge ဝင်ခွင့်ကို သီးသန့်လျှောက်ပေးတဲ...
07/10/2023

ဒါကတော့ UK က OXFORD နဲ့ CAMBRIDGE ဝင်ခွင့်လျှောက်နည်းကို The Telegraph သတင်းစာက Oxbridge ဝင်ခွင့်ကို သီးသန့်လျှောက်ပေးတဲ့ super tutor (နည်းပြ) တွေကို interview ပြီးတင်ဆက်ပေးထားတာကို နမူနာ share ပေးလိုက်တာပါ။ မြန်မာပြည်မှာတော့ Scholarship နည်းပြဆိုသူတွေ သိပ်ခေတ်မစားပေမယ့် နိုင်ငံခြားမှာတော့ super tutor တွေက ဘောလုံးအသင်းနည်းပြတွေ အားကစားဝါသနာရှင်များအကြား ကမ္ဘာကျော်သလို သက်ဆိုင်ရာ ကျောင်းသားအသိုင်းအဝိုင်းမှာ နာမည်ကြီးပါတယ်။

ကျွန်ုပ်တို့ Scholarship Insider သည် INSIDER ဆိုတဲ့ အမည်နဲ့ ကိုက်အောင် အခုလို World Class နည်းပြတွေဆီက နည်းလမ်းတွေကို အတွင်းကျကျပညာယူပြီး ကျွန်ုပ်တို့၏ သင်တန်းသားများကို ပြန်လေ့ကျင့်ပေးနေပါတယ်။
ကမ္ဘာ့ ထိပ်တန်း တက္ကသိုလ်တွေမှာ တစ်နှစ် သိန်း ၂၀၀၀-၃၀၀၀ ပညာသင်တွေကို ဝင်ပြိုင်လျှောက်တဲ့အခါ ကျောင်းသားကချည်း လေ့လာဆည်းပူး ကြိုးစားရတာမျိုး မဟုတ်ပါဘူး။ နည်းပြလုပ်တဲ့သူကလည်း ကိုယ့်နည်းဗျူဟာတွေက အခြား ပြည်တွင်းပြည်ပက နည်းပြတွေထက်သာအောင် အမြဲလေ့လာဆည်းပူးနေရပါတယ်။ ကမ္ဘာ့ဖလားကို နည်းပြမပါဘဲ ဝင်ကန်လို့မရသလို အခုလို တစ်ကမ္ဘာလုံးအဆင့် ပြိုင်ရတဲ့ Oxbridge ပြိုင်လျှောက်တဲ့အခါမျိုးမှာ ကျောင်းသားဘယ်လောက်တော်တော် နည်းပြညံ့ရင်လည်း ရှုံးနိုင်ပါတယ်။

ဒါကြောင့် နိုင်ငံခြားပညာသင်ဆုတစ်ခု အောင်ပွဲရဖို့ Scholarship WINNER ဖြစ်ဖို့ဆိုတာ ကျောင်းသား၊ မိဘ၊ ဆရာ ၃ ဦးစလုံး တက်ညီလက်ညီကြိုးစားမှ ဖြစ်နိုင်တာတဲ့အတွက် အခုလို ပန်းဝင်ဖို့ နီးချိန်မှာ လုံးလထုတ်ကြိုးစားကြဖို့ တိုက်တွန်းလိုက်ရပါတယ်။ ကျွန်ုပ်တို့ဘက်ကတော့ တာဝန်ကျေအောင် အမြဲကြိုးစားလျက် ရှိပါကြောင်း...

မူရင်း သတင်းဆောင်းပါးဖတ်ရန်
👉🏼https://www.telegraph.co.uk/education-and-careers/2023/10/05/how-to-get-in-oxbridge-oxford-cambridge-college-admission/?fbclid=IwAR1ClXyApW-R_aZD_hsDbIGkeL4m233QrsHun3XgLY8xE9gyullCATj5uN8

College application essay တွေ၊ personal statement တွေ၊ recommendation တွေကို ChatGPT သုံးပြီးရေးနေတဲ့သူများ သိစေရန်ရေးပု...
30/09/2023

College application essay တွေ၊ personal statement တွေ၊ recommendation တွေကို ChatGPT သုံးပြီးရေးနေတဲ့သူများ သိစေရန်

ရေးပုံရေးနည်း ပညာတစ်ခုကို စနစ်တကျ တတ်အောင် သင်တန်းတက်ဖို့သင်ယူလေ့ကျင့်ယူဖို့ထက် ဖြတ်လမ်းလိုက် ကလိမ်ကျချင်တဲ့သူကများနေတယ်။ ဖွဘုတ်ပေါ်က ပညာရေး group တွေထဲကြည့်လိုက်ရင် မရေးတတ်ရှာလို့ အကြံဉာဏ်တောင်းသူကို စနစ်တကျ သင်တန်းတက်ဖို့ အားပေးရမယ့်အစား မရစေချင်လို့ ChatGPT သုံးပြီးရေးလိုက်ပါလား၊ online မှာ သူများဘာရေးလဲလိုက်ရှာပြီး ဆင်တူရိုးမှားပြောင်းရေးပါလား လို့ cmt ပေးပြီး တမင်အချွန်နဲ့လိုက်မတဲ့ လူကခပ်များများ...

ကိုယ့်ဟာကိုယ် Zukerberg + တက္ကသိုလ်ကြီးတွေက professor ကြီးတွေ ထက်တော်တယ်ထင်လို့ သူတို့ကို အလွယ်တကူလိမ်လို့ရမယ်လို့ထင်ရင် စမ်းကြည့်လိုက်ပေါ့

📢Top 5️⃣ Oxbridge/Ivy League level INSIDER tips for Scholarship Applicationsဒီနှစ်နိုင်ငံခြားကျောင်းလျှောက်မည့်သူများ Ox...
24/09/2023

📢Top 5️⃣ Oxbridge/Ivy League level INSIDER tips for Scholarship Applications

ဒီနှစ်နိုင်ငံခြားကျောင်းလျှောက်မည့်သူများ Oxbridge/Ivy League level မှာ Scholarship ရသည်အထိ အသုံးတည့်သော နည်းလမ်းများကို သုံးပြီး သင့်အကြိုက်ဆုံးကျောင်းတွေကနေ ဝင်ခွင့်ရယူရလိုပါသလား?

ကျွန်ုပ်တို့၏ founder ဦးငြိမ်းဇော်ကို ရေးသားသော Scholarship လျှောက်နည်း ဆောင်းပါးတစ်ပုဒ် MasterStudies Website တွင် ဖော်ပြခြင်းခံရပါသည်။ စိတ်ဝင်စားသူများအနေဖြင့် အောက်ပါ link တွင် ဝင်ရောက်ဖတ်ကြည့်နိုင်သည်။
👇🏼👇🏼👇🏼
https://www.masterstudies.com/articles/top-5-tips-for-scholarship-applications-from-a-graduate-scholarship-winner

ထို့ကြောင့် နိုင်ငံခြားပညာရေး၊ တက္ကသိုလ်ဝင်ခွင့်လျှောက်ထားခြင်းကိစ္စရပ်များတွင် ကိုယ်ပိုင်အတွေးအခေါ်များဖြင့် မြန်မာကိုကျော်၍ နိုင်ငံခြားပရိသတ်များအထိ ပေါက်ရောက်အောင် ထိုးဖောက်နိုင်သူ မြန်မာများအနက် ကျုန်ုပ်တို့၏ Founder ဦးငြိမ်းဇော်ကိုသည် Parami University တည်ထောင်သူ ဒေါက်တာကျော်မိုးထွန်း (Ph.D. Yale University) ပြီးလျှင် ဒုတိယမြောက်ပုဂ္ဂိုလ်ဖြစ်လာသည်။ သို့ဖြစ်ပါ၍ ဤဆောင်းပါးကို ဖော်ပြပေးပါသော MasterStudies Website ပိုင်ရှင် နော်ဝေးနိုင်ငံအခြေစိုက် KeyStone Education Group အား အထူးကျေးဇူးတင်ရှိပါကြောင်း…..

Address

No. 86, 49th Street, Pazundaung
Yangon
11171

Opening Hours

Saturday 09:00 - 12:00
Sunday 09:00 - 00:00

Website

Alerts

Be the first to know and let us send you an email when Scholarship Insider posts news and promotions. Your email address will not be used for any other purpose, and you can unsubscribe at any time.

Contact The School

Send a message to Scholarship Insider:

Shortcuts

Share

Category