13/04/2026
မနက်ဖြန် သက်ြန်ကျပြီ…💦
ဒီမနက်စောစော ဘုရားပန်းတွေလဲရင်း
အတာပန်းတွေကို အတာအိုးထဲ ထိုးပြီး
နှစ်သစ်ကို ကြိုဖို့ ပြင်ဆင်တယ်…
အားလုံးပြီးသွားတော့
မနက်စာစား ကော်ဖီသောက်ရင်း
ဒီပိတ်ရက်လေးကို အကျိုးရှိအောင်
ကိုယ့်စိတ်ကိုယ် ပြန်စစ်နေမိတယ်…
ကုန်ဆုံးသွားတဲ့ တစ်နှစ်တာမှာ
မေတ္တာ ကရုဏာ မုဒိတာ ဥပေက္ခာ
ဟန်ချက်ညီညီနဲ့ ဖြတ်သန်းခဲ့ရဲ့လား…
ခဏတိုင်း ဖြစ် ပျက်နေတာတွေကို ဆင်ခြင်ရင်း
အသိတွေကို သတိနဲ့ ကပ်ထားနိုင်ရဲ့လားလို့
ပြန်ဆန်းစစ်မိတယ်…
တကယ်တော့ အချိန်တွေက အကုန်မြန်ပါတယ်...
တစ်နှစ်တာဖြတ်သန်းမှုက ခဏတာလိုပါပဲ ....
ကျမတို့က မလိုတာတွေ အရေးမကြီးတာတွေ
အတော်များများ လုပ်ရင်း အချိန်ဖြုန်းပစ်လေ့ရှိတယ်...
“ကိုယ့်အတွက် ဘာလုပ်ခဲ့ပြီးပြီလဲ
ဘာတွေ လုပ်နေပြီလဲ” ဆိုတာ တွေးမိတယ်…
တစ်နှစ်တာလုံး လှုပ်ရှားနေတဲ့ ခန္ဓာကိုယ်နဲ့
အနားမရတဲ့ စိတ်ကို
ဒီပိတ်ရက်လေးမှာတော့
အချိန်ပေး အနားယူရမှာပါ ...
ကိုယ့်စိတ်က ကိုယ့်ရဲ့ အဖော်အစစ်ပဲ မလား…
နှစ်ဟောင်းကနေ နှစ်သစ် ပြောင်းတဲ့အချိန်မှာ
မိသားစု မောင်နှမ ကိုယ့်ဝန်းကျင်မှာ
ခွင့်လွှတ်ခြင်းတွေ နားလည်မှုတွေ
မေတ္တာတရားတွေ စာနာမှုတွေနဲ့
ဒီနှစ်သက်ြန်လည်း အေးချမ်းစွာ ဖြတ်သန်းပါမယ်…
၇ရက်သားသမီးများအားလုံး
🌿 ကပ်ဘေးအမျိုးမျိုးမှ ကင်းဝေးကြပါစေ
🌿 ကျန်းမာခြင်း သုခနဲ့ ပြည့်စုံကြပါစေ
🌿 သောကကင်းဝေး စိတ်အေးချမ်းကြပါစေ
𝑨𝒎𝒂𝒏𝒅𝒂
30/03/2026
✨ Monday Self-Check ✨
ဒီတစ်ပတ်အစမှာ
ကိုယ့်ကိုယ်ကိုယ် မေးကြည့်လိုက်ပါ …
ပြီးခဲ့တဲ့အပတ်မှာ
ဘာတွေလုပ်ခဲ့လဲ ဘာတွေမှားခဲ့လဲ
ဘာတွေကို ပြန်ပြင်ဖို့လိုလဲ ...
တခါတလေ
ကျမတို့က ရှေ့ကိုပဲ အလျင်လိုနေပြီး
ကိုယ့်ကိုယ်ကိုယ် ပြန်ကြည့်ဖို့ မေ့နေတတ်ကြတယ်…
ဒါပေမဲ့
တကယ်တိုးတက်တာက
“မြန်မြန်သွားနိုင်တာ” မဟုတ်ဘဲ
“မှန်မှန်သွားနိုင်တာ” လို့ ကျမယုံကြည်ပါတယ် …
ဒါကြောင့်
ဒီတစ်ပတ်ကို
နည်းနည်း ပိုသတိထားပြီး
သေချာ ပြန်စတင်ကြရအောင် …
🌿 ကိုယ့်ကိုယ်ကိုယ် အပြစ်မတင်ဘဲ နားလည်ပေးမယ်
🌿 မလိုအပ်တဲ့ စိတ်ဖိစီးမှုတွေကို လျှော့ချမယ်
🌿 အလုပ်နဲ့ စိတ်ချမ်းသာမှုကို မျှတအောင် ကြိုးစားမယ်
🌿 ပိုပြီး စနစ်ကျအောင် ပြင်ဆင်မယ်
🌿 အရှိန်မလျှော့ဘဲ ရှေ့ဆက် ကြိုးစားမယ်
မိတ်ဆွေကရော…
ပြီးခဲ့တဲ့အပတ်မှာ ကိုယ့်ကိုယ်ကိုယ် ဘယ်လိုမြင်မိလဲ? 💭
𝑨𝒎𝒂𝒏𝒅𝒂 🤍
20/03/2026
ပျော်ပါရဲ့လား မိတ်ဆွေ....
#တကယ့် ပျော်ရွှင်မှုရင်းမြစ်က ကိုယ့်ဆီမှာ ရှိပါတယ်....
စိတ်အေးချမ်းနေတဲ့အခါ အတွေးအမြင်တွေ အပြုသဘောဖြစ်နေတဲ့အခါ
ကိုယ့်အတွေးတွေကြောင့် တကယ်ပျော်နေနိုင်ပါတယ်....
စစ်မှန်တဲ့ပျော်ရွှင်မှုလိုချင်ရင် ဗုဒ္ဓမြတ်စွာ ဟောကြားထားသလို
စိတ်ကိုယဉ်ပါးအောင် လေ့ကျင့်ဖို့လိုပါတယ် ....
လူ့သဘောက ရချင်တာဖြစ်ချင်တာတွေ ပိုင်ဆိုင်ရရင် ပျော်ကြတယ်....
ဒါပေမယ့် အရာရာ မမြဲတဲ့သဘောမို့
#အပြောင်းအလဲနဲ့ ကြုံရတဲ့အခါ မခံစားနိုင်ကြဘူး...
"လူတွေက ဆင်းရဲဒုက္ခကို ရှောင်ရှားချင်ပေမယ့်လည်း
အဲ့ဒီ ဆင်းရဲဒုက္ခထဲကို တိုးဝင်ကြတယ်....
ပျော်ရွှင်မှု ကိုရချင်ပေမယ့်လည်း မသိမှုကြောင့်
ကိုယ့်ကိုယ်ပိုင် ပျော်ရွှင်မှုကိုတောင် ရန်သူလို ဖျက်ဆီးပစ်ကြတယ်"တဲ့
အိန္ဒိယဆရာတော်ကြီးတစ်ပါးရေးတဲ့ ဆောင်းပါးမှာ ဖတ်ဖူးတယ်....
တကယ်တော့ ကျမတို့အားလုံးက ပျော်ရွှင်မှုကို အရမ်းလိုချင်ပေမယ့်
သူ့ရင်းမြစ်အကြောင်းကို မသိနားမလည်ကြဘူး...
ဒါ့ကြောင့် ကိုယ်တိုင် ပိုပြီးပျော်ရွှင်အောင် ဖန်တီးမယ့်အစား
နောက်ထပ် မပျော်ရွှင်မှုတွေ ဝမ်းနည်းမှုတွေကိုသာ ဖန်တီးမိတတ်တယ်...
#တကယ်တော့ ပျော်ရွှင်မှုဆိုတာ ခံစားချက်တစ်ခုပါပဲ...
“ခံစားချက်”ဆိုတာ ကျယ်ပြန့်တဲ့ စိတ်ရဲ့အစိတ်အပိုင်းတစ်ခုပါ...
အလုံးစုံ ပျော်ရွှင်မှုမှ အလုံးစုံ မပျော်ရွှင်မှုအထိ အဆင့်ဆင့် ခံစားလို့ရတယ်...
ပျော်ရွှင်မှု၊ မပျော်ရွှင်မှု ခံစားချက်တွေက အာရုံငါးပါး သိစိတ်တွေနဲ့
#ဘဝရ့အခိုက်အတန့်ခဏတိုင်းမှာ ဖြစ်ပေါ် ပြောင်းလဲ ပျက်ယွင်းနေတာမလား ...
မြင်သာတဲ့ ဥပမာပုံလေး
ကျမနဲ့အတူ တွေးကြည့်ရအောင်...
#အရမ်းအသံသာပြီး တေးဆိုတတ်တဲ့ငှက်ကလေး
ကျမတို့အခန်းရဲ့ ပြတင်းပေါက်မှာ လာနားတယ်ပေါ့....
အသံလေးက သာလိုက်တာ... နားထောင်လို့ကို မဝဘူး....
ဒါပေမယ့် မိတ်ဆွေက နားထောင်နေရင်း
ဒီငှက်ရဲ့ အသံလေး နှစ်သက်လိုက်တာ...
သူပျံသွားရင် သူ့တေးသံ ငါ မကြားရတော့ဘူး...
ငါ ဘယ်လို လုပ်ရပါ့... သူ ပြန်လာအောင် ဘာလုပ်ရမလဲ....
သူ့ကိုဖမ်းထားရမလား စတဲ့ စိုးရိမ်စိတ်တွေ ကြောင့်ကြမှုတွေကြောင့်
ငှက်လေး တေးဆိုတာသာ ပြီးသွားတယ် သေချာ မခံစားလိုက်ရဘူး....
အဲ့ဒီချိန် ငှက်လေးလည်း ပျံပြေးသွားရော
နောင်တတွေ ဝမ်းနည်းမှုတွေနဲ့ ကျန်ခဲ့တယ်....
ပြန်တွေးရအောင်လည်း သူ တေးဆိုချိန်မှာ အာရုံများနေတော့
ကိုယ့်မှတ်ဉာဏ်ထဲမှာ ငှက်လေးရဲ့တေးသံ မကျန်ခဲ့ပြန်ဘူး....
ကဲ...နောက်တခေါက် ပြန်တွေးကြည့်ကြရအောင်...
ကျမတို့အခန်းပြတင်းပေါက်မှာ ငှက်လေး လာနားနေပြီနော်...
သူ တေးဆိုတော့မယ်....
အဲ့ခဏလေးမှာ သူ့တေးသံလေးကိုပဲ အာရုံစိုက် နားထောင်နေတယ်....
#သူ ပြန်လာဖို့ သူ့ကို ထိန်းချုပ်ဖို့ အပိုင်သိမ်းဖို့ ဘာမှ တွေးမနေဘူး...
ငှက်လေးတော့ တေးဆိုပြီး အဝေးကို ပျံသွားပြီ...
ကြည်လင်နေတဲ့ ကျမတို့အာရုံထဲမှာ
သူ့တေးသံလေး ကျန်နေခဲ့တယ်....
သူ မလာတဲ့နေ့ရက်တွေ အချိန်တွေမှာ
အဲ့ဒီတေးသံလေးကို ပြန်တွေးပြီး ခံစားနိုင်တယ်....
တကယ်တော့လည်း ငှက်လေးက မကြာမကြာ လာနေဉီးမှာပါ....
#သူလာတဲ့အချိန်သာ ကျမတို့ မှန်ကန်တဲ့အတွေးနဲ့ လက်ခံဖို့လိုတာပါ...
#ပျော်ရွှင်မှုကို ခံစားတာလည်း ဒီလိုပါပဲ....
ရုပ်ဝတ္ထုဖြစ်ဖြစ် လူတစ်ဉီးအပေါဖြစ်ဖြစ် စိတ်ထဲရောက်လာရင်
နှစ်သက်တယ်ဆိုတဲ့ ခံစားချက်ဖြစ်လာတယ်...
အဲ့ခံစားချက်ကို ထပ်ကာ ထပ်ကာ လိုချင်တယ်...
ပိုင်ဆိုင်ထားရတာ ပျော်သလိုဖြစ်တယ် ကျေနပ်တယ်...
ပျောက်ဆုံးသွားမှာ ကြောက်တယ်...
ဒီအတိုင်းပဲ စီးပွားရေးမှာ အောင်မြင်နေသူဆိုရင်
အဲ့အောင်မြင်တဲ့အပေါ်မှာ ကျေနပ်တယ် ပျော်တယ်...
တပြိုင်တည်း အဲ့ဒီအောင်မြင်မှု ပျောက်ဆုံးမှာ လျော့သွားမှာ မလိုလားဘူး...
စိုးရိမ်စိတ် ကြောက်စိတ်တွေ ဖြစ်တယ်....
တကယ်တော့ ပျော်ရွှင်ရတဲ့အချိန်မှာ
#စိတ်တည်ငြိမ်မှုနဲ့ ခံစားနိုင်ဖို့ သတိထားရပါမယ်....
ဘဝအလှည့်အပြောင်းကြုံလို့ မပျော်ရတဲ့အခါလည်း ရင်ဆိုင်လာနိုင်မယ်...
ကိုယ်ပျော်ရွှင်ဖူးတာကို ပြန်တွေး ခံစားနိုင်မယ်...
ကိုယ်ကျော်ဖြတ်ခဲ့တာတွေကို ပြန်တွေးပြီး အားယူနိုင်မယ်...
ဘယ်လိုအခက်အခဲကို ရင်ဆိုင်ရပစေ
ခွန်အားသတ္တိ ဖြစ်လာတဲ့ပျော်ရွှင်မှုကို ခံစားရပါတယ်...
#အချိန်တန်ရင် ငှက်လေးလိုပဲ
ပျော်ရွှင်မှုက တကျော့ ပြန်လာဉီးမှာ....
ခဏတိုင်းကြုံတွေ့နေရမယ့် ပျော်ရွှင်မှုတွေကို ပြန်ရလာတိုင်း
#လက်မလွှတ်တမ်း တကယ်ပျော်နိုင်ဖို့ မမေ့နဲ့နော်...
“𝑺𝒐𝒎𝒆𝒕𝒊𝒎𝒆𝒔, 𝒉𝒂𝒑𝒑𝒊𝒏𝒆𝒔𝒔 𝒊𝒔 𝒋𝒖𝒔𝒕 𝒂 𝒑𝒂𝒔𝒔𝒊𝒏𝒈 𝒎𝒐𝒎𝒆𝒏𝒕,
𝑳𝒆𝒕 𝒊𝒕 𝒄𝒐𝒎𝒆, 𝒍𝒆𝒕 𝒊𝒕 𝒈𝒐… 𝒂𝒏𝒅 𝒇𝒆𝒆𝒍 𝒊𝒕 𝒇𝒖𝒍𝒍𝒚.”
𝑨𝒎𝒂𝒏𝒅𝒂
March 2026
#ဒီနေ့အတွေး
17/03/2026
ညီမလေး ....
#တစ်စုံတစ်ယောက်ကို အကြောင်းပြချက်မရှိဘဲ ဆုံးရှုံးလိုက်ရတာဟာ
စိတ်ဒဏ်ရာတစ်ခုပါပဲ...
#နှုတ်ဆက်ခွင့်မရဘဲ လမ်းခွဲလိုက်ရတဲ့အခါ
ကျွန်မတို့ရဲ့ ဦးနှောက်က "ဘာကြောင့်လဲ"ဆိုတဲ့မေးခွန်းကို အဖြေရှာရင်း
အဲ့ဒီလူဆီမှာပဲ အတွေးတွေ စိတ်ခံစားမှုတွေ ပိတ်မိနေတတ်ပါတယ်...
ညီမကိုပြောပြချင်တာက "ချစ်နေရုံသက်သက်ကတော့ မမှားပါဘူး"...
ဒါပေမဲ့ ညီမ ကိုယ့်ကိုယ်ကိုယ် ပြန်မေးရမှာက
"ဒီအချစ်က ကိုယ့်ကိုပျော်ရွှင်စေလား ဒါမှမဟုတ် နာကျင်စေလား"ဆိုတာပါပဲ ...
တကယ်တော့
#အဖြေမရှိတာဟာ အဖြေတစ်ခုပါပဲ...
"𝑵𝒐 𝑹𝒆𝒔𝒑𝒐𝒏𝒔𝒆 𝒊𝒔 𝒂 𝑹𝒆𝒔𝒑𝒐𝒏𝒔𝒆"...
လွန်ခဲ့တဲ့နှစ်တွေက သူ ဘာကြောင့်ထွက်သွားလဲဆိုတာကို ရှာဖွေနေမယ့်အစား
"သူဟာ ညီမဘဝထဲကနေ ထွက်သွားဖို့ ဆုံးဖြတ်ခဲ့သူ" ဆိုတဲ့အချက်ကိုပဲ
အမှန်တရားအဖြစ် လက်ခံကြည့်ပါ...
သူ မရှိတော့တဲ့ ၇နှစ်တာ ကာလကို ကြည့်ပြီး
"ငါ့ဘဝက သူမပါဘဲလည်း ရှေ့ဆက်နေတာပဲ" ဆိုတာကို မြင်ရမယ်...
သူ့ကိုချစ်တဲ့စိတ်ကို အတင်းပြောင်းလဲပစ်စရာမလိုပေမယ့် အဲ့ဒီစိတ်ထဲမှာပဲ နစ်မနေပါနဲ့...
#ကိုယ့်ကိုယ်ကိုယ် ပြန်ချစ်ပါ ...
ညီမက သူ့ကို ပိုင်ဆိုင်လိုစိတ်မရှိဘဲ ချစ်နေတာ ကောင်းပါတယ်...
ဒါပေမယ့် လူတစ်ယောက်ကို စောင့်နေရတာဟာ
ဘဝရဲ့အစိတ်အပိုင်းတစ်ခုပဲ ဖြစ်သင့်တယ်...ဘဝတစ်ခုလုံး မဖြစ်စေပါနဲ့ ...
"ငါကတော့ သူ့ကိုပဲ ချစ်တာ" ဆိုပြီး ကိုယ့်နှလုံးသားကို ပိတ်မထားပါနဲ့ ...
ကိုယ်တိုင်လည်း ပျော်ရွှင်ခွင့် ရှိပါတယ်....
ကိုယ့်ကို တန်ဖိုးထားမယ့်သူကို လက်ခံခွင့်လည်း ရှိပါတယ် ....
၇ နှစ်ဆိုတာ နည်းတဲ့အချိန်မဟုတ်ပါဘူး....
ညီမက ပိုကောင်းတဲ့ ပိုတန်ဖိုးထားတတ်တဲ့ မေတ္တာနဲ့ထိုက်တန်ပါတယ်...
#သူနဲ့ပတ်သက်လို့ တိုက်ဆိုင်မှုရှိလာတဲ့အခါ သတိတရ ရှိနိုင်ပါတယ်....
ပျော်စရာ အမှတ်တရတချို့ တွေးမိရင် အားပါးတရ ပြုံးရင်း
သူ့ကိုလည်း အဆင်ပြေ ကျန်းမာနေဖို့ မေတ္တာပို့ ဆုတောင်းပေးလိုက်ပါ...
#လူ့ဘဝသက်တမ်းမှာ အဖိုးတန်တဲ့အချိန်တွေကို
ဝမ်းနည်းမှုတွေနဲ့ပဲ ကုန်ဆုံးမသွားစေချင်ဘူး ...
လက်ရှိအချိန်မှာ အကောင်းဆုံး ရှင်သန်ကြည့်ပါ...
ညီမအတွက် ပိုကောင်းတဲ့နေ့ရက်တွေ ရောက်လာမယ်လို့ ယုံကြည်ပါတယ်...
မေတ္တာဖြင့်
𝑨𝒎𝒂𝒏𝒅𝒂
14/03/2026
#ကိုယ့်စိတ်ကို နှောင့်ယှက်နေတာ ဘယ်သူလဲ...?
တခါတရံ စိတ်မကြည်လင် အလိုမကျ
ပင်ပန်း နုံးချိနေတတ်တယ်...
ပတ်ဝန်းကျင်မှာ ဘာသံမှ မကြားချင်အောင်
ကိုယ့်ဖြစ်တည်မှုကို မလိုချင်တော့အောင် ခံစားမိတတ်ပါတယ်...
ဒီလို ကိုယ့်စိတ်ကိုနှောင့်ယှက်နေတာ ဘယ်သူလဲ...?
စဉ်းစားမိတာတွေ အများကြီး ရှိပါလိမ့်မယ်...
ကိုယ်အလေးထားတဲ့သူတစ်ယောက်က
ကိုယ့်အပေါ် ဆိုးဆိုးရွားရွား ဆက်ဆံခဲ့တယ်...
ကိုယ့်ယုံကြည်ချက် ကိုယ်တန်ဖိုးထားတာကို
ထိခိုက်စေမယ့် စကားတွေ ပြောခဲ့တယ်...
ဒါမှမဟုတ်
ကိုယ့်ဘဝကို နားလည်မပေးဘူး ...
ကိုယ့်ဖြစ်တည်မှုကို သဘောမကျဘူး ပြောခဲ့တယ်ဆိုရင် ...
#သူပြောတဲ့ စကားတွေကြောင့်
ကိုယ့်ကိုကိုယ် မေးခွန်းတွေထုတ်နေမိတယ်...
"သူပြောသလိုများ ကိုယ်က ဖြစ်နေလား?"
"သူ ကိုယ့်အပေါ် မကောင်းနိုင်တာ ကိုယ့်အပြစ်လား"
"ကိုယ့်မှာ လိုအပ်ချက်ရှိနေလို့လား?"....
အဲ့လို အတွေးတွေများလာပြီး
နောက်ဆုံး ကိုယ့်ကိုကိုယ် သံသယဝင်လာတယ်...
အဲ့ဒီစကားတွေ စိတ်ထဲ ထည့်ထားပြီး
ကိုယ့်ကိုကိုယ် အထင်သေး အားငယ်လာတယ်...
ကိုယ်က သူပစ်ချထားခဲ့တဲ့ နေရာမှာပဲ
ပြန်မရပ်တည်နိုင်တော့သလို
မျှော်လင့်ချက် ကင်းမဲ့လာတယ်...
ကိုယ့်ကိုကိုယ်လည်း နှစ်သိမ့်မပေးနိုင်ဘူး ...
#ကိုယ့်ရဲ့စိတ်ခွန်အားကို ဒီအတွေးတွေပေါ်မှာ ဖြုန်းမိရင်း
အကြိမ်ကြိမ် လဲပြိုနေမိတယ်...
ကိုယ့်ကိုကိုယ်လည်း ခွင့်မလွှတ်နိုင်ဘူး ...
လူတစ်ယောက် ဒါမှမဟုတ်
အကြောင်းအရာ အဖြစ်အပျက် တစ်ခုကို
အချိန်အတော်များများ ကိုယ့်စိတ်ထဲမှာ နေရာပေးလိုက်ပြီဆိုရင်
#အဲ့ဒီအရာက ကိုယ် ခွင့်ပြုပေးနေသရွေ့
ကိုယ့်အပေါ် လွှမ်းမိုးနေတော့မှာပါ...
တခါတလေ ကိုယ့်စိတ်ခံစားမှု အခြေအနေတွေကြောင့်
မတတ်သာလို့ စွန့်လွှတ်လိုက်ရတဲ့ ဆက်ဆံရေးတွေရှိနိုင်သလို
မဖြစ်သင့်မှန်းသိရက်နဲ့
ရှေ့ဆက်တိုးမိနေတဲ့ ဆက်ဆံရေးတွေလည်း
အများကြီး ရှိနိုင်ပါတယ်...
တကယ်တော့
တစ်ဖက်လူကို အတင်းဆွဲထားခဲ့တဲ့ relationship အတော်များများက
တကယ်ချစ်လို့ ဆိုတာထက်
ကိုယ့်ကို ချန်ရစ်ခဲ့တာ မကြိုက်လို့လည်း ဖြစ်နိုင်ပါတယ်...
အာရုံစိုက်ခံရတာ အလေးပေးခံရတာ ကြိုက်တဲ့သူတွေမှာ
အများဆုံး ဖြစ်တတ်ပါတယ်...
တကယ်တော့
#ကိုယ့်ရဲ့အသိဥာဏ်ကို စိတ်ခံစားမှုထက်
ပိုပြီးသန်မာနေအောင် လေ့ကျင့်ထားသင့်ပါတယ်...
အဲလိုမှမဟုတ်ရင်
ကိုယ့်စိတ်ကို ကိုယ်မပိုင်ပဲ
#အချိန်တိုင်း ကိုယ့်ကိုကိုယ် ဆုံးရှုံးနေရတတ်ပါတယ်...
ကိုယ့်ရဲ့ emotionတွေကို
ကျိုးကြောင်းဆင်ခြင်တတ်တဲ့ အသိဥာဏ်နဲ့
management လုပ်နိုင်ဖို့က
#လူတိုင်းအတွက် အရေးပါတဲ့ အရည်အချင်းတစ်ခုပါပဲ...
စိတ်ဓာတ်ကြံ့ခိုင်ဖို့အတွက် လေ့ကျင့်ယူတဲ့အခါမှာလည်း
အချိန်တစ်ခု လိုပါတယ် ...
#ကိုယ့်စိတ်က ကိုယ့်ကိုပြန်ပြီး အနှောင့်အယှက်မပေးနိုင်အောင်
တည်ငြိမ်မှုရှိဖို့ လက်ခံတတ်ဖို့ ကြိုးစားရမှာပါ...
ကိုယ့်စိတ်ကို ပိုနားလည်ချင်တယ်
ဆက်ဆံရေးပြဿနာတွေကို အတူတကွဖြေရှင်းချင်တယ်ဆိုရင်
Viber/Telegram မှ တဆင့်ဆက်သွယ်ပြီး counseling ရယူနိုင်ပါတယ်....
ချစ်ခြင်းမေတ္တာနဲ့ ငြိမ်းချမ်းကြပါစေရှင်...🤍
𝑨𝒎𝒂𝒏𝒅𝒂
March 2026
#ဒီနေ့အတွေး
08/03/2026
အမျိုးသမီးတို့ရေ....
ကိုယ့်ကိုယ်ကို မေးကြည့်ပါဦး...
ကိုယ့်အတွက် အချိန်ပေးပြီး ဂရုစိုက်ဖြစ်ရဲ့လား...?
ကိုယ့်ကိုယ်ကို ချစ်ဖို့ မေ့နေတာ ကြာပြီလား...?
ကျမတို့အမျိုးသမီးတွေက အမျိုးသားတွေထက်
စိတ်ဖိစီးမှုကို ပိုပြီး ခံစားရနိုင်ပါတယ်...
နေ့စဥ်အလုပ်တွေနဲ့ လုံးပန်းနေကြပေမယ့်
တခါတရံ ကိုယ့်ကိုကိုယ် တွေးမိရင်း
စိတ်ပျက်အားငယ် ဝမ်းနည်းလာတယ်...
ဝမ်းနည်းရာကနေ စိတ်ဓာတ်ကျလာပါတယ်...
အဲ့ဒီ ခံစားချက်က ကိုယ့်ကို အခြားလူတစ်ယောက်လို
ပြောင်းလဲသွားစေနိုင်ပါတယ်...
ဘဝမှာ လူတိုင်း စိတ်ညစ်တစ်ခါ ပျော်တစ်လှည့်ပါပဲ...
Single အမျိုးသမီးလေးတွေဖြစ်ဖြစ် အိမ်ထောင်ရှင်လေဒီတွေပဲဖြစ်ဖြစ်
ကိုယ့်ဘဝကို အကောင်းဆုံးဖြတ်သန်းနေဖို့ပါပဲ...
ဒီနေ့ကစပြီး
ကိုယ့်ဘဝကို ပိုလှပအောင် ကျေနပ်စရာဖြစ်အောင် နေထိုင်သွားမယ်လို့
ကိုယ့်ကိုကိုယ် သတိပေးကြရအောင်နော် ...
🌸 ကိုယ့်ကိုကိုယ် အချိန်ခဏပေး ဂရုစိုက်ပါ...
🌸 ကိုယ့်ကျန်းမာရေးကိုလည်း ဂရုစိုက်ပါ....
🌸 Personal Growth အတွက် ရည်မှန်းချက်တွေ ထားပါ..
🌸ကိုယ့်ကိုကိုယ် အရှိအတိုင်း လက်ခံပါ...
🌸အကောင်းမြင်တတ်သူ ဖြစ်ပါစေ...
🌸စိတ်ကို အမြဲရှင်းရှင်းထားရင် သိပ်ကောင်းပါတယ်..
🌸ကိုယ်ပိုင်ဆိုင်တာလေးတွေကို တန်ဖိုးထားပြီး ကျေးဇူးတင်ကြရအောင်...
🌸ကိုယ့်ကိုကိုယ် လေးစားပါ...အခြားသူတွေကိုလည်း လေးစားကြရမှာပါ...
🌸ကိုယ့်ကိုကိုယ်ယုံကြည်ပြီး မမှီခိုတတ်တဲ့သူ ကိုယ်တိုင်ရပ်တည်နိုင်တဲ့
စိတ်ခွန်အားကို မွေးမြူပါ ...
🌸အရေးကြီးဆုံးက ကိုယ့်ကိုကိုယ် ချစ်ဖို့ မမေ့ပါနဲ့...
"Give to Gain" ဆိုတဲ့အတိုင်း
ကိုယ့်ကိုကိုယ် ပေးလိုက်တဲ့ ဂရုစိုက်မှု၊ ချစ်ခြင်းနဲ့ အားပေးမှုတွေက
ပိုမိုတောက်ပတဲ့အရည်အသွေးနဲ့ ယုံကြည်မှုတွေကို
ပြန်လည် ရရှိလာပါလိမ့်မယ် ...
ကျမတို့အမျိုးသမီးတွေက နူးညံ့လှပတဲ့ပန်းလေးတွေ ဖြစ်သလို
လိုအပ်ရင်လည်း ကျောက်ဆောင်တွေလို မာကျောနိုင်ကြပါတယ်....
ဦးနှောက်နဲ့စဉ်းစားနိုင်သလို နှလုံးသားနဲ့လည်း ချစ်နိုင်ကြတယ်...
တာဝန်တွေအများကြီးယူနိုင်တဲ့သူတွေဖြစ်သလို
ကိုယ်ချစ်တဲ့သူတွေအတွက်
နွေးထွေးမှုရော အလင်းရောင်ပါပေးနိုင်တဲ့ နေရောင်ခြည်တွေပါ....
ပတ်ဝန်းကျင်က အသိအမှတ်ပြုရတဲ့အမျိုးသမီး ...
ကိုယ့်လက်တွဲဖော်က တန်ဖိုးထားရတဲ့အမျိုးသမီး. ...
သားသမီးတွေက လေးစားမြတ်နိုးရတဲ့မိခင်အဖြစ် ...
ကိုယ်ရည်ကိုယ်သွေး ကိုယ်စီနဲ့
ကိုယ်တိုင် ထွန်းလင်းတောက်ပနိုင်ပါတယ်...
အမျိုးသမီးများနေ့အတွက်
စကားဝိုင်းတစ်ခုမှာ မျှဝေပေးဖြစ်ခဲ့တဲ့ ကျမရဲ့အတွေးအမြင်တွေပါ...
ကျမ မျှဝေပေးတဲ့အချက်တွေနဲ့ ကိုယ့်ကိုကိုယ် မေးကြည့်ပါဦး...
ကိုယ့်ဘဝကိုယ် အကောင်းဆုံး တည်ဆောက်ရင်း
နေ့ရက်တွေကို အဓိပ္ပါယ်ရှိရှိ ဖြတ်သန်းကြရအောင်နော်...
March 2026
𝑨𝒎𝒂𝒏𝒅𝒂
07/03/2026
#စကားလုံးတိုင်းကို ခံစားနေဖို့ လိုလို့လား....
အဓိက က နေ့စဥ်ကြားနေရတဲ့စကားလုံးတိုင်းကို
လက်ခံမှု တုံ့ပြန်မှု မှန်ကန်ဖို့ လိုပါတယ် ...
စကားလုံးရွေးချယ်မှုကတစ်ဆင့် အကျိုးမဲ့ပြီး
အကုသိုလ် ဖြစ်မသွားစေဖို့ သတိပြု ဆင်ခြင်ရမှာပါ...
ချီးမွမ်းစကားမျိုးကြားရရင်
ကြည်နူးမှုခံစားရလို့ ကျေးဇူးတင်စရာပါ...
လှိုက်လှိုက်လှဲလှဲ လက်ခံတုံ့ပြန်ရမှာဖြစ်သလို
ကိုယ်က သူများကိုပြောရမယ်ဆိုရင်လည်း
ကြည်လင်တဲ့စိတ်ရင်းအမှန်နဲ့ ချီးမွမ်းရမှာပါ...
နားထောင်ဖို့ခက်တဲ့ ဝေဖန်တဲ့စကားမျိုး ကြားရတဲ့အခါ
ငါ့ကိုမှ ပုဂ္ဂိုလ်ရေး တိုက်ခိုက်တာလို့မမြင်ဘဲ
စိတ်ကို ဖွင့်ပြီး လက်ခံပေးရပါမယ်...
အချိန်ယူပြီး ပြန်လည်ဆင်ခြင် သုံးသပ်သင့်ပါတယ်...
ကိုယ့်ကို ပိုမိုတိုးတက်ဖို့ ပေးလာတဲ့အခွင့်အလမ်းလို့ မှတ်ယူရမှာပါ...
အပြုသဘောဆောင်တဲ့ ဝေဖန်မှုတွေကိုလည်း
လေးလေးစားစားနဲ့ လက်ခံတုံ့ပြန်တတ်ဖို့ လိုအပ်ပါတယ်...
တချို့သူတွေရဲ့စကားတွေက တုံ့ပြန်စရာမလိုပေမယ့်
တချို့စကားတွေကျတော့ ဖြေရှင်းမှ ဖြစ်မှာမျိုးဆို
ဒေါသနဲ့ တုံ့ပြန်တာမျိုးမဟုတ်ပဲ
ကျိုးကြောင်းဆင်ခြင်ဉာဏ်ကို အခြေခံပြီး တုံ့ပြန်ရမှာပါ...
ရင့်သီးကြမ်းတမ်းတဲ့ စကားလုံးတွေဆို
ကိုယ့်နားက ကြားလိုက်ရင်တောင်
စိတ်နှလုံးသားထဲထိ မရောက်စေဘဲ လျစ်လျူရှုထားရမှာပါပဲ...
#မတုံ့ပြန်တိုင်း ငုံ့ခံတဲ့သဘောမှ မဟုတ်တာ...
ဒေါသနဲ့ သတိလက်လွတ် ပြုမူပြောဆိုမိတာတွေက
အရုပ်ဆိုးတဲ့ တုံ့ပြန်မှုတွေ လုပ်မိတတ်တယ်...
စကားလုံးတွေက ပျောက်ကွယ်သွားပေမယ့်
ကိုယ့်လုပ်ရပ်က အခြားသူတွေရဲ့အမြင်မှာ ထင်ကျန်နေတယ်...
လုပ်ရပ်တိုင်းမှာ သက်ရောက်မှုရှိနေတာလေ...
#စကားလုံးတိုင်းကို လိုက် ခံစားနေဖို့မလိုပါဘူး...
ကိုယ့်စိတ်ခံစားမှုကြောင့် တုံ့ပြန်မယ်ဆိုရင်လည်း
မေတ္တာ လား... ဥပေက္ခာ လား ...
ထိုက်တန်တာသာ ပြန်ပေးလိုက်ပါ....
𝑨𝒎𝒂𝒏𝒅𝒂
March 2026
#ဒီနေ့အတွေး
04/03/2026
လွန်ခဲ့တဲ့ရက်ပိုင်းက
လမ်းထဲမှာ နာရေးတစ်ခုဖြစ်တယ်...
အဲ့နေ့မှာပဲ
မျက်နှာချင်းဆိုင်တိုက်က ညီမလေးတစ်ယောက်
မီးဖွားပြီး ဆေးရုံကဆင်းလာတယ်...
ကလေးအနှီးလေးအုပ်ပြီး ကားပေါ်ကဆင်းလာတာကြည့်နေမိတော့
တိုက်တိုက်ဆိုင်ဆိုင်ပါပဲ
နာရေးအိမ်က dead bodyကို ကားပေါ်တင်နေတာ တွေ့ရတယ်...
ဘာရောဂါ၊ ဘာ့ကြောင့်ဆိုတဲ့ ခေါင်းစဥ်တွေ ကွဲလွဲကြပေမယ့်
သေဆုံးခြင်းဆိုတဲ့ ဘဝနိဂုံးကတော့ အတူတူပါပဲ...
#ဝင်ကစွပ်တွေလို အငှားခန္ဓာနဲ့ ခရီးသွားနေကြရတာမလား ....
#မွေးဖွားခြင်းနဲ့ သေဆုံးခြင်းကြားက ကာလကို
"ရှင်သန်ခြင်း"လို့ သတ်မှတ်ကြတာပါ....
ခုလက်ရှိရထားတဲ့ လူ့ဘဝကို
ဘာအဓိပ္ပာယ်အတွက် ရှင်သန်နေရမှန်း မသိလောက်အောင်
အလဟဿကုန်ဆုံးပစ်ရင် လူဖြစ်ရကျိုးနပ်ပါ့မလား ...
လူဖြစ်ရတဲ့တစ်ဘဝ တခဏကို အကောင်းဆုံးအသုံးချနိုင်မှ
လူဖြစ်ရကျိုးနပ်မှာပါ...
#ကိုယ်ရှင်သန်နေတဲ့ ဘဝကို
အဓိပ္ပါယ်ရှိတယ်လို့ ခံစားနေရဖို့ လိုပါတယ် ....
ရှင်သန်နေရတဲ့ အဓိပ္ပါယ် ရှိမှ
ဘဝက အသက်ဝင်မှာပါ...
#ကောင်းတဲ့ ရည်ရွယ်ချက်တွေနဲ့
အသက်ရှင်နေဖို့ အရေးကြီးပါတယ်....
အကောင်းအဆိုး အမှားအမှန် ကုသိုလ် အကုသိုလ်ကို မသိပဲ
#အသက်ရှင်နေလည်း ဘဝ သေနေသလို အချည်းနှီးပါပဲ.....
သိတော့သိတယ် သတိက မလိုက်နိုင်ဘူးဆိုရင်လည်း
အမှားတွေ ပြောမိလုပ်မိရင်း အပြစ်တွေများလာပြီး
ပြင်ဖို့ခက်လာရင် ကိုယ့်ဘက်က အရှုံးချည်းပါပဲ...
ကိုယ်ရထားတဲ့ လူ့ဘဝ အကျိုးရှိရှိ နေသွားနိုင်ဖို့က
စိတ်ရဲ့သဘာဝတွေကို သိနေရမှာပါ....
#စိတ်ရဲ့အရည်အသွေးကို ကောင်းမွန်အောင် လေ့ကျင့်နိုင်မှ ဖြစ်မှာပါ....
#ဘဝမှာ ကျေနပ်စရာအကောင်းဆုံးကတော့
အမှားအမှန်ကို ခွဲခြားနိုင်တဲ့ သိစိတ် ရှိနေတာပါပဲ...
အဲ့ဒီအသိဉာဏ်နဲ့ပဲ ကိုယ့်ဘဝကို အသက်ဝင်စေတာပါ...
𝑨𝒎𝒂𝒏𝒅𝒂
March 2026
#ဒီနေ့အတွေး
02/03/2026
#သို့ ဖေဖေ …
ဖေဖေနဲ့စကားမပြောဖြစ်ပေမယ့် သမီး အမြဲသတိရနေပါတယ် ...
#ဖေဖေ မှတ်မိလား…
တခါ ကျူရှင်ကအိမ်အပြန် လမ်းဖြတ်ကူးရင်း
သူငယ်ချင်းတွေအကြောင်း ပြောပြတော့
"သူတို့က သမီးလုပ်နိုင်မှန်းသိလို့ဖြစ်မယ်...သမီးတော်တာ ပြလိုက်…
ငါ့သမီးက တော်ပြီးသား” လို့ ဖေဖေပြောခဲ့တာ ...
သမီး ဖေဖေ့မျက်နှာကို မော့ကြည့်ခဲ့တယ်...
ဖေဖေက တကယ်ပြောနေတာပဲ…
ယုံကြည်မှုအပြည့်နဲ့ ငုံ့ကြည့်ပြီး
ကိုင်ထားတဲ့သမီးလက်ကို ခပ်တင်းတင်းဆုပ်ရင်း ပြုံးပြလိုက်သေး …
အတန်းထဲမှာ အလယ်အလတ်တန်းက ကျမ
ဖေဖေ့အတွက်တော့ တော်တဲ့သမီး လား ....
ငယ်ကတည်းက ခေါင်းမာပြီး စိတ်ပါမှ စာလုပ်
ကျက်စာတွေဆို“နားလည်ရင်ပြီးတာပဲကို”လို့ စောဒကတက်တဲ့ သူ...
စာ သာ မကြိုးစားတာ
ဖေဖေ့စာအုပ်စင်တော့ အမြဲမွှေနှောက် ဖတ်လို့ရတာအကုန်ဖတ်...
တချို့စာအုပ်တွေ အခါခါဖတ်လွန်းလို့ မှတ်မိနေတဲ့အထိ....
PE ချိန် ဆရာမတွေမဝင်ရင် အတန်းထဲကလူတွေ စုပြီး
ဖတ်ထားတဲ့ စာတွေ ပုံပြင်တွေ ပြော…
အချိန်အားရရင် ပုံတွေဆွဲနဲ့
ဘယ်လိုများ စာတော်ပါတော့မလဲ ဖေဖေရယ်…
#ဖေဖေ မှတ်မိလား…
သမီး ပုံတွေဆွဲတာ ရူးသွပ်လွန်းလို့
ဖေဖေဆူတဲ့ကြားက အချိန်အားရှိသမျှ ဆွဲနေတော့
“ဒီတခါ ပုံတွေတွေ့ရင် အကုန်လွှင့်ပစ်မယ်”လို့ ဖေဖေစိတ်တိုပြီးပြောခဲ့တာ…
ဖေဖေ မတွေ့ခဲ့ဘူးမဟုတ်လား…
သမီးက ဖေဖေ့စန္ဒယားထိုင်ခုံ အံလေးထဲ ထည့်ထားတာလေ…
#ဖေဖေ မှန်ပါတယ်…
သမီးက ကိုယ်လုပ်ချင်တာတွေလုပ်ရတဲ့အခါ နည်းနည်း တော်ပါတယ်...
၉တန်းတုန်းက ကျူရှင်တစ်ရက်ဖျက်ပြီး
ကျောင်းပွဲအတွက် သီချင်းသွားတိုက်ခဲ့သေးတာလည်း ရှိတယ်လေ…
ပုံမှန်ဆို စည်းကမ်းကြီးတဲ့မေမေက ဒါမျိုး ဘယ်ရလိမ့်မလဲ…
အဲ့နေ့က ဖေဖေကချည်း ဦးဆောင်ဆူသွားတော့
မေမေ ဘာမှမပြောတော့တာ …
ပြီးမှ ဖေဖေက “ဘာလို့ ဖေဖေ့ကို အရင်မပြောခဲ့လဲ”တဲ့ ...
“ပြောရင် သွားခိုင်းမှာမို့လား” လို့ ပြန်မေးတော့ ဖေဖေ မဖြေတော့ဘူး...
#ဖေဖေ မှတ်မိတယ် နော်…
သမီး နောက်ရက်တွေ သီချင်းသွားမတိုက်ပဲ
ကျောင်းပွဲမှာ မဆိုဖြစ်တော့တာ …
သမီးက ဖေဖေ မကြိုက်တာ မလုပ်ခဲ့ဖူးဘူး မလား…
သမီးအလုပ်တွေ လုပ်တော့ရော
ဖေဖေ့ဆီက အင်အားတွေ အများကြီး ရခဲ့တယ် ...
Japan company တခုမှာ designer သွားလျှောက်တုန်းက
ဖေဖေက“သူတို့ ငါ့သမီးကို ခန့်မှာပါ” ပြောတော့
ကိုယ့်ထက် လုပ်သက်နဲ့ အရည်အချင်းပိုသာတဲ့သူတွေမြင်ခဲ့တာတောင်
မကြောက်ခဲ့ဘူး... ဖေဖေပြောသလို ယုံကြည်နေခဲ့တာ...
အလုပ်ရသွားပြီလို့ ဖုန်းဆက်လာတော့
ဖေဖေက ကိုယ့်ထက် ပျော်ခဲ့သေးတာ …
#ဖေဖေ သိလား…
ခုထိ တခါတလေ အခက်အခဲတွေ တွေ့တဲ့အခါ
"ဖေဖေက ငါ့ကို သိပ်ယုံကြည်တာ…
ငါ တော်မနေတောင် မညံ့မှ ဖြစ်မယ်…
ငါက ဖေဖေယုံကြည်တဲ့အတိုင်းဖြစ်နေရမယ်"လို့စိတ်အားတင်းထားတယ်...
ဖေဖေနဲ့ နောက်ဆုံးဖုန်းပြောတုန်းက
“သမီး မေမေ့ကို ဂရုစိုက်…မကြီးနဲ့ အငယ်တွေကိုရောပဲ…
ဖေဖေက သမီးကို ယုံတယ်နော်” လို့ ပြောခဲ့တယ် ...
အဲ့တာ နောက်ဆုံးမှန်း သိခဲ့ရင်
သမီး ဖုန်းမချပဲ ဆက်ပြောနေမိမှာ …
“ဒါပဲနော် ဖေဖေ” လို့ ပြောခဲ့တုန်းက
နောက်တကြိမ် ဖုန်းပြောရမယ်ဆိုတဲ့ မျှော်လင့်ချက်ကို
နှစ်တွေ အကြာကြီး သိမ်းထားခဲ့ဖူးတယ် ...
#ဖေဖေ …
ဖေဖေ ပြန်မလာတော့လို့
သမီးတို့ လွမ်းနေ၊ သတိရနေတာကလွဲရင် အပြစ်မတင်ပါဘူး …
ဖေဖေက ဘယ်ရောက်နေနေ
သမီးတို့ရင်ထဲမှာ အမြဲရှိနေတာ …
သံသရာဆိုတဲ့ ခရီးတနေရာမှာ
ဖေဖေ ရှိနေတာ မလား …
တချိန်ချိန် တနေရာမှာ
ဖေဖေနဲ့ ပြန်တွေ့ကြရင်
ဖေဖေ့သမီး ပြန်ဖြစ်ချင်တယ် …
#အဖေများနေ့ တဲ့…
ဒီနေ့ ပိုလွမ်းတယ် ဖေဖေ… 🤍
𝑨𝒎𝒂𝒏𝒅𝒂
March 2026
27/02/2026
သူက အနှစ်လေးပါ…
သူတို့ အနှစ်လေးတွေအားလုံး
ဒီမြင့်မားတဲ့ တောင်ကုန်းကြီးကို တက်နေခဲ့ကြတာပါ ...
တိတိကျကျပြောရရင်
သူတို့ဘဝတစ်ခုလုံး တောင်ထိပ်ကိုရောက်ဖို့ ကြိုးစားတက်ရင်းနဲ့ပဲ
ကုန်ဆုံးကြပါတယ်...
တချို့က အမြန်တက်နိုင်ကြပြီး
တချို့ကတော့ အတက်နှေးပါတယ် …
အဲဒီထဲမှာ သူက အရမ်းနှေးပါတယ် ...
တောင်တက်နေရင်း
တခြားအနှစ်လေးတွေ သူ့ကို ကျော်သွားတာကိုမြင်တိုင်း
သူ့စိတ်ထဲမှာ မပျော်ပါဘူး ...
သူကိုယ်တိုင် အညံ့ဖျင်းဆုံး တောင်တက်သမားဖြစ်နေမလားလို့တောင်
ခံစားခဲ့ရပါတယ် …
တချို့က သူ့ကို ကျော်တက်ရင်း လှောင်ပြောင်ကြပေမယ့်
တချို့ကတော့ ကူညီချင်ကြပါတယ်…
ဒါပေမယ့် သူက အကူအညီ မယူခဲ့ပါဘူး ...
တောင်တက်ရတာ သူ့အတွက် ခက်ခဲပါတယ်..
မိုးရွာလို့ မြေကြီးတွေ ချောနေတဲ့အခါဆို
ပိုပြီး ခက်ခဲပါသေးတယ် …
အဲဒီလိုနဲ့ တစ်နေ့မှာတော့
သူ့ထက်တောင် ပိုနှေးတဲ့ အနှစ်လေးနဲ့ ဆုံခဲ့ပါတယ် ...
အဲဒီအနှစ်လေးကို တောင်တက်ဖို့
သူ ကူညီပေးခဲ့တဲ့အခါမှာ
“ကျေးဇူးတင်ပါတယ်” လို့
ပိုနှေးတဲ့ အနှစ်လေးက ပြောပါတယ် ...
“ရပါတယ်… ငါက တောင်တက်တာ အရမ်းနှေးတော့
ဘယ်သူ့ကိုမှ သိပ်မကူညီနိုင်ဘူး” လို့
အားငယ်တဲ့စိတ်နဲ့ သူ ပြန်ပြောလိုက်မိတယ် ...
အဲဒီအခါ ပိုနှေးတဲ့ အနှစ်လေးက ပြန်မေးတယ် ...
“နှေးတယ် ဟုတ်လား?
မင်း မြန်သလား၊ နှေးသလားတော့ ငါမသိဘူး…
ဒါပေမဲ့ ငါသိတာကတော့
မင်း ငါ့ကို ကူညီခဲ့တယ်… ပြီးတော့
မင်း အခုထိ တောင်တက်နေတုန်း ဆိုတာပါပဲ”
သူ့စကားကြောင့်
အနှစ်လေး ပြုံးလိုက်မိတယ် ...
“ဟုတ်တယ်…ငါ အခုထိ တက်နေတုန်းပဲ…
#ဒါဟာ အမှန်တရားပဲ…”
ဒါနဲ့ပဲ သူ ဆက်တက်နေခဲ့ပါတယ် ...
ရာသီဥတု သာယာချိန်မှာရော
မိုးရွာချိန်၊ နှင်းကျချိန်တွေမှာပါ
သူ မရပ်ခဲ့ပါဘူး ...
တက်ရင်း တက်ရင်းနဲ့
သူ ပိုတော်လာပါတယ် ...
တခါတလေ သူက သူများကိုကျော်တက်သလို
တခါတလေ သူများတွေကလည်း သူ့ကို ကျော်တက်ပါတယ်…
ဒါပေမယ့် အဲဒီအရာတွေကို သူ ဂရုမစိုက်တော့ပါဘူး ...
တချို့ အနှစ်တွေက ဆက်မတက်တော့တာကို
သူ သတိထားမိလာတယ် ...
တောင်တက်တာ ရပ်လိုက်တဲ့သူတွေဟာ
ရောက်နေတဲ့နေရာမှာပဲ ကျန်ခဲ့ကြတယ် ..
တချို့က သူတို့ရောက်နေတဲ့နေရာကိုကျေနပ်လို့ ရပ်လိုက်ကြတာဖြစ်ပြီး
တချို့ကတော့ ဆက်မတက်ချင်တော့လို့ ရပ်လိုက်ကြတာပါ ...
တချို့က တခြားသူ ကျော်တက်တာကို မကြိုက်ကြလို့
လမ်းကို ပိတ်ဆို့ထားကြတယ် …
ဒါပေမဲ့ သူကတော့ ခိုင်မာတဲ့စိတ်နဲ့
ဖြတ်ကျော်ပြီး ဆက်တက်သွားခဲ့ပါတယ်...
တခါတလေတော့
ဒီတောင်ကြီးကို တက်ဖို့ မဖြစ်နိုင်တော့ဘူးလို့ အတွေးဝင်လာပေမယ့်
#သူ ဆက်တက်နေခဲ့ပါတယ်…
အမြဲတမ်း…
အမြဲတမ်း…
𝑫𝒆𝒂𝒓 𝒀𝒐𝒖,💛
“𝐃𝐚𝐧𝐢𝐞𝐥 𝐄𝐫𝐫𝐢𝐜𝐨”ရဲ့ “𝐓𝐡𝐞 𝐆𝐫𝐞𝐚𝐭 𝐇𝐢𝐥𝐥”ကို
စာဖတ်သူတွေအတွက် ဝေမျှပေးတာပါ…
စာရေးဆရာက ဒီပုံပြင်ထဲက ဇာတ်ကောင်လေးတွေကို “ကြက်ဥအနှစ်”အဖြစ်
စိတ်ဓာတ်ကျလွယ်၊ ဝမ်းနည်းလွယ်တဲ့ လူသားတွေရဲ့ သဘောသဘာဝကို ကိုယ်စားပြုထားပါတယ် ...
#ကျမတို့အားလုံးဟာ_
ကိုယ့်ရည်မှန်းချက်ဆီ တက်လှမ်းနေကြတဲ့
“ကြက်ဥအနှစ်လေး”တွေပါပဲ ...
ဘဝရဲ့ အခက်အခဲတွေဟာ
တစ်ယောက်တည်းအပေါ်မှာပဲ ကျရောက်နေတာမဟုတ်ပါဘူး ...
#လူတိုင်းမှာ ကိုယ်စီ စိန်ခေါ်မှုတွေ ရှိနေတတ်ပါတယ်...
#အရေးကြီးဆုံးက_
မရပ်မနား ဆက်ကြိုးစားသွားဖို့ပါပဲ ...
#မရပ်မနား ကြိုးစားနေမယ်ဆိုရင်
အောင်မြင်မှုဟာ လက်တစ်ကမ်းမှာပါ...
𝐑𝐞𝐦𝐞𝐦𝐛𝐞𝐫,
"𝑪𝒐𝒏𝒔𝒊𝒔𝒕𝒆𝒏𝒄𝒚 𝒊𝒔 𝒌𝒆𝒚."🔑
With Love,
Aᴍᴀɴᴅᴀ
February 2026
08/03/2026
07/03/2026
04/03/2026
02/03/2026
27/02/2026