Magic Finger music

ကျေးရွာတွေကို မီးရှို့တဲ့လုပ်ရပ်တွေအမြန်ဆုံးရပ်တန့်ဖို့ ရွှေဆံပင်ဆရာတော်မိန့်ကြား

ရွှေဆံပင်တံတားစခန်းပညာဒါနကျောင်းမှာ စစ်ရှောင် ၅၀၀ကျော် စောင့်ရှောက်ထား

စစ်ကိုင်းတိုင်းအတွင်းကျေးရွာတွေကို စစ်ကောင်စီတပ်ဖွဲ့တွေဝင်ရောက်ကာ နေအိမ်တွေမီးရှို့တဲ့လုပ်ရပ်တွေနဲ့ပတ်သက်ပြီးအမြန်ဆုံးရပ်တန့်ဖို့ တောင်းပန်တဲ့အကြောင်း ရွှေဆံပင်ဆရာတော် အရှင်ဝေပုလ္လက တောင်းဆိုမိန့်ကြားလိုက်ပါတယ်။

ဒါဟာစစ်ကိုင်းတိုင်းအတွင်းက ပြည်သူတွေရင်ဆိုင်နေရတဲ့အခြေအနေတွေနဲ့ပတ်သက်ပြီး ထင်ရှားတဲ့ ဆရာတော် တွေထဲ လူမှုကွန်ရက်ကနေပထမဆုံးမေတ္တာရပ်ခံချက်မိန့်ကြားဖော်ပြလာတဲ့ ဆရာတော်လည်းဖြစ်ပါတယ်။

မကြာသေးခင်အချိန်တုန်းက စစ်ကိုင်းတိုင်း၊ ပုလဲမြို့နယ်၊ သီတင်းရွာမီးရှို့ခံရချိန်မှာလည်း သက်တော်၉၈နှစ်အရွယ် နိုင်ငံတော်သြဝါဒါစရိယ သီတင်းဆရာတော်ကြီးကို တပည့်ရွာခံတွေက ထော်လာဂျီပေါ်တင်ပြီး အတင်းပင့်ပြေးကြရတဲ့အပြင် ဆရာတော်ကြီးကျောင်းအပါအဝင် အိမ် (၁၂၀) ကျော်လက်နက်ကြီးတွေပစ် မီးရှို့ခံရတယ်လို့ ရွှေဆံပင်ဆရာတော်ရဲ့ ဖော်ပြချက်အရ တွေ့ရပါတယ်။

"ဒီအကုသိုလ်တွေကလွန်ကျူးသူရော၊စေခိုင်းသူပါ သံသရာမှာ လူမွှေးမပြောင်အောင် ခံကြရမှာပါ။ ကိုယ့်ပြည်သူကိုမီးရှို့တဲ့လုပ်ရပ်ကြီးတွေကအတော်ကိုဆိုးဝါးလွန်းပါတယ်။ မကောင်းတဲ့လုပ်ရပ်ကို ရပ်တန့်တာ နောက်ကျတယ်ဆိုတာ မရှိပါဘူး" လို့ ရွှေဆံပင်ဆရာတော်ရဲ့ လူမှုကွန်ရက်စာမျက်နှာပေါ်မှာ ရေးသားထားပါတယ်။

ဒါ့အပြင် ရွှေဆံပင်တံတားစခန်းပညာဒါနကျောင်းမှာလည်း လက်ရှိမှာကျောင်းမဖွင့်နိုင်ဘဲ စစ်ဘေးရှောင်ပြည်သူ ခန့်မှန်း အယောက်(၅၀၀) ကျော်လောက်ကိုကျွေးမွေးစောင့်ရှောက်ထားတယ်လို့ ဆိုပါတယ်။

ဒီသတင်းအပြည့်အစုံကိုအောက်ဖော်ပြပါလင့်ကနေ ဆက်လက်ဖတ်ရှု့နိုင်ပါတယ်။
https://www.bbc.com/burmese/live/burma-61580209

ပုံစာ - ရွှေဆံပင်ဆရာတော်ရဲ့လူမှုကွန်ရက်စာမျက်နှာဖော်ပြထားတဲ့ ယင်းမာပင်မြို့နယ်၊လည်ငေါက်ရွာမီးရှို့ခံရပြီးနောက်မြင်ကွင်း။

ဓာတ်ပုံ - Shwe Sanpin SayarTaw

#ဘီဘီစီမြန်မာပိုင်း #ရွှေဆံပင်ဆရာတော် #မီးရှို့ခံ