https://www.facebook.com/325125284820054/

Growth

Contact information, map and directions, contact form, opening hours, services, ratings, photos, videos and announcements from Growth, Education, Myitkyina.

20/05/2024

KG ပြီးဆုံးတဲ့ကျောင်းသားတစ်ယောက်မှာ ဒါတွေကျွမ်းကျင်ပြီးမြောက်ပြီးသားဖြစ်ရပါမယ်

1. အရောင်တွေကို သိရပါမယ်
2. ဘယ်ဖက်လက်၊ ညာဖက်လက်ကို သိရပါမယ်
3. မိမိအိမ်လိပ်စာကို ပြောပြတတ်ရပါမယ်
4. ဖခင်အမည်၊ မိခင်အမည် ပြောပြတတ်ရပါမယ်
5. ရက်သတ္တပတ်နေ့ရက်တွေကို ပြောပြတတ်ရပါမယ်
6. နွေ၊ မိုး၊ ဆောင်း ရာသီဥတုတွေကို ပြောပြတတ်ရပါမယ်
7. ခု၊ ဆယ်၊ ရာ၊ ထောင် ငွေကြေးအသုံးကို ပြောပြတတ်ရပါမယ် (ခု နဲ့ ဆယ်ကတော့ မသုံးသလောက်ဖြစ်၍ အနည်းငယ်အခက်အခဲတွေ့နိုင်)
8. မိမိနာမည်ကို ဖတ်တတ်ရပါမယ်
9. မိမိနာမည်ထဲက ပထမအမည်စာလုံးကို ရေးတတ်ရပါမယ်
10. ကိန်းဂဏန်း ၂၀ အထိ ရေတွက်နိုင်ရပါမယ်
11. စာအုပ်ကို အတည့်အတိုင်း ကိုင်တွယ်နိုင်ရပါမယ်
12. ပုံပြင်ဖတ်ပြတာကို ကောင်းကောင်း နားထောင်တတ်ရပါမယ်
13. ကာရံစကားလုံး (rhymes) များကို သတိထားတတ်ရပါမယ်
14. KG သီချင်းများ သီဆိုတတ်ရပါမယ်
15. သီချင်းထဲက စာသားအတိုင်း လိုက်လုပ်တတ်ရပါမယ်
16. ရွှံ့၊ ရွှံ့တု စသည်တို့ဖြင့် ကစားတတ်ရပါမယ်
17. ပုံဆွဲ၊ ရောင်စုံခြယ်တတ်ရပါမယ်
18. ပန်းချီဆေးဖြင့် ပုံဆွဲတတ်ရပါမယ်
19. ကတ်ကြေးအသုံးပြု၍ စာရွက် ဖြတ်/ညှပ်တတ်ရပါမယ်
20. ဘလော့တုံးလေးများ တည်ဆောက်ဆော့ကစားတတ်ရပါမယ်
21. သဲကန်အတွင်း သဲများဖြင့် အဆင်ပြေစွာ ဆော့ကစားတတ်ရပါမယ်
22. သစ်စေ့လေးများဖြင့် အပင်လေးတွေစိုက်တတ်ရပါမယ်
23. အစားအစာတစ်မျိုးမျိုး ချက်ပြုတ်ပြင်ဆင်တဲ့အတွေ့အကြုံတစ်ခုခု ရှိထားရပါမယ်
24. အပ်နှင့် အပ်ချည် အသုံးပြုတတ်ရပါမယ်
25. တကိုယ်ရည်သန့်ရှင်းမှု ဂရုပြုတတ်ရပါမယ်
26. ခြေသည်းလက်သည်း သန့်ရှင်းနေစေရန် ဂရုပြုတတ်ရပါမယ်
27. ထမင်းစားစဉ် လက်ကိုင်ပုဝါအား ကောင်းစွာ အသုံးပြုတတ်ရပါမယ်
28. စည်းကမ်းရှိရှိ စားသောက်တတ်ရပါမယ်
29. မိမိကိုယ်တိုင် ဖိနပ်စီး/ခြေနင်းကြိုးချည် လုပ်ဆောင်တတ်ရပါမယ်
30. ယဉ်ယဉ်ကျေးကျေး ပြောဆိုတတ်ရပါမယ်
31. တဖက်သားအပေါ် ကြင်နာတတ်သလို ကူညီပေးတတ်ရပါမယ်
32. အများနဲ့ဆောင်ရွက်စဉ် လုမလုပ်ပဲ မိမိအလှည့်ရောက်ရန် စောင့်နေတတ်ရပါမယ်
33. ကစားစရာနှင့် အခြားအများပိုင်ပစ္စည်းများအား အသုံးပြုပြီး နေရာတကျ ပြန်ထားတတ်ရပါမယ်
34. မိမိနေရာမှာ ငြိမ်ငြိမ်ထိုင်ပြီး တစ်ခုခုပြောစရာရှိလျင် လက်မြှောက်ပြပြီး အခွင့်တောင်းတတ်ရပါမယ်
35. မိမိ၏ စာသင်စားပွဲခုံအား စာရေးကိရိယာများဖြင့် ရှုပ်ပွမနေအောင် ထားတတ်ရပါမယ်
36. ကျောင်းမှ အိမ်အပြန် မိမိ၏ပစ္စည်းပစ္စယများအား သေချာစစ်ဆေးတတ်ရပါမယ်

Photo - internet
Crd

04/09/2023

အတန်းပညာမှာ တော်ရုံသက်သက်ဟာ ဘဝမှာအောင်မြင်ဖို့ လုံလောက်ကောင်းမွန်တဲ့ အညွှန်းပြအခြေအနေမဟုတ်ပါဘူး။ ကလေးတွေရဲ့ အနာဂတ်အတွက် ဉာဏ်ရည် ကဏ္ဍအစုံမှာ မြင့်မားလာအောင် လေ့ကျင့်ပေးဖို့လိုအပ်ပါတယ်။

ဘဝအောင်မြင်ရေးအတွက် ဉာဏ်ရည် ခုနစ်သွယ်
----------------------------------------------------

ဒေါက်တာ ဟိုးဝပ်ဂါဒ်နာက Frames of Mind: The Theory of Multiple Intelligence စာအုပ်မှာ ဉာဏ်ရည်ကဏ္ဍ ၇မြိုးကို အဆိုပြုတင်ပြခဲ့ပါတယ်။ ဉာဏ်ရည် ၇သှယျလို့ အမည်ပေးခဲ့ပါတယ်။ ဒီဉာဏ်ရည်တွေက-
(၁) နှုတ်မှုနဲ့ဘာသာစကားဆိုင်ရာဉာဏ်ရည် (Verbal-linguistic intelligence)
(၂) သင်္ချာနဲ့ကျိုးကြောင်းဆက်စပ်မှုဆိုင်ရာဉာဏ်ရည် (Mathematical-logical intelligence)
(၃) အမြင်နှင့်ပုံဖော်မှုဆိုင်ရာဉာဏ်ရည် (Visual-spacial intelligence)
(၄) ဂီတဉာဏ်ရည် (Musical rhythmic imtelligence)
(၅) ကိုယ်ခန္ဓာလှုပ်ရှားမှုဆိုင်ရာ ဉာဏ်ရည် (Bodily-kinesthetic intelligence)
(၆) လူမှုဆက်ဆံရေးဆိုင်ရာဉာဏ်ရည် (Interpersonal intelligence)
(၇) မိမိကိုယ်ကိုယ် ရှုမြင်သုံးသပ်မှုဆိုင်ရာဉာဏ်ရည် (Intra-personal intelligence) တို့ပဲဖြစ်ပါတယ်။

ဉာဏ်ရည် ၇သှယျလုံးမှာ ထိပ်တန်းအဆင့်ရောက်တဲ့သူရှားပေမဲ့ တကယ်ထက်မြက်တဲ့ ကလေးတွေဟာ အများစုမှာအဆင့်မြင့်မြင့်ရဖို့လိုပါတယ်။ ကျောင်းသင်ဘာသာရပ်နဲ့ ဉာဏ်ရည်စစ်ဆေးလွှာတွေက နှုတ်မှုနဲ့ဘာသာစကားဆိုင်ရာဉာဏ်ရည်၊ သင်္ချာနဲ့အကျိုးအကြောင်းဆက်စပ်မှုဆိုင်ရာဉာဏ်ရည်တွေကိုသာ ပုံဖော်နိုင်တဲ့အတွက် တကယ့်ဉာဏ်ရည်အစစ်အမှန်ကို ပီပြင်အောင်ပုံမဖော်နိုင်ပါဘူး။

"ဒီဉာဏ်ရည်တွေတိုးပွားလာအောင်လုပ်ပေးလို့ရပါသလား"
မွေးကတည်းက ဉာဏ်ရည်တစ်ခုခုမှာထက်မြက်တဲ့လူတွေရှိပါတယ်။ ဒါပေမဲ့ အတွေ့အကြုံနဲ့လေ့ကျင့်မှုရရင် ဉာဏ်ရည်မြင့်မားတိုးတက်လာတယ်ဆိုတာလည်း သုတေသနတွေက တွေ့ထားပါတယ်။

"ဉာဏ်ရည်တစ်မျိုး တိုးအောင်လှုံ့ဆော်ရင် အခြားဉာဏ်ရည်တွေပါ တိုးတက်လာပါတယ်"
လူတိုင်းက အရာရာတိုင်းမှာ မတော်နိုင်ဘူးလို့ မိဘတွေယုံကြည်ထားပေမဲ့ ဉာဏ်ရည်တစ်ခု တိုးတက်အောင်လှုံ့ဆော်လေ့ကျင့်ပေးရင် အခြား ခြားနားတယ်လို့ထင်ရတဲ့ ဉာဏ်ရည်တွေလည်း တိုးတက်မှုဖြစ်စေတာ တွေ့ရပါတယ်။ ဒါကြောင့် အိုင်းစတိုင်းတို့၊ လီယိုနာဒိုဒါဗင်စီတို့လို အစွမ်းထက်မြက်သူတွေဟာ ဘက်စုံမှာ ဉာဏ်ရည်အားကောင်းကြတာ တွေ့နိုင်ပါတယ်။

[ဒေါက်တာ သိန်းလွင်၏ ကလေးတို့ဉာဏ်ရည် စာအုပ်မှ ပထမဆုံးအခန်းကို အနှစ်ချုပ်ရေးသားဖော်ပြပါသည်]

01/02/2023

ကလေးကို မနာလိုစိတ်ကင်းအောင် ပျိုးထောင်ပါ
=========================

ရှင်သန်လာတဲ့တစ်လျှောက်မှာ
မနာလိုစိတ်ရှိတဲ့သူတွေက
ကြောက်စရာအကောင်းဆုံးပဲ။

မုန်းတယ် ဆိုတဲ့ခံစားချက်ထက်
မနာလိုစိတ်က ပိုပူလောင်ပြီး
တစ်ပါးသူ ပျက်စီးရာပျက်စီးကြောင်းပဲ ဖြစ်စေချင်တယ်။

မနာလိုစိတ်သည် အားကျရာကနေ
သိမ်ငယ်စိတ်၊ အငုံစိတ်ဝင်လာရင် ဖြစ်တတ်ပါတယ်။

သူတစ်ပါးအဆင်မပြေချိန် ဝမ်းသာနေရင် မနာလိုစိတ် ကြီးမားနေလို့ပါပဲ။

ကျွန်တော် တို့ Generation မှာ
ကလေးတွေကို အငုံစိတ် မနာလိုမှု သိမ်ငယ်စိတ်တွေ မရှိအောင်
ကိုယ့်ကိုယ်ကိုယ် ချိုးနှိမ်တတ်အောင်
မွေးမြူပျိုးထောင်ပေးရမယ်။

ဒါမှ ပိုလှတဲ့နိုင်ငံ အသိုင်းအဝိုင်းဖြစ်လာမယ်။

မနာလိုစိတ်ရှိသူက အမြဲ သူတစ်ပါးကို ချိုးနှိမ်အောင်ပြောပြီး သူကပဲ အကောင်းဆုံးလို့ ဟန်ဆောင်တတ်ကြတယ်။

ဘာကြောင့်လဲဆိုတော့ စိတ်မလုံခြုံနေတာမို့။

သူများကိုကြည့် အားကျတယ်။

သူများလို လိုက်မလုပ်နိုင်တော့ ဒေါသထွက်ရတယ်။

ပြီးရင် အပြစ်တင်ဝေဖန်တိုက်ခိုက်တယ်။

ဒါ့ကြောင့် ရောင့်ရဲတတ်တဲ့ စိတ်နဲ့
အရှိကို အရှိအတိုင်းလက်ခံတတ်အောင် သင်ပေးရမယ်။

မနာလိုမှုရှိရင် သေသည်အထိ ပူလောင်ပြီး စိတ် မငြိမ်းချမ်းနိုင်ဘူး။

လူတွေမှာ မနာလိုစိတ်အားကြီးလာရင် ပျက်စီးတတ်တယ်။

မပြည့်တဲ့အိုးတွေက ဘောင်ဘင်ခတ်တယ်။

အကြွေစေ့တွေက အသံကျယ်တယ်။

သို့ဖြစ်ပါသောကြောင့် မိမိကလေးတွေကို မနာလိုစိတ် ကင်းအောင် သတိတရားနဲ့ ပြုစုပျိုးထောင်ကြပါလို့။

မိမိကလေးက အဖက်ဖက်က ပြည့်စုံနေရင် အကောင်းမွန်ဆုံး လက်ဆောင်တခုပေါ့။

Credit to original uploader

Photo - Google

22/09/2022

S*x Education ကို ဘယ်က ဘယ်လိုစပြောရမလဲ မသိဘူးဆိုတဲ့ မိဘတွေအတွက်ပါ။

ပထမဦးဆုံးတစ်ချက် - အဲဒီအကြောင်းပြောဖို့ စောလွန်းတယ် နောက်ကျ လွန်းတယ်ဆိုတာ မရှိပါဘူး၊ မီသေးတဲ့ မိဘတွေက စကားနားလည်တဲ့ ၂နှစ်က စပြောနိုင်သလို ငါတော့ နောက်ကျပြီလား တွေးနေတဲ့ မိဘတွေကလည်း ကိုယ့်ကလေး ဘယ်အသက်ဖြစ်ဖြစ် (၁၄/၁၅ ဖြစ်ဖြစ်) စပြောလို့ရပါတယ်

တခြားမှာ အများကြီးလိုက်ဖတ်လို့ရတာမို့ အတိုချုပ်ပြောရရင် ၂ချက်ပါ (၂နှစ်ကနေ ၇နှစ် / ၈နှစ်ကလေးတွေအတွက်ပါ)

၁) တစ်ကိုယ်ရည်ဆိုင်ရာ အင်္ဂါတွေ အကြောင်း ပြောပြပါ
၂) မိမိ ခန္ဓာကိုယ် မိမိသာ ပိုင်ကြောင်းပြောပါ

ဒီ၂ချက်ပါပဲ

၁) တစ်ကိုယ်ရည်ဆိုင်ရာ အင်္ဂါတွေ (private parts) အကြောင်း ပြောပြပါ

ဒီနေရာမှာ နိုင်ငံတကာမှာတော့ အတတ်နိုင်ဆုံး အခေါ်အဝေါ်တွေကို မူရင်းအတိုင်းသုံးဖို့ အားပေးကြပါတယ်၊ ဆိုလိုတာက va**na ကို မွေးလမ်းကြောင်း၊ P***s ကို လိင်တံ စသဖြင့် သုံးဖို့ပါ၊ ဘာဖြစ်လို့ နာမည်အမှန်ပဲ သုံးခိုင်းရလဲဆိုရင် ဒါမှ သူတို့ဟာ ဒီစကားလုံးတွေကို တခြားမှာ တွေ့ရင် သူတို့ရဲ့ တစ်ကိုယ်ရည်ဆိုင်ရာအင်္ဂါတွေ ဖြစ်ကြောင်းသိမှာမို့ပါ

ဒါပေမဲ့ ကျွန်မတို့ မြန်မာပြည်မှာက အခုမှစလုံးရေးစနေတဲ့ အချိန်ဆိုတော့ မိဘတွေ အဲလိုသုံးနှုံးရမှာ ဝန်လေးမှာ နားလည်ပါတယ်၊ နာမည်ပြောင်တွေ (ပိပိ၊ဂျိူဂျိုးစသဖြင့်) သုံးပြီးသင်လည်းရပါတယ်၊ အဓိကက အဲဒါတွေဟာ ရွံစရာ၊ ကြောက်စရာအဖြစ် မမြင်သွားစေဖို့ပါပဲ

ဒါကြောင့် တခြားကိုယ်ခန္ဓာအင်္ဂါရပ်တွေအကြောင်းပြောရင် ဒါကတော့ ဘယ်လိုခေါ်တယ် စသဖြင့် ပြောသွားပေးလို့ရပါတယ်။

"ဒါလေးကတော့ ဗိုက်၊ ဒါလေးက ချက်၊ ဒါလေးက ဆီးခုံ၊ ဒါလေးက ပိပိ" စသဖြင့် ပြောပြလို့ရပါတယ်၊ အဓိကက ပြောပြတဲ့ အုပ်ထိန်းသူကိုယ်တိုင်က အဲဒီအင်္ဂါတွေနားရောက်ရင် ရှိုးတိုးရှန့်တန့်မဖြစ်ဖို့၊ ဟီးဟီးဟားဟားမဖြစ်ဖို့ပါ

ဘာမှ မမြင်မကြားဖူးတဲ့ ကလေးတွေက ကျွန်မတို့ အစိုးရကျောင်းတွေမှ bio မှာ reproduction စသင်ရင် တခိခိဖြစ်သလို မဖြစ်နေပါဘူး၊ ပုံမှန်အင်္ဂါရပ်လို့ပဲ သင်ပေးရင် ပုံမှန်အင်္ဂါလို့ပဲ သဘောထားမှာပါ

ဒါပေမဲ့ ပုံမှန်အင်္ဂါထဲမှာမှ တစ်ကိုယ်ရည်အင်္ဂါဖြစ်ကြောင်း နားလည်စေရပါမယ်၊ private parts are supposed to be private တစ်ကိုယ်ရည်အင်္ဂါတွေဟာ ကိုယ့်တစ်ကိုယ်ရည်နဲ့ပဲဆိုင်တယ်ဆိုတာကို ပြောပြရမှာပါ၊

၂) မိမိ ခန္ဓာကိုယ် မိမိသာ ပိုင်ကြောင်းပြောပြပါ

S*x education ဟာ လိင်မဆက်ဆံဖို့ ဒါမှမဟုတ် လိင်ဆက်ဆံဖို့ သင်ပေးတာ မဟုတ်ပါဘူး၊ ကိုယ့်ခန္ဓာကိုယ်ရဲ့ သဘောသဘာဝကို ပြောပြတာပါ

ကလေးတွေကို အထူးသဖြင့်သိသာစေရမှာက သူတို့ခန္ဓာကိုယ်ကို သူတို့ပဲ ပိုင်တယ်ဆိုတာပါ၊ ဒါမှ အရွယ်ရောက်တဲ့အခါ လိင်ဆက်ဆံခြင်းဟာ ရွံစရာ/ရှက်စရာ နဲ့ အမြတ်ထုတ်စရာဆိုတဲ့ အစွန်း၂ဖက်က လွတ်မှာပါ

- တစ်ကိုယ်ရည်အင်္ဂါတွေကို မေမေ/ဖေဖေက သန့်ရှင်းရေး လုပ်ပေးတဲ့ အချိန်ကလွဲပြီး ဘယ်သူ့ကိုမှ ပေးမထိရဘူး (ဆေးခန်းပြရင် ဆရာဝန်က လိုအပ်ရင် ထိလို့ရတယ်၊ ဒါပေမဲ့ မေမေနဲ့ ဖေဖေ အနားရှိမှ)
- ဘယ်သူ့ကိုမှ မပြရဘူး
- ဓာတ်ပုံအရိုက်မခံရဘူး (ဒါလည်း ဒီဘက်ခေတ်မှာ ထည့်ပြောဖို့ အရေးကြီးတဲ့ တစ်ချက်ပါ)
- သူများရဲ့ တစ်ကိုယ်ရည်အင်္ဂါတွေကိုလည်း လိုက်မထိရဘူး (မိဘ တော်တော်များများက ဒီအချက်ကို ပြောဖို့မေ့ကြတယ်လို့ သုတေသနတွေက ပြောပါတယ်)
- ဒါနဲ့ပတ်သက်တာ တစ်ခုခုဆို မေမေ့ကို/ဖေဖေ့ကို ပြန်ပြောပြလို့ရတယ်၊ ဘာအကြောင်းဖြစ်ဖြစ် ပြောလို့ရတယ်

ဒီ၅ချက်ကိုပဲ အလျဉ်းသင့်သလို ပြောပြပေးသွားလို့ရပါတယ်၊ ကျွန်မဖတ်မိတဲ့အထဲ သဘောကျတဲ့ တစ်ချက်က ဒီအကြောင်းတွေ ပြောပြီးတိုင်း မေးခွန်းမေးပေးပါတဲ့၊ မေးရမှာက
"သားသားခန္ဓာကိုယ်ကို ဘယ်သူပိုင်လဲ"
"မီးမီးခန္ဓာကိုယ်ကို ဘယ်သူပိုင်လဲ" စသဖြင့်ပါ

သူတို့အနေနဲ့
"သားသားခန္ဓာကိုယ်ကို သားသားပဲ ပိုင်တယ်"
"မီးမီးခန္ဓာကိုယ်ကို မီးမီးပဲ ပိုင်တယ်" ဆိုပြီး ပြန်ဖြေတတ်အောငိ သင်ပေးရမှာပါ

ဒီလိုမျိုး s*x edu အကြောင်းပြောတိုင်း ဒီမေးခွန်းလေးနဲ့ အဆုံးသတ်ရင် သူတို့ရဲ့ တစ်ကိုယ်ရည်အင်္ဂါတွေကို သူများလာထိရင် ခံနေဖို့ တအားခဲယဉ်းသွားပါပြီ။

29/08/2022

မူကြိုမှာ ကလေးတွေကို ဘာလို့အိပ်ခိုင်းတာလဲ။ တကယ်ရော အိပ်ချိန်က လိုအပ်ရဲ့လားဆိုတဲ့မေးခွန်းအတွက်ပါ

မူကြိုလာအပ်ရင် နေ့တပိုင်းနဲ့ တနေကုန် ဘာကွာလဲဆိုတာရှင်းပြတိုင်း အိပ်ချိန်ပါတယ်ပြောရင် တချို့တွေရဲ့ reactionက "အိပ်ချိန်ကြီးလား??" "ရတယ် ဘာမှမဖြစ်ဘူး သူက နေ့လည်အိပ်လေ့မရှိဘူး" "အိပ်ချိန်ဆိုတာ အဲ့လောက်အထိ အရေးမကြီးပါဘူး" စသဖြင့် အမျိုးမျိုးတွေ့ရပါတယ်။ တချို့တွေဆို ဆရာမတွေ သက်သာအောင် ကလေးတွေသိပ်တယ်လို့တောင် ထင်ကြတာရှိပါတယ်။

အဲ့တော့ ကလေးသိပ်တာက တကယ်ပဲ ဆရာမတွေသက်သာအောင်သိပ်တာလား။ အရေးမကြီးဘူးလား။ အဖြေကတော့ လုံးဝNoပါ။ ဘာလို့ဆို အောက်မှာပါတဲ့ အချက်တွေကြောင့် ဖြစ်ပါတယ်။

Early childhood expertတစ်ယောက်ပြောတာကတော့ နေ့ခင်းအိပ်ချိန်က ကလေးတွေအတွက် သင်ယူမှုပိုင်းမှာ အထောက်အကူပြုနိုင်တဲ့ အခွင့်အလမ်းတစ်ခု (တနည်း) သူတို့ရဲ့energyတွေကို ဖြည့်တင်းပေးမဲ့အချိန်ဖြစ်ပါတယ်တဲ့။ ၅နှစ်အောက် ကလေးတွေက ညဘက်မှာ ၁၁နာရီကနေ ၁၂နာရီအထိ အိပ်ချိန်ရှိရမှာဖြစ်ပြီး နေ့ခင်းတစ်ရေးအိပ်ချိန်က အနည်းဆုံး၁နာရီ ရှိရမှာပဲ ဖြစ်ပါတယ်။

ဆရာမတွေက အိပ်ခါနီးမှာ သူတို့အတွက် ငြိမ်ငြိမ်စိမ်စိမ်ရှိစေမဲ့ Programတွေ ဥပမာအားဖြင့် စာဖတ်တာမျိုးနဲ့ Puzzleဆက်ခိုင်းတာမျိုးဖြစ်ဖြစ် လုပ်ပေးရပါတယ်။ အိပ်တဲ့နေရာကိုလဲ အတတ်နိုင်ဆုံး မီးမှိန်နိုင်သမျှ မှိန်အောင်ထားပေးရပြီး သူတို့အတွက် သက်တောင့်သက်သာ ရှိစေမဲ့ ခေါင်းအုံး အခင်းတို့ကို အသုံးပြုပြီး သူတို့လေးတွေ စိတ်အေးချမ်းသာစွာနဲ့ အိပ်နိုင်အောင် စီစဉ်ထားဖို့လိုပါတယ်။

အိပ်တဲ့အချိန်မှာလဲ ကလေးတစ်ယောက်နဲ့ တစ်ယောက် ကွာခြားနိုင်ပါတယ်။ တချို့ကျတော့ သူကြိုက်တဲ့ စာအုပ်လေးဖတ်ပြီးတာနဲ့ အိပ်ပျော်နိုင်သလို တချို့ကလဲ သူအရမ်းကြိုက်တဲ့အရုပ်လေးကိုဖက်ပြီး အိပ်တတ်ကြပါတယ်။ ကျောင်းမှာတော့ စာဖတ်တာက မအိပ်ခင်Activityဖြစ်ပြီး အိပ်ယာဝင်တာနဲ့ သူတို့လေးတွေကို တီချယ်တွေက သိပ်ပေးပါတယ်။ သိပ်ပေးတဲ့အခါ Sleep musicလေးတွေဖွင့်ပေးပြီး သိပ်ပါတယ်။ တချို့ကျ ဖင်လေးပုတ်ပေးရတယ်။ တချို့ကျ T zoneလေးကို ပွတ်ပေးရတယ်။ တချို့ကျ ဆံပင်လေးတွေကြားထဲကို လက်ချောင်းတွေနဲ့ ဖွပေးပြီး ခေါင်းလျှော်သလိုလေး လုပ်ပေးရတယ်။ အရမ်းလှုပ်လွန်းတဲ့ကလေးတွေကျရင် ကိုယ်ပေါ်တင်သိပ်ရတာမျိုးလုပ်ပေးရတယ်။ နောက်ဆုံး သူ့ဘေးမှာ တီချယ်ပါလှဲအိပ်လိုက်မှပဲ တီချယ်ကိုဖက်ပြီး အိပ်ပျော်သွားတာမျိုးလေးတွေလဲ ရှိပါတယ်။

ကဲ ကလေးတွေအားလုံး အိပ်သွားပြီ။ တီချယ်တွေ ခဏလွတ်လပ်ရေးရပြီလို့ထင်ပါသလား။ ဆက်လက်ပြီးNoပါ။ ထမင်းအပြေးစားရတယ်။ အခန်းထဲမှာ Dutyကျန်ခဲ့တဲ့ တီချယ်ထမင်းစားနိုင်အောင် သုတ်သုတ်စားပြီး dutyလဲပေးရတယ်။ အခန်းထဲရောက်ရင် မှောင်ထဲမှာ သူတို့လေးတွေ အိပ်တာ ပုံစံမှကျရဲ့လား။ လှုပ်ရင်းရှားရင်း လက်တွေများ ဖိမိနေမလား စိုးရိမ်တကြီး လိုက်ကြည့်ရတယ်။ ယောင်ရင် အနားသွားထိုင် ပြန်သိပ်ပေးရပါတယ်။

တနင်္လာကနေ သောကြာကတော့ ကျောင်းမှာ အိပ်ပြီး စနေတနင်္ဂနွေမှာလဲ မအိပ်လို့မဖြစ်ပါဘူး။ အဲ့တော့ အိမ်မှာ သိပ်တဲ့အခါ မိဘတွေ သတိထားဖို့ အချက်လေးတွေပါ။

အိမ်မှာ ကလေးတွေကို နေ့ခင်းအိပ်ခိုင်းတဲ့အခါ မိဘတွေ သတိထားသင့်တဲ့အချက်၃ခုရှိပါတယ်။

(1) စိတ်ရှည်ပါ။
ဟုတ်ပါတယ်။ ကလေးတစ်ယောက်ကို သိပ်ရတယ်ဆိုတာ လွယ်တဲ့အလုပ်မဟုတ်ပါဘူး။ ဒါပေမဲ့ ကျန်းမာရေးအရ ကလေးအနားရဖို့လိုတဲ့အတွက် စိတ်ရှည်ရှည်ထားပြီး သိပ်ရပါမယ်။

(2) တစ်ရေးအိပ်ချိန်ကို ပျော်ရွှင်စရာကောင်းတဲ့ အချိန်လို့ပဲ မှတ်ယူပါစေ။
တချို့ရှိပါတယ်။ နေ့လည်ခင်း မအိပ်ရင် ဘာမဝယ်ပေးဘူး ဒါမလုပ်ပေးဘူးနဲ့ ချိန်းခြောက်မိတာမျိုးတွေ ရှိမှာပါ။ ကလေးတွေကို နေ့တိုင်း အေးအေးဆေးဆေး အိပ်စေချင်ရင် အဲ့ဒါမျိုး လုံးဝလုပ်လို့မရပါဘူး။ အိပ်တယ်ဆိုတာ သူတို့ကို ပိုပြီး energeticဖြစ်လာစေဖို့ ရည်ရွယ်တယ်။ သားသား/မီးမီးအိပ်နေတဲ့အချိန် ဖေဖေမေမေက သားသား/မီးမီးကိုထားပြီး ဘယ်မှမသွားဘူးဆိုတာမျိုး ပြောပြပေးပါ။ သူတို့စိတ်ချလက်ချနဲ့ သက်တောင့်သက်သာ အိပ်နိုင်ပါစေ။

(3) အိပ်ယာကို အိပ်ယာအဖြစ်ပဲအသုံးပြုပါ။
မူးသွားပြီလား။ ဒါက ဘာကိုဆိုလိုတာလဲဆိုတော့ တချို့ကျတော့ အိပ်ယာပေါ်မှာ ကစားစရာတွေပါတင်ပြီး ပေးဆော့တော့ အိပ်ယာနဲ့ ကစားကွင်းမသဲကွဲ ဖြစ်ခဲ့ရင် ကလေးက အိပ်ချိန်မှာလဲ ကစားနေပါလိမ့်မယ်။ အိပ်တဲ့နေရာနဲ့ ကစားတဲ့နေရာမတူရင် ပိုလို့အဆင်ပြေပါတယ်။

အရေးအကြီးဆုံးအချက်ကတော့ ကလေးကို စိတ်မရှည်တာနဲ့ပဲ ခေါင်းကို လုံးဝလုံးဝ ကိုင်မလှုပ်မိပါစေနဲ့။ ကလေးရဲ့ ဦးနှောက်လေးတွေထဲက Nerveကြောသေးသေးလေးတွေက ရုတ်တရက်လှုပ်တာကို မခံနိုင်တာမို့ ဦးခွံနဲ့ထိပြီး ပေါက်နိုင်ပါတယ်။ ကိုယ့်ရဲ့ တခဏလေးပေါ်လာတဲ့ အတွေးလေးနဲ့ ကလေးလေးတွေရဲ့ ဦးနှောက်လေးကို မထိခိုက်စေပါနဲ့နော်။

အခုဆိုရင် ကလေးတွေရဲ့ အိပ်ချိန်က ဘယ်လောက်အရေးကြီးတယ်ဆိုတာ ဖေဖေမေမေတို့ သတိထားမိလောက်ပြီ ထင်ပါတယ်နော်။ အမြဲတမ်း ကျန်းမာပျော်ရွှင်တဲ့ Geniusလေးတွေရဲ့ ဖေဖေမေမေတွေ ဖြစ်ပါစေရှင်။

Crd #

12/08/2022

ဘယ်သန်ကလေးတွေကို ညာသန်ဖြစ်အောင် ပြောင်းရမလား။ ဘယ်သန်ကလေးတွေကို ဘယ်သန် မဖြစ်စေချင်ဘူး၊ ဘယ်သန်ကို ညာသန်ဖြစ်အောင် ဘယ်လို ပြောင်းရမလဲ ဆိုတဲ့ မေးခွန်းဟာ ကျွန်မ အများအဆုံး အမေးခံရတဲ့ မေးခွန်းလည်း ဖြစ်ပါတယ်။ ဘယ်သန်ကလေးတွေကို ညာသန်ဖြစ်အောင် အတင်းမပြောင်းရဘူးဆိုတာကို ဖွံ့ဖြိုးပြီးနိုင်ငံများမှာတော့ သိပြီးဖြစ်ပေမဲ့ ကျွန်မတို့နိုင်ငံမှာတော့ မိဘဆရာတော်တော်များများ မသိကြသေးပါဘူး။
ဘယ်သန်ကလေးတွေဟာ ကမ္ဘာ့လူဦးရေရဲ့ တစ်ရာပုံမှာ တစ်ပုံပဲရှိကြတဲ့ ကလေးများသာမို့ သူတို့လေးတွေဟာ ညာသန်ကြီးစိုးတဲ့ လူ့အဖွဲ့အစည်းကြီးထဲမှာ လူနည်းစုကလေးတွေသာ ဖြစ်ကြပါတယ်။ ဘယ်သန်ကလေးတွေရဲ့ ဖြတ်သန်းလာရတဲ့သမိုင်းကို ကြည့်ရင် တော်တော်များများဟာ စိတ်ပိုင်း၊ ရုပ်ပိုင်း နာကြင်ထိခိုက် ခံစားခဲ့ကြရရှာပါတယ်။ ညာသန်အဖြစ် အတင်းအကြပ် အပြောင်းမခံရတဲ့ ဘယ်သန်ကလေးများတောင်မှ သူတို့ရဲ့ ဘယ်သန်ဖြစ်ရတဲ့ဘ၀ဟာ မလွယ်ကူလှပါဘူး။ ညာသန်တွေအတွက်သာ ရည်ရွယ်ထုတ်လုပ်ထားတဲ့ အသုံးအဆောင်ပစ္စည်းများဟာ ဘယ်သန် ကလေးတွေအတွက် သုံးစွဲရတာ အဆင်မပြေလှပါဘူး။
ဘယ်သန်ကလေးတွေ ဘာကြောင့်ဖြစ်
ဘယ်သန်ကလေးတွေကို မျိုးရိုးဗီဇ (Genes) ကြောင့်ဖြစ်တယ်လို့ ဆိုပေမဲ့ နောက်ပိုင်းမှာတော့ ရုပ်ချင်း ချွတ်စွပ်တူသူ အမြွှာကလေးတွေဟာ မျိုးရိုးဗီဇ (Genes) တူပေမဲ့ တစ်ယောက်က ဘယ်သန်၊ တစ်ယောက်က ညာသန် ဖြစ်နေကြတာကို တွေ့ခဲ့ကြရပါတယ်။ ဒါကြောင့် ပညာရှင်များဟာ ဘယ်သန်ဟာ မျိုးရိုးကြောင့်မဟုတ်ဘူးလို့ ဆိုကြတာပါပဲ။
၂၀၀၈ ခုနှစ်မှာ ဆွီဒင်မှာလုပ်ခဲ့တဲ့ သုတေသနအရ ဘယ်သန်ဟာ ကိုယ်၀န်ဆောင် စိတ်ကျရောဂါနဲ့ ဆက်စပ်နေတယ်လို့ ဆိုပါတယ်။ ဒါပေမဲ့ အခုအချိန်ထိ ဘယ်သန် ဘာကြောင့်ဖြစ်ရတယ်ဆိုတာကို သိပ္ပံပညာအနေနဲ့ တိကျသေချာစွာ မသိသေးပါဘူး။
ဘယ်သန်ကလေးတွေ ညာဘက်ဦးနှောက် ပိုဖွံ့ဖြိုးစေသလား
ညာဘက်ကြွက်သားများ လှုပ်ရှားမှုကို ဘယ်ဘက်ဦးနှောက်ခြမ်းက ထိန်းချုပ်ပြီးတော့၊ ဘယ်ဘက်ကြွက်သားများ လှုပ်ရှားမှုကိုတော့ ညာဘက်ဦးနှောက်ခြမ်းက ထိန်းချုပ်ထားပါတယ်။ အဲဒီလို ထိန်းချုပ်မှုကြောင့်ပဲ ဘယ်သန်တွေဟာ ညာဘက်ဦးနှောက် ပိုဖွံ့ဖြိုးတယ်ဆိုတဲ့ အယူအဆတစ်ခု ရှိခဲ့ဖူးပါတယ်။ ဒါပေမဲ့ ဒါဟာ တကယ်တော့ မဟုတ်ပါဘူး။ နယူးဇီလန်နိုင်ငံ University of Welligton မှ ဦးနှောက်ဥာဏ်ပိုင်းဆိုင်ရာ သိမှုပါရဂူတစ်ဦးဖြစ်သူ Gina Grimshaw က ဘယ်သန်တွေ ညာဘက်ဦးနှောက်ဖွံ့ဖြိုးတယ်ဆိုတာဟာ တကယ်တော့ ကြီးမားတဲ့ အယူအဆမှားတစ်ခုသာဖြစ်ကြောင်း ကို သုတေသနပေါင်းများစွာ လုပ်ပြီးတော့ သက်သေပြခဲ့ပါတယ်။ ညာသန် ၉၈ ရာခိုင်နှုန်းဟာ ဦးနှောက်ညာဘက်ပိုင်း အလုပ်တွေဖြစ်တဲ့ တီထွင်ဖန်တီးမှုနဲ့ဆိုင်တဲ့ အလုပ်တွေ၊ စိတ်ကူးစိတ်သန်းကွန့်မြူးရတဲ့ အလုပ်တွေ၊ ပန်းချီ၊ စာပေရေးသားခြင်း၊ သရုပ်ဆောင်မှုပညာ စတဲ့ အလုပ်တွေမှာ ထူးချွန်စွာ လုပ်ဆောင်နိုင်ကြသလို၊ ဘယ်သန် ၇၀ ရာခိုင်နှုန်းလောက်ဟာလည်း ဒီအလုပ်တွေကို လုပ်ဆောင်နိုင်တယ်လို့ ဆိုပါတယ်။ ဦးနှောက်ညာဘက်ပိုင်းဖွံ့ဖြိုးခြင်း မဖွံ့ဖြိုးခြင်းဟာ ဘယ်သန်ဖြစ်ခြင်း၊ ညာသန်ဖြစ်ခြင်းနဲ့ မသက်ဆိုင်လှပါဘူး။
ဦးနှောက်ဘယ်ဘက်ခြမ်း အလုပ်ဖြစ်တဲ့ စကားပြောဆိုမှု ( ဘာသာစကား ) မှာလည်း ဘယ်သန်နဲ့ညာသန်ဟာ အတူတူပါပဲ။ ဘယ်သန်မို့လို့ စကားပြောဆိုမှု နှောင့်နှေးသွားတာ ၊ စကားနှေးသွားတာ ၊ စကားပြောနောက်ကျတာ ဆိုတာမျိုးတွေကို သုတေသနအရ မတွေ့ရဘူးလို့ ဆိုပါတယ်။ အာရုံစူးစိုက်နိုင်စွမ်းအား၊ စိတ်ခံစားမှု၊ ဂီတကိုဖန်တီးနိုင်မှု၊ ခံစားနိုင်မှု စတဲ့ နေရာတွေမှာလည်း ဘယ်သန်နဲ့ ညာသန်ဟာ ထူးထူးခြားခြား ဘာမှကွာခြားမှုမရှိဘူးလိ့ု Gina က ပြောပါတယ်။ ဘယ်သန်နဲ့ညာသန် ဥာဏ်ရည်ဖွံ့ဖြိုးမှုအပိုင်းမှာ ဘာမှ ကွာခြားမှုမရှိဘူးလို့ ဆိုပေမဲ့ ညာသန်ကြီးစိုးတဲ့ လူ့အဖွဲ့အစည်းကြီးက ဘယ်သန်တို့ကို ဘယ်လိုကြိုဆိုလဲ ဆိုတာပေါ်မူတည်ပြီးတော့ ဘယ်သန်များရဲ့ စိတ်ပိုင်းဆိုင်ရာ ခံစားချက်၊ စိတ်ဒါဏ်ရာ စတာတွေ ပေါ်လာရတော့တာပါပဲ။
ညာသန်များတဲ့လူ့အဖွဲ့စည်းနဲ့ ဘယ်သန်များ
ဘယ်သန်ကလေးအဖြစ် မွေးလာတဲ့ ကလေးများရဲ့ မိဘတော်တော်များများဟာ ညာသန်ဖြစ်နေတတ် ကြပါတယ်။ ကျွန်မတို့နိုင်ငံမှာတော့ ဘယ်သန်ကလေးတွေကို “ဟင် သူက ဘယ်ကျော်ကြီးလား” ဆိုတဲ့ မနှစ်မြို့တဲ့ အသံမျိုးနဲ့ ကြိုဆိုတတ်ကြတယ်။ ရိုးရာယဉ်ကျေးမှုထုံးတမ်းစဉ်လာအရ ဘယ်လက်ဟာ မကောင်းဘူးလို့ ယူဆတာကြောင့် ဘယ်လက်နဲ့ ထမင်းမစားနဲ့၊ ဘယ်လက်နဲ့စာမရေးနဲ့ စသဖြင့် ဘယ်သန်ကလေးတွေကို ညာသန်ဖြစ်အောင်လို့ အတင်းအကြပ် တိုက်တွန်းကြပါတယ်။ ဘယ်သန်ကို ညာသန်ဖြစ်အောင်လို့ အတင်းဖိအားပေးလုပ်ခိုင်းခြင်းရဲ့ အကျိုးဆက် ကြောင့် ဘယ်သန်ကလေးတွေဟာ စိတ်ပိုင်းဆိုင်ရာ၊ ရုပ်ပိုင်းဆိုင်ရာ မလုံခြုံမှုတွေ ခံစားရပါတော့တယ်။
ဘယ်သန်ကို ညာသန်ဖြစ်အောင် ပြောင်းမှုကြောင့် ဖြစ်လာနိုင်သော အကျိုးဆက်များ
မွေးစကနေ ခုနစ်နှစ်တာကာလဟာ ကလေးတို့ ဥာဏ်ရည်ဖွံ့ဖြိုးရေးအတွက် တစ်နည်းပြောရရင် စိတ်ပိုင်းရုပ်ပိုင်း ဖွံ့ဖြိုးရေးအတွက် တည်ဆောက်တဲ့ကာလပဲ ဖြစ်ပါတယ်။ မွေးစကတည်းကပါလာတဲ့ ဦးနှောက်နျူရွန်ဆဲလ်တွေဟာ နူရွန်လမ်းကြောင်းတွေကိုဖောက်ကာ တစ်ခုနဲ့တစ်ခု ချိတ်ဆက်ပြီးတော့ ဦးနှောက်ကို တည်ဆောက်နေတဲ့ကာလပါ။
ဒီကာလမှာ ပျော်ရွှင်မှုနဲ့ ချစ်ခြင်းမေတ္တာတရားဟာ ကလေးတို့ရဲ့ ဥာဏ်ရည်ဖွံ့ဖြိုးမှုအတွက် အရေးအကြီးဆုံးပါပဲ။ ဘယ်သန်ကလေးတွေဟာ ဘယ်သန်ဖြစ်တဲ့အကြောင်းကို မိဘများ စတင်သတိထားမိလာတဲ့ အချိန်ကတော့ တစ်နှစ်ကျော် နှစ်နှစ်ကာလပဲ ဖြစ်ပါတယ်။ ဘာလေးလှမ်းပေးပေး ကလေးက ဘယ်လက်နဲ့ လှမ်းယူလာပြီမို့ ကိုယ့်ကလေး ဟာ ဘယ်သန်ဖြစ်တော့မယ်ဆိုတာကို မိဘများ စသိလာပါပြီ။ ညာသန်တွေများတဲ့ လူမှုအဖွဲ့စည်းထဲမှာ ကိုယ့်ကလေးက ဘယ်သန်ဖြစ်ရတယ်ဆိုတော့ မိဘများအနေနဲ့ စိတ်အနှောက်အယှက် စဖြစ်လို့လာပါပြီ။ ကိုယ့်အနား၀န်းကျင်မှာရှိကြတဲ့ သူများကလည်း ဘယ်သန်မဖြစ်စေနဲ့ ညာသန်ဖြစ်အောင်လေ့ကျင့်ပေး၊ ကလေးပစ္စည်းတစ်ခုခုကို ဘယ်လက်နဲ့လှမ်းယူရင် မပေးနဲ့၊ ညာလက်နဲ့ယူခိုင်း ဆိုပြီတော့ ကလေးမိဘကို ဝိုင်းပြီး သင်ကြားကြပါတော့တယ်။
ကလေးဟာ စိတ်ရော ရုပ်ပါ စိတ်ချလုံခြုံရတဲ့ ပတ်၀န်းကျင်ကနေ သူ့အတွက်လိုအပ်တဲ့ ဖွံ့ဖြိုးမှုတွေကို လွတ်လပ်စွာ သင်ယူလေ့လာခွင့် ရရမယ့်အချိန်မှာ “ ဟင်းနော်၊ ဘယ်လက်နဲ့မကိုင်နဲ့၊ ရိုက်ထည့်လိုက်မယ်” “ဘယ်လက်နဲ့ယူရင် မေမေ မပေးဘူး” ဆိုတဲ့ တားမြစ်ပိတ်ပင်မှုတွေ၊ ဆူပူဟန့်တားမှုတွေအောက်မှာ ကလေးတို့ရဲ့ ရုပ်ပိုင်းဆိုင်ရာဖွံ့ဖြိုးမှုနဲ့ စိတ်ပိုင်းဆိုင်ရာ ဖွံ့ဖြိုးမှုတွေ နောက်ကျရပါတော့တယ်။ ကလေးစာစရေးပြီဆိုတဲ့ အချိန်ကို ရောက်တဲ့အချိန်မှာလည်း ဘယ်လက်နဲ့စာရေးနေတဲ့ ကလေးကို ညာလက်နဲ့ အတင်းရေးခိုင်းတာကြောင့် ကလေးဟာ လက်ရေးပိုဆိုးလာစေတယ်။
ကလေးကို အတင်းခြောက်လှန့်ပြီး ညာသန်ဖြစ်အောင်လုပ်မှုကြောင့် ကလေးဟာ ကြောက်လန့်စိတ်နဲ့ စိတ်မလုံခြုံတာကို ခံစားရစေပါတော့တယ်။ ဒီအကျိုးဆက်က အိပ်ရာထဲမှာ ရှူးပေါက်ချတာ၊ စကားထစ်တာ၊ လက်သည်းကိုက်တာ၊ ပုံမှန်ထက်ပိုပြီးတော့ ရှက်ကြောက်တာ၊ အာရုံစူးစိုက်မှုအားနည်းတာ၊ ငယ်ဘ၀မှတ်ဥာဏ်ထဲမှာ ဘယ်လက်ကနေ ညာလက်အပြောင်းခံလိုက်ရတဲ့အရာဟာ ပျော်စရာမကောင်းတဲ့ ၀မ်းနည်းစရာကောင်းတဲ့ ဖြစ်ရပ်တစ်ခု အဖြစ်ကျန်ခဲ့စေတာ၊ စာဖတ်ရတာ အခက်ခဲရှိစေတာ၊ စာလုံးတွေကို ပေါင်းဖို့ခက်တာ စတဲ့ ပြဿနာတွေကို ကြုံရနိုင်ပါတယ်။ ဒီပြဿနာတွေကို ကြုံရခြင်းဟာ ဘယ်သန်ဖြစ်လို့ ကြုံရခြင်းမဟုတ်ပါဘူး။ ဘယ်သန်ကို ညာသန်ဖြစ်အောင်လို့ အတင်းအကြပ်လုပ်ခိုင်းခြင်းကြောင့်သာ ကလေးတို့ ဖြစ်ရတဲ့ ပြဿနာများပဲဖြစ်ပါတယ်။
ဘယ်သန်သမားတွေ ကြုံကြရတဲ့အခက်ခဲများ
ဘယ်သန်သမားတွေဟာ ညာသန်သမားများအတွက် ရည်ရွယ်ထုတ်ထားတဲ့ ကတ်ကြေးလိုမျိုး ပစ္စည်းတွေကို ကိုင်တွယ်ကြရတဲ့အတွက် သူတို့မှာ ကိုင်ရတာမလွယ်လှပါဘူး။ ဘောင်းဘီဇစ်လိုမျိုး၊ ဆွယ်တာဇစ်လိုမျိုးတွေကို ဆွဲရတာလည်း မလွယ်လှပြန်ပါဘူး။ အဆိုးဆုံးကတော့ စာရေးရတာပါပဲ။ စာဟာ ဘယ်ကနေ ညာဘက်ကို ရေးရတာမို့ ဘယ်သန်များအတွက် ရေးရတာမလွယ်ပါဘူး။
ဘယ်သန်တွေကို စာရေးဖို့ ဘယ်လိုသင်ကြားမလဲ
ဘယ်သန်လေးတွေကို ဘယ်လက်နဲ့ပဲ စာရေးခိုင်းပေမဲ့ စာကို ဘယ်လိုရေးရမယ်၊ ခဲတံကို ဘယ်လိုကိုင်ရမယ် ဆိုတာကို စနစ်တကျနဲ့ မသင်ကြားနိုင်ဘူးဆိုရင်ဖြင့် ဘယ်သန်ကလေးတွေမှာ စာရေးရတာ နည်းနည်းခက်ခဲစေနိုင် ပါတယ်။ ဘယ်သန်ကလေးတွေ စာရေးတဲ့အချိန်မှာ လက်ထားတဲ့အနေထား၊ စာရွက်အနေထား ၊ ခဲတံကိုင်တဲ့ လက်ကောက်၀တ်အနေထား ပုံစံမှန်ဖို့လိုပါတယ်။ ဘယ်သန်ကလေးတွေအတွက် စာရွက်အနေအထားဟာ ပုံမှာပြထားတဲ့အတိုင်း ဖြစ်ရမယ်။ ဒါမှ သူတို့စာရေးရတာ သက်သောင့်သက်သာနဲ့ လွယ်လွယ်ကူကူ ရေးနိုင်မှာဖြစ်သလို၊ သူတို့ရေးထားတဲ့ စာတွေကိုလည်း လက်နဲ့မကွယ်ဘဲနဲ့ ရေးထားတာကို ပြန်မြင်နိုင်မှာပါ။
ဘယ်သန်ကလေးတွေကို စာရွက်မှာ မရေးခိုင်းခင်မှာ မြေဖြူခဲနဲ့ ကြမ်းပေါ်မှာ ရေးခြယ်ခိုင်းတာ၊ သဲပေါ်မှာ တုတ်ချောင်းနဲ့ စာရေးစေတာမျိုးတွေနဲ့ အရင်လေ့ကျင့်ပေးလို့ရပါတယ်။ ဘယ်သန်ကလေးတွေ ဘယ်လက်နဲ့ ထမင်းစားတာ၊ ဘယ်လက်ကိုသုံးပြီး အားကစားလေ့ကျင့်တာ၊ ဘယ်လက်နဲ့အလုပ်လုပ်တာဟာ တကယ်တော့ ညာသန်များတဲ့ လူအဖွဲ့စည်းမှာမို့လို့သာ လူတွေကထူးဆန်းနေတာပါ။ တကယ်တော့ ဒါဟာ ချို့ယွင်းအားနည်းချက်၊ ပြစ်ချက်တစ်ခု မဟုတ်ပါဘူး။
ကမ္ဘာကျော် ဘယ်သန်အနုပညာရှင်တွေ၊ ပန်းချီဆရာတွေ၊ သိပ္ပံပညာရှင်တွေ အများကြီးပါ။ ဘယ်သန်ဖြစ်ဖြစ်၊ ညာသန်ဖြစ်ဖြစ် အရေးကြီးဆုံးက ကလေးတို့ လွတ်လပ်ပျော်ရွှင်စွာနဲ့ လေ့လာသင်ယူနိုင်ဖို့ပါပဲ။ ဘယ်သန်ကနေ ညာသန်ကို အတင်းအကြပ်ပြောင်းခိုင်းခြင်းဟာ ကလေးတို့ဥာဏ်ရည်ကို ထိခိုက်စေတာမို့ မိဘ ဆရာများ ဆင်ခြင်ပေးကြပါလို့ တိုက်တွန်းလိုက်ပါရစေ။
crd

12/05/2022

Tongue Twister for kids
crd

11/05/2022

စာရေးနှေးသော လက်ကလေး
-------------------------
▪️ကလေး A
ဆရာ ကျွန်မကလေး စာရေးတာ အရမ်းနှေးတယ်။ စာလေး ၁ လုံး। ၂-လုံး ရေပြီးရင် ခဲတံကို ခဏချ। ပြီးရင် ပြန်ကောက်। ပြန်ရေး। ခဲတံတောင် နိုင်ပုံမရဘူး။ စာလုံးတွေကလည်း မညီမညာနဲ့ ဖတ်ဖို့ကခက်। ဘယ်လိုကျင့်ကျင့် မရဘူး။

▪️ကလေး B
ဒီကောင် ချီးကျူးဖို့ကောင်းတာက စာရေးရင် တထိုင်တည်းရေးတယ်။ ခဲတံလည်း ကျကျနန ကြာကြာကိုင်နိုင်တယ်။ အတန်းမှာ စာရေးရင် သူအရင်ဆုံးပြီးတယ်။

🔶ခဲတံကိုင်ပုံ ( pencil grip )

စာရေးမြန်ခြင်း।လှခြင်း। သပ်ရပ်ခြင်း।သန်ခြင်း ဆိုတာကိုဆုံးဖြတ်ပေးတဲ့အထဲမှာ pencil grip ဆိုတဲ့ ခဲတံကိုင်ပုံလေးလည်းပါတာပေါ့။ ကလေးအများစုကတော့ သဘာဝကသင်ပေးတဲ့အတိုင်း ခဲတံလေးတွေကို နည်းမှန်လမ်းမှန်နဲ့ ကိုင်တတ်သွားကြတာပါပဲ။ သင့်ကလေးက ပုံ-၁ ကအတိုင်း ခဲတံကိုကိုင်နေရင်တော့ လက်ခံနိုင်ပါတယ်။ ပုံ-၁ ကအတိုင်းလည်းမကိုင်। စာရေးလျှင်လည်း ကကျိုးကကျော်। လက်ကလည်း ခဏခဏညောင်းဆိုလျှင်တော့ သူ့ရဲ့ pencil grip လေးကို ပုံ-၂ပါ အတိုင်း ကျင့်ပေးလိုက်ပါ။ pencil grip ကို မူကြို। မူလတန်းအရွယ်တို့တွင် ကျင့်ပေးရတာပိုလွယ်ပါသည်။ မှားနေတာကို မကျင့်ပေးပဲထားလိုက်ရင်တော့ အမှားအတိုင်း တစ်သက်လုံးကိုင်သွားနိုင်ပါသည်။

ပုံ-၂ pencil grip
---------------
-ခဲတံက လက်မ।လက်ညှိုး।လက်ခလယ် ၃-ခု ဖြင့်သာ ပုံပါအတိုင်း ကိုင်ထားရမည်။
-လက်သူကြွယ် နှင့် လက်သန်းကလေက အနောက်ဘက်သို့ ကွေးဝင်ပြီး စားပွဲပေါ်မှာသက်တောင့်သက်သာ အနားယူနေရမည်။
-လက်ကောက်ဝတ်က အပြင်ဘက်အနည်းငယ်လေး ကွေးနေရမည်။ ပုံကိုကြည့်ပါ။ တချို့ကလေးတွေ အတွင်းဘက်ကို အရမ်းကွေးပြီး ရေးနေတာကို တွေ့ရပါလိမ့်မည်။ ပြင်ခိုင်းပါ။
-လက်တတောင်က စားပွဲပေါ်မှာ အနားယူနေရမည်။
-ခဲတံထိပ်နှင့် ၁-၂ စင်တီမီတာ အကွာမှကိုင်ခိုင်းပါ။
-အထက်ပါအတိုင်း နေ့စဉ်မိနစ်အနည်းငယ်စီ ကျင့်ပေးပါ။
-pencil grip ပုံစံခွက်လေးတွေ လည်းအပြင်မှာ ဝယ်လို့ရနေပါပြီ။

🔶 ထိုင်သည့်ပုံစံ နှင့် စာရွက်အနေအထား

အဲဒါကလည်း ကလေးရဲ့ စာရေးအားကို အထောက်အကူပြုပါတယ်။ပုံ-၃ ကိုကြည့်ပါ။
-ကလေးအရပ်နှင့်အနေတော်မည့် စားပွဲ နှင့် ထိုင်ခုံဖြစ်သင့်သည်။
-ခြေဖဝါး ၂-ဖက်စလုံးက ကြမ်းပြင်ပေါ်ကို ထိထားပါစေ။
-လက်တတောင် ၂-ဖက်စလုံးက စားပွဲပေါ်မှာ နားနေပါစေ။
-ရေးမဲ့ စာရွက်ကို ပုံပါအတိုင်း ကလေးစာရေးမည့်လက်က စားပွဲပေါ်တွင် ချထားသည့် လမ်းကြောင်းအတိုင်း တစောင်းလေး ချပေးထားပါ။
- အခြား လက်တဘက်ဖြင့် စာရွက်ကိုထိန်းထားခိုင်းပါ။

🔶လက်ကကြွက်သား သန်မာရဲ့လား( muscle tone )

လက်ကြွက်သားလေးတွေ ပျော့နေရင်လည်း စာရေးရာမှာ အခက်အခဲရှိတတ်ပါတယ်။ လက်သန်တယ်ဆိုတာ လက်ထဲက အရိုးချောင်းတွေ နဲ့ ကြွက်သားတွေ သန်တယ်ဆိုတာကို ပြောတာပါ။ လက်ကြွက်သားတွေ ပျော့နေတဲ့ကလေးက ခဲတံကိုင်ပြီး ခဏနေရင် ညောင်းလာပါလိမ့်မယ်။ အဲဒီတော့သူက ခဏ နားရပါတယ်။ အဲဒီလိုနဲ့ စာရေးနေတာ ကြာနေတော့တာပါပဲ။ ဒီတော့ သူတို့လက်ထဲမှာရှိတဲ့ ကြွက်သားတွေကို မာလာအောင် အထောက်အကူပြုမဲ့ လက်လှုပ်ရှားမှုတွေကို နေ့စဉ်နေ့တိုင်းကျင့်ပေးပါ။

🔹လက်သန်ရန် လုပ်ဆောင်နိုင်သော ဥပမာ နှင့် အကြံပြုချက်အချို့

- မလိုအပ်ပဲ ထမင်းခွံ့ကျွေးခြင်း မလုပ်ပါနဲ့။ ကလေးကို ကိုယ်တိုင် လက်ဖြင့်ကိုင်တွယ်। ဇွန်းဖြင့်ကိုင်တွယ်၍ စားခိုင်းပါ။

- မူကြိုကလေးငယ်လေး စာမရေးခင် playdough ဆိုတဲ့ဂျုံလေးတွေကို လက်ဖြင့်ညှစ်ခိုင်း। လုံးခိုင်း। လိပ်ခိုင်းခြင်းများကို ပြုလုပ်ခိုင်းပါ။ ပြီးမှ ခဲတံကိုင်ခိုင်း၍ စာရေးခိုင်းပါ။ မူကြိုဆရာမလေးကို အကြံပေးချင်တာက ကလေးငယ်လေးကျောင်းထဲရောက်တာနဲ့ စာရေးခြင်းဖြင့် မစပါနဲ့။ ဂျုံကို အရင်ပေးကစားခိုင်းပါ။ ပြီးလျှင်စာရေးခိုင်းပါ။

- ဂျုံလုံးလေးများ ပြုလုပ်ခိုင်းပြီး လက်မ।လက်ညှိုး। လက်ခလယ် ၃-ခုကြားညှပ်ပြီး လက်ချောင်းကလေးများ ထိသည်အထိ ညှစ်ခိုင်းပါ။

-မူကြိုအရွယ်လေးတွေကို ပန်းချီဆွဲခိုင်းခြင်း। သဲအိမ်। နှင်းအိမ်လေးများ ဆောက်ခိုင်းခြင်း। လက်ကိုအဓိကအသုံးပြုရသော အနုပညာဖန်တီးမှုများကို ပြုလုပ်ခိုင်းခြင်း တို့ဖြင့် လေ့ကျင့်ပေးနိုင်သည်။ ပုံတွေပေါ်မှာ ဆေးချယ်ခိုင်းပါ။

-လက်ဖဝါးပေါ်မှာ ကျောက်စရစ်ခဲလေးကိုတင်। ပြီးလျှင် လက်သူကြွယ်နှင့်လက်သန်းလေးများကိုကွေးပြီး လက်ဖဝါးပေါ်မှ ကျောက်စရစ်ခဲလေးကို ဖိခိုင်းပါ။

-ကြယ်သီး တပ်ခြင်း। ဖြုတ်ခြင်းများကို ပြုလုပ်ခိုင်းပါ။

-ပုံတွင်ပြထားသော ပုလင်းမျိုးဖြင့် ပန်းပင်ရေဖြန်းခိုင်းပါ။

- ပုံမှာ ပြထားသည့်လက်ကောက်ဝတ် လေ့ကျင့်ခန်းကို နေ့စဉ်လုပ်ဖို့ ကူညီပေးပါ။ စားပွဲပေါ်မှာ လက်တတောင်ကို တင်ပြီးလူကြီးက ကိုင်ပေးထား। ကလေးကို လက်သီးဆုပ်ခိုင်းပြီး အပေါ်ဘက်ကို ကွေးချီ। ဖြေချီ လုပ်ခိုင်းပါ။

-ကလေးငယ်လေးတွေက ချီးကျူးခံရရင်। game ပုံစံကစားခိုင်းရင် လက်လေ့ကျင့်ခန်းတွေကို လိုက်လုပ်ကြမှာပါ။

-ကလေးငယ်များကို ကစားကွင်းသို့ မကြာခဏခေါ်သွားပြီး ဆော့ကစားခိုင်းပါ။

-လက်ကြွက်သားပဲ အရေးကြီးတာ မဟုတ်။ ခန္ဓာကိုယ်မှာ ရှိတဲ့ ကြွက်သားများ ပျော့ပါကလည်း ကလေးများက စားပွဲခုံမှာ ကြာကြာထိုင်ပြီး စာမလုပ်နိုင်။ ခန္ဓာကိုယ် တွန့်လိမ်ကောက်ကွေးနေပြီး မကြာခင် စားပွဲပေါ်မှဆင်း၍ ကြမ်းပေါ်ထိုင်ဖတ်လိမ့်မည်။ ထို့နောက် ထိုင်ရာမှ လှဲပြီးဖတ်လိမ့်မည်။ ထို့နောက် တခါတည်း အိပ်ပျော်သွားလိမ့်မည်။ အဲဒီလိုကလေးတွေကို ကိုယ်လက်လှုပ်ရှားမှုလေးတွေ အရင်လုပ်ခိုင်းပြီးမှ စာထိုင်ဖတ်ခိုင်းပါ။ ကိုယ်လက်လှုပ်ရှားမှု ပြုလုပ်လိုက်သည့်အတွက် ကြွက်သားမာခြင်းအဆင့် (muscle tone )တက်လာ၏။ muscle tone တက်လာတော့ နဲနဲပိုကြာကြာထိုင်နိုင်တာပေါ့။ စာသင်နေတာ တဝက်ရောက်လျှင် ခဏရပ်ခိုင်းပြီး လေ့ကျင့်ခန်းလုပ်ခိုင်းသော ဆရာ। ဆရာများကို မိဘများဘဝတွင် တွေ့ခဲ့ဖူးပါလိမ့်မည်။ အားလုံးသဘောကျခဲ့ကြမှာပါ။

-အရင်ကပြောခဲ့သလိုပဲ ဗီတာမင် ဒီ। ကယ်လစီယမ် နှင့် ကိုယ်လက်လှုပ်ရှားမှုတို့သည် ကလေးများ၏ အရိုးနှင့်ကြွက်သားများ အတွက်အရေးပါသည်။ ထို ၃-ခုထဲမှ တခုချိုတဲ့လျှင် ကလေးများ၏ အရိုးနှင့်ကြွက်သားကျန်းမာရေး အပေါ်ထိခိုက်နိုင်ပါသည်။

- ပုံလေးတွေကို တချက်ကြည့်ကြည့်ပါ။ အဲလိုလေးတွေလုပ်ပေးသည့် မူကြိုကို ရွေးချယ်ပါ။ ကလောင်ကိုင်မည့် လက်ကလေး ကလောင်ကို နိုင်နိုင်နင်းနင်း ကိုင်နိုင်ပါစေ။

မေတ္တာဖြင့်

-credit- ဂန္ထ၀င်ပျိုးခင်း page

11/05/2022

လက်ဦးဆရာမိဘတာဝန်ပါ။

ကလေးတို့ကိုစာမသင်ခင်
ဘာသင်မလဲ

ချစ်တတ်နည်းသင်ပါ
လေးစားတတ်နည်းသင်ပါ
မျှဝေတတ်နည်းသင်ပါ
ကျေးဇူးတင်တတ်နည်းသင်ပါ
ရိုးသားနည်းသင်ပါ
ကူညီနည်းသင်ပါ
ကြိုးစားတတ်အောင်သင်ပါ
ကိုယ့်ကိုယ်ကိုယ်ယုံကြည်နည်းသင်ပါ
သတ္တိရှိအောင်သင်ပါ
စူးစမ်းတတ်အောင်သင်ပါ
ဆင်ခြင်သုံးသပ်တတ်ဖို့သင်ပါ
အမှန်တရားကိုမြတ်နိုးတတ်ဖို့သင်ပါ
ခွင့်လွှတ်တတ်အောင်သင်ပါ

ဘယ်အရွယ်မှာစသင်ရမလဲ
မွေးစမှာစသင်ရပါမယ်
ကြီးမှသင်လေခက်ခဲလေပါ

ဘယ်အချိန်မှာသင်ပေးရမလဲ
နေ့စဥ်တိုင်းကလေးနဲ့နေချိန်တိုင်း
သင်ပေးပါ

လူကြီးမိဘကဘာပြင်ဆင်ရမလဲ
အထက်ပါတို့ကို
မိဘတို့ကိုယ်တိုင်
လက်ခံကျင့်သုံးပါမှ
ကလေးကိုသင်ကြားခြင်း
ပိုထိရောက်ပါလိမ့်မယ်

ကျောင်းစာမပေါက်မြောက်ရင်တောင် လောကမှာ
တင့်တင့်တယ်တယ်နေထိုင်နိုင်သွားမယ့် နည်းတွေပါ
စိတ်ချမ်းသာကိုယ်ကျန်းမာ
နေထိုင်သွားနိုင်မယ့်နည်းတွေပါ

crd

10/05/2022

Credit :

ဒီအချိန်မှာ ဒွိဟဖြစ်နေတဲ့ ဖေဖေမေမေတို့ဖတ်ကြည့်ပေးနော်👇👇👇

မူကြိုပြန်ထားရမလား
KG တက်ရမလား
Grade 1 တန်းတက်ရမလား

2020 -21 ပညာရေးနှစ်မှာ
KG မတက်လိုက်ရတဲ့ ကလေးငယ်တွေ ကျောင်းပြန်ဖွင့်ရင်
KG ပဲပြန်ထားရမလား Grade 1 တန်းတက်ရမလား ???

မူကြိုကို ၁ လလောက်ပဲတက်ရသေးတယ် ကျောင်းပြန်ဖွင့်ရင် မူကြိုပြန်ထားရမလား KG ပို့ရမလား ???

ဝေခွဲရခက် ဗျာများနေတဲ့ မိဘများရဲ့အခက်ခဲလေးတွေအတွက် စဉ်းစားဆုံးဖြတ်နိုင်ဖို့အကြံလေးတစ်ခုပေးပါရစေ....

မူကြိုမှ KG သို့ -

နောက်နှစ်မှာ KG တက်ဖို့ အသက်ပြည့်ပြီ မူကြိုကလုံးဝမတက်ရသေးဘူး / မူကြိုကို လပိုင်းသာ တက်ရသေးတယ် ကျောင်းပြန်ဖွင့်ရင် KG တက်လို့အဆင်ပြေပါ့မလား မူကြိုပြန်ထားရင်ကောင်းမလား ဆိုရင်.. ..

KG အပ်လို့ရပါတယ် မြန်မာနိုင်ငံရဲ့KG သင်ရိုးသစ်ဟာ တနိုင်ငံလုံးအနေထားနဲ့ ကလေးအားလုံးသင်ယူနိုင်ရန်အတွက် ကလေးဖွံ့ဖြိုးမှု့ကို ပဲဦးစားပေးရေးဆွဲထားတဲ့သင်ရိုးဖြစ်ပါတယ်
KG မှာ ဘာသာရပ်မရှိပါဘူး ဖွံ့ဖြိုးမှု့နယ်ပယ် (၆)ရပ်နဲ့သင်ကြားတာဖြစ်လို့အဆင်ပြေပါတယ်

မူကြိုဆိုတာမရှိတဲ့ ဝေးလံခေါင်ဖျားတဲ့မြန်မာနိုင်ငံဒေသများက ကလေးများအတွက် မူလတန်းပညာရပ်ကို လွယ်ကူစွာချည်းကပ်သင်ယူနိုင်ရန်အတွက် ရေးဆွဲထားတာမို့လို့ KG ကိုမူကြိုမတက်ခဲ့လည်း အပ်လို့ရပါတယ်

Grade 1 ရောက်မှ ဖွံ့ဖြိုးမှု့ကနေ ဘာသာရပ် ၁၀ခုအနေနဲ့ ခွဲထွက်သင်ကြားသွားမှာဖြစ်ပါတယ်

ဒါဆိုမေးစရာလေးရှိလာပါမယ်နော် ????
ဒါဖြင့် မူကြိုထားစရာမလိုဘူးလား ???
KG ပဲတန်းအပ်တော့မယ် စသဖြင့် စဉ်းစားမိရင် ...

မူကြိုမှာဘာတွေလုပ်ပေးလည်း မိဘတွေ သိဖို့လိုအပ်ပါတယ် .
မူကြိုမှာလည်း မြန်မာနိုင်ငံတော်က ချမှတ်ထားတဲ့ သင်ရိုးတွေရှိပါတယ် ဘာတွေလည်းဆိုရင် ..

ကလေးဖွံ့ဖြိုးမှု့ပါ
KG ရဲ့ဖွံ့ဖြိုးမှုနယ်ပယ်တွေဟာ မူလတန်းအကြို ဖွံ့ဖြိုးမှု နယ်ပယ်ကိုအခြေခံထားတာဖြစ်ပါတယ် နယ်ပယ်ခြင်းမတူပါဘူး
အပြန်အလှန်ချိတ်ဆက်ထားတာမို့ မူကြိုမှာလေ့ကျင့်ပေးသလိုမျိုး အိမ်မှာလေ့ကျင့်ပေးထားနိုင်ရင် ကလေးအတွက်အဆင်ပြေချောမွေ့စေမှာဖြစ်ပါတယ်

(အောက်မှာ မူကြို နဲ့ KG ဖွံ့ဖြိုးမှု့ နယ်ပယ်များကိုချိတ်ဆက်ပြထားပါတယ်)

ဒီအချက်လေးတွေနဲ့ကိုက်ညှိစဉ်းစားပြီး ပြင်ဆင်ပေးလို့ရပါတယ်

🎐 Learning Environment
အသက် ၃နှစ်မှ ၅ နှစ်အရွယ်ကလေးတွေဟာ သူ့အသက်ရွယ်နဲ့သူ ဖွံ့ဖြိုးမှု (၅)ရပ်နဲ့အညီ မှန်မှန်ကန်ကန်ဖွံ့ဖြိုးဖို့အတွက် သင်ယူနိုင်ဖို့အခွင့်အလမ်းတွေဖန်တီးပေးနိုင်တဲ့ပတ်ဝန်းကျင်မှာရှိသင့်ပါတယ် သင်ယူနိုင်ဖို့အခွင့်အလမ်းတွေဖန်တီးပေးရပါမယ်

🎐 Brain Development
ပြန်မရနိုင်တဲ့ ဦးနှောက်ဖွံဖြိုးမှုအချိန်များ
အသက် ၃နှစ်မှာ ၅ နှစ်တွင်းကလေးများရဲ့ ဦးနှောက်ဟာ 90% ဖွံဖြိုးနေပါတယ် လှုံ့ဆော်မှု့များများပေးရမယ် အရေးကြီးဆုံး အချိန်အပိုင်းအခြားတခုဖြစ်ပါတယ် ဒီအချိန်တွေလွတ်သွားခဲ့ရင်အစားထိုးပြန်မရနိုင်တဲ့တသက်စာဆုံးရှုံးမှု့ကြီးပါ ဦးနှောက်ဖွံ့ဖြိုးမှု့ကိုသိရှိထားမှ လေ့ကျင့်ပေးနိုင်မှာပါ
ဒါတွေကိုမူကြိုမှာလေ့ကျင့်ပျိုးထောင်ပေးပါတယ်

🎐 Social Development
ပေါင်းသင်းဆက်ဆံရေး အရေးကြီးဆုံးအချက်ပါ
ကလေးဟာမိသားစုနဲ့ခွဲခွာပြီး သူစိမ်းတွေနဲ့ တခြားနေရာစိမ်းတခုမှာ စိတ်ဖိအားကင်းကင်းနဲ့ တက်ကြွပျော်ရွှင်စွာ လူအများနဲ့ လိုက်လျောညီထွေနေထိုင်နိုင်ဖို့၊ သင်ယူဖို့.၊ မျှဝေတတ်ဖို့၊ ရန်မဖြစ်ဖို့၊ မိမိအလှည့်ကိုစောင့်တတ်ဖို့၊ ဆရာရဲ့စကားကိုနားထောင်တတ်ဖို့၊ စည်းကမ်းတွေကိုလိူက်နာတတ်ဖို့၊မိမိရဲ့ခံစားချက်ကိုလည်း ဖော်ပြတတ်စေဖို့၊ KG မှာ Pair work တွေလုပ်ဆောင်ရပါတယ် အတူပူးပေါင်းလုပ်ဆောင်တတ်စေဖို့ စသည်တို့ကိုလေ့ကျင့်ပေးထားရပါမယ်
ဒီအချက်ကိုအိမ်မှာရနိုင်ဖို့အခက်ခဲဆုံးပါ ရဖို့မလွယ်ကူပါဘူး။

🎐 Self-Help Skills
မိမိရဲ့ကိုယ်ပိုင်ပစ္စည်းလေးတွေထိန်းသိမ်းတတ်ဖို့.၊ မိမိဘာသာ ထမင်းစားတတ်ဖို့၊ ရေအိမ်ဝင်လုပ်ငန်းစဉ်မိမိဘာသာလုပ်တတ်ဖို့၊ မိမိဖိနပ်မိမိစီးနိုင်ဖို့၊ စာသင်ခန်းကပစ္စည်းတွေကို သူ့နေရာနဲ့သူအသုံးချတတ်ဖို့ ၊ ကျောင်းနဲအိမ်စည်းကမ်းလေးတွေ နားလည်ဖို့၊ အချိန်လုပ်ဆောင်မှု့လေးတွေကိုတပြေးညီလိုက်ပါနိုင်ဖို့ စသည်တို့ကိုလည်း လေ့ကျင့်ပေးထားဖို့လိုအပ်ပါတယ်

🎐 Fine motor Skills
KG မှာ စာမသင်ဘူးဆိုပေမယ် ကလေးဟာ ခဲတံနဲ့လုံးဝစိမ်းမနေသင့်ပါ ခဲတံမှန်ကန်စွာကိုငိနိုင်ဖို့. အရောင်ကိုသပ်ရပ်စွာခြယ်တတ်ဖို့ စာရေးဖို့အတွက် လက်ချောင်းသန်မာမှု့ အဆင်သင့်ဖြစ်နေဖို့လိုအပ်ပါတယ်
မျက်စိနဲ့လက်တတန်းတည်းလုပ်ဆောင်ရတာတွေလုပ်ဆောင်နိုင်ဖို့တွက်
Fine mortor activities လေးတွေလေ့ကျင့်ပေးထားရပါမယ်

🎐 Language Development
အရေးကြီးဆုံးဖြစ်တဲ့ ဘာသာစကားပါ KG မှာ ကလေးဟာ စကားသံတွေကို ပီသကောင်းမွန်စွာပြောပြတတ်ဖို့လိုပါတယ် အသံကိုကောင်းစွာရွတ်ဆိုနိုင်ဖိူ့လိုအပ်သလို
ဆရာပြောပြရှင်းပြတာကိုလည်း နားလည်နိုင်စွမ်းရှိဖို့လိုအပ်ပါတယ်

** ဒါတွေကိုလေ့ကျင့်ပြင်ဆင်ပေးထားဖို့လိုအပ်ပါတယ် **

ဒီအချက်တွေကို မူကြိုမှာ လေ့ကျငိ့ချိန်လုံလောက်စွာ ကျောင်းတက်ခဲ့ရရင် ပြည့်စုံနိုင်ပါတယ်

ဖေဖေမေမေအများစုက ပူပန်စိတ်တွေနဲ့ KG တက်တော့မယ်ဆိုတာနဲ့ က ခ / ABC တွေ 123 တွေ စွတ်အတင်းဆို အတင်းသင် အတင်းရေးခိုင်းနေတာကို များစွာတွေ့ရပါတယ် 😞
ဒါတွေကို KG ဆရာကလည်းသေချာသင်ပေးမှာပါဖြစ်ပါတယ်
သိပြီးသားတွေ မသင်တော့ဘူးဆို ရှေ့တဆင့်တက်သင်မှာလည်းမဟုတ်သလို သင်စရာမလိုဘူးဆိုထိုင်နေမှာလည်းမဟုတ်ပါနော်

အဂ်လိပ်စာမှမသင်ရင် ကလေးဟာဘာမှမတတ်တော့ဘူးလိူ့ယူဆနေတာမျိုးတွေလည်းများစွာရင်ဆိုငိရပါတယ်

မူကြိုဟာကလေးဖွံ့ဖြိုးမှု့ကိူဦးစားပေးလုပ်ဆောင်ရခြင်းဖြစ်ပါတယ်

KG ဟာလည်းဖွံ့ဖြိုးမှု့ ကိုအခြေခံတာဖြစ်လို့
က ခ / ABC တွေထက် များစွာအရေးကြီးတဲ့
တခြား ဖွံ့ဖြိုးမှု့တွေကိုသင်ဖို့မေ့နေတတ်ကြပါတယ်

ကလေးရဲ့ဘဝတသက်တာ သင်ယူမှု့ခရီးရှည်ကြီးအတွက် အရေးကြီးသောအခြေခံများကိုခိုင်ခန့်အောင်ကောင်းစွာပံ့ပိုးပေးဖိူ့လိုအပ်ပါတယ်

KG တက်ဖို့ မြန်မာ အဂ်လိပ် သခ်ျာ အပြင်ဘာတွေသင်ပေးရဦးမလဲဆိုရင် ဒါတွေပြင်ဆင်ပေးပါလို့ အကြံပြုပါရစေရှင့်

သားသားမီးမီးတို့ပညာရေးခရီးလမ်း သာယာဖြောင့်ဖြူပြီး ခရီးဆုံးထိအောင်မြင်စွာလျောက်လှမ်းနိုင်ပါစေနော်

Credit_to_original_writer

Address

Myitkyina
1011

Telephone

+959258708568

Website

facebook.com

Alerts

Be the first to know and let us send you an email when Growth posts news and promotions. Your email address will not be used for any other purpose, and you can unsubscribe at any time.

Contact The School

Send a message to Growth:

Want your school to be the top-listed School/college in Myitkyina?

Growth

20/05/2024

04/09/2023

01/02/2023

22/09/2022

29/08/2022

12/08/2022

12/05/2022

11/05/2022

11/05/2022

10/05/2022

Address

Telephone

Website

Alerts

Contact The School

Shortcuts

Share

Category

Listing takedown request