24/12/2025
Paul McCartney ရဲ့ "Yesterday"
Yesterday....
ဒီသီချင်း ဖြစ်တည်လာပုံက ထူးခြားတယ်လို့ပဲ ပြောရမယ်။
၁၉၆၅ခုနှစ်ရဲ့ ဇန်နဝါရီလထဲက ညတစ်ညမှာ နှစ်နှစ်ခြိုက်ခြိုက်အိပ်ပျော်နေတဲ့ ပေါလ် တစ်ယောက် အိပ်ယာကနေ ရုတ်တစ်ရက် လန့်နိုးလာပါတယ်။ သီချင်းသံစဥ်တစ်ခုကို ကြားပြီး လန့်နိုးလာခြင်းပါ။ ချက်ချင်းပဲ ပီယာနိုပေါ်မှာ အကြိမ်ကြိမ်တီးပြီး သံစဥ်ကို မမေ့အောင် မှတ်သားထားလိုက်ပါတယ်။ စတူဒီယိုရောက်တဲ့အခါ စကားလုံးထည့်ဖို့ အိုင်ဒီယာမရှိသေးတာကြောင့် သံစဥ်သီးသန့်ပဲ တီးထားလိုက်ပြီးယာယီအသံသွင်းထားခဲ့ပါတယ်။
လအနည်းအငယ်ကြာပြီးနောက် ပေါ်တူဂီခရီးစဥ်တစ်ခုမှာ "Yesterday" ဆိုတဲ့ စကားလုံးကို ပေါလ် အမှတ်မထင်ပြောမိရင်း ဒီသီချင်းတစ်ပုဒ်လုံး မွေးဖွားဖို့ ဖြစ်လာပါတယ်။ Verse-Verse-Bridge-Verse ဖွဲ့စည်းပုံကို ပေါလ် အသုံးပြုခဲ့ပြီး ဆုံးရှုံးမှု၊ အထီးကျန်မှု၊ အတိတ်ကိုလွမ်းဆွတ်မှုတို့ကို ဖော်ကျူးထားတဲ့ စာသားတွေကြောင့် ရိုးရှင်းပြီး စွဲမက်ဖွယ်ရာတေးသွားတစ်ပုဒ် ဖြစ်လာပါတယ်။
ပေါလ် ကိုယ်တိုင် Acoustic ဂီတာကို တီးခတ်ထားပြီး ဂီတမှူးဂျော့မာတင်က တယောနှစ်လက် ( Viola + Cello ) နဲ့ ပံ့ပိုးတီးခတ်ပေးခဲ့ပါတယ်။
"Yesterday, all my troubles seemed so far away..." ဆိုတဲ့ အဖွင့်စာကြောင်းက ဂီတသမိုင်းရဲ့ အထင်ရှားဆုံး စာကြောင်းတစ်ကြောင်းအဖြစ် မှတ်တမ်းတင်ခံထားရတယ်လို့လည်း သိရပါတယ်။
၁၉၆၅ ခုနှစ်၊ သြဂုတ်လမှာ ထုတ်ဝေခဲ့တဲ့ The Beatles ရဲ့ ပဥ္စမမြောက် အယ်လ်ဘမ်ဖြစ်တဲ့ Help! ဆိုတဲ့ အဲလ်ဘမ်မှာ ဒီသီချင်းကို ထည့်သွင်းထုတ်ဝေခဲ့ပါတယ်။
ဆိုရရင် "Yesterday"က အိပ်မက်သံစဥ်ကနေ ဖြစ်တည်လာခဲ့တာလို့ပဲ ပြောရမှာပါ။
"Yesterday" သီချင်းဟာ Most Covered Song အဖြစ် Guinness World Record စံချိန်တင်ထားတဲ့ သီချင်းတစ်ပုဒ်လည်း ဖြစ်နေပါတယ်။ Rolling Stone Magazine ရဲ့ သမိုင်းတစ်လျှောက် အကောင်းဆုံးသီချင်း ၅၀၀ စာရင်းမှာလည်း အဆင့်၁၃ ရခဲ့ပါတယ်။ ၁၉၆၆ခုနှစ် Grammy Awards မှာ "Best Pop Vocal Performance, Male" ဆုကိုလည်း "Yesterday" နဲ့ပဲ ပေါလ် ရရှိခဲ့ပါတယ်။ အမေရိကန်ရေဒီယိုမှာ အကြိမ်ပေါင်း ၇သန်းကျော် ထုတ်လွင့်ခဲ့တယ်လို့လည်း ဆိုထားပါတယ်။အမေရိကန် Billboard Hot 100 ဇယားမှာလည်း နံပါတ်၁ နေရာထိ ရယူခဲ့ပါသေးတယ်။
Copyright ကြောင့် "Yesterday" သီချင်းကိုတော့ Telegram Channel မှာ ကြည့်ရှုပေးပါ။
Youtube : https://youtube.com/?si=usRcyB87tL9zgqif
Telegram : https://t.me/musictree2023
#ဂီတသစ်ပင်
