15/06/2026
🙏ဗုဒ္ဓမြတ်စွာဘုရား ပရိနိဗ္ဗာန် စံဝင်တော်မူခဲ့သောနေရာနှင့်အဓိပ္ပါယ်ရှိသောအကြောင်းအရာများကို WALK FOR PEACE ဆရာတော်ကြီး မျှဝေထားပါတယ်။
🙏Walk for Peace ခရီးစဉ်သည် အိန္ဒိယနိုင်ငံ၊
ဥတ္တရပရာဒေ့ရှ်ပြည်နယ်ရှိ ကုသိနာရုံသို့ ရောက်ရှိလာပြီဖြစ်ကြောင်းကို အလွန်နက်ရှိုင်းသော ကျေးဇူးတရား၊ ကြည်ညိုလေးစားမှုများဖြင့် မျှဝေလိုက်ရပါသည်။
ဤနေရာသည် ကျွန်ုပ်တို့၏ ခရီးစဉ်တလျှောက်လုံးတွင် အမြင့်မြတ်ဆုံးနှင့် စိတ်နှလုံးကို အလွန်ထိရှစေသော ဘုရားဖူးဌာနကြီးများအနက် တခုဖြစ်ပါသည်။
လုမ္ဗိနီ (ဗုဒ္ဓမြတ်စွာဘုရား ဖွားမြင်တော်မူရာဌာန)၊
ဗုဒ္ဓဂါယာ (ဘုရားအဖြစ် သစ္စာလေးပါးကို ထိုးထွင်းသိမြင်တော်မူရာဌာန) နှင့်
သာရနာကူ (ဓမ္မစကြာတရားဦး ဟောကြားတော်မူရာဌာန) တို့နှင့်အတူ
ကုသိနာရုံသည် ကမ္ဘာ့ဗုဒ္ဓဘာသာဝင်များအတွက် အမြင့်မြတ်ဆုံး ဘုရားဖူးဌာနကြီး လေးဌာနအနက် တခုဖြစ်ပါသည်။
လွန်ခဲ့သော နှစ်ပေါင်း ၂,၆၀၀ ကျော်ခန့်က ဗုဒ္ဓမြတ်စွာဘုရားသည် သက်တော် ၈၀ အရွယ်တွင် ဤမြင့်မြတ်သောမြေ၌ ပရိနိဗ္ဗာန် စံဝင်တော်မူခဲ့ပါသည်။
ဤသန့်ရှင်းမြင့်မြတ်သော နေရာပေါ်တွင် ရပ်တည်ရခြင်းသည် အလွန်နက်ရှိုင်းသော စိတ်ခံစားမှုတစ်ရပ်ဖြစ်ပြီး စကားလုံးများဖြင့် ဖော်ပြရန်ခက်ခဲသည့် တည်ငြိမ်အေးချမ်းမှုတရပ်က ကျွန်ုပ်တို့ကို လွှမ်းခြုံထားပါသည်။
ဤနေရာတွင် ရှိနေစဉ်အတွင်း သံဃာတော်များနှင့် ဥပါသကာ၊ ဥပါသိကာတော်များသည် ကုသိနာရုံ၏ သမိုင်းဝင် အထွတ်အမြတ်နေရာ နှစ်ခုတွင် သွားရောက်၍ ဂါရဝပြု ပူဇော်ခွင့်ရခဲ့ကြပါသည်။
• ပရိနိဗ္ဗာန်စေတီတော် (Parinirvana Stupa)
ဤသည်မှာ ဗုဒ္ဓမြတ်စွာဘုရား ပရိနိဗ္ဗာန် စံဝင်တော်မူခဲ့သော မြင့်မြတ်သည့်နေရာဖြစ်ပါသည်။
အေးချမ်းစွာ လျောင်းစံတော်မူသော ရှေးဟောင်း ရုပ်ပွားတော်မြတ်ကြီးကို စေတီဖြူတော်ကြီးက ဖူးမြော်ကြည်ညိုနိုင်အောင် တည်ရှိနေပါသည်။
အလွန်နက်ရှိုင်းသော သဒ္ဓါတရားဖြင့် ကျွန်ုပ်တို့အားလုံး စုပေါင်းကာ ရဟန်းသံဃာတော်၏ သင်္ကန်းတော်ကို ကိုယ်စားပြုသော ရွှေရောင်ပိတ်ကြီးဖြင့် ရုပ်ပွားတော်မြတ်အား ခြုံလွှမ်းပူဇော်ခဲ့ကြပြီး အမြတ်ဆုံးသော ဂါရဝပူဇော်မှုကို ဆောင်ရွက်ခဲ့ကြပါသည်။
• ရာမာဘာရစေတီတော် (Ramabhar Stupa)
ဤနေရာသည် ဗုဒ္ဓမြတ်စွာဘုရား၏ ရုပ်ကလာပ်တော်ကို မီးသင်္ဂြိုဟ်ခဲ့သော သမိုင်းဝင်နေရာဖြစ်ပါသည်။
ရာစုနှစ်များစွာ တည်တံ့နေခဲ့သော အနီရောင်အုတ်စေတီတော်ကြီးဖြင့် အမှတ်အသားပြုထားပါသည်။
ဤနေရာတွင် ကျွန်ုပ်တို့သည် ကြာပန်းများကို ပူဇော်ဆက်ကပ်ခဲ့ကြပြီး၊ မြတ်စွာဘုရား၏ လောကခရီးစဉ် အဆုံးသတ်ရာ ဤမြင့်မြတ်သော နေရာတွင် တိတ်ဆိတ်စွာ ဆင်ခြင်အောက်မေ့ခဲ့ကြပါသည်။
ဤသန့်ရှင်းမြင့်မြတ်သော နေရာများတွင် ရှိနေခွင့်ရခြင်းက ကျွန်ုပ်တို့၏ စိတ်နှလုံးနှင့် အသိဉာဏ်ကို အလွန်နက်ရှိုင်းသော ငြိမ်းချမ်းတည်ငြိမ်မှုဖြင့် ပြည့်ဝစေခဲ့ပါသည်။
ကျွန်ုပ်တို့သည် မြတ်စွာဘုရားရှင်ကို လေးနက်စွာ အောက်မေ့ဆင်ခြင်မိကြပါသည်။
ကိုယ်တော်မြတ်သည် အကန့်အသတ်မဲ့ ကရုဏာတရားနှင့် ပညာတရားတို့ဖြင့် ဤကမ္ဘာမြေပေါ်တွင် လျှောက်လှမ်းတော်မူခဲ့သော မြင့်မြတ်သည့် လူသားတစ်ဦးဖြစ်ပြီး သတ္တဝါအားလုံး ဒုက္ခမှ လွတ်မြောက်နိုင်ရန် မိမိဘဝတလျှောက်လုံးကို အနစ်နာခံ၍ လမ်းညွှန်ပြသတော်မူခဲ့ပါသည်။
ကိုယ်တော်၏ ဘဝနှင့် အချိန်ကာလကို ကျော်လွန်တည်ရှိနေသည့် ဓမ္မတရားတော်များသည် Walk for Peace ခရီးစဉ်၏ အဓိက လှုံ့ဆော်အားပေးမှု ဖြစ်ပါသည်။
ဤမြင့်မြတ်သော မြေပြင်သည် ငြိမ်းချမ်းရေးလမ်းစဉ်ဆိုသည်မှာ မိုင်ပေါင်းများစွာကို ခြေကျင်လျှောက်လှမ်းရုံမျှ မဟုတ်ဘဲ၊ မိမိတို့၏ စိတ်နှလုံးအတွင်း၌ မူလကတည်းက တည်ရှိနေသော ငြိမ်းချမ်းမှုဆီသို့ နူးညံ့သိမ်မွေ့စွာ လျှောက်လှမ်းသည့် ခရီးစဉ်ဖြစ်ကြောင်း သတိပေးနေပါသည်။
သင်နှင့် သတ္တဝါအားလုံး ကျန်းမာချမ်းသာ၍ ပျော်ရွှင်ငြိမ်းချမ်းကြပါစေ။
Crd by WALK FOR PEACE,
🙏🙏🙏
゚
