24/06/2024
သူမေးထားတာ တိုတိုလေး။ မနေနိုင်မထိုင်နိုင် စာအရှည်ကြီး ဝင်ရေးဖြစ်တယ်။ ကလေးတွေကို အဲဒီလို သင်ပေးဖြစ်တယ်။ ကလေးတွေကို ဗဟုသုတ၊ အတွေးအခေါ်၊ လေ့လာလိုစိတ်ကို အဓိကပေးချင်တာ။ ပုစ္ဆာတွက်ဖို့ အဓိကဦးစားပေးရင် ရိုဘော့တွေ ဖြစ်ကုန်မယ်လို့ ကလေးတွေကို ပြောဖြစ်တယ်။ တစ်ချို့က ဗဟုသုတထက် ပုစ္ဆာမြန်မြန်တွက်၊ အဖြေကို ဦးအောင် ပြောချင်တယ်။ အခြေခံပညာရေးသင်ယူတဲ့အရွယ်မှာ အတွေးအခေါ်နဲ့ စူးစမ်းလိုမှုကို အစပျိုးပေးလိုက်ချင်တာ။ အချိန်အကြောင်းသင်ရင် တစ်ရက်မှာ ၂၄ နာရီဘာလို့ ဖြစ်နေတာလဲက စမေးလိုက်တယ်။
=•••=======
Comment ပေးလိုက်တာက
၁ ပေကို ၁၂ စိပ်ထားပြီး၊ တစ်စိပ်ကို တစ်လက်မလို့ ခေါ်တာမို့ ၁၂ လက်မပြည့်ရင် တစ်ပေဖြစ်တယ်။ တစ်မီတာကို အစိပ်တစ်ရာ စိပ်ထားပြီး တစ်စိပ်ကို ၁ စင်တီမီတာခေါ်တယ်။ ၁၀၀ စင်တီမီတာက တစ်မီတာပဲ။ ဒါတွေက ရှေးလူတွေက သတ်မှတ်ထားတာမို့ ကိုယ်က ပြောင်းလဲလို့ မရဘူး။ နောက်လူတွေက သတ်မှတ်ချက်ကို လိုက်မှတ်ထားဖို့ပဲ။
လောကမှာ သတ်မှတ်ချက်တွေရှိတယ်။ သီအိုရီတွေရှိတယ်။ သတ်မှတ်ချက်ဆိုတာက ၁၂ လက်မ တစ်ပေ၊ ၂၄ နာရီ တစ်ရက် စသဖြင့်။ ရှေးလူတွေ သတ်မှတ်ခဲ့တာ။ အင်္ဂလိပ်လို သီအိုရီကို နည်းယာမလို့ခေါ်တယ်။ နည်းယာမဆိုတာ သဘာဝတရားတွေ။ ဒါတွေကလည်း သဘာဝတရားမို့ ပြောင်းလဲလို့ မရဘူး။ တစ်စုံတစ်ယောက်က သဘာဝနည်းယာမတွေကို တွေ့ရှိသွားတဲ့အခါ သဘာဝတရား နည်းယာမတွေက ဒီလိုပါလားလို့ နားလည်အောင် လုပ်ပြီး မှတ်သားရတာပဲ။ သူတပါး မတွေ့သေးတဲ့ နည်းယာမတွေကို ကိုယ်ဖော်ထုတ်နိုင်အောင် ကြိုးစားကြတာရှိသလို သူတပါးဖော်ထုတ်ထားတဲ့ နည်းယာမတွေကို အသုံးချနိုင်အောင် ကြိုးစားကြတဲ့ အပိုင်းလည်း ရှိတယ်။
မေးခွန်းရှင် မေးထားတဲ့အရာက သတ်မှတ်ချက်တစ်ခုပဲ။ တစ်မီတာ အလျား၊ အနံ၊ အမြင့် ပတ်လည်ရှိတဲ့ ကုဗတုံးတစ်ခုကို တစ်ကုဗမီတာလို့ သတ်မှတ်ထားတယ်။ အဲဒီကုဗတုံးလေးတွေကို အတုံးတစ်ထောင် အညီအမျှစိပ်လိုက်ရင် တစ်တုံးက အလျား၊ အနံ၊ အမြင့် ၁၀ စင်တီမီတာ စီရမယ်။ 10 cm x 10 cm x 10 cm = 1000 cubic cm
1 cubic m အတုံး တစ်ခုက 1000 cubic cm ရှိတဲ့ အတုံးပေါင်း 1000 ရှိတယ်။ ထုထည် မှန်သမျှကို ကုဗမီတာ၊ ကုဗစင်တင်မီတာတွေနဲ့ ဖော်ပြနိုင်တယ်။ လီတာဆိုတာကတော့ အရည်နဲ့ဆိုင်တဲ့ ထုထည်တွေကို ဖော်ပြရာမှာ သုံးလေ့ရှိတယ်။ 1000 ကုဗစင်တီမီတာ အတုံးလေးက ၁ လီတာနဲ့ ညီမျှတယ်။ ဒါကြောင့် လီတာ ၁ ထောင်က ၁ ကုဗမီတာနဲ့ ညီမျှသွားတယ်။
အလွယ်ဥပမာ ပေးရရင် ရေတစ်လီတာရှိ ရေဘူးတစ်ထောင်ကို တစ်မီတာ ပတ်လည်ရှိတဲ့ ကန်ထဲထည့်ရင် ရေအပြည့်အတိ ရမယ်။ ဒါသတ်မှတ်ထားချက်ပဲ။ သတ်မှတ်ချက်ဆိုတာ နားလည်အောင်လုပ်ပြီး မှတ်သားထားဖို့ပဲ။
အလျား၊ အချိန်၊ အလေးချိန်ဆိုတဲ့ မူလအတိုင်းအတာတွေ၊ ဆင့်ပွါးလာတဲ့ ထုထည်၊ ကီလိုဝပ်လို အရာတွေက ရှေးခေတ်လူတွေက နယ်မြေဒေသအလိုက် အသုံးပြုခဲ့ကြတာမို့ သတ်မှတ်ချက်အမျိုးမျိုးရှိခဲ့တယ်။ ဥပမာ အလျားကို မြန်မာတွေက မိုက်၊ ထွာ၊ တောင်၊ အင်္ဂလိပ်တွေက foot, yard, chain ။ ထုထည်ကို မြန်မာတွေက စလယ်၊ ပြည်၊ တင်းတောင်း၊ အင်္ဂလိပ်တွေက pint, quart, gallon နဲ့ သတ်မှတ်ခဲ့ကြတယ်။ မတူတဲ့ တိုင်းပြည်၊ လူမျိုးတွေ ရောင်းဝယ်ဖောက်ကား၊ အလုပ်လုပ်ကြလာတဲ့အတွက် အများသဘောတူ စံသတ်မှတ်ချက်တွေထားလာကြတယ်။ အင်္ဂလိပ်တွေ အုပ်စိုးခံရတဲ့နိုင်ငံနဲ့ လူမျိုးတွေကြ အင်္ဂလိပ် စံယူနစ် သတ်မှတ်ချက်တွေ သုံးဖြစ်ကြတယ်။ ဥရောပက ပြင်သစ်နိုင်ငံက ဦးဆောင်ပြီး အပြည်ပြည်ဆိုင်ရာ စံယူနစ်တွေ သတ်မှတ်ခဲ့ကြတယ်။ ကမ္ဘာပေါ်မှာ ယနေ့ တွင်ကျယ်စွာ အသုံးပြုနေတဲ့ စံယူနစ် ၂ ခုက အင်္ဂလိပ်စနစ် FPS နဲ့ အပြည်ပြည်ဆိုင်ရာ MKS စနစ်တို့ ဖြစ်တယ်။
သို့သော်လည်း နိုင်ငံနဲ့ လူမျိုးအလိုက် ဒေသအတွင်းမှာတော့ ရှေးယခင်အဆက်ဆက် အသုံးပြုခဲ့တဲ့ အတိုင်အတာ သတ်မှတ်ချက်တွေကို အသုံးစဲ ဖြစ်တယ်။ ဥပမာ မြန်မာမှာဆို အလေးချိန်နဲ့ ပတ်သတ်ရင် ရွေး၊ ကျပ်သား၊ ပိဿာ တို့ဖြစ်ပြီး တရုတ်၊ ယိုးဒယားတို့မှာ မြေအရောင်းအဝယ်ပြုရင် သူတို့ ဘိုးဘွား အစဉ်အဆက်သုံးနေတဲ့ အတိုင်းအတာ သတ်မှတ်ချက်ကို စံပြုသုံးစဲ ဖြစ်တယ်။
ကလေးတွေကို အဲဒီလိုလေးတွေ သင်ပေးပါ။ ၁၂ လက်မ တစ်ပေဆိုတာလောက် ခပ်တုံးတုံးကြီး မသင်ပေးပါနဲ့။ ယနေ့ အင်တာနက်ခေတ်ကြီးမှာ ကလေးတွေကို ဘယ်နိုင်ငံက ဘယ်လို သတ်မှတ်ချက် ယူနစ်တွေ သုံးကြလဲ research လေးတွေ လုပ်ခိုင်း၊ assignment လေးတွေတင်ခိုင်းတာမျိုး လုပ်ခိုင်းစေချင်တယ်။ AI technology, big data analysis ဘက် သွားနေတဲ့ခေတ်မှာ ကလေးတွေကို သင်ကြားတာ machine language level program သွင်းသလို မသင်ပေးသင့်ဘူး။
