ООУ „Блаже Конески“ - Велес

01/09/2026

Добредојде во нашето училиште на најважните, нашите првачиња!

Денес за вас, драги првачиња, започнува едно ново и прекрасно патување. За првпат ги поминувате училишните врати, ќе седнете во училишните клупи, ќе ги запознаете вашите наставници, ќе стекнете нови другарства.

Можеби денес има малку возбуда, можеби и по некоја солза, но верувајте, пред вас се години исполнети со знаење, дружење, игра, нови искуства и многу убави спомени.

Нашите наставници се подготвени не само да ги научат првачињата да читаат, пишуваат и да стекнуваат нови знаења, туку и да им помогнат да ги направат своите први чекори кон самостојноста, одговорноста, почитувањето и другарството.

Знаеме дека секое дете е различно, со свои потреби, интереси, способности и темпо на развој. Токму затоа ќе се трудиме секое дете да биде забележано, слушнато, охрабрено и поддржано.

Од денес нашето училиште е и ваш дом. Тука ќе ги направите првите чекори кон вашите идни соништа. Можеби денес сте мали, но пред вас се големи можности. Не плашете се да прашувате, да грешите, да се обидувате повторно и да сонувате големи соништа.

Во нашето училиште секој од вас е важен, секој има свој талент и секој заслужува поддршка и внимание.

Ви посакуваме во секој училишен ден да има по нешто ново што ќе научите, по нешто убаво што ќе доживеете и многу причини за насмевка.

Нека ви е среќен првиот училишен ден, првиот чекор кон големите соништа!

Добредојдовте во нашето училиште!

Ви посакувам среќна, успешна и безгрижна учебна година!

28/08/2026

Дел од атмосферата од настапот на нашиот училишен бенд на „Велешко лето 2026“!

27/08/2026

ИЗВЕСТУВАЊЕ ЗА ПОЧЕТОКОТ НА УЧЕБНАТА 2026/2027 ГОДИНА!

Почитувани родители и ученици,

Со почетокот на новата учебна година, Општинското основно училиште „Блаже Конески“ – Велес на 1 септември 2026 година, вторник, го започнува воспитно-образовниот процес за учебната 2026/2027 година.

Училиштето е подготвено за новите предизвици и активности, со создадени услови за непречено одвивање на наставата и пријатна средина за учење и работа.

Со заеднички ангажман, посветеност и позитивна енергија, продолжуваме да градиме училиште во кое секој ученик ќе има можност да учи, да се развива, да ги открива и надградува своите способности и да постигнува успеси.

Добредојде им посакуваме и на нашите најмали ученици, првачињата, за кои започнува едно ново и значајно поглавје во нивниот живот.

Учениците од Прво одделение, заедно со нивните родители, ги очекуваме на свечениот прием во поливалентниот простор на училиштето, во периодот од 9:15 до 9:30 часот.

Во 9:30 часот ќе започне кратка забавна програма под мотото „Првиот чекор кон големите соништа“, подготвена за нив од нивните поголеми другарчиња.

По завршувањето на програмата, првачињата ќе бидат повикани од своите наставнички и, заедно со нив, ќе заминат во своите училници, каде што ќе го направат првиот чекор во едно ново патување исполнето со учење, дружење, нови пријателства, незаборавни моменти и големи соништа.

Ученици од II до IV одделение

Наставата за учениците од II до IV одделение започнува во 7:30 часот. На првиот наставен ден нема да се организира исхрана и продолжен престој за нив.

Учениците од II одделение ќе бидат пречекани од своите наставнички на влезот од прво одделение, по што заедно ќе се упатат во своите училници.

За учениците од V до IX одделение, наставата ќе се одвива во две смени:

Прва смена – од 7:30 часот:
V-1 и V-4 одделение
VI одделение
VIII одделение

Втора смена – од 13:00 часот:
V-2 и V-3 одделение
VII одделение
IX одделение

Учениците од VI одделение ќе бидат пречекани од своите одделенски раководители во поливалентниот простор во 7:30 часот, по што заедно ќе се упатат во своите матични училници.

Секој ученик е важен дел од нашето училиште и наша заедничка одговорност е да му овозможиме услови за учење, развој и напредок.

Наставниот кадар, стручната служба, директорот и сите вработени во училиштето и во новата учебна година ќе бидат посветени на создавање поддржувачка, безбедна и поттикнувачка средина во која учениците ќе можат слободно да учат, да ги развиваат своите способности и да ги остваруваат своите цели.

На сите ученици им посакуваме среќен и успешен почеток на учебната година, исполнет со нови знаења, пријателства, убави моменти и многу успеси!

Со почит,
ООУ „Блаже Конески“ – Велес

25/08/2026

ВЕЧЕР НА БЕНДОВИ - ВЕЛЕШКО ЛЕТО 2026!

Како дел од програмата на „Велешко лето 2026“, со свој настап ќе се претстави училишниот бенд на ООУ „Блаже Конески“ – Велес!

Нашите ученици ќе ви приредат незаборавна музичка вечер, исполнета со омилените песни, позитивна енергија и многу ентузијазам.

Дојдете да ги поддржиме нашите млади музички таленти и заедно да уживаме во музиката!

26.08.2026 | 20:00 часот | Младински парк

20/08/2026

Нашите ученици дел од меѓународните „Плазма спортски игри“ во Сплит!

Со голема гордост споделуваме дека наши ученици се дел од македонската делегација која ја претставува нашата држава на меѓународните „Плазма спортски гри“, кои се одржуваат во Сплит, Република Хрватска.

На ова големо спортско натпреварување, нашите ученици имаа можност да ги одмерат силите со свои врсници од различни држави од целиот Балкан, покажувајќи спортски дух, упорност, фер-плеј и тимска работа.

Особено значаен успех оствари нашата ученичка Марија Кирова под менторство на наставникот Александар Тодоровски, која се натпреваруваше во дисциплината атлетика и освои фантастично 5то место во конкуренција на 18 учесници од целиот Балкан!

Овој резултат претставува огромен успех за Марија, за нашето училиште и за Република Северна Македонија. Нејзината посветеност, труд и спортски дух се вистински пример за сите наши ученици.

Учениците од III одделение во состав: Иан Попов, Лука Чочков, Јаков Коцевски, Ѓорѓина Груев, Марта Папазовска, Клара Папазовска, Димитар Иванов, Лена Мечкарова, Кристија Зафирчев под менторство на наставникот Марјан Петров, учествуваа во дисциплината народна топка, каде што со голема борбеност, тимски дух и позитивна енергија достојно го претставија нашето училиште и нашата држава и освоија одличното 5то место.

Горди сме на сите наши ученици кои со своето учество, однесување и постигнувања испишуваат уште една убава страница во спортската приказна на нашето училиште.

Браво, Марија! Браво за нашиот спортски тим!

Продолжете храбро, со спортски дух и верба во себе!
Вашиот успех е наша гордост!

13/08/2026

Ви посакуваме многу среќа, успех и незаборавни моменти! Покажете го вашиот спортски дух, борбеност и тимски дух и уживајте во секој момент!

Веруваме во вас! Среќно шампиони!

Велес патува на меѓународните Плазма Спортски игри за млади!

Триесетина ученици со своите ментори од основните училишта во градот оваа недела ќе се упатат кон Сплит на меѓународните Плазма Спортски игри за млади. Нашата спортска екипа со постигнатите успеси на државните спортски игри е најбројната од Македонија и ќе се натпреварува во народна топка, атлетика, ракомет, тенис и одбојка на песок. Благодарност до Сојузот на училишен спорт од Велес за нивниот ангажман и посветеност, а Општина Велес и понатаму ќе поддржува активности кои придонесуваат за здрав и правилен развој на децата.

Им посакуваме многу спортски успеси, дружење и нови искуства! Велес е спортски град!

30/06/2026

ДРЖАВНИ ШАМПИОНИ ОД ООУ „БЛАЖЕ КОНЕСКИ“ - ВЕЛЕС!

Со голема гордост споделуваме дека учениците од нашето основно училиште постигнаа извонреден успех на Државното првенство на Плазма Спортските игри за млади, каде што достојно го претставија нашето училиште и покажаа вистински спортски дух, посветеност и тимска игра.

Во силна конкуренција на најдобрите училишни екипи од целата држава, нашите ученици освоија две први места и едно трето место со што се закитија со титулата државни прваци во своите дисциплини!

Марија Кирова - ПРВО МЕСТО - АТЛЕТИКА
ментор: Александар Тодоровски

Генерација на III одделение - ПРВО МЕСТО - НАРОДНА
ментор: Марјан Петров

Стефан Тодоровски - ТРЕТО МЕСТО - ПИНГ ПОНГ

Нашите шампиони со освоеното прво место се пласираа меѓу најдобрите на балканот и од 17 до 22 Август ќе го претставуваат нашето училиште и нашата држава на меѓународното финале кое ќе се одржи во Сплит, Хрватска, а ќе имаат можност да се натпреваруваат со најдобрите спортисти од Хрватска, Србија, Словенија и Босна и Херцеговина.

Овој голем успех е резултат на нивниот труд, дисциплина и упорност, како и на несебичната поддршка и посветеност на нивните ментори.

Им честитаме од срце на сите учесници за одличното претставување, а особено на нашите државни шампиони, кои со своите резултати уште еднаш докажаа дека нашето училиште е дом на талентирани, успешни и амбициозни млади спортисти.

Браво шампиони! Ви посакуваме многу нови победи, спортски успеси и достојно претставување на сите идни натпреварувања!

13/06/2026

Драги ученици!

Пред девет години за првпат влеговте низ вратите на нашето училиште како љубопитни и насмеани деца. Сега стоите пред нас како млади луѓе, подготвени за нови предизвици, нови знаења и нови успеси. Во овие училишни клупи не стекнавте само знаење. Создадовте пријателства, научивте важни животни лекции, ги развивавте своите таленти и го градевте својот карактер. Горди сме на секој ваш успех, на секој вложен труд и на секој чекор што ве доведе до денешниот ден. Зад вас остануваат многу убави спомени, но пред вас се отвораат уште поголеми можности.

Драги деветтоодделенци, каде и да ве однесе вашиот пат, носете ги со себе вредностите што ги научивте овде, почитта, чесноста, одговорноста, другарството и љубовта кон знаењето. Не заборавајте дека вратите на нашето училиште секогаш ќе останат отворени за вас и дека секогаш ќе бидете дел од нашето училишно семејство

Средното образование ќе ви донесе нови искуства, нови предизвици и нови одговорности. Веруваме дека ќе ги пречекате со истата упорност, љубопитност и желба за напредок што ја покажувавте и во нашето училиште. Не плашете се да сонувате големи соништа и да поставувате високи цели. Успехот секогаш им припаѓа на оние кои веруваат во себе и вредно работат за своите цели.

Со искрена гордост и најубави желби, ви честитаме за успешно завршеното основно образование и ви посакуваме среќен пат кон новите животни предизвици.

Сонувајте големи соништа и имајте храброст да ги остварите!

Честита полуматура и со среќа на патот кон иднината!

11/06/2026

Одлични резултати на Државниот натпревар по природни науки!

Со голема гордост ги споделуваме успесите на нашите ученици на Државниот натпревар по природни науки, каде повторно покажаа знаење, посветеност и љубов кон науката.

Нивниот труд, истрајност и желба за нови знаења беа препознаени и наградени со одлични резултати, достојно претставувајќи го нашето училиште на највисоко ниво.

Им честитаме на сите учесници за вложениот труд, а особено на наградените ученици и нивните ментори кои со својата работа придонесоа за овој значаен успех.

Продолжуваме да создаваме, учиме и постигнуваме нови успеси!

10/06/2026

Државен натпревар по македонски јазик

Со голема гордост објавуваме дека учениците од нашето училиште достојно нè претставија на Државниот натпревар по македонски јазик.

Нивната посветеност, љубов кон мајчиниот јазик и вложениот труд повторно покажаа дека знаењето, упорноста и талентот носат успех. Учениците имаа можност да ги покажат своите јазични вештини и да се натпреваруваат со најдобрите ученици од целата држава.

Им честитаме на сите учесници за постигнатиот успех и им посакуваме уште многу идни достигнувања. Благодарност и до наставниците-ментори кои несебично ги подготвуваа и поддржуваа на нивниот пат кон успехот.