Forumi Rinor Islam - Islamic Youth Forum

ORIENTIMI PROFESIONAL – NJË HAP DREJT SË ARDHMES

Forumi Rinor Islam – Shkup realizoi me sukses aktivitetin edukativ “Orientimi Profesional”, i cili u mbajt në hapësirat e INNOX-it dhe u udhëhoq nga prof. Abil Baush.

Aktiviteti u hap me një fjalë përshëndetëse nga kryetari i FRI-Shkup, Afrim Demiri, i cili theksoi rëndësinë e investimit në edukimin dhe zhvillimin e të rinjve, duke nënvizuar se orientimi profesional paraqet një nga vendimet më të rëndësishme në ndërtimin e së ardhmes së tyre akademike dhe profesionale.

Gjatë trajnimit, pjesëmarrësit patën mundësinë të njihen me parimet bazë të orientimit profesional, procesin e identifikimit të aftësive dhe interesave personale, si dhe rëndësinë e përzgjedhjes së një profesioni që përputhet me potencialin dhe synimet e secilit individ. Përmes metodave interaktive, diskutimeve dhe ushtrimeve praktike, u përcollën njohuri të vlefshme dhe këshilla konkrete për zhvillimin personal dhe profesional.

Aktiviteti u zhvillua në një atmosferë pozitive dhe bashkëpunuese, duke nxitur reflektim, shkëmbim përvojash dhe diskutime të hapura ndërmjet pjesëmarrësve. Në përfundim, të rinjtë shprehën vlerësime dhe përshtypje pozitive për përmbajtjen dhe dobinë e trajnimit.

Forumi Rinor Islam – Shkup mbetet i përkushtuar në organizimin e aktiviteteve edukative dhe zhvillimore që synojnë fuqizimin e të rinjve dhe mbështetjen e tyre në rrugëtimin akademik, profesional dhe shoqëror.

Shkup, 30 maj 2026

NGA VETËBESIMI I ULËT DREJT FUQIZIMIT PERSONAL - TAKIMI I FUNDIT “TALENTIUM”

Në kuadër të projektit Talentium i realizuar ne zyret e Forumit Rinor Islam - Dega Shkup, u zhvillua takimi i fundit me temë: “Ndërtimi i Vetëbesimit dhe Prezantimi Personal”, i udhëhequr nga ligjëruesi Zuhri Kamberi.

Ligjërata u fokusua në rëndësinë e vetëbesimit dhe ndikimit të tij në formimin e individit, sidomos në mënyrën e komunikimit, në marrëdhëniet me të tjerët dhe në paraqitjen publike.

Gjithashtu u trajtuan dallimet mes vetëbesimit të shëndetshëm, arrogancës dhe mendjemadhësisë, si dhe vetëbesimit të ulët, duke u sqaruar veçoritë kryesore dhe mënyra se si ato reflektohen në sjelljen e përditshme.

Përmes shembujve praktikë dhe diskutimeve interaktive, pjesëmarrësit u orientuan drejt mënyrave të ndërtimit të vetëbesimit të qëndrueshëm, përmes njohjes së aftësive personale, pranimit të kufizimeve dhe punës së vazhdueshme për vetëpërmirësim.

Në rrjedhën e aktivitetit u realizuan edhe ushtrime individuale dhe në grupe, të cilat i ndihmuan të rinjtë të identifikojnë faktorët që ndikojnë në uljen e vetëbesimit, të sfidojnë mendimet negative dhe të praktikojnë metoda për forcimin e sigurisë personale.

Në përmbyllje, ky takim u vlerësua si një hap i rëndësishëm në fuqizimin personal të të rinjve, duke i motivuar ata të besojnë në potencialin e tyre, të përballen me sfidat me guxim dhe të synojnë zhvillim të vazhdueshëm.

Shkup, 30 maj 2026

NJË FILLIM I NDRITUR - MARTESA ME HATIXHEN (R.A.)

Forumi Rinor Islam - Dega Shkup, realizoi ligjëratën e katërt në kuadër të ciklit edukativ “Në gjurmët e Muhammedit a.s”, me temë: “Një histori mbështetjeje – Martesa me Hatixhen r.a”, ligjëruar nga hoxhë Hasan Baftijari.

Takimi filloi me lexim të ajeteve Kur’anore nga hfz. Tarik Alija.

Ligjërata trajtoi periudhën e rëndësishme të jetës së Profetit Muhammed a.s., duke ndalur vëmendjen te njohja dhe bashkëpunimi i tij me Hatixhen r.a., e cila u dallua për urtësinë, besimin dhe mbështetjen e saj të palëkundur.

Gjatë ligjëratës u theksuan fillimet e ortakërisë së tyre në tregti, suksesi dhe besueshmëria që Muhammedi a.s. fitoi në mesin e njerëzve, si dhe udhëtimi i tij në Damask, i cili shënoi një etapë të rëndësishme në jetën e tij para martesës.

Një vëmendje e veçantë iu kushtua edhe martesës së tyre, duke e paraqitur atë si shembull të një raporti të ndërtuar mbi sinqeritetin, respektin dhe përkrahjen e ndërsjellë.

Cikli i ligjëratave do të vazhdojë edhe në javët në vijim me tema të tjera nga jeta dhe shembulli i Profetit Muhammed a.s.

Shkup, 21 maj 2026

FORUMI RINOR ISLAM BASHKON TË RINJTË NË IFTARE TË PËRBASHKËTA

Në kuadër të 10 ditëve të bekuara të Dhulhixhes, Forumi Rinor Islam organizoi iftare të përbashkëta me anëtarët dhe aktivistët në degët e Tetovës, Shkupit dhe Kumanovës, duke krijuar atmosfera vëllazërore, imanore dhe plot ngrohtësi rinore.

Mbrëmjen e së hënës, në ambientet e zyrave të degëve në Tetovë dhe Shkup, Departamenti i Edukimit realizoi iftar të përbashkët me anëtarët, ku të pranishmit patën mundësi të kalojnë çaste të mira së bashku, në frymë bashkimi, respekti dhe reflektimi mbi vlerat islame.

Ndërsa një ditë më vonë, iftari i përbashkët u realizua edhe në Kumanovë, me pjesëmarrjen e anëtarëve dhe aktivistëve të kësaj dege. Ky aktivitet shërbeu si një mundësi e mirë për forcimin e lidhjeve mes të rinjve, bashkëbisedim dhe ndarje të momenteve të veçanta në atmosferë vëllazërore.

Përmes këtyre organizimeve, Forumi Rinor Islam vazhdon të promovojë afrimin, unitetin dhe frymën e solidaritetit mes të rinjve, veçanërisht në ditët e begata të Dhulhixhes.

Tetovë, Shkup, Kumanovë
29 Maj 2026

Në këtë ditë të bekuar të Kurban Bajramit, lusim Allahun që të pranojë adhurimet, sakrificat dhe lutjet tona, të mbushë zemrat tona me qetësi, shtëpitë me bereqet dhe jetët tona me mëshirën e Tij.

Le të jetë kjo festë një kujtesë për afërsinë me Allahun, për sinqeritetin, sakrificën dhe dashurinë ndaj njëri-tjetrit.

Gëzuar Bajramin e Kurbanit!

GËZOJMË FËMIJËT NË PRAG TË KURBAN BAJRAMIT

Një ditë para festës së Kurban Bajramit, Forumi Rinor Islam – Dega Tetovë realizoi shpërndarjen e dhuratave për fëmijët e Kopshtit të fëmijëve “Rinia” – objekti Teteks 1, me qëllim që në prag të festës të sjellim buzëqeshje, gëzim dhe atmosferë festive tek më të vegjlit.

Ky aktivitet u zhvillua në një frymë ngrohtësie dhe kujdesi ndaj fëmijëve, duke përcjellë mesazhin e solidaritetit, dashurisë dhe vlerave humane që bart kjo festë.

Falënderojmë stafin e kopshtit për mikpritjen dhe bashkëpunimin, duke uruar që Kurban Bajrami të sjellë paqe, begati dhe mirësi për të gjithë.

Tetovë, 26 Maj 2026

TAKIMI I PESTË “TALENTIUM” – KOMUNIKIMI VERBAL DHE JOVERBAL SI ÇELËS I BASHKËVEPRIMIT TË SUKSESSHËM

Në kuadër të aktiviteteve edukative të projektit “Talentium”, më 23 maj 2026 u realizua takimi i pestë me temë “Komunikimi verbal dhe jo verbal”, i udhëhequr nga ligjëruesi Arsim Jonuzi.

Gjatë ligjëratës u trajtua rëndësia e komunikimit në jetën e përditshme, duke u ndalur veçanërisht tek dallimi dhe roli i komunikimit verbal dhe joverbal në marrëdhëniet ndërpersonale dhe profesionale.

Ligjëruesi foli mbi tiparet kryesore të të dy formave të komunikimit, duke përfshirë përdorimin e leksikut, tonin e zërit, ritmin dhe qartësinë në komunikimin verbal, si dhe qëndrimin e trupit, kontaktin me sy dhe shprehjet e fytyrës në komunikimin joverbal.

Në kuadër të aktivitetit u zhvilluan edhe ushtrime praktike dhe interaktive, të cilat i ndihmuan nxënësit të kuptojnë më lehtë rëndësinë e komunikimit efektiv dhe mënyrat më të përshtatshme të shprehjes në situata të ndryshme.

Përmes ligjëratës dhe aktiviteteve praktike, pjesëmarrësit mësuan metoda më efikase të komunikimit, duke zhvilluar aftësi që kontribuojnë në bashkëpunim më të mirë, vetëbesim dhe mirëkuptim në komunikimin e përditshëm.

Ky takim përbën një hap të rëndësishëm në zhvillimin personal dhe profesional të të rinjve, duke i inkurajuar ata të ndërtojnë komunikim të shëndoshë dhe të suksesshëm në çdo aspekt të jetës.

Shkup, 23 maj 2026

Shfrytëzojini këto ditë të mbetura të Dhul-Hixhes me sa më shumë ibadet, dhikër, dua dhe vepra të mira.

Na pret dita e Arafatit - një nga ditët më madhështore tek Allahu, ndërsa agjërimi i saj shlyen mëkatet e dy viteve. Pas saj vijnë edhe ditët e Kurban Bajramit, ditë të mbushura me mëshirë, falje dhe afrimitet me Allahun.

Mos i lini këto ditë të kalojnë pa e përmendur Allahun dhe pa bërë diçka që ju afron tek Ai.

ZBULIMI I POTENCIALIT TË FSHEHUR – TAKIMI I RADHËS ME BURSISTËT NË TETOVË

Forumi Rinor Islam – dega Tetovë realizoi takimin e radhës me bursistët, në kuadër të aktiviteteve të vazhdueshme edukative dhe motivuese për të rinjtë.

Tema e këtij takimi ishte “Zbulo aftësitë dhe talentet tua të fshehura”, një trajnim inspirues që kishte për qëllim nxitjen e vetëdijes tek të rinjtë për potencialin, aftësitë dhe talentet që posedojnë, si dhe rëndësinë e zhvillimit të tyre në jetën personale dhe profesionale.

Ligjërata u realizua nga Fisnik Shabani, i cili përmes bashkëbisedimit dhe shembujve praktikë motivoi bursistët të besojnë më shumë në veten e tyre, të punojnë për zhvillimin personal dhe të mos hezitojnë të shfaqin potencialin që mbajnë brenda vetes.

Takimi u zhvillua në një atmosferë pozitive dhe interaktive, ku bursistët patën mundësi të ndajnë mendime, përvoja dhe ide rreth sfidave dhe mundësive që i ndihmojnë në zbulimin e aftësive të tyre.

Forumi Rinor Islam mbetet i përkushtuar në organizimin e aktiviteteve që kontribuojnë në formimin edukativ, intelektual dhe moral të të rinjve.

Tetovë, 23 Maj 2026