Eden Na Eden Fudbalska-Skola

02/09/2026

Момците на Мрмачоски тргнаа убедливо во Втората пионерска лига – Саботковски со хет-трик за 15 минути:

За првпат после 15 години постоење, Фудбалската школа „Еден на Еден“ од Могила отвори ново поглавје во својата приказна со настап во Втората пионерска лига на ФФМ.

Согласно правилата за настап во натпреварувањето, нашата екипа оваа сезона настапува под името на ФК Новаци, но своите натпревари ги игра во Могила, со фудбалери од школата „Еден на Еден“ и под водство на Никола Мрмачоски – УЕФА А лиценциран тренер.

Момците на Мрмачоски одиграа одличен натпревар и забележаа убедлива победа 5:1 против скопски Еуромилк.

Во центарот на вниманието беше Павел Саботковски, кој за само 15 минути постигна хет-трик. Саботковски погоди во 1., 3. и 15. минута, а подоцна уште еднаш се запиша меѓу стрелците во 72. минута. Во листата на стрелци се запиша и Андреј Трајковски, со погодок во 62. минута.

Сепак, покрај убедливата победа, посебно внимание заслужува еден податок кој можеби најдобро зборува за потенцијалот на оваа екипа и ростерот со кој настапуваме е значително помлад од носечката генерација на натпреварувањето.

Иако Втората пионерска лига оваа сезона се игра за генерацијата 2011, во ростерот на Мрмачоски за овој натпревар имаше само шест фудбалери родени 2011 година. Дури осум фудбалери се генерација 2012, пет се генерација 2013, а во составот беше и Лука Маркоски, генерација 2014.

Тоа значи дека од вкупно 20 фудбалери во ростерот, дури 14 се помлади од носечката генерација 2011.

Уште повпечатлив е податокот за фудбалерите кои добија минутажа. Од 16-те играчи кои настапија, десет беа помлади од носечката генерација, седум фудбалери родени 2012 и тројца родени 2013 година.

Токму затоа, повеќе од самиот резултат радува начинот на кој оваа млада екипа го започна новиот предизвик. Да се натпреваруваш со состав во кој огромен дел од фудбалерите се една, две, а во ростерот и три години помлади, значи да им дадеш можност порано да почувствуваат повисоко ниво на натпреварување и да собираат драгоцено искуство за годините што следуваат.

Почетен состав:

Александар Андреевски — 2011
Виктор Талевски — 2011
Павел Николовски — 2011
Марко Петровски — 2012
Виктор Јанчески — 2011
Иван Гулевски — 2012
Андреј Трајковски — 2012
Марко Мрмачоски — 2013
Христијан Пресилски — 2013
Христијан Јаневски — 2011
Павел Саботковски — 2011

Состав / резервни играчи:

Петар Велјановски — 2013 🔄
Дамјан Шурбевски — 2012 🔄
Марио Марковски — 2012 🔄
Андреј Нуневски — 2012 🔄
Стефан Илиевски — 2012 🔄
Боби Нунески — 2013
Кире Секулоски — 2013
Петар Иваноски — 2013
Лука Маркоски — 2014

Тренер: Никола Мрмачоски

01/09/2026

🦸‍♂️

28/08/2026

Могила за првпат добива второлигаш во младинска конкуренција!

Нова страница во 15-годишната приказна на Фудбалската школа „Еден На Еден“ – Могила!

За првпат од своето основање, нашата школа во новата сезона ќе биде дел од Втората младинска лига на ФФМ, што претставува уште еден голем чекор напред во развојот на младинскиот фудбал во Могила.

Во Втората младинска лига ќе настапуваат фудбалерите од генерациите 2011 и 2012. Согласно правилата за натпреварување, екипата ќе настапува под името на ФК Новаци, но своите домашни натпревари ќе ги игра во Могила.

Покрај настапот во Втората младинска лига:

▪️Генерациите 2012 и 2013 ќе се натпреваруваат во Регионалната лига – Преспанско-пелагониски регион.

▪️Генерациите 2015/16, 2017 и 2018 ќе настапуваат во Детската лига.

Сите категории ќе работат под стручно водство на Никола Мрмачоски – тренер со УЕФА А лиценца, а тренинзите ќе се одржуваат двократно, претпладне и попладне, на стадионот „Димко Сарванов“ во Могила, на еден од најдобрите фудбалски терени во регионот.

Од детска, преку регионална, па сè до Втора младинска лига, создаваме систем во кој нашите деца ќе имаат можност да растат, да напредуваат и да се натпреваруваат на сè повисоко ниво.

Вратите на Фудбалската школа „Еден На Еден“ се отворени за сите деца кои сакаат да ни се приклучат и да станат дел од приказната наречена „Еден На Еден“.

24/08/2026

🏆 Момците на Мрмачоски не знаат за доста – освоен е и „Фер Плеј Куп“ во Охрид!

Генерацијата 2017, со импресивни бројки и без ниту еден пораз, го освои престижното и исклучително квалитетно 15-то издание на „Фер Плеј Куп“ во Охрид!

Наш противник во големото финале беше екипата на Вук од Србија, а нашите момци со победа од 2:0 стигнаа до уште еден трофеј во својата колекција.

Но, поважно од самиот трофеј е начинот на кој оваа генерација игра фудбал. Овие момци лесно ги освојуваат срцата на публиката со допадлив, школски и офанзивен фудбал, многу погодоци и желба за игра која ретко се гледа на оваа возраст.

Продолжете да уживате момци – ова е ваше време!

Посебна благодарност и честитки до организаторите на „Фер Плеј Куп“ за одличната организација и за јубилејното 15-то издание на овој прекрасен фудбалски настан.

Беше задоволство да бидеме дел од турнирот и да уживаме во прекрасната фудбалска атмосфера во Охрид.

Се гледаме пак!

23/08/2026

🦸‍♂️ Ново финале за генерација 2017 – овојпат во Охрид, противникот повторно од Србија!

Ново финале за нашите момци од генерацијата 2017, кои речиси и да немаат турнир на кој учествуваат, а да не стигнат до финалето.

Откако во полуфиналето, по изведувањето на пенали, бевме подобри од екипата на Јанг Тим, во финалето нè очекува противник од Србија со кој веќе се сретнавме во групната фаза, во натпревар кој заврши 2:2.

🏟️ Финалето е закажано денес од 16:30 часот на „Билјанини Извори“ во Охрид.

Уживајте дечки, ова е ваше време!

16/08/2026

Белградски Партизан е последната пречка до нов трофеј за нашите момци од генерацијата 2017!

Нашите момци од генерацијата 2017 повторно се во финале, овојпат на престижниот и исклучително квалитетен „Трофеј Трајан Куља“ во Црнобуки.

Откако во изминатите две години оваа извонредна генерација освои речиси сè на турнирите на кои настапуваше, денес од 16:00 часот, на теренот во Црнобуки, за противник во големото финале ќе ја има екипата на белградски Партизан.

Уживајте во финалниот натпревар дечки, ова е ваше време!

02/08/2026

23/06/2026

Плакета за посебен придонес:

По повод 15 години постоење на Фудбалската школа „Еден на Еден“ од Могила, со особена чест ја доделуваме Плакетата за посебен придонес на Фидан Шемовски.

Фидан Шемовски е еден од најистакнатите личности од Могила, човек кој со својата работа и посветеност остави длабока трага во културниот живот на нашата општина. По негова заслуга се создадени и испеани многубројни песни посветени на Могила и овој регион.

Тој е организатор на единствениот Фестивал на дуети на Балканот, кој секое лето се одржува во Могила, а со години несебично ги поддржува културните, спортските и сите општествено значајни настани во нашата општина.

Во знак на благодарност за неговата долгогодишна поддршка, посветеност и придонес во афирмацијата на Могила, со особена чест му ја доделуваме Плакетата за посебен придонес.

Ви благодариме стрико Фидане, што со вашата работа и љубов кон Могила сте инспирација за сите нас.

22/06/2026

Индивидуални тренинзи со Никола Мрмачоски – УЕФА А лиценциран тренер:

Индивидуалните тренинзи не се само дополнителен тренинг, туку процес во кој секој играч добива програма креирана според неговите потреби.

Под стручно водство на Никола Мрмачоски – УЕФА А лиценциран тренер, со професионална тренинг опрема и одлични услови за работа, секој тренинг е насочен кон максимален индивидуален напредок.

📞 За повеќе информации и закажување термин: 071 858 751

21/06/2026

Плакета за трајни вредности!

По повод 15 години постоење на Фудбалската школа „Еден на Еден“ од Могила, со особена чест доделивме плакетата за трајни вредности на човекот кој беше еден од првите соработници на Фудбалската школа „Еден на Еден“ од Могила. Уште од самите почетоци, покрај моралната, даваше и несебична стручна поддршка и е креатор на логото на нашата школа, симболот по кој денес нè препознаваат илјадници деца, родители и спортски работници.

Можеби ниту самиот, кога го создаваше тоа лого пред 15 години, не можеше да претпостави каква приказна ќе следува. Денес, 15 години подоцна, тој е изграден професионалец, а Фудбалската школа „Еден на Еден“ е препознатлив бренд во целиот регион.

За неговиот несебичен придонес, доверба и трајниот печат што го остави во создавањето на идентитетот на нашата школа, со особена чест му ја доделивме Плакетата за трајни вредности на Мартин Мрмачовски.