Medreseja Isa Beu

17/08/2026

10/08/2026

AFATI I DYTË I REGJISTRIMEVE NË SHAM "MEDRESEJA ISA BEU”

Medreseja “Isa Beu” shpall afatin e dytë të regjistrimeve për nxënësit e rregullt të cilët dëshirojnë të vazhdojnë shkollimin e tyre në këtë institucion arsimor dhe fetar.

📚 Dorëzimi i dokumenteve mund të bëhet në Medresenë “Isa Beu” – Qendër, si dhe në paralelet e saj të shtrira në Shkup, Tetovë, Gostivar dhe Shtip.

📅 Dokumentet mund të dorëzohen duke filluar nga dita e nesërme, ndërsa regjistrimi do të jetë i hapur deri me 22.08.2026.

Ky afat i dytë u mundëson të gjithë nxënësve që kanë dëshirë të ndjekin mësimet në Medresenë “Isa Beu”, por që nuk kanë arritur të regjistrohen gjatë afatit të parë, të shfrytëzojnë edhe një mundësi për t’u bërë pjesë e kësaj shkolle.

🏫 Medreseja “Isa Beu” ofron një mjedis të përshtatshëm për edukim, arsimim dhe formim të gjithanshëm të nxënësve, duke ndërthurur dijen bashkëkohore me edukimin dhe vlerat islame.

📌 Për më shumë informacione rreth dokumentacionit dhe procedurës së regjistrimit, ju ftojmë të drejtoheni në Medresenë “Isa Beu” – Qendër ose në njërën nga paralelet e saj.

Mirë se vini në Medresenë “Isa Beu”!

10/08/2026

05/08/2026

GJENERATA E VI E MEDRESESË “ISA BEU” RIKTHEHET PAS MË SHUMË SE TRI DEKADASH NË VATRËN E DIJES DHE EDUKIMIT

Në një atmosferë të ngrohtë, plot emocione, mall dhe kujtime të bukura, Medreseja “Isa Beu” mirëpriti ish-nxënësit e Gjeneratës së VI, të cilët vijuan mësimet gjatë viteve shkollore 1989–1990 / 1992–1993, duke u rikthyer pas më shumë se tri dekadash në institucionin ku hodhën themelet e formimit të tyre fetar, arsimor dhe njerëzor.

Në këtë takim morën pjesë edhe ish-kujdestarët e tyre të klasës, Reisul Ulema i Bashkësisë Fetare Islame të Republikës së Maqedonisë së Veriut, H. Hfz. Shaqir ef. Fetahu, dhe prof. Mahir Hasani, të cilët për vite me radhë kanë qenë pjesë e rëndësishme e edukimit dhe formimit të kësaj gjenerate.

Ish-nxënësit u pritën nga drejtori i Medresesë “Isa Beu”, Dr. Islam Islami, i shoqëruar nga punëdrejtuesi, prof. Mervan Muhamedi, dhe sekretari i Medresesë, prof. Avni Neziri. Drejtori dhe bashkëpunëtorët e tij u uruan mirëseardhje ish-nxënësve, duke shprehur kënaqësinë e veçantë për vizitën dhe rikthimin e tyre në Medrese.

Në fjalën e tij, drejtori Dr. Islam Islami i informoi të pranishmit për ecurinë dhe zhvillimin e Medresesë “Isa Beu”, projektet e realizuara, sukseset e arritura, aktivitetet e shumta të institucionit, si dhe planet dhe synimet për të ardhmen.
Drejtori, njëkohësisht, falënderoi ish-nxënësit e Gjeneratës së VI për vizitën e tyre dhe për kujdesin e treguar ndaj institucionit ku ata u formuan, duke theksuar se rikthimi i gjeneratave në Medrese është dëshmi e lidhjes së fortë shpirtërore dhe emocionale që ata vazhdojnë të kenë me këtë vatër të dijes dhe edukimit.

Në mënyrë të veçantë, drejtori shprehu mirënjohje për Reisul Uleman H. Hfz. Shaqir ef. Fetahun dhe prof. Mahir Hasanin, për kontributin e tyre në edukimin dhe formimin e kësaj gjenerate, si dhe për angazhimin e tyre shumëvjeçar në Medresenë “Isa Beu”.

Në kuadër të takimit u zhvillua edhe një orë simbolike me ish-kujdestarët e klasës, Reisul Ulema H. Hfz. Shaqir ef. Fetahu dhe prof. Mahir Hasani, gjatë së cilës u rikujtuan vitet e kaluara në bankat e Medresesë, mësimet, përjetimet, sfidat dhe kujtimet e bukura që kanë lënë gjurmë të pashlyeshme në jetën e tyre.

Pas më shumë se tri dekadash, ish-nxënësit ndanë me njëri-tjetrin rrugëtimin e tyre jetësor dhe profesional, duke prezantuar angazhimet dhe profesionet që ushtrojnë sot në fusha të ndryshme të shoqërisë. Ata theksuan se dituria, edukata, vlerat morale dhe fryma e vëllazërisë të fituara në Medresenë “Isa Beu” kanë qenë dhe mbeten udhërrëfyes të rëndësishëm në jetën dhe veprimtarinë e tyre.

Takimi përfundoi me urime të përzemërta për shëndet, mirësi dhe suksese, si dhe me dëshirën që këto takime dhe ribashkime të vazhdojnë edhe në të ardhmen. Ky rikthim i Gjeneratës së VI dëshmoi edhe një herë se lidhja shpirtërore, vëllazërore dhe kujtimet e krijuara në Medresenë “Isa Beu” mbeten të forta dhe të pandërprera, pavarësisht kalimit të dekadave.

03/08/2026

PAS MË SHUMË SE DY DEKADASH, GJENERATA XIX RIKTHEHET NË MEDRESENË “ISA BEU” – ATY KU NISI RRUGËTIMI I TYRE

Në një atmosferë të ngrohtë, të mbushur me emocione, mall dhe kujtime të bukura, Medreseja “Isa Beu” mirëpriti ish-nxënësit e Gjeneratës XIX, të viteve shkollore 2002–2003 / 2005–2006, të cilët pas më shumë se dy dekadash u rikthyen në institucionin ku hodhën themelet e formimit të tyre fetar, arsimor dhe njerëzor.

Në mungesë të kujdestarëve të klasave, të cilët tashmë janë në mëshirën e Allahut, në atë kohë në vend të tyre ishte profesor Mr.Elez Ismaili, i cili e shoqëroi këtë gjeneratë gjatë viteve të shkollimit. Ish-nxënësit e kujtuan me respekt dhe mirënjohje kontributin e tij, ndërsa për kujdestarët e tyre të ndjerë u bënë lutje që Allahu i Madhërishëm t’i mëshirojë dhe t’i shpërblejë me Xhenet.

Ish-nxënësit u pritën nga drejtori i Medresesë “Isa Beu”, Dr. Islam Islami, i shoqëruar nga sekretari i Medresesë, prof. Avni Neziri. Drejtori u dëshiroi mirëseardhje të përzemërt, duke shprehur kënaqësinë e veçantë për rikthimin e tyre në këtë vatër të dijes, edukimit dhe formimit të brezave.

Në fjalën e tij, drejtori Dr. Islam Islami i informoi të pranishmit për ecurinë dhe zhvillimin e Medresesë “Isa Beu”, ndryshimet e rëndësishme që ka përjetuar institucioni ndër vite, projektet e realizuara, sukseset e arritura dhe planet për të ardhmen.

Një moment i veçantë i këtij takimi ishte edhe vizita në objektin e Medresesë, ku ish-nxënësit patën mundësinë të rikthehen në hapësirat ku kishin kaluar një pjesë të rëndësishme të jetës së tyre. Gjatë vizitës, ata rikujtuan me nostalgji bankat shkollore, klasat, ambientet, mësimet, shoqërinë dhe momentet e bukura të viteve të tyre të rinisë.

Takimi vijoi me bashkëbisedim dhe ndarje kujtimesh nga vitet e shkollimit në Medrese. Ish-nxënësit treguan për rrugëtimin e tyre jetësor dhe profesional pas përfundimit të shkollimit, duke prezantuar profesionet, angazhimet dhe kontributin e tyre në fusha të ndryshme të shoqërisë.

Ata theksuan se dituria, edukata, vlerat dhe parimet e fituara në Medresenë “Isa Beu” kanë luajtur një rol të rëndësishëm në formimin e personalitetit të tyre dhe kanë qenë udhërrëfyes në jetën dhe veprimtarinë e tyre profesionale e shoqërore.

Në kuadër të takimit u shpreh mirënjohje për të gjithë mësimdhënësit dhe punonjësit e Medresesë që kanë kontribuar në edukimin dhe formimin e kësaj gjenerate. Me respekt të veçantë u kujtuan edhe ata që tashmë nuk janë në mesin tonë, për të cilët u bë lutje që Allahu i Madhërishëm t’i mëshirojë dhe t’i shpërblejë për kontributin e tyre.

Rikthimi i Gjeneratës XIX në Medresenë “Isa Beu” dëshmoi edhe një herë se lidhja me institucionin ku është marrë dija dhe edukata, si dhe miqësitë e krijuara gjatë viteve të shkollimit, mbeten të forta pavarësisht kalimit të kohës.

Takimi përfundoi me urime për shëndet, mbarësi dhe suksese të mëtejshme në jetën dhe veprimtarinë e tyre, si dhe me dëshirën që takime të tilla të vazhdojnë edhe në të ardhmen, duke ruajtur gjallë kujtimet, miqësitë dhe lidhjen shpirtërore me Medresenë “Isa Beu”.

31/07/2026

GJENERATA XIV E MEDRESESË “ISA BEU” U RIKTHYE NË VATRËN E DIJES PAS SHUMË VITESH

Në një atmosferë të ngrohtë, plot emocione dhe kujtime të bukura, Medreseja “Isa Beu” mirëpriti ish-nxënësit e gjeneratës XIV të vitit shkollor 1997–1998 / 2000–2001, të cilët u ribashkuan në institucionin ku hodhën themelet e formimit të tyre fetar, arsimor dhe njerëzor. Në këtë takim mori pjesë edhe kujdestari i tyre i dikurshëm, prof. Mahir Hasani.

Ish-nxënësit u pritën nga drejtori i Medresesë, Dr. Islam Islami, i shoqëruar nga punëdrejtuesi, prof. Mervan Muhamedi dhe sekretari i Medresesë, prof. Avni Neziri. Ata i përshëndetën të pranishmit me fjalë mirëseardhjeje, duke shprehur kënaqësinë për rikthimin e tyre në vatrën e dijes dhe edukimit.

Në fjalën e tij, drejtori dr. Islam Islami i informoi të pranishmit për ecurinë dhe zhvillimin e Medresesë “Isa Beu”, projektet e realizuara, sukseset e arritura dhe planet për të ardhmen. Njëkohësisht, ai shprehu mirënjohje të veçantë për prof. Mahir Hasani, duke e falënderuar për kontributin e tij shumëvjeçar dhe të çmuar në edukimin dhe formimin e brezave të shumë nxënësve, si dhe për përkushtimin e treguar gjatë shërbimit të tij në Medresenë “Isa Beu”.

Në kuadër të këtij takimi u zhvillua një orë simbolike me kujdestarin e tyre, gjatë së cilës u rikujtuan vitet e kaluara në bankat e Medresesë, sfidat, përjetimet dhe kujtimet që kanë lënë gjurmë në jetën e secilit prej tyre.

Pas më shumë se dy dekadash, pjesëmarrësit ndanë rrugëtimin e tyre jetësor dhe profesional, duke prezantuar angazhimet dhe profesionet që ushtrojnë sot në fusha të ndryshme të shoqërisë. Ata theksuan se vlerat, edukata dhe dituria e fituar në Medresenë “Isa Beu” kanë qenë udhërrëfyes të rëndësishëm në jetën dhe veprimtarinë e tyre.

Takimi përfundoi me urimet për shëndet, suksese dhe ribashkime të tjera në të ardhmen, duke dëshmuar edhe një herë se lidhja shpirtërore dhe vëllazërore e krijuar në Medresenë “Isa Beu” mbetet e fortë dhe e pandërprerë pavarësisht kalimit të viteve.

31/07/2026

DREJTORI I MEDRESESË “ISA BEU” MORI PJESË NË CEREMONINË E PROMOVIMIT TË HAFIZES SË RE HAVA IMER AZEMI

Me ftesë të Myftiut të Shkupit, Dr. Qenan ef. Ismaili, dhe i udhëhequr nga Reisul Ulema i Bashkësisë Fetare Islame të Republikës së Maqedonisë së Veriut, H. Hfz. Shaqir ef. Fetai, drejtori i Medresesë “Isa Beu”, Dr. Islam ef. Islami, mori pjesë në ceremoninë solemne të promovimit të hafizes së re, Hava Imer Azemi, e cila u mbajt në Xhaminë “Bardhi” në fshatin Bllacë.

Në këtë ceremoni morën pjesë Reisul Ulema i Bashkësisë Fetare Islame, h. hfz. Shaqir ef. Fetai, drejtori i Medresesë “Isa Beu”, dr. Islam ef. Islami, Myftiu i Shkupit dr. Qenan ef. Ismaili, prof. dr. Rexhep Suma nga Fakulteti i Studimeve Islame në Prishtinë, dr. Musa Vila, kryetar i Këshillit të Bashkësisë Islame të Hani të Elezit, hfz. Abdurahim ef. Kurtish, themelues i Bashkësisë Shqiptare Islame në Danimarkë, h. Nebi ef. Imeri, imam në Cyrih të Zvicrës, si dhe një numër i madh imamësh, hafizësh, mysafirësh dhe besimtarësh.

Në emër të familjes së hafizes dhe xhematit, të pranishmit i përshëndeti hfz. Abdurahim ef. Kurtish, i cili u uroi mirëseardhje mysafirëve dhe i dëshiroi hafizes së re shëndet, suksese dhe mbarësi në rrugëtimin e saj në shërbim të Kur’anit.

Gjatë ceremonisë, Reisul Ulema H. Hfz. Shaqir ef. Fetai përgëzoi hafizen, familjen dhe muhafizin e saj për këtë arritje të çmuar, duke vlerësuar traditën e pasur të trojeve tona në nxjerrjen e hafizëve dhe hafizeve të Kur’anit. Me këtë rast, ai e uroi veçanërisht hafizen edhe për suksesin e saj të fundit në Garat Ndërkombëtare të Kur’anit Famëlartë, të mbajtura në Shkup, ku fitoi vendin e tretë.

Myftiu i Shkupit, Dr. Qenan ef. Ismaili, në fjalën e tij vlerësoi përkushtimin e hafizes dhe të muhafizit të saj, duke theksuar rëndësinë e edukimit të brezave me dashurinë ndaj Kur’anit dhe dijes islame.

Në fund të ceremonisë, Myftinia e Shkupit i ndau hafizes certifikatën e hifzit, një laptop dhe një plaketë, ndërsa muhafizi H. Miftar ef. Islami u nderua me mirënjohje për kontributin e tij. Gjithashtu, Reisul Ulema ndau dhurata për hafizen dhe muhafizin.

Pjesëmarrja e drejtorit të Medresesë “Isa Beu”, Dr. Islam ef. Islami, në këtë ceremoni dëshmon përkushtimin e institucionit në mbështetjen dhe vlerësimin e çdo suksesi në shërbim të Kur’anit Famëlartë dhe të edukimit islam.

30/07/2026

PROFESORI I MEDRESESË “ISA BEU”, MR. FERAT PLAKAJ, ANËTAR I KOMISIONIT VLERËSUES NË GARAT NDËRKOMBËTARE TË KUR’ANIT FAMËLARTË

Medreseja “Isa Beu” shpreh kënaqësinë e saj që profesori i lëndës së Kiraetit, Mr. Ferat Plakaj, mori pjesë si anëtar i komisionit vlerësues në Garat Ndërkombëtare të Kur’anit Famëlartë, të mbajtura në Shkup, në kuadër të bashkëpunimit ndërmjet Bashkësisë Fetare Islame të Republikës së Maqedonisë së Veriut dhe Ministrisë së Çështjeve Islame, Thirrjes dhe Udhëzimit të Mbretërisë së Arabisë Saudite.

Përfshirja e profesorit tonë në këtë komision përbën një vlerësim të lartë për përgatitjen, përvojën dhe kontributin e tij në fushën e mësimit të Kiraetit dhe shkencave të Kur’anit. Gjatë zhvillimit të garave, ai kontribuoi në procesin e vlerësimit të garuesve, duke ndjekur me profesionalizëm dhe përgjegjësi paraqitjet e tyre dhe mbarëvajtjen e përgjithshme të këtij manifestimi të rëndësishëm ndërkombëtar.

Këto gara u karakterizuan edhe nga pjesëmarrja e një numri të konsiderueshëm të hafizëve dhe hafizeve të Medresesë “Isa Beu”, të cilët përfaqësuan me dinjitet institucionin tonë dhe dëshmuan nivelin e lartë të edukimit kuranor që kultivohet në Medrese.

Me këtë rast, Medreseja “Isa Beu” dhe drejtori i sajë Dr. Islam Islami, shprehin mirënjohje dhe falënderimet më të sinqerta ndaj Reisul Ulemasë, H. Hfz. Shaqir ef. Fetahu, për besimin e dhënë në emërimin e profesorit Mr. Ferat Plakaj si anëtar të komisionit vlerësues, si dhe për përkrahjen e vazhdueshme që i jep kuadrove profesionale dhe promovimit të vlerave të dijes islame.

Lutemi që Allahu i Madhëruar ti shpërblejë të gjithë ata që kontribojnë në shërbim të Kur’anit Famëlartë, duke ju dhënë suksese dhe bereqete në misionin e tyre fisnik.

29/07/2026