Официјална Facebook страница на Гимназија „Добри Даскалов“
Гимназиското образование во Кавадарци датира уште од 1897 година, кога Бугарската егзархија отвoра нижа гимназија застапена во два класа-први и втори. Во учебната 1907/08 година, гимназијата станува трикласна и како таква работи до 1913 година, кога е укината со влегувањето на српската окупаторска власт во Вардарскиот дел на Македонија.
Со започнувањето на Првата светска војна биле направени обид
и за повторно воспостваување на гимназиското образование, преку испраќање на барање од Општинскиот одбор на Кавадарци до Министерот за просвета и црковни прашања во Белград, но поради тешките воени услови, барањето не е прифатено. По воспоставувањето на бугарската власт во текот на Првата светска војна, поточно од декември 1915 година, во учебната 1916/17 и 1917/18 година, продолжила со работа порано формираната прогимназија.
По завршувањето на Првата светска војна и повторното воспоставување на српската окупаторска власт, во октомври 1919 година, со дозвола на српскита политичка и школска власт во Кавадарци, отворенае е трикласна гимназија која работи се до 1929 година, кога со шестојануарската диктатура се затворени скоро сите гимназии во Вардарска Македонија. Во периодот од 1929 до 1938 година работи Граѓанска школа, а во 1938 година наместо граѓанска школа отворена е нижа гимназија која работи се до капитулацијата на Југославија.
Во текот на Втората светска војна, бугарската окупаторка власт отвора гимназија која работи се до ослободувањето на градот. Гимназијата во овој период претставува јадро на раволуционерните идеи, носител е на сите акции во градот и претставува значајна база за пополнување на партизанските единици со нови борци.
По завршувањето на НОВ, највисокиот државен орган, АСНОМ, донесува одлука за отворање на повеќе гимназии и технички училишта , меѓу кои е и нашата Гимназија. Отпочнува со работа на 5 февруари 1945 година, во старата зграда (денес ОУ „Страшо Пинџур“) под името Јосип Броз Тито. Работи како полна Народна гимназија со застапеност од I до VIII клас, а наставата се изведува на мајчин македонски јазик (стандарден).
На полугодието од учебната 1955/56 година, поточно на 1 февруари 1956 година, Гимназијата се вселува во новата зграда која не е целосно доградена. Новиот дел како анекс кон зградата, е дограден дури во периодот од 1974 до 1976 година, со што гимназијата се здобива со кабинети и лабаратории по повеќе наставни предмети, библиотека, читална, свечена сала, фискултурна сала со потребните соблекувални и кабинет за наставниците.
Во 1956 година, со новата реформа во образованието, одлучено е да се намали гимназиското во корист на стручното образование. За таа цел, во рамките на Гимназијата се отвора Економско училиште, а веќе во учебната 1956/57 година во прва година се запишуваат само економски паралелки. Во состав на Гимназијата и економското училиште, работи и лозарско-шумарско училиште, кое после неколку години се издвојува како самостојно средно училиште. Овие реформи траат до 1960 година, кога повторно е воведено гимназиското образование, а во состав на Гимназијата се и економските паралелки. Застапени се две насоки, општествено-јазичната и природно математичка. Гимназиското образование се одвива се до 1982 година, кога наполно е укинато поради новите реформи во средното образованието, каде што му се дава предност на средното насочено образование. Па така, од учебната 1982/83 година нашата Гимназија се преструктуира во Училиште за средно образование и има четири струки: математичко-информатичка, биотехнолошка, правна и биротехничка. Овој концепт се применува се до учебната 1989/1990 година.
Во учебната 1991/92 година со повторното воведување на гимназиското образование е дозволено културолошката и математичко-информатичката струка да се преструктуираат во гимназиски насоки, а Училиштето за средно образование си го враќа името Гимназија. Се упишуваат по 6 паралелки: 2 општа гимназија, 2 природноматематичка гимназија и 2 правна струка.
Од основањето, во 1945 година па се до 1994 година, Гимназијата го носи името „ Јосип Броз Тито“. Во 1994 година, по предлог на Републичката комисија при Министерството за образование и физичка култура е одлучено Гимназијата да го носи името на познатиот војвода од Тивешијата од илинденскиот период- Добри Даскалов.
02/06/2026
⚡ Генијалците на електричната револуција ⚡
Учениците од втора година успешно реализираа активност за изработка на пано со постери посветени на најзначајните научници и пронаоѓачи кои оставиле траен белег во развојот на електричната енергија и современата технологија.
Преку истражување, креативност и тимска работа, тие ги претставија животот, достигнувањата и придонесот на големите умови кои го променија светот.
👏 Пофалби за вложениот труд, креативноста и посветеноста на сите ученици! ⚡📚🔬
Успешно реализирана средношколска екскурзија на учениците од трета година при СОУ Гимназија „Добри Даскалов“ Кавадарци
Средношколските денови се најубави, највозбудливи и најемотивни, а еден од најубавите настани во средношколските денови е завршната екскурзија, екскурзија што е единствена и што остава спомени до крајот на животот.
Во периодот од 11.05.2026 година до 17.05.2026 година учениците од трета година при СОУ Гимназија “Добри Даскалов“ Кавадарци успешно ја реализираа повеќедневната завршна екскурзија на релација Кавадарци – Венеција – Верона – Рим – Фиренца – Постojна јама – Кавадарци.
Во текот на патувањето учениците имаа можност да посетат повеќе градови во Италија, значајни културно-историски знаменитости, да се запознаат со богатото културно наследство и да стекнат нови искуства и пријателства.
Екскурзијата започна со посетата на романтичната Венеција, каде учениците уживаа во убавините на плоштадот „Свети Марко“, каналите и препознатливата архитектура, величествената базилика „Св Марко“ и високата камбанарија од која има прекрасен поглед кон градот. За учениците особено впечатливи беа тесните улички, малите мостови и атмосферата покрај каналите.
Патувањето продолжи кон Верона, град познат по својата историја, прекрасната архитектура и легендата за Ромео и Јулија, која буди романтична атмосфера.
Сите патишта водат кон Рим, кон вечниот град, од кој учениците беа воодушевени. Ги посетија најпознатите знаменитости како Колосеумот, Пантенонот, Фонтаната ди Треви и Ватикан. Прошетаа низ прекрасните плоштади и улици исполнети со туристи од целиот свет и уживаа во уникатната атмосфера во градот.
Патувањето продолжи кон Фиренца, град кој се смета за лулка на ренесансата и еден од најубавите културни центри во Италија. Градот ги воодушеви со својата архитектура, богатата ренесансна историја и уметничките знаменитости.
Посетата на Постojна Јама остави посебен впечаток со својата природна убавина и уникатност, необичните карпести форми и долгите ходници, прекрасните сталактити, сталагмити и големите подземни сали.
Екскурзијата помина во одлична атмосфера, со многу дружење, позитивна енергија и незаборавни спомени. Учениците научија многу за историјата и уметноста на Италија, а убавите спомени и впечатоци ќе ги пратат во текот на целиот живот.
🌍📚 Со особено задоволство бевме дел од „Superschools Education Conference“, организирана од Regional Youth Cooperation Office (RYCO) во рамки на програмата „Superschools – Western Balkans School Exchange Scheme“, која се одржа во Златибор.
Конференцијата претставуваше значајна можност за поврзување на претставници од образовни институции, наставници, ученици, младински организации и партнери од целиот регион, со заедничка цел – создавање поквалитетно, поинклузивно и поврзано образование за младите од Западен Балкан. 🤝
Особено сме горди што на конференцијата учествуваше професорката Наде Лазова и ученикот од нашето училиште Давид Митров, кој имаше можност да биде дел од инспиративни дискусии, размена на искуства и активности со млади од различни земји од регионот. Ова учество претставува значајно искуство кое придонесува за личен развој, градење нови пријателства и поттикнување на меѓукултурен дијалог. 🌟
Во текот на програмата беа реализирани бројни панели, презентации и интерактивни сесии посветени на:
🔹 улогата на младинските размени во надминување на регионалните предизвици
🔹 влијанието на програмата Superschools врз учениците и наставниците
🔹 успешните приказни и искуства од учесниците
🔹 имплементацијата и резултатите од програмата во изминатите 5 години
🔹 10-годишното делување и достигнувања на Regional Youth Cooperation Office (RYCO)
Конференцијата беше збогатена и со свечена програма по повод 5 години од Superschools, каде беа одбележани достигнувањата и влијанието на програмата врз регионалната соработка и младинското поврзување.
Горди сме што имавме можност да бидеме дел од оваа значајна иницијатива која промовира соработка, разбирање и заеднички вредности помеѓу младите од Западен Балкан.
Искрена благодарност до Regional Youth Cooperation Office (RYCO), како и до партнерите European Union и GIZ за успешната организација и континуираната поддршка на младите и образованието. ✨
На 9.5.2026 година на Меѓународниот Балкански Универзитет во Скопје се одржа Државниот натпревар по англиски јазик за учениците од средните училишта на кој под менторство на проф. Александра Петреска, ученичката Надица Сивакова ја освои третата награда.
На 09.05.2026 година во просториите на Природно –математичкиот факултет во Скопје се одржа тринаесеттиот Државен натпревар по биологија. На натпреварот учествуваа и нашите ученици кои постигнаа солидни резултати. На сите ученици им се заблагодаруваме за учеството и им честитаме за освоените награди. Во следнава табела се истакнати учесниците и постигнатите резултати на овој натпревар.
Државен натпревар по македонски јазик и литература
На 9.05.2026 година на Филолошкиот факултет во Скопје се одржа Државниот натпревар по македонски јазик и литература за четврта година на кој под менторство на проф. Ристенка Јосифова, ученичката Елена Илова ја освои третата награда, а ученичката Цветанка Ристовска освои благодарница.
СОУ Гимназија „Добри Даскалов“ со највисоко признание на
државниот натпревар на училишни оркестри.
СОУ Гимназија „Добри Даскалов“ уште еднаш потврди дека е лидер во музичката уметност и образованието, освојувајќи прво место со максимални 100 бода на Државниот натпревар на училишни хорови и оркестри, кој се одржа на 6 и 7 мај во Кавадарци.
Оркестарот на гимназијата, составен од талентирани и посветени ученици, со својата извонредна изведба, музичка зрелост и професионален настап ја воодушеви стручната комисија и публиката, потврдувајќи го високиот квалитет на музичкото творештво што се негува во нашето училиште.
Особена заслуга за овој голем успех има менторот, професор Драган Вељковиќ, чија професионалност, посветеност и огромен ангажман претставуваат двигател на сите успеси на оркестарот. Со своето знаење, искуство и исклучителен педагошки пристап, професорот Вељковиќ успешно ги мотивира учениците да го развиваат својот талент, да тежнеат кон совршенство и да ја претставуваат гимназијата на највисоко ниво.
Под негово менторство, учениците не само што ги усовршуваат своите музички способности, туку учат и вредности како дисциплина, одговорност, тимска работа, меѓусебна почит и посветеност – вредности кои се темел на секој голем успех.
Дел од оркестарот се:
Росица Колевска – пијано, Матеа Маџункова – пијано, Патриција Ѓорчева – флејта, Сара Мешкова – флејта, Тео Камчев – кларинет, Филип Панов – гитара, Кристијан Митрев – гитара, Никола Јованов – гитара, Петар Петков – гитара, Мила Лазарова – гитара, Дарко Ефремов – гитара и Ѓорѓи Грков – бас гитара.
Овој успех е уште една потврда дека СОУ Гимназија „Добри Даскалов“ континуирано создава млади таленти кои со своето знаење, труд и креативност оставаат силен белег на државно ниво. Гимназијата продолжува да биде препознатлива како училиште што вложува во културата, уметноста и развојот на младите, создавајќи генерации ученици кои со гордост го претставуваат својот град.
Државниот натпревар, во организација на Здружението на музичките педагози на Република Македонија, уште еднаш ја потврди важноста на музиката како универзален јазик што ги поврзува младите и ја развива нивната креативност, самодоверба и уметничка зрелост.
СОУ Гимназија „Добри Даскалов“ останува пример за успешна работа, квалитетно образование и врвни резултати во областа на музичката уметност.
02/06/2026
22/05/2026
20/05/2026
19/05/2026
16/05/2026
13/05/2026
13/05/2026
11/05/2026
10/05/2026