Либери едукација за деца

Сите деца сакаат да танцуваат, да пејат и да цртаат. Родителите треба да ја негуваат и да ја поттикнуваат креативноста на нивните деца уште од најрана возраст. Со танцување децата ќе бидат посилни, поагилни и пофлексибилни, а истовремено и посамоуверени. Дозволете им да играат со бои, да бидат мали уметници со што ќе го развиваат мозокот, особено деловите за меморија, планирање, моторички движења и делот за донесување одлуки. Преку глума учат да се изразат подобро и пофлуентно, а децата изложени на музика имаат подобри способности за читање.

Имајте деца кои не се откажуваат.
Тајната на успехот е во способноста да се избегнат фрустрации кога работите стануваат тешки. Со позитивни афирмации треба да го охрабрувате вашето дете и да го убедите да се обиде пак и пак и пак. Децата се соочуваат со многу предизвици кои се дел од психичкиот и физичкиот развој. Кога сакате да им го задржите вниманието на некоја потешка задача, кажете им ги чекорите до успехот. Објаснете им на децата дека препреките се составен дел во процесот на учење. Посветете внимание на нивните интереси и нивните афинитети. Така ќе ја развиете нивната страст и нивната љубопитност за изучувањето на одредена тема.

До скоро, се веруваше дека когнитивните способности се тие кои водат до успехот на децата, а можат да се мерат со тестовите за интелигенција и споредувањето на способностите за препознавање букви и бројки. Но, постојат многу поважни карактеристики кои водат до успехот. Станува збор за постојаноста, само-контролата, љубопитноста, смелоста, совесноста, самодовербата и оптимизмот. Овие се вештини кои вие како родители можете да им ги пренесете на вашите деца, преку вашиот однос со децата. Мотивирајте ги да истражуваат, да помагаат, да бидат подобрата верзија од себеси. Да научат како да ценат и вреднуваат, да се соочат со неуспех и да не се плашат да се обидат повторно.

Значењето на раниот детски развој.
Сите искуства кои децата ги имаат во текот на првите пет години имаат огромно влијание на развојот на нивниот мозок, нивното здравје и нивната иднина како возрасни личности. Сите искуства влијаат на развојот на мозочните ќелии. Дури и наједноставните, секојдневни работи како пеењето и разговарањето со вашите деца имаат големо значење. Децата имаат бескраен потенцијал, ние треба да им помогнеме да го постигнат. Во првите пет години од нивниот живот децата треба да бидат изложени на што повеќе позитивни искуства што ќе го поттикнуват развојот на мозокот.

Колкави очекувања може да имате од деца кои имаат од 1 до 4 години?
Повеќето истражувања покажале дека родителите веруваат дека нивните дечиња имаат поголем капацитет за контролирање на нивните емоции. Всушност, нивниот развој се одвива поинаку.
Дечињата на возраст помеѓу 3 и 4 години ја развиваат нивната само-контрола, нивните способности да ги споделуваат своите работи и учат како да ги контролираат своите емоции.
Овие неколку години се многу важни за развојот на децата. Тие се години кога треба да ги советувате и да ги водите вашите дечиња, трпеливо, нежно и ефективно.

Позитивната дисциплина се фокусира на љубезност и доверба. Со позитивни афирмации, вашето дете се чувствува почитувано и сакано што во иднина ќе поттикне добро однесување.
* Бидете добар пример, вашите дела зборуваат погласно од вашите зборови.
* Бидете постојани. Не правете отстапки од утврдените правила.
* Бидете смирени и јасни.
* Бидете брзи. Веднаш реагирајте кога ќе забележите потреба.
* Одредете ги вашите битки. Размислете на кои постапки треба да обрнете внимание.
* Бидете реални и имајте разумни очекувања.
* Пофалете ги добрите дела, гушнете ги и кажете им дека ги сакате.
* Гушкајте ги и кажете им дека ги сакате.

Што е позитивна дисциплина?
Позитивната дисциплина значи дека вие почитувате, слушате и со љубов ги наградувате добрите постапки. Со добра дисциплина, вашето дете ќе научи само-контрола, а последователно на тоа доаѓа поголема самодоверба и самопочит. Ваквата дисциплина значи дека вие им кажувате на децата дека ги сакате додека ги учите што е добро, а што не. Имајте план и поставете ги границите. Да се биде родител не е лесна работа, а да се биде добар родител значи дека некогаш вашето дете нема да ги сака вашите одлуки или вашите правила. На почеток го садите семето на дисциплината. Не очекувајте дека дрвото ќе порасне преку ноќ. Многу години подоцна, тие правила ќе изградат здрави и исполнети личности.

Пораснете дете кое го сака животот.
Вие како родители може да го научите вашето дете да се смее често, да биде оптимист и да ужива во секој момент во животот. Учете ги да ги ценат и најмалите работи, да бидат благодарни за секојдневните благодети. Слушајте ги внимателно и внимавајте на нивните емоции. Имајте ритуали и рутини кои ќе ги научат на добри навики. Помогнете им да ги надминат фрустрациите, но, оставете ги да имаат и неуспеси кои подоцна ќе ги надминат со леснотија. Оставете ги да уживаат во работите што ги сакаат.

Децата учат преку пример. Тие не ве слушаат што зборувате, ти ве следат како се однесувате. Нивното однесување е одраз на родителите или луѓето со кои растат. Играјте улоги , сменете ги улогите и ќе видите како добро ќе го имитираат секој ваш збор, однесување и ќе видите како ве доживуваат.
Сте ја одиграле ли оваа игра некогаш со нив ?

Да се биде добар, квалитетен родител значи да ги припремите децата за живот и во него да не им требате. Во исто време да бидете сидро, но и да им дадете крилја да летаат без вас ✨