19/09/2021
NY FAHEFAN'NY MPAMPIANATRA
Miantoka ny fahombiazan'ny mpampianatra amin'ny asany ao an - dakilasy ny fananany fahefana manoloana ny mpianany . To teny izy raha miteny ; manaiky an - tsitrapo izay ampanaoviny ny ankizy .
Araka izany , io fahefan' ny mpampianatra io dia tsy ny fanaovany didy jadona akory ; tsy ny tsindry na ny famoretana atao amin'ny ankizy . Ny fanabeazana marina dia tsy afaka hiaraka amin'ny fanaovana herisetra tahaka izany , tsy afaka hiaraka amin'ny fanambaniana ny olona beazina .
Izao no tenin'ny mpanoratra iray antsoina hoe Arnaud Denoo : " Ny fahefana dia midika fampandraisana andraikitra , fa tsy fampileferana ny hafa eo ambany sitraponao akory . "
Eo amin'ny fifandraisan' ny mpampianatra amin'ny mpianatra , dia tahaka izao manaraka izao no tokony ho endrika hampiharan'ny mpampianatra io fahefany io :
1 - Miresaka amin'ny mpianatra sy mifanakalo hevitra amin' izy ireo .
2 - Manao izay hitokisan'ny mpianatra azy mba hisian'ny risi-po eo amin'ny roa tonta.
3 - Manaja ny mpianatra ka maneho môdely tsara ho azy ireo .
4 - Mampandray anjara mavitrika ny mpianatra amin'ny asa pedagôjika .
5 - Mampihatra ny fitsipi-pifehezana amin'ny ankizy rehetra tsy misy fanavahana .
Ireo toetra sy fihetsika tsaran' ny mpampianatra ireo no tena mametraka ny fahefany ao an - dakilasy . Ilana toe- po tsara sy faharesen - dahatra izany , indrindra rehefa fantatsika tokoa fa asa masina sy sarobidy ny asantsika mpanabe .
Isaoranay mialoha ianao amin'ny fanehoan-kevitrao .
Raoeliarijao
