Le Petit Prof

أجي نفهمو ولدنا

ولدك ماشي "ضعيف فالقراية"... غير ذكاءو مختلف

كاين اعتقاد خايب كيقول: الطفل اللي كيجلس هادي وماكيهضرش = ضعيف.
ولكن كما قال *هوارد غاردنر*: _"كل طفل موهوب بطريقة ما. دورنا هو نلقاو فين."_

الحقيقة هي كل طفل عندو نوع ذكاء غالب عليه، ومهمتنا نكتشفوه ماشي نقارنوه.
*ماريا مونتيسوري* قالت: _"الطفل لا يتعلم من الكلام، يتعلم من المثال."_ يعني إلا شافك كتلاحظي مجهودو وتشجعيه، غادي يثق فراسو ويبان ذكاءو.

فالروض كيبانو 7 أنواع ديال الذكاء بوضوح:

1. الذكاء اللغوي
كيهضر بزاف، كيحكي قصص، كيتعلم الكلمات بسرعة.
هاد الطفل هو اللي كيجي من الروض وعاود ليك اليوم كامل بالتفاصيل. ماشي "ثرثرة"، هادي علامة على ذاكرة سمعية قوية.

2. الذكاء الحركي الجسدي
كيتعلم بالحركة واللمس. ما يقدرش يجلس بلاصتو بزاف.
*بياجيه* قال: _"المعرفة تبنى بالفعل."_ يعني خليه يجرب بيديه باش يفهم.

3. الذكاء البصري المكاني
كيركب البازل بسرعة، كيرسم، كيلاحظ التفاصيل الصغيرة.

4. الذكاء الاجتماعي
كيعرف يتعامل مع صحابو، كيحل النزاعات، كيحس بمشاعر الآخرين.
هاد الطفل غالباً هو "القائد الصغير" اللي كيجمع صحابو.

5. الذكاء الموسيقي
كيحفظ الإيقاع والأغاني بسرعة، كيحس بالنغم.
إلا لاحظتيه كيغني باش يحفظ، خليه، هادي طريقتو فالتعلم.

6. الذكاء الرياضي-المنطقي
كيحب الأرقام، كيحل الألغاز، كيسول "علاش؟ كيفاش؟".
هاد النوع كيبني المنطق ديالو بالأسئلة.

7. الذكاء الذاتي
كيعرف شنو بغا وشنو ما بغاش، عندو وعي براسو.
هاد الطفل خاصو مساحة يختار ويتحمل مسؤولية اختيارو.

فين كيخرب كلشي؟
حينما نحكمو على الكل بنفس المعيار. نقولو للطفل الحركي "جلس"، وهو كيتعلم بالحركة.
ونقولو للطفل اللي كيهضر بزاف "سكت"، وهو كيفرغ طاقتو وذكاءو.
هنا كنقتلو موهبتو بلا ما نحسو.

الخلاصة:
ماكاينش طفل غبي وطفل ذكي. كاين طفل ذكاءو لغوي، وطفل ذكاءو موسيقي، وطفل ذكاءو اجتماعي.
خدمتنا نلاحظو، نفهمو، ونعطيو كل واحد الطريقة اللي كتناسبو.

نتمنى من الأمهات والآباء يحاولو يلاحظو وليداتهم فالدار ويقيمو فين كيبان الذكاء ديالهم.
وما فيها باس إلا بغيتو تجيو عندي، الباب مفتوح ليكم ناقشو مع بعض نوع الذكاء ديال الطفل ديالكم. مرحبا بيكم معايا.

سؤال ليكم:
ولدك فين كيبان ذكي؟ فالحكي؟ فالغناء؟ فالحركة؟ ولا فالطريقة اللي كيتعامل بيها مع الناس؟

#الروض

Bonjour ❤️

من بعد ما شفت التفاعل الكبير مع "اجي نفهمو ولدنا" فالكروب، وطلبو مني الآباء نخرّجها للعموم... قررت نبدا كل سبت نشاركها معاكم هنا فالفيسبوك ❤️
حيت بغينا الفايدة توصل لكل دار، ونبنيو مع بعض جيل جديد من الآباء الفاهمين لولادهم... ونردّو للروض الدور الحقيقي ديالها.
📢 اجي نفهمو ولدنا
موضوع اليوم:
ولدي ما كايشبهش لخوه... واش فيه مشكل؟ ولا غير مختلف؟ 🤔

🌟 شعارنا في الروضة:
"كل طفل... حكاية مختلفة، نكتب أول سطورها بحب، لأنه لا تشابه بين القصص"

"علاش ختو كتحفظ دغيا وهو لا؟"
"علاش ولد جارتي كيهضر وولدي ساكت؟"
"واش ولدي متأخر؟"

*لا، ولدك ما فيه حتى مشكل. غير ربي خلقو بنمط تعلم وشخصية مختلفة. حيت ولدك هو بطل الحكاية ديالو بوحدو

🧠 4 أنواع ديال الدراري فالروضة - شكون هو ولدك؟

1. الطفل الحسي - الحركي 🏃‍♂️
هاد النوع ما كيقدرش يجلس فبلاصتو، كيلمس كلشي وكتجيه الفهامة من الحركة. كيحب يتعلم باللعب، بالتراب، بالماء.
*الغلط اللي كنديروه معاه:* كنغوتو عليه "جلس، سكت، علاش مكلخ". وهو مسكين دماغو خدام إلا تحرك.

2. الطفل البصري 👀
كيعشق الصور والألوان، كيرسم مزيان ولكن كينسى دغيا اللي سمعو بالودنين. كيتعلم مزيان بالقصص المصورة والفيديو.
الغلط اللي كنديروه معاه: كنبقاو نقريوه غير بالهضرة والشفوي، وهو خاصو يشوف بعينيه باش يفهم.

3. الطفل السمعي 👂
هادا كيعاود الأغاني والأناشيد دغيا، كيهضر بزاف وكيسول على كلشي. كيحب الحكايات والشرح بالصوت.
الغلط اللي كنديروه معاه:كنقولو ليه "سكت شوية، صدعتينا"، وهو غير باغي يتعلم بالطريقة ديالو.

4. الطفل الحساس - الخجول 🥺
كيبكي دغيا، كيخاف من الناس الجداد، ولكن كيلاحظ أدق التفاصيل. كيحتاج للحضن والروتين الثابت باش يحس بالأمان.
الغلط اللي كنديروه معاه: "مالك خواف، كون راجل". هاد الهضرة كتهرس ثيقتو فراسو.

ولدك يمكن يكون خليط بين 2 أنواع، وهادشي طبيعي 100%. حيت "لا تشابه بين القصص"

🏫 دابا شنو الدور الحقيقي ديال الروضة؟ واش تقري ولا تربي؟

الجواب: الروضة فالأول كتربي عاد كتقري

علاش؟ حيت الطفل من 3 لـ 6 سنين الدماغ ديالو كيبني "الشخصية" قبل "المعلومات"

الدور الصحيح ديال الروضة هو 5 حوايج بالترتيب:
أولا: تبني الثقة - يولي ولدك يقدر يبعد على مّو فالصباح بلا بكا وخلايع.
ثانيا: تعلمو النظام - كيفاش يتسنى نوبتو فاللعب، كيفاش يجمع حوايجو ولعابو.
ثالثا: تنمي اللغة ديالو - يولي يقدر يهضر ويعبر على اللي مضايقو بالفم ماشي بالضرب والبكا.
رابعا: تكتشف النمط ديالو - المربية الشاطرة كتعرف واش هاد الولد حركي ولا بصري، باش تعرف كيفاش توصل ليه المعلومة.
خامسا: عاد القراية - الحروف والأرقام كتجي فاللخر، ومن الأحسن تكون على طريق اللعب والأغاني.

حنا فالروضة ما كنقريوش غير الحروف، كنقريو إنسان. كنعاونو باش "نكتبو أول سطور الحكاية ديالو بحب"

✅ شنو خاصك تسولي الروضة ديال ولدك؟
1. "مربية، شنو بان ليك النمط ديال ولدي؟ حركي ولا بصري؟"
2. "كيفاش كتعاملو مع الطفل الخجول باش ما يتعقدش ويبقى بوحدو؟"
3. "واش ولادنا كيلعبو ويتعلمو أكثر ولا غير كاتبين وجالسين؟"

ولدك ما خصوش يولي نسخة من ولد جارتك
خصو يولي البطل فالحكاية ديالو... وحنا غنعاونوك تكتبيها معاه

وفالأخير، الهدف ديالنا ماشي غير نقريو الحروف والأرقام... الهدف ديالنا نوعيو الآباء ونبنيو جيل متفهم، ونحاولو نتفاداو الأخطاء اللي يمكن حنا طحنا فيها مع والدينا قبل