24/07/2018
مكاينش شي شعب فالعالم ساكن فدار فيها 100 متر وداير نصها صالون باش الناس الأغراب يتمتعو بيه...
مكاينش شعب تيدير تلفازة كبيرة في الصالون للضياف ويدير تلفازة صغيرة ليه ولولادو
مكاينش شعب فالعالم عندو لكواش من أحسن الماركات مازالين فالميكات ديالهوم ومول الدار وولادو يتغطاو بكاشات قدام .
مكاينش شعب فالعالم كيعرض فعرسو على 400 بني آدم ويدفع فيه صالير 3 سنين ويدير كريدي وأكثر باش يقولو عليه كلاس و لاباس عليه...
مكاينش شعب فالعالم يجيب اللحم مرة في الاسبوع ، والحوت مرة في الشهر.. وملي يكون عندو ضيف واحد يدبح حولي ويدير الشواء ويجيب ١٠كيلو ديال الحوت باش يدير بسطيلة.
مكاينش شعب فالعالم الطبقة العاملة فيه واخدة دار فالبحر بالملايين كريدي باش يدوزو فيها 2 سيمانات د صيف...
احنا_كاملين عايشين عيشة غلط بإختلاف طبقاتنا وإمكانياتنا المادية، من أول العامل لي عندو أيفون6 وهو الصالير ديالو 1500 درهم .. الى ....
ربة_البيت لي كتتشكا من غلاء الخضر وهي كترمي نصها فٱخر اليوم...
احنا_شعب ماشي فقراء احنا أغبيااااء..احنا شعب لا يفكر .. المظاهر والناس عماو لينا العينيين ...
شعب مستهلك بحماقة ..وغير منتج بالمرة..شعب خاصو 2 تصرفيقات وركلة .... باش يفيق ...
