15/08/2026
هنتكلم عن النظرة القاصرة في الجمع بين (خريج الكليات وطلبة المعاهد والخاص)وطبعا نتكلم بصفتي شخص شاف السوق وخدي توكات واتعامل مع خريجي المعاهد والكليات وحتى الي مش صيادلة مرة وحدة...
أولا:- (جماعة المعاهد يعرفوا يصرفوا زيكم وفيهم ناس شاطرة) هذه فكرة مغلوطة من هلبا جوانب أولها هو إن ليست مهنة حامل بكالوريوس الصيدلة صرف الدواء فقط هذه فكرة مغلوطة عند العامة ،والصحيح إن الصيدلي ممكن يكون أكاديمي أو صيدلي مستشفيات أو الصيدلي المُصنع للدواء بذاته فلا يُنسى أن من صنع الدواء صيدلي ،ونصت كذلك منظمة FIB أن الصيدلي من مهامه
التنظيم الدوائي، التفتيش، مراقبة الجودة، اليقظة الدوائية، مراقبة الأدوية بعد التسويق، والسياسات الدوائية .
وحددت مهام مساعد الصيدلي (Assistant Pharmacis) على أن يكون تحت اشراف صيدلي بالدرجة الأولى.
ثانيا:-(اشكالية الصرف أصلا عند خريجي المعاهد)
خلينا نكونوا واضحين إن الله عز وجل جعل لكل شئ قدرا ،فلما تقول صرف الدواء انت مش في غذائية احفظ الجيهة هذه شن فيها وهذه شن فيها وبيع ،فحتى لو كنت انت تشبح فيهم يصرفوا لحالة معينة مثلا بحكم حفظهم للحالات فعلمهم في ذاته ناقص هو فاهم ان كذا تنعطى لكذا وكذا متنعطاش لكذا لكن تعالى اسأله علاش Diclofenac sodium متنعطاش لمريض ضغط!
قولي شن السبب شن الآلية الي تصير !
اسأله علاش منعطوش كالسيوم مع حديد اشرحلي شن الآلية المانعة الي جعلت منهم تداخل دوائي !
ممكن تلقاه حافظ عادي جدا ان هذا ميمشيش مع هذا وهذا مياخدوشي مع هذا لكن علاش شن السبب (يقعد هذا الخط الفاصل بين المتعلم وواخد اساسيات وفاهم وبين الحافظ حفظ باش يبيع عادي)
ورغم ذلك في حالات تكون تعبة على روحها وسمعت شروحات وهكذا ولكن هذا ميخليناش نعطوا العامة منهم الحق في الصرف الدوائي ونقولوا اهو يصرفوا عادي …
ثالثا:- (جماعة المعاهد معبيين الصيدليات وواكلين عليكم الجو )
لازم ما نعرفوا إن هذا طبيعي لازم يعبوا الصيدليات بحكم الكليات تخرج كل خمس سنين دفعة وحدة ممكن لا تتعدى الخمسين نفر والمعاهد تخرج كل سنتين اعداد لا حصر لها من الطلبة وهذا لا غضاضة فيه لو أن كل شخص يخدم خدمته ويشد مكانه ،ومينفعش نحكم على تخصص وعلم بحالة واقعة في فترة معينة من الزمان محتمل إنها تتنحى لو صار فيه تنظيم قانوني يمنع مساعد الصيدلي من صرف الدواء وتصدر المشهد ..
فالموضوع مش اكل جو الموضوع حياة ناس المفروض نعطوها شئ من الاهتمام مش حرك بالعود واعطي لمسعود .
رابعا:-(العقل والمهارات والشطارة هي الي تفرق مش الكلية والمعهد )
العقل والمهارات هذه تفرق لما نحط زوز في نفس المجال ونفس التخصص ونفس العلم ككل ونقارن بينهم لكن تجي تقارن بين طالب ابتدائي وطالب ثانوي وتعطيهم معادلة يحلوها وتقول العقل والشطارة هي الي تفرق هذا مش منطق لأن طالب الثانوي مر بتراتبيات أهلته إنه يعرف يحل المعادلة والثاني متاع الإبتدائي مايعرف عن المعادلة إلا الارقام هذا حد علمه ،اما عن حفظ الدووات على الرفوف شوية otc شوية تداخلات واحفظ واعطي هذه كله يقدر يديرها حتى حد من تحت الكوبري حفّظه بيحفظ ولكن أصل العلم !!!
خامسا:-( في ناس في المعاهد أذكى من جماعة الكليات )
هذا كلام والله نتفق فيه مليون في المية نقول لكم حاجة أقوى ؟
في ناس في الورش عندها IQ خرافي هل هذا يؤهله إن نجيبه نخدمه في صيدلية وهي احفظ واصرف واتعامل انت ذكي ! أكيد لا ،لان مهما كان طالب المعهد ذكي هلبا هو وضع نفسه في نطاق علمي محدد ومخرجات علمية محددة وهي منهج المعهد لا غيرها وهذه متسمحش ليه يصرف على كل حال ،يشبح في نفسه ذكي ونابغة وعلامة يدخل ويتقدم للكلية ووقتها يقارن روحه ناجح ناجح لنفسه فاشل حتى هي لنفسه.
سادسا:-(جماعة العام معقدين وملحقوش على العنقود إلى آخره…)
هنقول حاجة قدام الله عز وجل نتحاسب عليها ،تقعميزنا بالساعات الطويلة على الكرسي لين ظهورنا انحنت للتحصيل العلمي هذا ربي مش هينساه ،ودخولنا كل مرة لامتحان واحني نرعشوا ربي مش هينساه وخوفنا بالأيام من الدرجة وهل صفت المادة ولا لا ربي مش هينساه ومكافحتنا رغم الظروف الي ما يعلم بيها الا الله محال ربي ينساه
هذا كله واحني نقدروا نمشوا لمعهد وناخدوا شهادة والحياة ايزي وانا اقسم بالله شفت منهج المعهد
لو جمعنا مقررات كليتنا (عضوية 1 وعضوية2 ومدسن1 بكل مقررات منهج المعهد في السنتين ولعلهم أكبر منه )
لكن الأمر فيه حلال وحرام وفيه مخافة الله وفيه سعي لطلب العلم وفيه حسابات هلبا بتغيب عن جماعة الفلوس و اعطيني نقبض وخلاص ،وحتى لو الواقع عاطي الفرصة لحمد وحميدة وكل من هب ودب بدي يقول صيدلي فقدام الله مش متساويه ابداً،وما يدوم حال.
سابعاً:-( كلها واحد في الاخير كلكم برا مش معترف بيكم معهد ولا كلية)
هذه فكرة حتى هي مغلوطة اغلب دكاترة كليتنا واخدين البكالوريوس من الكلية وخرجوا حضروا برا الماستر والدكتوراة وكان معترف بيهم عادي جدا واسألوا بالك تقولوا نكدبوا فأكيد كلية الصيدلة معترف بيها بلا شك لكن هل انت بتخرج برا تقول لهم اني خريج المعهد الفلاني بيخلوك صيدلي !
-هذا للي يقارن ويقولك برا وما برا-
أخيرا اني مننقللش من حد ومنحتقرش من حد ولكن هذه تذكير إن لكل شخص مهامه وخدمته وعلم حصله وشن نتيجة العلم هذا اما في الباقي قيل يا رسول الله، من أكرم الناس؟ قال: أتقاهم..
تحياتنا -صيادلة جامعة طرابلس -
